Feto sira, tansá mak imi hakru’uk ba ulun sira?
Feto sira, tansá mak imi hakru’uk ba ulun sira?
“La’en mak nia feen nia ulun.”—1 KOR 11:3.
1, 2. (a) Apóstolu Paulo hakerek saida kona-ba Maromak Jeová nia arranju ulun nian? (b) Ita sei ko’alia kona-ba pergunta saida de’it?
MAROMAK JEOVÁ haleno apóstolu Paulo atu fó-hatene sé mak iha knaar nu’udar ulun no sé mak tenke hakru’uk ba ulun sira. Paulo hakerek: “Kristu mak ema ida-ida nia ulun . . no Maromak mak Kristu nia ulun.” (1 Kor 11:3) Iha lisaun primeiru, ita aprende tiha ona katak Jesus simu ho laran no sente kontente atu hakru’uk ba nia Ulun, Maromak Jeová, no katak mane kristaun sira hakru’uk ba Kristu nu’udar sira-nia ulun. Kuandu Kristu hala’o nia knaar nu’udar ulun, nia hatudu laran-di’ak, laran-sadi’a no hanoin ema seluk. Mane sira iha kongregasaun laran presiza hatudu hahalok sira-ne’e ba ema seluk, liuliu ba sira-nia kaben.
2 Maibé, oinsá ho feto sira? Sé mak sira-nia ulun? Paulo hakerek: “La’en mak nia feen nia ulun.” Liafuan ne’ebé Maromak leno ne’e katak sá loos? Feto sira tenke halo tuir nafatin matadalan ne’e maski la’en la’ós fiar-na’in ka lae? Hakru’uk ba mane nu’udar ulun dehan katak feen sira tenke sai hanesan atan ne’ebé halo tuir de’it buat hotu-hotu ka lae? Kuandu família halo desizaun boot, feen tenke nonook de’it ka lae? Hahalok saida de’it mak book ema atu gaba feto sira?
“Ha’u sei halo ba nia ajuda-na’in ida”
3, 4. Tanbasá mak di’ak ba la’en no feen atu tuir arranju ulun nian?
3 Maromak mak deside sé mak iha knaar nu’udar ulun. Depois Maromak Jeová kria Adão, nia hatete: “La di’ak atu mane ne’e kontinua hela mesak. Ha’u sei halo ba nia ajuda-na’in ida, atu halo nia sai kompletu.” No depois Maromak kria Eva, Adão sente kontente tebes tanba nia iha maluk no ajuda-na’in to’o nia dehan: “Ne’e mak ruin husi ha’u-nia ruin no isin husi ha’u-nia isin.” (Gên 2:18-24) Adão no Eva iha knaar furak atu sai inan-aman ba ema hotu, no sira-nia oan no bei-oan sei moris nu’udar ema sala-laek iha mundu ne’ebé sei sai jardín kapás.
4 Maibé, tanba Adão no Eva kontra hasoru Maromak, situasaun kapás iha jardín Eden lakon. (Lee Roma 5:12.) Maski nune’e, Maromak hakarak ema atu nafatin halo tuir arranju ulun nian. Ohin loron, kuandu la’en halo didi’ak nia knaar nu’udar ulun no feen loloos hakru’uk ba nia la’en, moris kaben nian sei sai kontente liu. Feen sei sente hanesan Jesus sente kona-ba hakru’uk ba nia Ulun, Aman Jeová. Iha lalehan, antes Jesus mai to’o mundu, nia “haksolok iha [Maromak] nia oin ba tempu hotu”. (Prov 8:30) Tanba ema hotu sala-na’in, dala ruma mane sira la bele hala’o sira-nia knaar nu’udar ulun iha dalan loos, no mós dala ruma feto sira la hakru’uk ba sira-nia kaben. Maski nune’e, bainhira la’en no feen sira haka’as an atu halo sira ida-idak nia knaar, arranju ulun nian sei lori haksolok iha moris kaben nian.
5. Tanbasá mak kaben-na’in sira tenke halo tuir konsellu iha Roma 12:10?
5 Se kaben-na’in hakarak hetan susesu iha sira-nia moris kaben nian, sira tenkesér halo tuir Bíblia nia konsellu ba ema kristaun: “Hadomi malu ho domin loos; buka atu sai uluk atu hamta’uk maluk sira.” (Rom 12:10) No mós, la’en no feen sira tenke haka’as an atu “hatudu laran-di’ak ba malu, hatudu laran-sadi’a, fó perdua ba malu ho laran”.—Ef 4:32, MF.
Kuandu Ita-nia la’en la’ós fiar-na’in
6, 7. Rezultadu di’ak saida mak bele mosu kuandu feen kristaun hakru’uk ba nia la’en ne’ebé la’ós fiar-na’in?
6 Oinsá se Ita-nia kaben la serbí Maromak Jeová? Dala barak, la’en mak ida ne’ebé la’ós fiar-na’in. Se nune’e, feen tenke hakru’uk ba nia la’en ka lae? Bíblia fó resposta: “Feto sira, imi rona imi-nia kaben bá; atu imi bele lori sira balun mai ne’ebé la halo tuir liafuan, la’ós tanba liafuan ruma, maibé ho sira feen nia hahalok, wainhira sira haree imi-nia hahalok santu no momoos.”—1 Ped 3:1, 2.
7 Maromak nia Liafuan hatete katak feen sira tenke nafatin hakru’uk ba sira-nia kaben maski nia la’ós fiar-na’in. Feen nia hahalok di’ak bele book la’en hodi hanoin kona-ba tansá feen hatudu hahalok di’ak hanesan ne’e. Dala ruma, rezultadu mak la’en hakarak atu buka-hatene kona-ba ninia feen nia fiar no ikusmai nia mós tama lia-loos.
8, 9. Se la’en nafatin la hatudu laran-di’ak ba feen nia fiar, saida mak feen presiza halo?
8 Maibé, oinsá se la’en nafatin la hatudu laran-di’ak ba feen nia fiar? Bíblia fó konsellu ba feen ne’ebé fiar-na’in atu nafatin hatudu hahalok kristaun nian, maski dala ruma ida-ne’e susar. Porezemplu, 1 Korinto 13:4 dehan: “Domin pasiénsia.” Nune’e, di’ak se feen kristaun ‘la hanoin nia an rasik, maibé ho laran-kmaus no pasiénsia’ tahan hasoru situasaun hotu ho domin. (Ef 4:2) Sin, maski Ita hasoru situasaun susar, ho ajuda husi Maromak nia forsa, espíritu santu, Ita bele nafatin hatudu hahalok kristaun nian.
9 Paulo hakerek: “Ha’u bele halo buat hotu iha Nia ne’ebé fó kbiit mai ha’u.” (Flp 4:13) Maromak nia espíritu bele fó forsa ba kaben-na’in kristaun atu halo buat ne’ebé baibain sira la bele halo. Porezemplu, kuandu ida hasara no hatudu hahalok ladi’ak ba nia kaben, baibain kaben ne’e hakarak selu fali. Maibé, Bíblia fó konsellu ba ema kristaun: “Keta selu aat ho aat ba ema. . . . Basá hakerek tiha, ‘Ha’u mak selu aat ba aat, Ha’u sei selu fali. Na’i dehan nune’e.’” (Rom 12:17-19) No mós, 1 Tesalonika 5:15 hatete: “Haree katak ema la buka selu aat ho aat; imi sei hanoin buat ne’ebé di’ak liu ba malu no ba komunidade tomak.” Ho ajuda husi Maromak Jeová nia espíritu santu, ita bele halo buat ne’ebé ita la bele halo ho ita rasik nia forsa. Entaun, importante tebes atu harohan hodi husu Maromak atu haraik ninia espíritu santu hodi ajuda ita hatudu hahalok ne’ebé ita kuran!
10. Saida mak Jesus halo bainhira ema haree nia la di’ak?
10 Jesus hatudu ezemplu di’ak tebes kona-ba hatudu hahalok di’ak maski ema seluk haree nia la di’ak. 1 Pedro 2:23 hatete: “Wainhira ema hasara nia, nia la hasara fali; wainhira nia terus, nia la si’ak fali; maibé nia tau laran-metin ba Ida ne’ebé tesi lia loloos.” Mai ita halo tuir Jesus nia ezemplu ne’e. Keta sai hirus tanba ema seluk nia hahalok ne’ebé ladi’ak. Maibé, simu konsellu ne’ebé Bíblia fó ba ema kristaun hotu: “[Hatudu] laran-kmaus no haraik-an. Keta selu aat ho aat, eh hirus malu ho hirus malu.”—1 Ped 3:8, 9.
Feto mós iha knaar furak
11. Feto kristaun balu simu knaar espesiál saida?
11 Hakru’uk ba mane nu’udar ulun dehan katak feen sira tenke sai hanesan atan ne’ebé halo tuir de’it buat hotu-hotu ka lae? Kuandu família halo desizaun boot, feen tenke nonook de’it ka lae? Lae. Maromak Jeová fó knaar furak ba mane no mós feto. Hanoin to’ok, Maromak fó knaar espesiál ba ema na’in-144.000 atu sa’e ba lalehan hodi ukun mundu nu’udar liurai no amlulik sira hamutuk ho Kristu! Ema na’in-144.000 ne’e inklui mós feto sira. (Gal 3:26-29) Klaru katak Maromak Jeová la haree feto sira nu’udar atan ne’ebé tenke halo tuir de’it no labele hola parte atu halo desizaun boot sira.
12, 13. Konta to’ok ezemplu ne’ebé hatudu katak feto sira simu knaar nu’udar profeta.
12 Porezemplu, iha Bíblia nia tempu, feto balu simu knaar nu’udar profeta. Joel 2:28, 29 fó-hatene nanis: “Ha’u sei fakar ha’u-nia espíritu ba ema oioin, no imi-nia oan-mane no imi-nia oan-feto sei fó sai profesia. . . . No mós iha tempu ne’ebá, ha’u sei fakar ha’u-nia espíritu ba atan-mane no atan-feto.”
13 Iha loron Pentekostes tinan 33 Jesus nia dixípulu maizumenus na’in-120 halibur hamutuk iha Jeruzalein. Sira balu mak feto. Maromak fakar nia espíritu ba sira hotu. Iha tempu ne’ebá, Pedro esplika katak eskritura iha livru Joel sai loos ba sira hotu, hodi dehan: “Ne’e mak buat ne’ebé hateten ona husi profeta Joel: ‘Sei mosu iha loron ikus,’ Maromak dehan, ‘katak ha’u sei fakar ha’u-nia espíritu balun ba ema hotu. Imi-nia oan-mane no oan-feto sira sei ko’alia iha ha’u naran; imi-nia foin-sa’e sira sei haree vizaun; imi-nia katuas sira sei mehi. Tebes, ba ha’u-nia atan-mane no atan-feto ha’u sei fakar ha’u-nia espíritu balun iha loron hirak ne’ebá no sira hotu sei ko’alia hodi ha’u-nia naran.”—Apos 2:16-18.
14. Iha apóstolu sira-nia tempu, feto sira halo serbisu importante saida de’it?
14 Iha apóstolu sira-nia tempu, feto sira mós halo serbisu importante atu ajuda habelar relijiaun kristaun ba fatin hotu. Sira haklaken Maromak nia Reinu ba ema seluk no halo buat seluk tan ne’ebé apoia serbisu haklaken. (Lc 8:1-3) Porezemplu, apóstolu Paulo bolu feto ida naran Febe nu’udar “diakonesa [“atan”, MF] iha kreda iha Sénkreas”. (Rom 16:1) No kuandu Paulo haruka kumprimentus ba nia maluk serbisu-na’in, nia mós temi feto balu inklui Trifena no Trifosa “ne’ebé serbisu iha Na’i”. Nia mós fó kumprimentus ba Pérsida “ne’ebé serbisu maka’as iha Na’i”.—Rom 16:12.
15. Oinsá mak feto sira hola parte iha serbisu habelar relijiaun kristaun ohin loron?
15 Ohin loron, ema na’in-7.000.000 liu haklaken lia-foun di’ak Reinu nian iha mundu tomak, no sira barak mak feto sira, inklui feto-klosan no ferik sira. (Mt 24:14) Sira barak mak pioneiru, misionáriu, no serbí iha Betel. David hakerek knananuk: “Maromak Jeová rasik mak hatete liafuan sira-ne’e; feto sira ne’ebé fó sai lia-foun di’ak mak tropa ne’ebé boot.” (Sal 68:11) Liafuan sira-ne’e sai loos ona! Maromak Jeová hafolin duni feto sira-nia haka’as-an atu haklaken hodi halo tuir ninia hakarak. Sin, maski Maromak husu feto sira atu hakru’uk ba sira-nia ulun, ne’e la dehan katak nia hakarak feto sira atu sai hanesan atan ne’ebé nonook de’it.
Feto na’in-rua ne’ebé la tuur nonook
16, 17. Oinsá mak Sara nia ezemplu hatudu katak feen la’ós hanesan atan ne’ebé halo tuir de’it buat hotu-hotu?
16 Se Maromak Jeová fó knaar furak ba feto sira, di’ak ba la’en atu husu feen nia hanoin antes nia halo desizaun importante, loos ka lae? Tuir loloos, di’ak ba la’en atu husu feen nia hanoin. Bíblia konta istória balu kona-ba feto ne’ebé fó sai nia hanoin ba nia la’en maski la’en la husu, ka kona-ba feto ne’ebé halo desizaun boot maski la’en la hatene. Mai ita ko’alia kona-ba ezemplu rua.
17 Sara, Abraão nia feen, husu beibeik Abraão atu duni sai ninia feen-ki’ik hamutuk ho nia oan tanba sira la hatudu respeitu. “Ida-ne’e halo Abraão la kontente duni” maibé Maromak hanoin la hanesan Abraão. Jeová hatete ba nia: “Keta husik buat ne’ebé Sara hatete beibeik kona-ba labarik ne’e no ó-nia atan-feto halo ó sente la kontente. Rona ba ninia lia.” (Gên 21:8-12) Abraão halo tuir Maromak Jeová hodi rona ba Sara, no halo buat ne’ebé Sara husu.
18. Maski Abigail la fó-hatene nia kaben, saida mak nia halo?
18 Hanoin mós kona-ba Abigail, Nabal nia feen, nia ezemplu. Kuandu David halai husi Liurai Saul ne’ebé laran-moras ba nia, nia hela ba tempu balu besik ema sira-ne’ebé hein Nabal nia bibi-lubun sira. Duké hadau ema riku ne’e nia bibi sira, David hamutuk ho nia ema fó seguransa ba bibi sira-ne’e. Maibé, Nabal mak “ema si’ak no halo hahalok aat”. Nia “ema ne’ebé la serve” no “beik-teen”. Bainhira David nia ema husu ho respeitu atu Nabal fó ai-han ba sira, Nabal lakohi fó no “hakilar ko’alia aat sira”. Kuandu Abigail rona kona-ba ne’e, saida mak nia halo? Nia la fó-hatene Nabal, maibé nia “ho lalais foti paun atus-rua, no tua-uvas buli sanan-rai boot rua, no bibi lima ne’ebé prepara ona atu te’in, no fini seá lima ne’ebé tunu tiha ona, no dose uvas-maran atus-ida, no dose figu-maran atus-rua”, no nia lori fó ba David no nia ema sira. Buat ne’ebé Abigail halo loos ka sala? Buat ne’ebé akontese depois ne’e hatudu katak nia halo buat ne’ebé loos. Bíblia hatete: “Maromak Jeová baku Nabal, no nia mate.” Ikusmai, David kaben ho Abigail.—1 Sam 25:3, 14-19, 23-25, 38-42.
‘Feto ne’ebé hetan gaba’
19, 20. Saida mak razaun ne’ebé loos atu gaba feto ida?
19 Bíblia gaba feen sira-ne’ebé halo tuir Maromak Jeová nia matadalan sira. Iha Provérbios ko’alia kona-ba “feen ne’ebé matenek” hodi hatete: “Nia folin-boot liu fali ahu-ruin. Nia na’in nia fuan fiar ba nia, no kuandu nia manán buat ruma, la iha balu ne’ebé lakon. Nia fó fali ba nia na’in buat ne’ebé di’ak, la’ós buat ne’ebé aat, iha loron hotu iha nia moris.” Liután ne’e, “nia loke nia ibun hodi ko’alia buat ne’ebé matenek, no lei domin nian mak ukun ninia nanál. Nia tau matan ba buat sira ne’ebé akontese iha nia uma-laran, no nia la han paun baruk nian. Nia oan-mane sira hamriik no dehan sai katak nia kontente, ninia na’in hamriik, no gaba nia”.—Prov 31:10-12, 26-28.
20 Saida mak razaun ne’ebé loos atu gaba feto ida? Provérbios 31:30 dehan: “Liafuan no hahalok ne’ebé ema gosta bele sai falsu, no oin bonita bele sai saugati de’it, maibé feto ne’ebé ta’uk ba Maromak Jeová mak ida ne’ebé sei hetan gaba.” Feen ne’ebé ta’uk ba Maromak Jeová sei halo tuir arranju atu hakru’uk ba nia ulun sira. “La’en mak nia feen nia ulun”, hanesan mós “Kristu mak ema ida-ida nia ulun”, no “Maromak mak Kristu nia ulun”.—1 Kor 11:3.
Hafolin Maromak nia prezente
21, 22. (a) Tanbasá mak ema kristaun ne’ebé kaben ona hakarak fó-agradese ba Maromak tan prezente moris kaben nian? (b) Tanbasá mak ita hakarak halo tuir Maromak Jeová nia arranju kona-ba ulun? (Haree kaixa iha pájina 17.)
21 Ema kristaun ne’ebé kaben ona iha razaun barak atu fó-agradese ba Maromak! Liuliu, sira bele fó-agradese ba Maromak nia prezente moris kaben nian, tanba sira bele kaer liman ba malu nu’udar sira la’o ho Maromak Jeová. (Rute 1:9; Miq 6:8) Maromak ne’ebé harii moris kaben nian hatene di’ak liu oinsá ita bele iha moris kaben nian ne’ebé kontente. Tan ne’e, mai ita halo tuir ninia hakarak hodi “Maromak Jeová nia ksolok sei sai ita-nia fatin seguru”, maski mundu ne’e iha susar laran.—Neem 8:10.
22 La’en kristaun ne’ebé hadomi nia feen hanesan nia hadomi ninia an rasik, sei hala’o nia knaar nu’udar ulun ho laran-maus no laran-di’ak. Feen ne’ebé halo tuir Maromak sei apoia no hatudu respeitu ba la’en; no nia la’en sei hadomi tebes nia. Buat ne’ebé importante liu hotu mak sira-nia ezemplu di’ak nu’udar la’en no feen sei fó glória ba Maromak Jeová.
Ita hanoin-hetan?
• Saida mak Maromak Jeová nia arranju ulun nian?
• Tanbasá mak kaben-na’in sira tenke halo tuir konsellu atu hamta’uk malu?
• Feen kristaun tenke hatudu hahalok saida de’it, maski nia la’en la’ós fiar-na’in?
• Tanbasá mak di’ak ba la’en atu husu feen nia hanoin antes halo desizaun ne’ebé boot?
[Pergunta estudu nian]
[Kaixa iha pájina 17]
Tanbasá mak hakru’uk ba sira ne’ebé iha knaar nu’udar ulun?
Maromak Jeová halo arranju katak ninia kriatura matenek hotu iha ulun ne’ebé sira tenke hakru’uk ba. Arranju ne’e lori buat di’ak ba anju no ema. Arranju ne’e fó oportunidade ba sira atu uza sira-nia liberdade atu hili. Sira bele hili se sira hakarak fó glória ba Maromak hodi sai ida de’it atu serbí nia ka lae.—Sal 133:1.
Ema kose-mina sira rekoñese no hakru’uk ba Jesus Kristu nu’udar kongregasaun nia ulun. (Ef 1:22, 23) Jesus mós hakru’uk ba Na’i Jeová, no aban-bainrua nia hatudu ida-ne’e kuandu “Oan-Mane rasik sei haraik an mós ba Ida ne’ebé tau hotu iha nia ukun, atu nune’e Maromak bele sai buat hotu ba ema hotu”. (1 Kor 15:27, 28) Entaun, di’ak mós ba ema ne’ebé dedika tiha sira-nia an ba Maromak atu halo tuir arranju ulun nian iha kongregasaun no iha família laran! (1 Kor 11:3; Ebr 13:17) Hodi halo nune’e, ita bele moris hakmatek, tanba Maromak Jeová sei simu ita-nia adorasaun no nia sei haraik bensaun mai ita.—Isa 48:17.
[Dezeñu iha pájina 13]
Orasaun bele ajuda feen atu hatudu hahalok kristaun nian
[Dezeñu iha pájina 15]
Maromak Jeová hafolin serbisu importante ne’ebé feto sira halo ba Maromak nia Reinu