Ita husik Maromak husu pergunta ba Ita?

BÍBLIA iha pergunta atus ba atus neʼebé ajuda ita atu hatene ita-nia hanoin no sentimentu. Tuir loloos, Maromak Jeová rasik uza pergunta atu hanorin lia-loos neʼebé importante. Porezemplu, Maromak Jeová uza pergunta barak atu fó avizu ba Caim atu troka ninia hanoin sala neʼebé bele lori nia atu halo hahalok aat. (Gên 4:6, 7) Dala ruma, Maromak Jeová uza pergunta ida deʼit atu book ema atu halo hahalok diʼak. Kuandu profeta Isaías rona Maromak Jeová husu: “Sé mak haʼu sei haruka, no sé mak sei bá atu reprezenta ami?” Isaías hatán: “Haʼu mak neʼe! Haruka haʼu bá.”—Isa 6:8.

Jesus, nuʼudar Mestre Boot, mós uza pergunta ho didiʼak. Iha Evanjellu sira hakerek Jesus nia pergunta hamutuk 280 liu. Maski dala ruma nia uza pergunta atu halo ema neʼebé kritika nia atu nonook, maibé dala barak ninia pergunta mak atu book rona-naʼin nia laran, no atu halo sira hanoin kona-ba sira-nia relasaun ho Maromak. (Mt 22:41-46; Joao 14:9, 10) Nuneʼe mós apóstolu Paulo neʼebé hakerek livru 14 husi Eskritura Lia-Gregu, nia mós uza pergunta ho didiʼak. (Rom 10:13-15) Ninia karta neʼebé nia hakerek ba ema Roma iha pergunta barak. Paulo nia konsellu book ninia lee-naʼin sira atu hafolin “rikusoi no hatene no matenek waʼin Maromak nian kleʼan tebetebes”.—Rom 11:33.

Maski pergunta balu mak atu ema hatán ho lian, maibé pergunta seluk mak atu book ema atu hanoin kleʼan. Iha Evanjellu sira hakerek kona-ba oinsá mak Jesus uza beibeik pergunta neʼebé book rona-naʼin atu hanoin kleʼan. Loron ida kuandu Jesus fó avizu ba ninia dixípulu sira, nia dehan: “Matan-moris neon-naʼin bá kona-ba farizeu no Herodes sira-nia fermentu,” neʼe katak sira-nia laran-makerek no sira-nia hanorin falsu sira. (Mc 8:15; Mt 16:12) Jesus nia dixípulu sira la komprende buat neʼebé nia hatete, tan neʼe sira hahú haksesuk malu tanba sira haluha atu lori paun. Haree toʼok oinsá mak Jesus uza pergunta atu ajuda sira komprende. Nia dehan ba sira: “Tansá imi haksesuk malu katak imi la iha paun? Imi seidauk haree no komprende? Imi-nia fuan sira toʼos hela ka? Imi matan iha maibé la haree? Tilun iha maibé la rona? . . . Imi seidauk komprende?” Jesus nia pergunta sira-neʼe mak atu book ninia dixípulu sira atu hanoin kleʼan kona-ba ninia liafuan katak sá.—Mc 8:16-21.

“Husik haʼu husu ba ó”

Maromak Jeová uza pergunta atu bele hadiʼa ninia atan Job nia hanoin. Liuhusi pergunta oioin, Maromak Jeová hanorin Job katak Job kiʼik liu fali ninia Kriadór. (Jó, kap. 38-41) Maromak Jeová hakarak Job atu hatán ho lian ba pergunta ida-idak neʼebé nia husu ka lae? Lae. Klaru katak pergunta sira hanesan “Ó iha neʼebé kuandu haʼu tau rai neʼe nia hun?” mak atu book Job nia hanoin no sentimentu. Depois Maromak husu tiha pergunta balu ba Job, Job la hatene ona atu hatete saida. Nia hatete deʼit: “Saida mak haʼu sei hatán ba Ita? Haʼu taka tiha haʼu-nia ibun ho haʼu-nia liman.” (Jó 38:4; 40:4) Job komprende buat neʼebé Maromak hanorin no tan neʼe nia haraik an. Maibé, Maromak Jeová laʼós deʼit hanorin Job atu haraik an. Maromak mós hadiʼa Job nia hanoin. Iha dalan saida?

Maski Job mak “ema neʼebé la halo sala no laran-moos”, maibé dala ruma ninia liafuan hatudu katak nia iha hanoin neʼebé la loos. Eliú haree kona-ba neʼe kuandu nia fó konsellu ba Job tanba Job “hatete katak ninia an mak loos liu fali Maromak”. (Jó 1:8; 32:2; 33:8-12) Nuneʼe, pergunta neʼebé Maromak Jeová husu mós hadiʼa Job nia hanoin. Hodi koʼalia ba Job liuhusi anin fuik, Maromak hatete: “Sé mak neʼe neʼebé halo nakukun haʼu-nia konsellu hodi uza liafuan neʼebé la iha matenek? Kesi ó-nia knotak bá,  nuʼudar mane ida, no husik haʼu husu ba ó, no ó hatán mai haʼu.” (Jó 38:1-3) Liuhusi pergunta, Maromak Jeová book ema atu hanoin kona-ba ninia matenek neʼebé la iha rohan no ninia kbiit neʼebé nia hatudu husi ninia kriasaun. Hatene kona-ba ida-neʼe ajuda Job atu fiar liután ba Maromak Jeová nia tesi-lia no dalan neʼebé Maromak halo buat hotu. Neʼe mak esperiénsia neʼebé diʼak tebes ba Job tanba Maromak neʼebé Forsa Boot Liu Hotu husu pergunta ba nia!

Oinsá ita bele husik Maromak Jeová husu pergunta ba ita?

Oinsá ho ita? Ita mós bele hetan buat diʼak husi pergunta sira neʼebé hakerek iha Bíblia laran ka lae? Sin, ita bele! Hodi para no hanoin kleʼan kona-ba pergunta sira-neʼe, bele ajuda ita atu laʼo ba oin iha lia-loos. Pergunta sira iha Maromak nia Liafuan mak iha forsa duni atu book ita-nia hanoin. Tuir loloos, “Maromak nia liafuan . . . book makaʼas . . . no bele hatene loloos buat neʼebé ema hanoin no hakarak iha nia fuan.” (Ebr 4:12) Maibé, atu bele hetan buat diʼak, ita presiza hanoin katak pergunta sira-neʼe mak ba ita, hanesan Maromak Jeová husu ba ita rasik. (Rom 15:4) Mai ita haree toʼok ezemplu balu.

“Juis ba raiklaran tomak sei la halo buat neʼebé loos ka?” (Gên 18:25) Abraão husu pergunta neʼe ba Maromak Jeová iha tempu neʼebé Maromak atu tesi-lia ba Sodoma no Gomorra. Abraão hatene ho klaru katak Maromak Jeová sei nunka halo hahalok neʼebé la loos, hodi halo ema diʼak mate hamutuk ho ema aat. Abraão nia pergunta hatudu katak nia iha fiar neʼebé metin ba Maromak Jeová nia justisa.

Ohin loron, ema balu karik iha hanoin oioin kona-ba oinsá mak Maromak Jeová sei tesi lia iha futuru, hanesan sé mak sei hetan salvasaun husi funu Armajedón ka sé mak sei moris hiʼas fali. Duké husik hanoin sira-neʼe halo ita sente laran-susar, diʼak atu hanoin-hetan Abraão nia pergunta neʼe. Hodi hatene katak Maromak Jeová mak Aman neʼebé laran-diʼak no hodi fiar ba ninia justisa no laran-sadiʼa, hanesan Abraão, ida-neʼe sei ajuda ita atu la lakon tempu no forsa tanba hanoin barak kona-ba buat neʼebé bele halo ita-nia fiar sai fraku no ba buat neʼebé bele halo ita haksesuk malu.

“Imi ida neʼebé mak hodi hanoin barak, bele hanaruk nia moris sasukat ida tan?” (Mt 6:27, Liafaun diak ba imi, primeira edisaun) Kuandu Jesus koʼalia ba ema-lubun boot, inklui mós ninia dixípulu sira, nia uza pergunta neʼe atu hatudu katak importante atu sira husik Maromak Jeová tau matan ba sira. Iha loron ikus sira-neʼe iha buat barak neʼebé halo ita hanoin barak, maibé hanoin demais kona-ba buat sira-neʼe sei la hanaruk ita-nia moris ka sei la halo ita-nia moris sai diʼak liután.

Bainhira ita sente laran-susar kona-ba ita-nia an no sira neʼebé ita hadomi, hanoin-hetan Jesus  nia pergunta neʼe bele ajuda ita atu iha hanoin neʼebé loos kona-ba buat hotu. Ida-neʼe bele ajuda ita atu la hanoin demais no atu halakon tiha hanoin neʼebé la loos neʼebé bele halo ita kole iha isin, neon, no sentimentu. Hanesan Jesus hatete, ita-nia Aman iha lalehan, neʼebé fó hahán ba manu sira, no fó hatais ba ai sira, hatene buat neʼebé ita presiza.—Mt 6:26-34.

“Ema ida bele tau ahi ba ninia hirus matan, maibé ahi la han ninia hatais ka lae?” (Prov 6:27) Kapítulu sia primeiru husi livru Provérbios mak inklui konsellu husi aman ida neʼebé hanorin ninia oan kona-ba matenek neʼebé nia bele uza iha ninia moris. Pergunta iha leten hatudu kona-ba rezultadu aat neʼebé ema bele hetan se halo sala-foʼer. (Prov 6:29) Se ita mak mane no ita haree katak ita book beibeik feto ka se ita mak feto no haree katak ita book beibeik mane ka ita iha hakarak aat seksuál nian ba ema seluk, diʼak se pergunta neʼe sai hanesan avizu ida ba perigu ida-neʼe. Maski pergunta neʼe bele proteje ita husi hahalok imorál, maibé tuir loloos pergunta neʼe mós bele uza atu husu ba ita-nia an bainhira ita hasoru tentasaun atu halo hahalok ruma neʼebé ladún matenek. Ida-neʼe hatudu ho klaru katak matadalan husi Bíblia tuirmai neʼe mak loos: “Ema ida sei koʼa buat neʼebé nia kari.”—Gal 6:7.

“Imi sé atu tesi lia ba ema seluk nia atan?” (Rom 14:4) Iha apóstolu Paulo nia karta ba ema kristaun iha Roma, nia koʼalia kona-ba problema neʼebé akontese iha kongregasaun iha tempu neʼebá. Ema kristaun balu neʼebé mai husi kultura ka rai oioin, sira tesi lia ba sira-nia maluk seluk nia desizaun no hahalok. Paulo nia pergunta neʼe fó-hanoin sira atu simu malu didiʼak no husik buat hotu ba Maromak Jeová nia liman atu nia tesi lia.

Nuneʼe mós ohin loron, Maromak Jeová nia povu mai husi rai oioin no iha situasaun neʼebé la hanesan. Maski nuneʼe, Maromak Jeová tau ninia atan sira hamutuk iha unidade. Ita mós hola parte atu haburas unidade neʼe ka lae? Se ita lalais deʼit atu la simu irmaun ka irmán seluk nia hahalok, importante tebes ba ita atu husu ba ita-nia an Paulo nia pergunta neʼebé temi iha leten.

Pergunta sira halo ita hakbesik liután ba Maromak Jeová

Ezemplu sira-neʼe hatudu katak pergunta sira neʼebé hakerek iha Maromak nia Liafuan iha forsa duni atu book ita atu hatene ita-nia an. Hanoin kona-ba liafuan iha versíkulu sira antes no depois pergunta sira, bele ajuda ita atu hatene oinsá ita bele uza ida-neʼe iha ita-nia moris. No mós nuʼudar ita lee Bíblia, ita sei haree pergunta diʼak barak neʼebé bele ajuda ita.—Haree kaixa iha pájina 14.

Hodi husik pergunta sira neʼebé hakerek iha Maromak nia Liafuan book ita, ida-neʼe sei ajuda ita atu halo ita-nia hanoin no ita-nia laran tuir Maromak Jeová nia dalan sira neʼebé loos. Depois Maromak Jeová husu tiha pergunta ba Job, Job hatete: “Husi lia-anin haʼu rona ona kona-ba Ita, maibé agora haʼu haree Ita ho haʼu-nia matan rasik.” (Jó 42:5) Sin, Job sente katak Maromak besik liu ba nia, hanesan nia haree rasik Maromak ho ninia matan. Dixípulu Tiago mós hatete: “Hakbesik ba Maromak, no nia sei hakbesik ba imi.” (Tgo 4:8) Tan neʼe, diʼak atu ita hotu husik informasaun hotu husi Maromak nia Liafuan, inklui mós pergunta sira, atu ajuda ita laʼo ba oin iha lia-loos no sente katak Maromak Jeová besik tebes ba ita!

[Kaixa iha pájina 14]

Oinsá mak husu pergunta sira tuirmai neʼe ajuda ita atu hanoin hanesan Maromak Jeová?

▪ “ Jeová gosta buat karan no sakrifísiu liu fali halo tuir ninia liafuan ka lae?”—1 Sam 15:22.

▪ “ Ida neʼebé kria matan, nia rasik la bele haree ka?”—Sal 94:9.

▪ “ Se ema buka sira rasik nia glória, neʼe mak glória ka lae?”—Prov 25:27.

▪ “ Ó iha direitu atu sai hirus ka lae?”—Jonas 4:4.

▪ “ Ema ida manán loos sá wainhira nia manán mundu tomak, maibé lakon nia moris?”—Mt 16:26.

▪ “ Buat sá mak sei haketak ita husi Kristu?”—Rom 8:35.

▪ “ Imi iha buat saida neʼebé imi la simu uluk?”—1 Kor 4:7.

▪ “ Oinsá naroman bele hamutuk ho nakukun?”—2 Kor 6:14.

[Dezeñu iha pájina 15]

Saida mak Job aprende husi pergunta neʼebé Maromak Jeová husu ba nia?