Haran—Sidade ne’ebé rame iha tempu antigu

BAINHIRA sira ne’ebé estuda ona Bíblia rona kona-ba rai-Haran, sira hanoin kedan kona-ba fiar-na’in Abraão. Abraão no nia feen Sara, no mós nia aman Tera no nia sobriñu Lot hela iha sidade Haran bainhira sira la’o rai husi Ur ba rai Kanaán. Iha sidade ne’e, Abraão hetan rikusoin barak. Depois nia aman mate, Abraão kontinua atu la’o ba rai ne’ebé mak Maromak loos promete ba nia. (Gên 11:31, 32; 12:4, 5; Apos 7:2-4) Abraão mós haruka nia atan ne’ebé idade boot liu atu bá Haran, ka área besik Haran, atu buka feen ba Isaac. Abraão nia bei-oan Jacob mós hela iha ne’ebá ba tinan balun.—Gên 24:1-4, 10; 27:42-45; 28:1, 2, 10.

Bainhira Liurai Senaquerib husi Asíria ameasa Liurai Ezequias husi Judá, nia temi nasaun sira ne’ebé nia manán, inklui mós ‘nasaun’ Haran. Bainhira nia temi ‘Haran’ nia la ko’alia de’it kona-ba sidade Haran, maibé mós inklui distritu hotu. (2 Reis 19:11, 12) Ezequiel nia profesia mós temi Haran nu’udar sidade ida ne’ebé halo negósiu barak ho sidade Tiru, no ida-ne’e hatudu katak iha tempu ne’ebá Haran mak sentru importante atu halo negósiu.—Eze 27:1, 2, 23.

Agora, Haran mak sidade ki’ik de’it, ne’ebé besik sidade Sanli Urfa, iha parte loro-sa’e iha rai-Turkia. Maibé iha tempu uluk, Haran mak sidade ne’ebé nakonu ho atividade. Maski sidade barak husi tempu antigu la uza ona naran ne’ebé hakerek iha Bíblia, maibé Haran uza nafatin naran ne’ebé temi iha Bíblia. Naran Haran, ka Harranu iha lia-asíriu, signifika katak “Dalan” ka “Dalan ba kuda-karreta”. Ida-ne’e hatudu katak ema husi sidade boot seluk sempre la’o liu husi Haran, atubele halo negósiu. Tuir informasaun ne’ebé ema hetan iha Haran, Liurai Nabonido husi Babilónia nia inan serbí nu’udar amlulik boot iha templu ba Sin, maromak fulan nian iha Haran. Ema balun dehan katak Nabonido mak hadi’a templu ne’e. Husi tempu ne’ebá, maski nasaun oioin lakon mosu, maibé sidade Haran sei iha to’o agora.

Ohin loron Haran la hanesan ho tempu uluk. Iha tempu antigu, liuliu durante tempu balun, ema haree Haran nu’udar sidade modernu no importante. Maibé, agora Haran mak sidade ki’ik ho uma ne’ebé tradisionál de’it. No besik Haran iha mós uma ne’ebé rahun ona husi nasaun antigu seluk. Iha mundu foun ne’ebé Maromak promete, ema barak ne’ebé uluk moris iha Haran, inklui Abraão, Sara, no Lot, sei hetan moris-hi’as. Karik sira bele konta mai ita informasaun barak liután kona-ba Haran, sidade ne’ebé rame iha tempu antigu.

[Dezeñu iha pájina 20]

Uma ne’ebé rahun ona iha Haran

[Dezeñu iha pájina 20]

Uma tradisionál

[Dezeñu iha pájina 20]

Haran ohin loron