Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

• Tanbasá mak orasaun no harohan importante kuandu ita hasoru susar ruma?

Maromak Jeová karik la halakon ita-nia susar, maibé nia bele hatán ita-nia orasaun hodi halo ita-nia fuan no laran sente dame. Depois ita harohan ba Maromak kona-ba susar ruma, ida-neʼe halo ita sente kalma no bele ajuda ita atu hatene katak perigu atu hanoin demais kona-ba susar ruma.—15/12, pájina 17.

• Tanbasá mak Mesias tenke mate?

Tanba razaun rua. Razaun ida mak Jesus nia mate hatudu katak ema perfeitu ida bele nafatin laran-metin ba Maromak maski hetan terus makaʼas. Razaun ida seluk mak ninia mate selu atu halakon sala neʼebé Adão hadaʼet ba nia bei-oan sira, no hodi nuneʼe loke dalan ba ema atu hetan moris rohan-laek.—15/12, pájina 22-23.

• Tanbasá mak ita lalika taʼuk atu halo buat neʼebé Maromak hakarak ita atu halo?

Maromak Jeová nunka husu ita atu halo buat neʼebé ita la bele halo. Nia komprende katak ita mak ema sala-naʼin, no nia hakarak ajuda ita. (Sal 103:14) Serbí Maromak nuʼudar Kristu nia dixípulu mak buat neʼebé halo ita sente kmaan duké halo ita sente laran-susar, tanba moris hanesan neʼe mós lori buat diʼak ba ema seluk no halo Maromak Jeová nia laran kontente.—15/1, pájina 8-9.

• Koʼalia ho oan sira inklui mós halo saida?

Koʼalia ho oan sira inklui mós husu pergunta no rona ho pasiénsia buat neʼebé oan hakarak koʼalia. Ba família barak, tempu neʼebé diʼak atu koʼalia ba malu mak tempu han.—15/1, pájina 18-19.

• Saida deʼit mak bele ajuda ita atu “laran-manas nafatin iha espíritu”?

Hodi halo orasaun beibeik atu husu Maromak nia espíritu, hodi badinas atu estuda Bíblia mesak, hodi hanoin kleʼan kona-ba buat neʼebé ita lee, no hodi tuir reuniaun beibeik, buat sira-neʼe bele ajuda ita atu “laran-manas nafatin iha espíritu”.—15/2, pájina 9.

• Iha situasaun saida mak ema bele hetan fali batizmu?

Ema bele hetan fali batizmu se karik nia sei moris iha situasaun ruma ka halo nafatin buat ruma subasubar toʼo tempu neʼebé nia hetan batizmu. Karik hahalok neʼebé nia halo neʼe mak hahalok sira neʼebé baibain kongregasaun la simu no sei hasai nia.—15/2, pájina 22.

• Iha Jesus nia ai-knanoik kona-ba trigu no duʼut aat, serbisu atu kuda fini diʼak reprezenta saida?

Oan-Mane, Jesus, prepara toʼos kuandu nia halaʼo serbisu haklaken iha rai. Husi Pentekostes 33 ba oin, serbisu kuda fini diʼak komesa kuandu ema kristaun sira hetan kose-mina no sai Maromak nia oan, ka Reinu nia oan sira.—15/3, pájina 19-20.

• Oinsá mak anju sira halibur sira neʼebé reprezenta trigu hodi tau iha Maromak Jeová nia hoka ka fatin atu rai ai-han? (Mt 13:30)

Serbisu neʼe halaʼo durante loron ikus mundu aat neʼe nian. Reinu nia oan sira neʼebé reprezenta trigu halibur hamutuk iha Maromak Jeová nia hoka, sira balu sai parte iha kongregasaun kristaun neʼebé halaʼo adorasaun loos, ka balu seluk simu ona sira-nia kolen atu bá lalehan.—15/3, pájina 21-22.