Tahan hasoru Satanás nia lia-bosok

‘KETA husik ema lohi imi. Imi-nia Maromak sei la ajuda imi. Rende an atu imi la hetan susar!’ Mensajen neʼe mak Rabsaqué, neʼebé reprezenta Liurai Senaquerib husi rai-Asíria, hatoʼo ba ema iha Jeruzalein. Liurai neʼe nia tropa sira tama ona atu ataka rai-Judá. Liafuan neʼebé Rabsaqué hatoʼo mak atu halo povu iha Jeruzalein la fiar an ona katak sira iha forsa no atu halo sira taʼuk hodi bele rende an.—2 Reis 18:28-35.

Ema hatene katak tropa Asíria halo aat ba ema. Sira halo sira-nia inimigu taʼuk hodi fó-hatene hahalok aat saida mak sira halo ba ema neʼebé sira kaer nuʼudar dadur. Philip Taylor neʼebé estuda kona-ba istória hatete katak tropa Asíria nia “toman mak atu halo ema taʼuk tebes hodi habelar lia-bosok atubele kontrola no domina povu sira neʼebé sira ataka no manán, no mós atu hataʼuk sira neʼebé atu sai sira-nia inimigu hodi fó-hatene kona-ba oinsá sira halo hahalok aat tebetebes ba ema neʼebé sira manán ona, hodi nuneʼe bele kontrola ema nia hanoin tuir sira-nia hakarak”. Lia-bosok mak hanesan kilat ida neʼebé iha forsa boot. Taylor hatete katak lia-bosok hanesan neʼe “ataka ema nia neon” hodi estraga sira-nia hanoin.

Ema kristaun loos “halo funu hasoru” anju aat sira neʼebé kontra hasoru Maromak. (Ef 6:12) Diabu Satanás mak ita-nia inimigu boot liu. Nia mós habelar lia-bosok atu hataʼuk ita.

Satanás hanoin katak nia bele halakon ita ida-idak nia laran-metin. Iha Job nia tempu, Satanás hatete ba Maromak Jeová: “Buat hotu neʼebé ema iha, nia sei fó atu salva nia moris.” Neʼe katak hodi haterus ema, neineik-neineik ema sei husik sira-nia laran-metin ba Maromak. (Jó 2:4) Satanás nia hanoin neʼe loos ka lae? Atu salva ita-nia moris, ita sei husik ita-nia laran-metin kuandu ita hetan terus ka lae? Satanás hakarak ita atu hanoin hanesan neʼe. Tan neʼe mak nia uza lia-bosok atu estraga ita-nia hanoin. Mai ita haree dalan balu neʼebé nia halo ida-neʼe no oinsá mak ita bele tahan hasoru nia.

Sira-nia “hun mak iha rai-rahun”

Liuhusi Elifaz, Job nia kolega ida, Satanás hakarak atu hatudu katak ema la iha kbiit atu laran-metin nafatin ba Maromak. Hodi kompara ema nuʼudar “sira neʼebé hela iha uma neʼebé halo ho rai-mean”, Elifaz hatete ba Job: “Sira-nia hun mak iha rai-rahun! Ema halakon sira lalais liu fali halakon borboleta. Husi dadeer toʼo kalan ema harahun tiha ba parte kiʼikoan; ema ida mós la hanoin sira bainhira sira lakon ba nafatin.”—Jó 4:19, 20.

Iha eskritura seluk mós kompara ema nuʼudar “sanan rai” neʼebé halo husi rai-mean neʼebé fasil atu rahun. (2 Kor 4:7) Ita fraku tanba ita sala-naʼin. (Rom 5:12) Ita la bele hasoru Satanás ho ita-nia kbiit rasik. Maibé nuʼudar ema kristaun, ita la mesak tanba Maromak Jeová ajuda ita. Maromak hafolin ita maski ita sala-naʼin. (Isa 43:4) Liután neʼe, Maromak Jeová fó ninia espíritu santu ba sira neʼebé husu ba nia. (Lc 11:13) Ninia espíritu santu bele fó ita “kbiit makaʼas” atu ita bele hasoru susar naran deʼit husi Satanás. (2 Kor 4:7; Flp 4:13) Se ita hamriik metin hasoru Diabu hodi ‘laran-metin ba ita-nia fiar’, Maromak sei fó kbiit ba ita atu bele tahan nafatin.  (1 Ped 5:8-10) Tan neʼe, ita la presiza taʼuk ba Diabu Satanás.

“Mane ida neʼebé hemu hela iha buat neʼebé la iha justisa”

Elifaz husu: “Oinsá ho ema neʼebé bele mate, atu nia bele sai moos? Ka oinsá ho ema neʼebé moris husi feto, atu nia bele sai loos?” Depois nia hatán hodi dehan: “Haree! [Maromak] la tau fiar ba ninia santu sira, no lalehan rasik la moos iha Maromak nia oin. Sá tan ho ema neʼebé aat no ladiʼak, ema ida neʼebé hemu buat neʼebé laloos hanesan hemu bee!” (Jó 15:14-16) Elifaz hatete ba Job katak la iha ema ida neʼebé loos iha Maromak Jeová nia oin. Diabu mós hakarak ita atu hanoin katak ita la folin. Nia hakarak ita atu hanoin beibeik kona-ba sala neʼebé ita halo uluk no hanoin katak ita la bele hetan perdua ona. Nia mós hakarak ita atu hanoin katak Maromak Jeová husu buat barak liu husi ita, no atu hanoin katak Maromak nia hahalok, hanesan laran-diʼak, prontu atu perdua, no ninia ajuda latoʼo atu taka ita-nia sala.

Loloos ita hotu “halo tiha sala no lakon ona Maromak nia glória”. Susar ba ema sala-naʼin atu halo tuir Maromak nia matadalan hotu. (Rom 3:23; 7:21-23) Maibé, neʼe laʼós katak ita la folin iha Maromak nia oin. Maromak Jeová hatene katak “samea uluk nian, neʼebé ema hanaran Diabu eh Satanás”, mak halo ita hanoin katak ita la iha folin tanba ita sala-naʼin. (Apok 12:9, 10) Tanba Maromak hatene “ita mak rai-rahun”, nia la “kontinua buka sala” husi ita.—Sal 103:8, 9, 14.

Se ita husik ita-nia hahalok aat no hakbesik ba Maromak Jeová ho laran-moos no arrepende ita-nia sala ho laran, “nia sei fó perdua iha dalan boot liu”. (Isa 55:7; Sal 51:17) Bíblia hatete: “Maski imi-nia sala mak hanesan mean lakan, sira sei sai mutin hanesan jelu-rahun.” (Isa 1:18) Tan neʼe, mai ita hakaʼas an nafatin atu halo Maromak nia hakarak.

Tanba ita ema sala-naʼin, ita la bele duni sai ema loos iha Maromak nia oin. Adão no Eva lakon sira-nia moris neʼebé perfeitu, no lakon oportunidade moris rohan-laek, laʼós deʼit ba sira maibé mós ba ema hotu. (Rom 6:23) Maibé, tanba Maromak Jeová hadomi tebes ema hotu, nia halo arranju atu sira neʼebé tau fiar ba Jesus Kristu nia sakrifísiu bele hetan perdua ba sira-nia sala. (Mt 20:28; Joao 3:16) Maromak hatudu duni ninia “grasa” ka laran-diʼak mai ita, loos ka lae? (Tito 2:11) Ita bele duni hetan perdua! Nuneʼe, keta husik Satanás halo ita hanoin katak ita la bele hetan perdua.

“Kona nia toʼo ninia ruin no nia isin”

Satanás hatete katak Job sei husik ninia fiar se nia lakon ninia saúde diʼak. Hodi koʼalia hasoru Maromak Jeová, Diabu hatete: “Kona nia toʼo ninia ruin no nia isin, no haree toʼok,  nia sei hatete aat ba Ita-nia oin.” (Jó 2:5) Maromak nia inimigu neʼe sei kontente tebetebes se nia bele halo ita sente katak ita la iha folin tanba ita moras.

Maibé, Maromak Jeová la husik ita kuandu ita la iha kbiit ona atu halo buat barak iha ita-nia serbisu ba nia hanesan uluk. Oinsá sei ita-nia kolega ida ema baku no hetan kanek? Ita sei hafolin nia nafatin ka lae, maski nia la bele halo ona buat barak ba ita hanesan uluk? Ita sei hadomi no tau matan ba nia duni, liuliu se nia hetan kanek tanba nia hakaʼas an atu halo buat ruma ba ita. Ita bele fiar katak Maromak Jeová sei halo liu fali ida-neʼe. Bíblia hatete: “Maromak la laran-aat atu haluha imi-nia hahalok sira no imi domin neʼebé imi hatudu ba Nia.”—Ebr 6:10.

Bíblia koʼalia kona-ba “feto-faluk kiak ida” neʼebé apoia adorasaun loos ba Maromak karik ba tinan barak. Kuandu Jesus haree nia tau “osan kiʼik rua” neʼebé folin kiʼik tebes, nia hafolin feto neʼe no ninia kontribuisaun ka lae? Sin, Jesus hafolin duni, tan neʼe mak nia gaba feto neʼe nia hahalok tanba nia halo buat hotu neʼebé nia bele atu apoia adorasaun loos.—Lc 21:1-4.

Se ita laran-metin nafatin, ita bele fiar katak ita-nia relasaun ho Maromak Jeová sei metin nafatin maski ita sai ferik-katuas ka sai moras tanba ita sala-naʼin. Maromak sei nunka husik ninia atan neʼebé laran-metin maski susar ruma halo sira la bele serbí nia hanesan uluk.—Sal 71:9, 17, 18.

Simu “maksoin atu taka imi-nia ulun”

Oinsá mak ita bele proteje ita-nia an husi Satanás nia lia-bosok? Apóstolu Paulo hatete: “Harii imi-nia kbiit iha . . . Naʼi, husi nia kbiit nia tulun. Tau hatais funu nian neʼebé Maromak haraik tiha ba imi, atu imi bele bá hasoru Diabu nia babeur aat hotu.” Parte ida husi hatais funu nian mak ‘maksoin atu taka ulun’. (Ef 6:10, 11, 17) Ita tenke haree didiʼak katak ita la simu Satanás nia lia-bosok, maibé kaer metin ba ita-nia esperansa atu hetan salvasaun. Soldadu nia kapasete proteje ninia ulun. Nuneʼe mós ita-nia “esperansa kona-ba maksoin”, ka ita-nia fiar katak Maromak sei kumpre buat hotu neʼebé nia promete kona-ba mundu foun, sei proteje ita-nia hanoin husi Satanás nia lia-bosok. (1 Tes 5:8) Atu esperansa neʼe bele metin nafatin, ita presiza badinas atu estuda Bíblia.

Job tahan Satanás nia babeur aat hotu. Tanba Job fiar metin katak sei iha moris-hiʼas, nia la taʼuk maski nia besik atu mate. Nia hatete ba Maromak Jeová: “Ita sei bolu, no haʼu rasik sei hatán ba Ita. Ita sei hanoin ba buat neʼebé Ita halo ho Ita-nia liman.” (Jó 14:15) Se karik Job mate tanba nia laran-metin, nia fiar nafatin katak Maromak nia domin ba Ninia atan sira sei book Nia atu bolu fali sira husi mate.

Mai ita mós tau fiar ba Maromak neʼebé loos. Maromak Jeová bele hadiʼa buat aat hotu neʼebé Satanás no ninia maluk sira halo ba ita. Hanoin-hetan mós apóstolu Paulo nia liafuan: “Maromak nia laran la bosok, no nia sei la husik imi hetan babeur neʼebé boot liu fali imi-nia kbiit; maibé . . . nia sei fó mós dalan atu imi bele lori nia.”—1 Kor 10:13.

[Dezeñu iha pájina 20]

Maromak Jeová hafolin serbisu neʼebé ita halo ho laran-metin

[Dezeñu iha pájina 21]

Simu maksoin atu taka ulun, no kaer metin ida-neʼe