Pergunta husi lee-naʼin

Iha situasaun saida mak ema bele hetan fali batizmu?

Iha situasaun balu, ema neʼebé hetan ona batizmu karik presiza hanoin kona-ba se ninia batizmu vale ka lae, no bele hanoin atu hetan fali batizmu. Porezemplu, karik ema ida sei moris iha situasaun ruma ka halo nafatin buat ruma subasubar toʼo tempu neʼebé nia hetan batizmu. Karik hahalok neʼebé nia halo neʼe mak hahalok sira neʼebé baibain kongregasaun la simu no sei hasai nia. Se nia halo hahalok sira-neʼe toʼo tempu neʼebé nia hetan batizmu, nia bele dedika nia an ba Maromak ka lae? Ema neʼe nia dedikasaun ba Maromak Jeová vale bainhira nia para ona halo hahalok ruma neʼebé kontra Bíblia. Tan neʼe, ema ida neʼebé hetan batizmu bainhira nia sei halo hela hahalok neʼebé kontra Bíblia, karik diʼak atu nia hanoin kona-ba hetan fali batizmu.

Oinsá ho ema neʼebé la halo hahalok neʼebé kontra Bíblia iha tempu neʼebé nia hetan batizmu, maibé depois nia hetan ona batizmu nia halo sala ruma neʼebé kongregasaun presiza harii grupu tesi-lia nian? Karik ema neʼe dehan katak nia ladún komprende buat neʼebé nia halo iha tempu neʼebé nia hetan batizmu, no nia hatete katak ninia batizmu la vale. Kuandu katuas sira koʼalia ho ema neʼe, sira labele halo nia hanoin katak ninia batizmu la vale, no labele husu se nia sente katak ninia dedikasaun no batizmu vale ka lae. Tuir loloos, nia rona ona diskursu batizmu nian neʼebé esplika kona-ba tansá mak batizmu importante. Nia rasik mós hatán ba pergunta sira kona-ba dedikasaun no batizmu iha diskursu neʼe. Depois nia mós troka ninia roupa no tama iha bee laran. Tan neʼe, ninia hahalok iha tempu neʼebé nia hetan batizmu hatudu katak nia komprende ho klaru katak buat neʼebé nia halo mak sériu tebes. Nuneʼe, katuas tenke haree nia nuʼudar ema ida neʼebé hetan ona batizmu.

Se ema ida hatete katak ninia batizmu la vale, katuas sira bele hatudu ba nia informasaun iha livru The Watchtower, 1 Marsu 1960, iha pájina 159 no 160, no mós iha 15 Fevereiru 1964, iha pájina 123 toʼo 126, neʼebé esplika ho klaru kona-ba hetan fali batizmu. Maski iha situasaun balu neʼebé ema bele hetan fali batizmu, hanesan ladún komprende didiʼak kona-ba Bíblia iha tempu neʼebé nia hetan batizmu, maibé ida-neʼe mak ema ida-idak nia desizaun.

Kona-ba hela hamutuk ho ema seluk iha uma ida, ema kristaun tenke hanoin didiʼak kona-ba buat saida deʼit?

Ema hotu presiza fatin atu hela. Maibé, ohin loron, ema barak la iha uma rasik. Karik tanba problema ekonomia, moras, ka situasaun seluk halo ema presiza atu hela hamutuk ho sira-nia família ka parente seluk iha uma ida deʼit. Iha rai balu, família no parente barak hela hamutuk iha kuartu ida deʼit no sira la livre atu halo buat hotu neʼebé sira hakarak.

Maromak Jeová nia organizasaun la iha responsabilidade atu fó lei ba ema hotu iha kongregasaun kristaun iha mundu tomak kona-ba fatin atu hela. Ema kristaun ida-idak tenke hanoin kona-ba Bíblia nia matadalan hodi bele hatene se Maromak simu ka lae, situasaun iha fatin neʼebé nia hela. Saida mak matadalan sira-neʼe?

 Ulukliu, ita tenke hanoin oinsá mak hela hamutuk ho ema seluk sei kona ita-nia moris no ita-nia relasaun ho Maromak. Ita hela hamutuk ho ema oinsá? Sira adora Maromak Jeová ka lae? Sira halo tuir Bíblia nia matadalan iha sira-nia moris ka lae? Apóstolu Paulo hatete: “Keta husik ema lohi imi: Hela hamutuk ho ema laran-aat sira halakon lisan diʼak.”—1 Kor 15:33.

Bíblia esplika katak Maromak Jeová la simu hahalok sala-foʼer no imorál. (Ebr 13:4) Tan neʼe, Maromak la simu duni situasaun iha neʼebé mane no feto neʼebé seidauk kaben atu hela hamutuk hanesan sira feen-laʼen. Ema kristaun lakohi duni atu hela iha fatin neʼebé iha ema neʼebé halo hahalok sira-neʼe.

Liután neʼe, Bíblia hatete ba ema hotu neʼebé hakarak atu Maromak simu sira atu “hadook an husi sala-foʼer”. (1 Kor 6:18) Nuneʼe, ema kristaun hatudu matenek atu sees an husi hela-fatin neʼebé bele hamosu situasaun ruma neʼebé bele tenta sira atu halo hahalok imorál. Porezemplu, hanoin toʼok kona-ba situasaun neʼebé ema kristaun balu hela hamutuk iha uma ida deʼit. Hela iha fatin hanesan neʼe bele hamosu situasaun ruma neʼebé bele tenta sira atu halo sala ka lae? Oinsá se loron ida ema naʼin-rua neʼebé laʼós feen-laʼen mesak deʼit iha uma tanba ema seluk neʼebé baibain mós iha bá fatin ruma ba tempu uitoan? Hanesan neʼe mós, perigu ba ema naʼin-rua neʼebé gosta malu neʼebé seidauk kaben atu hela iha uma neʼebé hanesan. Tan neʼe, diʼak atu sees an husi situasaun sira hanesan neʼe.

Ladiʼak mós ba ema neʼebé soe malu ona atu hela nafatin iha uma neʼebé hanesan. Tanba uluk sira iha relasaun neʼebé besik, ida-neʼe bele halo sira monu ba sala-foʼer.—Prov 22:3.

Buat seluk tan neʼebé importante atu ema kristaun hanoin mak kona-ba viziñu sira-nia haree kona-ba hela hamutuk ho ema seluk iha uma ida. Maski ema kristaun ida hanoin katak la sala atu hela iha fatin ruma, maibé se ida-neʼe halo viziñu sira koʼalia buat neʼebé ladún diʼak kona-ba ita, diʼak ba ita atu hadiʼa situasaun neʼe. Ita lakohi duni atu hafoʼer Maromak Jeová nia naran ho ita-nia hahalok. Paulo hatete: “Hadook an husi fó laran-susar ba ema, ba ema judeu ka ema gregu, ka ba Maromak nia kreda, nuʼudar haʼu buka atu fó ksolok ba ema hotu-hotu iha buat hotu, la hodi buka haʼu rasik nia diʼak maibé ema barak nian, atu sira bele hetan maksoin.”—1 Kor 10:32, 33.

Karik susar ba sira neʼebé hakarak atu halo tuir Maromak Jeová nia matadalan neʼebé loos atu hetan hela-fatin neʼebé diʼak ba sira. Maibé, ema kristaun tenke kontinua atu “buka-hatene buat neʼebé Naʼi hakarak”. Sira tenke haree katak hahalok foʼer ruma la mosu iha sira-nia hela-fatin. (Ef 5:5, 10) Atu halo ida-neʼe, ema kristaun tenke halo orasaun atu husu Maromak nia matadalan no halo buat hotu neʼebé sira bele atu proteje sira-nia an iha buat isin no morál nian no mós atu la hafoʼer Maromak Jeová nia naran.