Batizmu hodi aman, oan no espíritu santu nia naran?
Batizmu hodi aman, oan no espíritu santu nia naran?
“Neʼe duni, laʼo bá, hanorin nasaun hotu-hotu; sarani sira hodi Aman, Oan no espíritu santu nia naran.”—MT 28:19.
1, 2. (a) Saida mak akontese iha Jeruzalein iha loron Pentekostes 33? (b) Saida mak book ema barak atu hetan batizmu?
JERUZALEIN nakonu ho ema barak husi rai oioin. Iha loron Pentekostes 33, iha selebrasaun ida neʼebé importante no ema barak neʼebé vizita mós hola parte. Maibé, buat ida akontese, depois neʼe apóstolu Pedro hatoʼo diskursu neʼebé diʼak no book ema barak nia laran. Pedro nia liafuan book ema judeu no ema husi rai seluk hamutuk naʼin-3.000 atu arrepende an no hetan batizmu iha bee laran. Nuneʼe, sira mós sai parte iha kongregasaun kristaun neʼebé foin harii. (Apos 2:41) Tanba ema barak hetan batizmu iha pixina no tanke boot bee nian iha Jeruzalein, ida-neʼe halo ema barak seluk hakfodak.
2 Saida mak halo ema barak hakarak atu hetan batizmu? Buat ida neʼebé akontese antes Pedro hatoʼo ninia diskursu mak “sira rona tarutu boot mai husi lalehan, hanesan anin boot”. Jesus nia dixípulu hamutuk naʼin-120 neʼebé halibur iha kuartu iha uma andár leten sai nakonu ho espíritu santu. Depois neʼe, mane no feto barak hakfodak atu rona dixípulu sira “koʼalia lia oioin”. Kuandu sira rona buat neʼebé Pedro hatete, inklui mós buat neʼebé nia hatete kona-ba Jesus nia mate, ida-neʼe book sira-nia laran. Saida mak sira tenke halo? Pedro hatete: “Hakribi imi-nia sala no simu batizmu bá, imi ida-ida, hodi Jesus Kristu nia naran . . . , no imi sei simu espíritu santu nia kmanek.”—Apos 2:1-4, 36-38.
3. Iha loron Pentekostes, saida mak ema judeu no ema husi rai seluk presiza halo?
3 Hanoin toʼok kona-ba ema neʼebé rona ba Pedro nia diskursu, sira mak ema judeu, no mós ema husi rai seluk neʼebé muda ona ba relijiaun ema judeu sira-nian. Nuneʼe, sira fiar ona Jeová nuʼudar sira-nia Maromak. No mós, husi Eskritura Lia-Ebraiku, sira hatene ona katak espíritu santu mak forsa neʼebé Maromak uza atu kria buat hotu no atu ajuda ninia atan sira. (Gên 1:2; Juíz 14:5, 6; 1 Sam 10:6; Sal 33:6) Maibé sira presiza hatene buat seluk tan. Importante ba sira atu komprende no simu ida neʼebé Maromak uza atu fó salvasaun, neʼe mak Jesus nuʼudar Mesias. Tan neʼe mak Pedro hatete katak sira presiza hetan batizmu “hodi Jesus Kristu nia naran”. Loron balu antes neʼe, Jesus neʼebé moris-hiʼas ona haruka Pedro no sira seluk atu fó batizmu ema “hodi Aman, Oan no espíritu santu nia naran”. (Mt 28:19, 20) Ida-neʼe mak buat ida neʼebé importante iha apóstolu sira-nia tempu, no sei importante mós iha tempu agora. Saida mak neʼe?
Hodi Aman nia naran
4. Ba ema neʼebé iha relasaun ona ho Maromak Jeová, saida mak troka?
4 Hanesan koʼalia tiha ona uluk, ema neʼebé rona Pedro nia diskursu adora ona Maromak Jeová no uluk sira iha relasaun diʼak ho nia. Sira hakaʼas an atu halo tuir Maromak nia Ukun-Fuan, tan neʼe mak sira husi rai seluk mós mai toʼo Jeruzalein. (Apos 2:5-11) Maibé, Maromak foin troka dalan neʼebé nia simu ema nia adorasaun. Nia la simu tan ema judeu nuʼudar ninia nasaun espesiál, tan neʼe maski sira halo tuir Ukun-Fuan, maibé ida-neʼe latoʼo atu Maromak simu sira. (Mt 21:43; Kol 2:14) Se sira hakarak atu kontinua iha relasaun diʼak ho Maromak Jeová, sira presiza halo buat seluk tan.
5, 6. Saida mak ema judeu no ema husi rai oioin presiza halo atubele iha relasaun diʼak ho Maromak?
5 Buat neʼebé sira presiza halo laʼós atu husik Maromak Jeová, Ida neʼebé Fó Moris. (Apos 4:24) Ema sira neʼebé rona buat neʼebé Pedro esplika, agora komprende ho klaru liután katak Maromak Jeová mak Aman ida neʼebé laran-diʼak. Nia haruka Mesias atu salva sira no nia mós prontu atu perdua sira, kona-ba sira Pedro hatete: “Neʼe duni Izraél nia umakain tomak hatene loloos bá katak Maromak halo Jesus neʼe neʼebé imi hedi ba [ai-riin] nuʼudar Naʼi no Mesias.” Tuir loloos, sira neʼebé halo tuir Pedro nia liafuan, agora sira iha razaun diʼak liután atu hafolin buat neʼebé Aman halo ona ba sira hotu neʼebé hakarak atu iha relasaun diʼak ho Maromak!—Lee Apostolu 2:30-36.
6 Loos duni, ema judeu no ema seluk husi rai oioin agora bele komprende katak atu iha relasaun diʼak ho Maromak Jeová, sira tenke rekoñese nia nuʼudar ida neʼebé fó salvasaun liuhusi Jesus. Tan neʼe mak sira arrepende sira-nia sala, inklui mós sala kona-ba oho Jesus maski sira hola parte ka lae iha hahalok neʼe. No mós, tan neʼe mak loron balu depois neʼe sira kontinua “laran-metin ba apóstolu sira-nia hanorin”. (Apos 2:42) Sira bele no hakarak atu “hakbesik ho laran-metin ba kadunan grasa nian”.—Ebr 4:16.
7. Oinsá mak ema barak ohin loron troka sira-nia hanoin kona-ba Maromak no hetan batizmu hodi Aman nia naran?
7 Ohin loron, ema rihun ba rihun husi rai oioin aprende lia-loos husi Bíblia kona-ba Maromak Jeová. (Isa 2:2, 3) Uluk, sira balu la fiar Maromak ka fiar katak nia iha maibé la fiar katak Maromak iha interese ba ninia kriasaun, maski nuneʼe, sira agora fiar katak Maromak iha no ema bele iha relasaun diʼak ho nia. Sira balu seluk, uluk adora maromak ida neʼebé iha oin tolu ka adora buat seluk nuʼudar sira-nia maromak. Agora sira hatene katak Jeová deʼit mak Maromak forsa boot liu hotu, no sira hakbesik nia hodi uza ninia naran. Ida-neʼe tuir buat neʼebé Jesus hatete ba ninia dixípulu sira atu halo, katak sira tenke hetan batizmu hodi Aman nia naran.
8. Saida mak sira neʼebé la hatene kona-ba sala husi Adão presiza komprende kona-ba Aman?
8 Sira barak mós aprende katak sira hetan sala husi Adão. (Rom 5:12) Ida-neʼe buat foun ba sira, maibé sira tenke simu. Ida-neʼe hanesan ema ida neʼebé moras maibé nia la hatene katak nia moras. Karik dala ruma nia sente moras, maibé tanba nia seidauk bá konsulta atu hatene loloos saida mak moras neʼe, nia hanoin katak nia isin-diʼak hela. Maibé tuir loloos, nia iha moras duni. (Kompara ho 1 Korinto 4:4.) Oinsá se nia bá konsulta atu buka-hatene loloos ninia moras? Nia sei buka no simu tratamentu neʼebé diʼak ka lae? Hanesan neʼe mós, bainhira ema barak aprende lia-loos kona-ba sala neʼebé ema hetan husi Adão, sira simu buat neʼebé Bíblia hatete no komprende katak Maromak fó ai-moruk neʼebé bele “kura” sira-nia moras. Sin, ema hotu neʼebé dook husi Aman presiza buka nia, Ida neʼebé bele “kura” sira.—Ef 4:17-19.
9. Saida mak Maromak Jeová halo atu ita bele iha relasaun diʼak ho nia?
9 Se Ita dedika ona Ita-nia moris ba Maromak Jeová no hetan ona batizmu, Ita hatene katak iha relasaun diʼak ho nia mak buat neʼebé kapás tebes. Agora Ita hatene katak Ita-nia Aman, Maromak Jeová, hadomi tebes Ita. (Lee Roma 5:8.) Maski Adão no Eva halo sala hasoru Maromak, maibé Maromak loke dalan ba sira-nia bei-oan, inklui mós ita, atu bele iha relasaun diʼak ho Nia. Hodi halo ida-neʼe, Maromak tahan hasoru terus tanba haree ninia Oan doben hetan terus no mate. Hatene kona-ba neʼe, ajuda ita atu simu Maromak nia kbiit no ukun, no atu halo tuir ho domin buat hotu neʼebé nia haruka ita atu halo. Ita iha razaun barak atu dedika an ba Maromak no hetan batizmu, tan neʼe se Ita seidauk halo ida-neʼe, diʼak atu Ita hanoin kona-ba halo ida-neʼe.
Hodi Oan nia naran
10, 11. (a) Tanbasá mak Ita tenke hafolin buat neʼebé Jesus halo? (b) Oinsá mak Ita sente kona-ba Jesus nia sakrifísiu?
10 Maibé hanoin fali kona-ba buat neʼebé Pedro hatete ba ema barak neʼebé rona nia. Nia hatete katak importante atu simu Jesus, no ema presiza hatudu katak sira simu nia hodi hetan batizmu “hodi . . . Oan nia naran”. Tansá mak ida-neʼe importante iha tempu neʼebá, no tansá mak importante ohin loron? Tanba hodi simu Jesus no hetan batizmu hodi nia naran, ida-neʼe hatudu katak ita rekoñese ninia knaar iha ita-nia relasaun ho ita-nia Kriadór. Jesus mate iha ai-riin terus nian atubele halakon malisan neʼebé ema judeu hetan tanba Ukun-Fuan. Maski nuneʼe, Jesus nia mate lori buat neʼebé diʼak liu. (Gal 3:13) Jesus fó buat neʼebé ema hotu presiza, neʼe mak ninia moris nuʼudar sakrifísiu. (Ef 2:15, 16; Kol 1:20; 1 Joao 2:1, 2) Atubele halo ida-neʼe, Jesus presiza tahan hasoru buat barak, hanesan ema halo buat neʼebé la loos ba nia, ema hasara nia, ema haterus nia, no ikusmai mate. Oinsá mak Ita hatudu katak Ita hafolin Jesus nia sakrifísiu? Hanoin toʼok katak Ita mak labarik ida neʼebé tinan 12, no Ita halo viajen iha ró boot naran Titanic, ró neʼebé iha tinan 1912 xoke jelu-fatuk boot iha tasi laran no mout. Ita koko atu haksoit ba ró kiʼik ida hodi bele salva Ita-nia moris, maibé ró kiʼik neʼe nakonu ona. Depois, señór ida iha ró kiʼik laran neʼe, reʼi nia feen, haksoit tun fali ba ró boot, no foti Ita hodi tau Ita iha ró kiʼik neʼe. Ita sente oinsá? Sin, Ita agradese tebes ba nia. Entaun, Ita bele komprende oinsá mak labarik-mane ida neʼebé hasoru duni situasaun neʼe sente. * Maibé, Jesus halo buat diʼak liu ba Ita. Nia mate atu Ita bele hetan moris ba nafatin.
11 Oinsá mak ita sente kuandu ita aprende kona-ba buat neʼebé Maromak nia Oan halo ba ita? (Lee 2 Korinto 5:14, 15.) Klaru katak ita sente agradese tebes. Ida-neʼe book ita atu dedika ita-nia moris ba Maromak no atu ‘la moris tan ba ita-nia an rasik, maibé moris ba ida neʼebé mate tanba ita’. Hetan batizmu hodi Oan nia naran katak ita rekoñese buat neʼebé Jesus halo ona ba ita no simu ninia kbiit nuʼudar “Naʼi-Ulun no Maksoin”. (Apos 5:31) Antes neʼe, ita la iha relasaun diʼak ho ita-nia Kriadór, no tuir loloos, ita la iha esperansa neʼebé loos. Maibé, hodi tau fiar ba Jesus nia sakrifísiu no hodi hetan batizmu, agora ita iha ona relasaun diʼak ho ita-nia Aman. (Ef 2:12, 13) Apóstolu Paulo hatete: “Uluk imi rasik dook husi Maromak no moris hasoru Nia tanba imi-nia hahalok aat sira, maibé ohin imi hadame malu ona ho Nia. Maromak hadame imi ho nia an hodi saran Kristu nia isin-lolon ba mate, atu imi bele sai ema sala-laek, santu, no moos.”—Kol 1:21, 22.
12, 13. (a) Hetan batizmu hodi Oan nia naran book ita atu halo saida kuandu ema ida hakanek ita-nia laran? (b) Ema kristaun neʼebé hetan ona batizmu hodi Jesus nia naran iha obrigasaun saida?
12 Maski ita hetan batizmu ona hodi Oan nia naran, ita hatene katak ita ema sala-naʼin. Hatene ida-neʼe ajuda ita iha ita-nia moris loroloron nian. Porezemplu, se ema ida hakanek Ita-nia laran, Ita hanoin-hetan katak Ita ho nia mak ema sala-naʼin ka lae? Imi naʼin-rua presiza hetan perdua husi Maromak, no imi mós tenke fó perdua ba malu. (Mc 11:25) Jesus fó ai-knanoik atu esplika kona-ba neʼe. Atan ida, debe nia naʼi osan rihun sanulu (denáriu 60.000.000), maibé ninia naʼi kasu nia tusan. Maski nuneʼe, kuandu atan neʼe haree ninia maluk neʼebé debe nia denáriu 100, nia lakohi kasu nia maluk nia tusan. Jesus esplika katak Maromak Jeová mós sei la perdua ema neʼebé la perdua nia maluk. (Mt 18:23-35) Sin, batizmu hodi Oan nia naran katak rekoñese Jesus nia kbiit no hakaʼas an atu halo tuir ninia ezemplu no hanorin, inklui mós prontu atu fó perdua ba ema seluk.—1 Ped 2:21; 1 Joao 2:6.
13 Tanba ita la perfeitu, susar ba ita atu banati-tuir Jesus iha buat hotu. Maski nuneʼe, tanba ita dedika ita-nia an ho laran tomak ba Maromak, ita hakarak hakaʼas an atu banati-tuir Jesus. Ita bele halo ida-neʼe hodi kontinua atu husik tiha moris tuan nian no tau fali moris foun. (Lee Efeso 4:20-24.) Kuandu ita hafolin kolega diʼak ida, karik ita hakaʼas an atu halo tuir nia ezemplu no ninia hahalok diʼak. Nuneʼe mós, ita hakarak atu aprende husi Kristu no halo tuir nia.
14. Oinsá mak ita bele hatudu katak ita rekoñese Jesus nia kbiit nuʼudar Liurai?
14 Iha dalan seluk tan neʼebé ita bele hatudu katak ita komprende kona-ba batizmu hodi Oan nia naran. Maromak “tau buat hotu-hotu iha [Jesus] nia ain okos, hodi halo nia sai Kreda nia ulun nuʼudar buat hotu-hotu nia ulun”. (Ef 1:22) Nuneʼe, ita presiza hatudu respeitu ba dalan neʼebé Jesus dirije sira neʼebé dedika an ona ba Maromak Jeová. Kristu uza ema neʼebé la perfeitu atu tau matan ba ita-nia kongregasaun, liuliu katuas kristaun sira. Mane sira-neʼe hetan knaar atu ajuda “santu sira hotu . . . no atu harii Kristu nia isin-lolon”. (Ef 4:11, 12) Maski ema ida neʼebé la perfeitu halo sala, Jesus nuʼudar Liurai iha Maromak nia Reinu bele hadiʼa problema iha tempu no dalan neʼebé loos ba nia. Ita fiar ida-neʼe ka lae?
15. Se Ita seidauk hetan batizmu, bensaun saida deʼit mak Ita bele simu depois batizmu?
15 Ema balu seidauk dedika an ba Maromak Jeová no seidauk hetan batizmu. Se Ita seidauk halo ida-neʼe, agora Ita bele komprende husi buat neʼebé koʼalia tiha ona katak importante atu simu Jesus nuʼudar Maromak nia Oan no hatudu katak Ita agradese ba buat neʼebé nia halo. Hetan batizmu hodi Oan nia naran sei halo Ita hetan bensaun barak.—Lee Joao 10:9-11.
Hodi espíritu santu nia naran
16, 17. Hetan batizmu hodi espíritu santu nia naran katak sá?
16 Hetan batizmu hodi espíritu santu nia naran katak sá? Hanesan temi ona uluk, ema sira neʼebé rona Pedro iha loron Pentekostes hatene kona-ba espíritu santu. Tuir loloos, sira bele haree rasik buat neʼebé hatudu katak Maromak kontinua atu uza ninia espíritu santu. Pedro mak ida husi sira neʼebé “nakonu ho espíritu santu hodi hahú koʼalia lia oioin”. (Apos 2:4, 8) Uza liafuan “hodi nia naran”, ida-neʼe la dehan katak sempre uza kona-ba ema. Ohin loron, buat barak halo “hodi governu nia naran”, ka hodi governu nia kbiit, maibé governu laʼós ema. Nuneʼe mós, ema neʼebé hetan batizmu hodi espíritu santu nia naran rekoñese katak espíritu santu laʼós ema, ka laʼós Maromak, maibé Maromak Jeová nia forsa. No batizmu hodi espíritu santu nia naran mós katak ema ida rekoñese oinsá mak Maromak uza ninia espíritu santu atu halo nia hakarak.
17 Ita hatene kona-ba espíritu santu hodi estuda Bíblia, loos ka lae? Porezemplu, ita komprende katak espíritu santu mak leno ema atu hakerek Bíblia. (2 Tim 3:16) Nuʼudar ita laʼo ba oin iha lia-loos, ita komprende mós katak “Aman iha lalehan sei haraik espíritu santu ba sira neʼebé husu ba nia”, inklui mós ba ita. (Lc 11:13) Karik Ita rasik haree tiha ona oinsá mak espíritu santu ajuda Ita iha Ita-nia moris. Maibé, se Ita seidauk hetan batizmu hodi espíritu santu nia naran, Jesus nia liafuan ajuda Ita atu fiar katak Aman sei haraik espíritu santu ba Ita, no ida-neʼe katak Ita sei hetan bensaun barak kuandu Ita simu espíritu santu neʼe.
18. Bensaun saida deʼit mak ema neʼebé hetan batizmu hodi espíritu santu nia naran sei simu?
18 Ohin loron mós, iha buat barak neʼebé hatudu katak Maromak Jeová tau matan no dirije kongregasaun kristaun liuhusi ninia espíritu. Espíritu neʼe mós ajuda ita ida-idak iha ita-nia atividade loroloron nian. Tanba ita hetan ona batizmu hodi espíritu santu nia naran, neʼe katak ita rekoñese oinsá mak espíritu santu ajuda ita iha ita-nia moris no katak ita kontente atu apoia espíritu neʼe. Maibé, ema balu karik hanoin oinsá mak ita bele moris tuir ita-nia dedikasaun ba Maromak Jeová, no oinsá mak ida-neʼe envolve espíritu santu? Ita sei estuda kona-ba ida-neʼe iha lisaun tuirmai.
[Nota–rodapé]
^ par. 10 Haree livru Awake! 22 Outubru 1981, pájina 3-8.
Ita hanoin-hetan?
• Hetan batizmu hodi Aman nia naran envolve saida?
• Hetan batizmu hodi Oan nia naran katak sá?
• Oinsá mak ita hatudu katak ita hafolin oportunidade atu hetan batizmu hodi Aman no Oan nia naran?
• Hetan batizmu hodi espíritu santu nia naran katak sá?
[Pergunta estudu nian]
[Dezeñu iha pájina 10]
Depois Pentekostes 33, relasaun saida mak dixípulu foun sira iha ho Aman?
[Credit Line]
By permission of the Israel Museum, Jerusalem