Pergunta husi lee-naʼin

Ezequiel 18:20 hatete katak “oan rasik sei la lori todan tanba sala neʼebé ninia aman halo”, no Êxodo 20:5 hatete katak Maromak Jeová sei fó “kastigu ba oan sira tanba sira-nia aman nia sala”. Eskritura rua neʼe kontra malu ka lae?

Eskritura rua neʼe la kontra malu. Eskritura ida koʼalia kona-ba oinsá mak ema ida-idak tenke hatán ba ninia hahalok rasik, no ida seluk koʼalia kona-ba oinsá mak rezultadu husi ema ida nia sala kona mós ninia oan sira.

Liafuan sira iha Ezequiel kapítulu 18 hatudu katak ema ida-idak tenke hatán ba ninia hahalok rasik. Iha versíkulu 4 hatete katak “ema neʼebé halo sala, ema neʼe rasik sei mate”. Oinsá kona-ba ema neʼebé iha hahalok “loos no nia halo buat neʼebé justisa no loos?” “Nia sei kontinua atu moris”. (Eze 18:5, 9) Tan neʼe, kuandu ita-nia tinan toʼo ona atu halo desizaun rasik, ita mós sei hetan tesi lia ‘tuir ita ida-idak nia hahalok rasik’.—Eze 18:30.

Corá mak ezemplu ida kona-ba neʼe. Kuandu ema Izraél laʼo iha rai-fuik maran, Corá sai la kontente ho nia knaar espesiál neʼebé Maromak fó ba nia. Tanba Corá hakarak hetan pozisaun diʼak liután hodi sai amlulik, nia no ema Izraél balu kontra hasoru Moisés no Aarão neʼebé reprezenta Maromak Jeová. Tanba Corá no ninia maluk sira ho foti an hakarak hetan pozisaun neʼebé tuir loloos sira la iha direitu atu hetan, Maromak Jeová oho sira. (Núm 16:8-11, 31-33) Maibé, Corá nia oan  sira la hamutuk ho sira-nia aman atu kontra Moisés no Aarão. Maromak la tau todan ba sira tanba sira-nia aman nia sala. Sira la mate tanba sira laran-metin ba Maromak Jeová.—Núm 26:10, 11.

Maibé, oinsá ho avizu iha Êxodo 20:5 neʼebé parte husi Ukun-Fuan Sanulu? Hanoin toʼok kona-ba situasaun iha tempu neʼebá. Maromak Jeová foin halo Lei aliansa nian ho nasaun Izraél. Depois rona tiha ukun-fuan sira husi aliansa neʼe, ema Izraél hatete: “Buat hotu neʼebé Jeová hatete ona, ami sei halo tuir duni.” (Êx 19:5-8) Nuneʼe, nasaun Izraél tomak komesa iha relasaun espesiál ho Maromak Jeová. Tan neʼe, liafuan iha Êxodo 20:5 hatoʼo liuliu mak ba nasaun Izraél tomak.

Kuandu ema Izraél kontinua laran-metin ba Maromak Jeová, nasaun tomak hetan buat diʼak no simu bensaun barak. (Lev 26:3-8) Maibé, kuandu nasaun Izraél husik Maromak Jeová no serbí fali mak maromak falsu sira, Maromak Jeová la fó tan ona bensaun no la proteje tan sira; nuneʼe nasaun hasoru susar. (Juíz 2:11-18) Maski nasaun adora maromak falsu sira, maibé iha ema Izraél balu neʼebé nafatin laran-metin ba Maromak no halo tuir ninia ukun-fuan sira. (1 Reis 19:14, 18) Karik ema laran-metin sira-neʼe hetan susar tanba nasaun Izraél nia sala, maibé Maromak Jeová hatudu laran-diʼak neʼebé nakonu ho domin ba sira.

Kuandu nasaun Izraél halo sala boot kontra Maromak Jeová nia matadalan sira, no tan neʼe hafoʼer nia naran iha nasaun sira seluk nia leet, Maromak Jeová deside atu fó kastigu ba nia povu hodi husik sira atu sai dadur iha Babilónia. Klaru katak kastigu neʼe mak ba ema ida-idak no ba nia povu nuʼudar nasaun. (Jer 52:3-11, 27) Tuir loloos, Bíblia hatudu katak tanba povu Izraél nia sala boot tebetebes, sira-nia bei-oan toʼo jerasaun tolu, haat, ka karik liu mós simu todan husi sira-nia beiʼala nia sala neʼe, hanesan Êxodo 20:5 hatete.

Maromak nia Liafuan mós konta kona-ba família sira neʼebé hetan susar tanba inan-aman nia hahalok sala. Porezemplu, Amlulik Boot Eli hakanek Maromak Jeová nia laran tanba nia husik deʼit ninia oan sira “neʼebé folin-laek”, neʼebé halo sala-foʼer atu serbí nafatin nuʼudar amlulik. (1 Sam 2:12-16, 22-25) Tanba Eli hafolin liu ninia oan sira duké Maromak Jeová, Maromak promete katak Eli nia família sei la iha tan direitu atu serbí nuʼudar amlulik boot, ida-neʼe komesa akontese ho ninia bei-oan nia bei-oan, Abiatar. (1 Sam 2:29-36; 1 Reis 2:27) Ezemplu kona-ba Geazi mós hatudu kona-ba matadalan iha Êxodo 20:5. Nia uza sala ninia pozisaun nuʼudar Eliseu nia atan atubele hetan sasán husi xefe tropa Síria nian naran Naaman neʼebé sai isin diʼak fali ona. Liuhusi Eliseu, Maromak Jeová tesi lia Geazi hodi dehan: “Naaman nia moras lepra sei kona fali ó no ó-nia bei-oan toʼo tempu neʼebé la bele sura.” (2 Reis 5:20-27) Tan neʼe, rezultadu husi Geazi nia sala mós kona ninia bei-oan sira.

Nuʼudar Kriadór no Ida neʼebé Fó Moris, Maromak Jeová iha direitu atu deside kastigu saida mak loos. Ezemplu sira neʼebé foin temi hatudu katak oan ka bei-oan sira bele lori todan tanba sira-nia beiʼala nia sala. Maibé, Maromak Jeová “rona ema neʼebé terus nia halerik”, no ema hotu neʼebé hakbesik ba Maromak sei hetan ajuda no sei sente kmaan.—Jó 34:28.

[Dezeñu iha pájina 29]

Corá no ninia maluk sira tenke hatán ba sira-nia hahalok rasik