Tahan susar sira hametin ami-nia fiar ba Maromak Jeová

Esperiénsia husi Ada Dello Stritto

Haʼu foin hakerek eskritura loroloron nian iha haʼu-nia kadernu. Haʼu tinan 36, maibé haʼu uza oras rua atu hakerek liafuan sira-neʼe. Tansá haʼu presiza uza tempu naruk hanesan neʼe atu hakerek liafuan balu deʼit? Haʼu-nia inan sei esplika.—Joel

HAʼU no haʼu-nia laʼen hetan batizmu nuʼudar Testemuña ba Jeová iha tinan 1968. Depois hetan tiha oan-mane naʼin-rua neʼebé iha saúde diʼak, haʼu mós koʼus oan ida tan. Maski seidauk toʼo fulan sia, maibé nia moris ona, no ami hanaran nia Joel. Nia moris iha tinan 1973 iha ospitál iha sidade Binche iha rai-Béljika, maizumenus kilómetru 60 husi sidade Bruxelas iha parte súl. Nia todan kilograma 1,7 deʼit. Kuandu haʼu alta, Joel presiza hela nafatin iha ospitál atubele aumenta nia todan.

Tanba Joel nia saúde seidauk sai diʼak, semana balu tuirmai, haʼu-nia laʼen, Luigi, no haʼu lori ami-nia oan ba doutór labarik nian. Depois koko tiha Joel, doutór hatete: “Deskulpa. Haʼu tenke fó-hatene katak Joel nia saúde la hanesan ho nia maun sira.” Ami hotu nonook ba tempu balu. Iha tempu neʼebá, haʼu hatene katak ami-nia bebé iha problema saúde nian neʼebé sériu. Tuirmai doutór bolu haʼu-nia laʼen hodi koʼalia mesamesak ho nia no dehan: “Imi-nia bebé iha trisomia 21,” neʼe mak moras ida neʼebé mós iha naran síndroma Down. *

Rezultadu husi konsulta neʼebé ami halo uluk halo ami triste, maibé ami deside atu konsulta ho doutór espesialista seluk. Nia koko Joel besik oras ida maibé la koʼalia buat ruma. Ba Luigi no haʼu, ida-neʼe hanesan buat neʼebé la iha rohan. Ikusmai, doutór foti matan no hatete: “Imi-nia oan sei presiza atensaun barak liu husi imi.” Depois ho laran-diʼak nia hatutan tan hodi dehan: “Maibé Joel sei kontente tebes tanba nia iha inan-aman neʼebé hadomi nia!” Ho laran-todan haʼu koʼus Joel, no ami lori nia ba uma. Iha tempu neʼebá nia foin semana ualu deʼit.

Reuniaun kristaun no haklaken hametin ami

Rezultadu husi konsulta seluk tan hatudu katak Joel iha moras ruin no nia fuan la normál. Tanba ninia fuan boot tebes, ida-neʼe hanehan nia aten-book no tan neʼe fasil ba  nia atu kona moras ruma. Lakleur, antes nia fulan haat, Joel hetan moras bronkopneumonia, no tan neʼe nia tenke bá fali ospitál, no doutór tau nia iha fatin ketak hodi ema labele vizita nia. Ami triste tebes tanba haree nia hetan terus. Ami hakarak atu koʼus nia no tau matan ba nia, maibé durante semana sanulu, doutór la fó lisensa ba ami atu kaer nia. Luigi no haʼu haree deʼit husi dook, ami hakoʼak malu, no halo orasaun.

Durante tempu susar sira-neʼe, ami kontinua tuir reuniaun hamutuk ho David no Marc, neʼebé tinan 6 no 3. Ba ami, tuir reuniaun iha Salaun Reinu halo ami sente hanesan ami iha Maromak Jeová rasik nia liman laran. Kuandu ami iha reuniaun fatin, hamutuk ho maluk kristaun sira, ami sente katak ami bele entrega ami-nia todan ba Maromak Jeová, no ami sente hakmatek iha laran. (Sal 55:22) Enfermeira sira neʼebé tau matan ba Joel hatete katak ami bele halo desizaun ho diʼak liu tanba ami tuir beibeik ami-nia reuniaun kristaun sira.

Durante tempu neʼebá, haʼu mós harohan beibeik ba Maromak Jeová atu fó forsa mai haʼu hodi haʼu bele bá haklaken. Duké hela iha uma no tanis, haʼu hakarak koʼalia ba ema seluk hodi fó-hatene sira oinsá haʼu hetan forsa tanba haʼu iha fiar ba Maromak nia promesa kona-ba mundu foun iha neʼebé moras sei la iha tan. Kuandu haʼu bá haklaken, haʼu sente katak Maromak Jeová hatán haʼu-nia orasaun.

“Ami la fiar ida-neʼe akontese!”

Loron neʼebé ami lori fali Joel husi ospitál, ami kontente tebetebes! Maibé loron tuirmai, ami-nia laran-haksolok sai fali laran-triste. Joel sai moras fali, no ami tenke lori nia lalais ba ospitál. Depois koko tiha nia, doutór fó-hatene ami: “Joel sei moris tan ba fulan neen deʼit.” Fulan haat tuirmai, kuandu nia maizumenus fulan ualu, ami haree katak doutór nia liafuan neʼe komesa sai loos tanba Joel nia saúde sai aat liután. Doutór ida tuur hamutuk ho ami no hatete: “Deskulpa. La iha buat seluk tan neʼebé ami bele halo atu salva nia.” Depois nia hatutan tan: “Agora, Maromak Jeová deʼit mak bele ajuda nia.”

Haʼu bá fali Joel nia kuartu iha ospitál. Maski haʼu sente laran-taridu tebetebes no kole liu, maibé haʼu lakohi duni husik nia sorin. Irmán balu troka malu atu akompaña haʼu hodi Luigi bele tau matan ba ami-nia oan naʼin-rua seluk. Semana ida liu. Depois, derrepente deʼit, Joel hetan atake-fuan. Enfermeira sira tama lalais, maibé sira la bele halo buat ida atu ajuda nia. Depois minutu balu liutiha, enfermeira ida ho lian neʼebé mamar hatete: “Hotu ona . . .” Iha tempu neʼe, haʼu sente haʼu la iha forsa tan, haʼu tanis makaʼas no husik hela kuartu neʼe. Haʼu koko atu halo orasaun ba Maromak Jeová, maibé susar ba haʼu atu hetan liafuan ida atu fó sai haʼu-nia laran-kanek. Minutu 15 liutiha, enfermeira ida fó-hatene: “Joel komesa sai diʼak fali!” Nia kaer haʼu-nia liman no hatete: “Mai, Ita bele haree nia agora.” Kuandu haʼu bá fali haree Joel, nia komesa dada iis fali! Lakleur deʼit, enfermeira no doutór barak rona kona-ba buat neʼebé akontese. Sira balu mai atu haree nia no hatete: “Ami la fiar ida-neʼe akontese!”

Joel halo ami hakfodak

Durante tinan primeiru iha Joel nia moris, doutór labarik nian sempre hatete ba ami: “Joel presiza beibeik imi-nia domin.” Luigi no haʼu haree beibeik katak Aman Jeová hadomi no tau matan ba ami iha tempu susar neʼe, tan neʼe ami mós hakarak halo ami-nia oan sente ami-nia domin ba nia. Ami iha  oportunidade barak atu hatudu domin ba Joel tanba nia presiza ajuda atu halo buat hotu.

Ba tinan hitu primeiru husi Joel nia moris, ami hasoru situasaun neʼebé hanesan. Durante fulan-Outubru toʼo fulan-Marsu, Joel sempre sai moras, no ami sempre tama-sai ospitál. Iha tempu hanesan, haʼu mós hakaʼas an atu uza tempu hamutuk ho ami-nia oan David no Marc. Kona-ba sira, sira mós hakaʼas an atu ajuda Joel iha buat oioin, no ida-neʼe lori rezultadu diʼak. Porezemplu, uluk doutór balu hatete ba ami katak Joel sei nunka bele laʼo. Maibé loron ida, kuandu Joel tinan haat, ami-nia oan Marc hatete: “Mai lai, Joel, hatudu toʼok ba amá saida mak ó bele halo!” Haʼu sente hakfodak loos, Joel komesa atu laʼo! Ami hotu haksolok, no ho laran ami halo orasaun hamutuk nuʼudar família atu hatoʼo ami-nia agradese ba Aman Jeová. Iha loron seluk, maski Joel bele halo buat kiʼik deʼit, maibé ami sempre gaba nia husi laran.

Treinu husi kiʼik kedas fó rezultadu diʼak

Se bele, ami sempre lori Joel hamutuk ho ami ba reuniaun sira iha Salaun Reinu. Atu moras la kona nia, ami tau nia iha karreta bebé nian neʼebé taka ho plástiku. Ema bele haree nia no nia bele haree ema, maibé nia la sai moras. Hanesan neʼe, nia mós kontente atu hamutuk ho irmaun-irmán sira iha kongregasaun.

Ami-nia maluk kristaun ajuda ami iha dalan oioin no sempre hatudu domin ba ami. Ida-neʼe fó forsa mai ami. Irmaun ida sempre fó-hanoin mai ami liafuan husi Isaías 59:1 neʼebé hatete: “Haree! Maromak Jeová nia liman la sai badak liu toʼo nia la bele salva ema, ka nia tilun la sai todan liu toʼo nia la bele rona.” Liafuan furak sira-neʼe ajuda ami atu tau fiar ba Maromak Jeová.

Nuʼudar Joel sai boot ba beibeik, ami hakaʼas an atu ajuda nia atu uza nia moris atu serbí Maromak Jeová. Ami sempre buka oportunidade atu koʼalia ho nia kona-ba Aman Jeová hodi Joel bele hadomi no haburas relasaun diʼak ho ninia Aman iha lalehan. Ami harohan ba Maromak Jeová atu haraik bensaun ba ami-nia hakaʼas-an atu treinu ami-nia oan.

Kuandu nia sai joven ona, ami ho laran-haksolok haree katak Joel gosta atu fahe lia-loos husi Bíblia ba ema neʼebé nia hasoru. Loron ida kuandu nia tinan 14, nia baixa tanba hetan operasaun. Maski nuneʼe, Joel husu haʼu: “Amá, haʼu bele fó doutór livru ida, neʼebé esplika kona-ba Bíblia ka lae?” Ida-neʼe halo haʼu sente kontente tebes. Tinan balu tuirmai, Joel hetan operasaun ida tan. Ami hatene katak karik nia bele lakon nia moris. Antes operasaun neʼe, Joel fó karta ida neʼebé ami prepara hamutuk ba nia doutór. Karta neʼe esplika ninia desizaun kona-ba raan. Doutór husu ba Joel: “Ita apoia ida-neʼe ka lae?” Joel ho laran-metin hatete: “Sin, señór doutór.” Ami sente kontente tebes tanba ami-nia oan tau fiar ba ninia Kriadór no hakarak duni atu halo Nia kontente. Ema sira neʼebé serbisu iha ospitál neʼe apoia ami, no ami agradese ba ida-neʼe.

Joel laʼo ba oin iha lia-loos

Kuandu Joel tinan 17, nia hetan batizmu hodi hatudu katak nia dedika an ba Maromak. Ami sei nunka haluha loron neʼe! Hodi haree nia laʼo ba oin iha lia-loos halo ami sente kontente  tebes. Husi tempu neʼebá, ninia domin ba Aman Jeová no ninia laran-manas ba lia-loos la sai menus. Tuir loloos, ba ema hotu neʼebé nia hasoru, Joel gosta atu hatete: “Lia-loos mak haʼu-nia moris!”

Kuandu nia besik tinan 20, Joel aprende atu lee no hakerek. Nia presiza hakaʼas an duni. Nia sente nia hetan susesu kuandu nia bele hakerek liafuan ida tan, maski liafuan neʼe simples. Husi tempu neʼebá, nia komesa nia loron hodi estuda livru Examining the Scriptures Daily (Eskritura loroloron nian). Tuirmai, nia hakaʼas an duni atu hakerek eskritura neʼe iha ninia kadernu. Toʼo agora, nia iha kadernu barak la halimar neʼebé nakonu ona ho eskritura sira!

Iha loron reuniaun nian, Joel hakarak atu ami toʼo sedu iha Salaun Reinu tanba nia hakarak atu fó benvindu ba ema hotu neʼebé tama salaun. Durante reuniaun sira, nia kontente atu fó komentáriu no hola parte atu halo drama kiʼik. Nia mós simu knaar atu ajuda ho mikrofone no halo serbisu seluk tan. Semana-semana, se nia la moras, nia mós hamutuk ho ami atu bá haklaken. Iha tinan 2007, kongregasaun fó avizu katak Joel agora serbí nuʼudar atan ministeriál. Ami tanis tan laran-haksolok. Bensaun neʼe hatudu duni Maromak Jeová nia laran-diʼak!

Ami sente Maromak Jeová lolo liman atu ajuda ami

Iha tinan 1999 ami hasoru susar ida tan. Ema ida neʼebé kaer karreta la ho kuidadu, xoke ami-nia karreta, no Luigi hetan kanek todan. Doutór presiza tesi nia ain ida, no halo operasaun balu ba ninia ruin kotuk. Dala ida tan, hodi tau fiar ba Maromak Jeová, ami sente kbiit neʼebé nia fó ba nia atan sira neʼebé presiza. (Flp 4:13) Maski Luigi aleijadu hela, maibé ami koko atu hanoin kona-ba buat neʼebé diʼak. Tanba Luigi la bele halo serbisu atu manán osan, nia iha tempu barak liu atu tau matan ba Joel. Ida-neʼe fó oportunidade mai haʼu atu uza tempu barak liután iha Maromak nia serbisu. Luigi bele mós uza tempu barak liután atu tau matan ba família nia adorasaun ba Maromak, no ba sira iha kongregasaun laran, tan nia kontinua atu serbí nuʼudar koordenadór ba grupu katuas nian.

Tanba ami-nia situasaun la hanesan ho família seluk, ami bele uza tempu barak liu atu hamutuk nuʼudar família. Nuʼudar tempu liu ba daudauk, ami aprende ona atu hanoin malu no la buka buat neʼebé ami la bele hetan. Kuandu ami sente laran-tun, ami hatoʼo ami-nia sentimentu ba Maromak Jeová liuhusi orasaun. Bainhira ami-nia oan David no Marc sai boot ona no hela ketak, neineik-neineik sira para serbí Maromak Jeová. Ida-neʼe halo ami sente triste, maibé ami hein katak loron ida sira sei fila fali ba Aman Jeová.—Lc 15:17-24.

Durante tinan sira-neʼe, ami sente Maromak Jeová nia ajuda, no ami mós aprende atu sadere ba nia kuandu ami hasoru susar oioin. Ami gosta loos liafuan husi Isaías 41:13 neʼebé hatete: “Haʼu Jeová, ó-nia Maromak, haʼu kaer ó-nia liman loos, Ida neʼebé hatete ba ó: ‘Keta taʼuk. Haʼu rasik sei ajuda ó.’” Hodi hatene katak Maromak Jeová kaer metin ami-nia liman, halo ami sente kmaan. Loos duni, ami bele hatete katak tahan susar sira hametin ami-nia fiar ba Jeová, ami-nia Aman iha lalehan.

[Nota–rodapé]

[Dezeñu sira pájina 16, 17]

Joel hamutuk ho nia inan, Ada

[Dezeñu iha pájina 18]

Ada, Joel, no Luigi

[Dezeñu iha pájina 19]

Joel gosta fó benvindu ba irmaun-irmán neʼebé tama Salaun Reinu