Irmaun sira, kari iha to’os espíritu nian no la’o ba oin!

“Nia kari karik iha to’os espíritu nian, husi to’os ne’e mak nia sei ko’a moris rohan-laek.”—GAL 6:8.

1, 2. Oinsá mak liafuan iha Mateus 9:37, 38 sai loos ohin loron? Tan ne’e, saida mak kongregasaun presiza?

OHIN loron ita haree buat ne’ebé importante tebes akontese iha ema nia istória! Serbisu haklaken ne’ebé Jesus fó-hatene nanis hala’o daudauk iha mundu tomak. Jesus hatete: “To’os boot duni, maibé serbisu-na’in uitoan. Ne’e duni imi harohan ba to’os-na’in atu haruka serbisu-na’in sira ba nia to’os.” (Mt 9:37, 38) Maromak Jeová hatán orasaun sira-ne’e iha dalan ne’ebé boot liu fali tempu uluk. Durante tinan 2009, kongregasaun Testemuña ba Jeová aumenta ba 2.031, to’o 105.298, no loron-loron maizumenus ema na’in-757 mak hetan batizmu!

² Tanba ema ne’ebé tama lia-loos aumenta ba beibeik, kongregasaun presiza irmaun sira ne’ebé kumpre kritériu husi Bíblia, atu hala’o knaar hodi hanorin no tau matan ba kongregasaun. (Ef 4:11) Uluk Maromak Jeová uza mane sira hanesan ne’e atu tau matan ba nia bibi sira, no ohin loron mós ita bele fiar katak nia sei kontinua halo nune’e. Iha Miquéias 5:5 fó-hatene nanis katak iha loron ikus sira “bibi-atan hitu” no “ulun-na’in ualu” sei tau matan ba Maromak Jeová nia povu. Ida-ne’e fó kmaan mai ita hotu tanba ida-ne’e hatudu katak sei iha mane barak ne’ebé simu knaar atu tau matan ba ita.

3. ‘Kari iha to’os espíritu nian’ katak sá?

³ Se Ita mak irmaun ida ne’ebé hetan batizmu ona, saida mak bele ajuda Ita atu la’o ba oin hodi hetan knaar atu serbí iha kongregasaun laran? Xave ida mak Ita ‘kari iha to’os espíritu nian’. (Gal 6:8) Hodi halo nune’e, Ita presiza husik Maromak nia espíritu santu hatudu dalan mai Ita iha Ita-nia moris. Haka’as an nafatin atu la ‘kari iha to’os hakarak aat isin nian’. Hasees an husi halimar demais, ka hakarak atu buka ksolok ba an de’it, ne’ebé bele halakon ita-nia laran-manas ba Maromak nia serbisu. Ema kristaun hotu tenke ‘kari iha to’os espíritu nian’, no karik, ikusmai, irmaun sira hanesan ne’e sei hetan knaar ruma iha kongregasaun laran. Ohin loron kongregasaun presiza liután atan ministeriál no katuas sira, tan ne’e ami fó sai lisaun ida-ne’e liuliu ba irmaun sira. Entaun, irmaun sira, ami fó laran-manas ba imi atu hanoin didi’ak hodi halo orasaun kona-ba informasaun iha lisaun ida-ne’e.

La’o ba oin hodi hala’o serbisu ne’ebé di’ak loos

4, 5. (a) Di’ak ba irmaun sira ne’ebé hetan batizmu ona atu la’o ba oin hodi bele hetan knaar saida de’it iha kongregasaun laran? (b) Oinsá mak irmaun ida bele la’o ba oin?

⁴ Maski irmaun ida hetan batizmu ona, ne’e la dehan katak irmaun ne’e bele hetan kedas knaar atu tau matan ba kongregasaun. Maibé nia tenke haka’as an atu la’o ba oin hodi bele hala’o “serbisu ne’ebé di’ak loos” ne’e. (1 Tim 3:1) Serbisu ne’e katak serbí maluk kristaun sira hodi ajuda sira ho laran. (Lee Isaías 32:1, 2. *) Irmaun ne’ebé la’o ba oin ho hakarak ne’ebé loos, la hanoin atu sai ema-boot iha kongregasaun. Maibé, nia hakarak atu serbí ba ema seluk nia di’ak.

⁵ Irmaun ne’ebé hakarak la’o ba oin atubele  serbí nu’udar atan ministeriál ka katuas, tenke haka’as an atu kumpre kritériu sira ne’ebé hakerek iha Bíblia laran. (1 Tim 3:1-10, 12, 13; Tito 1:5-9) Se Ita mak irmaun ida ne’ebé dedika an tiha ona, husu ba Ita-nia an: ‘Ha’u badinas iha serbisu haklaken, no ajuda ema seluk atu halo ida-ne’e ka lae? Ha’u ajuda ha’u-nia maluk sira atu hametin sira-nia fiar hodi hatudu interese ba sira ka lae? Ema hatene ha’u nu’udar ema ne’ebé badinas atu estuda Maromak nia Liafuan ka lae? Ha’u haka’as an atu fó komentáriu ne’ebé di’ak ka lae? Ho badinas ha’u hala’o knaar ne’ebé katuas sira husu ha’u atu halo ka lae?’ (2 Tim 4:5) Importante atu hanoin didi’ak kona-ba pergunta sira-ne’e.

6. Saida mak bele ajuda irmaun ida atu simu knaar sira iha kongregasaun laran?

⁶ Buat seluk tan ne’ebé irmaun ida bele halo atu simu knaar sira mak husu ‘kbiit husi Maromak nia espíritu atu nia laran bele sai maka’as liután’. (Ef 3:16) Kongregasaun la vota ba irmaun ida atu sai nu’udar atan ministeriál ka katuas. Maibé irmaun ida bele hetan knaar furak ne’e, bainhira nia halo kle’an liután ninia relasaun ho Maromak Jeová. Oinsá mak Ita bele halo ida-ne’e? Dalan ida mak hodi nafatin husik ‘espíritu lori Ita’ no haburas hahalok sira ne’ebé espíritu lori mai. (Gal 5:16, 22, 23) Katuas sira presiza duni hatudu hahalok di’ak sira-ne’e atu hala’o sira-nia knaar. Nu’udar Ita hatudu katak Ita haburas ona hahalok di’ak sira-ne’e no nu’udar Ita moris tuir konsellu ne’ebé Ita simu, ema hotu iha kongregasaun laran sei haree katak Ita “la’o ba oin”.—1 Tim 4:15.

Prontu atu ajuda ema seluk

7. Presiza halo saida de’it atu serbí ema seluk?

⁷ Irmaun sira ne’ebé serbí iha kongregasaun presiza serbisu maka’as no mós sai prontu atu fó ajuda maski karik sira lakon buat ruma. Sira ne’ebé iha knaar atu tau matan ba kongregasaun mak hanesan bibi-atan, no sira hanoin tebes bibi sira ne’ebé hasoru problema ruma. Haree oinsá apóstolu Paulo sente kona-ba knaar ne’e. Nia fó-hatene nia maluk fiar-na’in sira iha sidade Korintu, dehan: “Husi laran-susar no terus barak mak ha’u hakerek ba imi ho matabeen wa’in, la’ós  atu imi fuan-kanek, maibé atu imi bele hatene domin boot ne’ebé ha’u iha ba imi.” (2 Kor 2:4) Ita bele haree katak Paulo uza ninia forsa tomak no nia hala’o ninia knaar ho laran.

8, 9. Fó to’ok ezemplu balu kona-ba oinsá mak mane sira tau matan ba ema seluk nia presiza.

⁸ Maromak Jeová nia atan sira, husi tempu uluk to’o agora, sempre prontu atu fó ajuda ba sira-nia maluk. Porezemplu, Noé nunka dehan ba nia família: “Kuandu ró boot ramata ona, mai fó-hatene ha’u, nune’e ha’u tama hamutuk ho imi.” Moisés nunka dehan ba ema Izraél iha rai-Ejitu: “Ha’u bá uluk, ita hasoru malu iha Tasi Mean. Imi mesak buka dalan atu to’o ne’ebá.” Josué nunka hatete: “Mai fó-hatene ha’u, kuandu moru Jerikó monu tiha ona.” No Isaías la hatudu ba ema seluk no dehan: “Nia mak ne’ebá! Haruka nia bá.”—Isa 6:8.

⁹ Jesus Kristu hatudu mai ita ezemplu di’ak liu kona-ba husik Maromak nia espíritu santu book ita. Nia prontu atu simu knaar hodi salva ema husi sala no mate. (Joao 3:16) Se Jesus prontu atu lakon nia moris hodi salva ita ema, ita mós bele banati-tuir nia hodi prontu atu ajuda ema seluk maski ita lakon buat ruma ka lae? Irmaun ida ne’ebé serbí nu’udar katuas ba tinan barak ona, fó sai ninia sentimentu kona-ba tau matan ba bibi-lubun. Nia hatete: “Jesus nia liafuan ba Pedro, ‘Tau matan ba ha’u-nia bibi sira’, kona loos ha’u-nia laran. Iha ha’u-nia esperiénsia, ha’u hatene katak liafuan badak de’it, kuandu hato’o ho domin, bele book ema nia laran. No hahalok di’ak, maski ki’ik de’it, bele halo ema seluk sente kmaan. Ha’u kontente loos hodi halo knaar nu’udar bibi-atan no atu ajuda irmaun-irmán sira.”—Joao 21:16.

10. Tanbasá mak irmaun kristaun hakarak banati-tuir Jesus nia ezemplu kona-ba serbí ema seluk?

¹⁰ Irmaun ne’ebé tau matan ba Maromak nia bibi sira hakarak banati-tuir Jesus nia ezemplu. Jesus dehan: “Ha’u sei fó kmaan ba imi.” (Mt 11:28) Fiar ba Maromak no domin ba kongregasaun book irmaun kristaun haka’as an atu halo serbisu di’ak ne’e. Sira sei la hanoin kona-ba buat ne’ebé sira lakon atu hala’o serbisu ne’e, ka katak serbisu ne’e susar liu. Maibé, oinsá se irmaun ida ladún hakarak serbí iha kongregasaun? Nia bele haburas hakarak ne’e ka lae?

Haburas hakarak atu serbí

11. Oinsá mak irmaun ida bele haburas nia hakarak atu serbí ema seluk?

¹¹ Se Ita sente Ita-nia esperiénsia la to’o atu serbí iha kongregasaun, Ita bele harohan ba Maromak hodi husu ajuda husi ninia espíritu santu. (Lc 11:13) Maromak Jeová nia espíritu sei ajuda Ita atu la hanoin demais kona-ba Ita-nia fraku ruma. Tuir loloos, ema nia hakarak atu serbí mai husi Maromak, tanba Aman Jeová nia espíritu mak book irmaun ida atu la’o ba oin no fó forsa ba irmaun ne’e atu hala’o ninia knaar sira. (Flp 2:13; 4:13) Nune’e, di’ak atu husu Aman Jeová atu ajuda Ita haburas Ita-nia hakarak atu simu knaar sira iha kongregasaun laran.—Lee Salmo 25:4, 5. *

12. Oinsá mak ema bele hetan matenek atubele kaer didi’ak ninia responsabilidade sira?

¹² Karik irmaun ida haree katak atu tau matan ba Maromak nia bibi sira mak susar no presiza uza tempu barak, tan ne’e nia lakohi haka’as an atu serbí. Ka, karik nia sente katak nia matenek la to’o atu kumpre nia knaar sira. Se nune’e, nia bele halo kle’an nia matenek hodi estuda liután Maromak nia Liafuan no livru sira ne’ebé esplika kona-ba Bíblia. Di’ak se nia husu ba nia an rasik: ‘Ha’u fahe tempu atu estuda Maromak nia Liafuan, no ha’u harohan beibeik hodi husu matenek husi Maromak ka lae?’ Tiago hakerek: “Imi ida kuran matenek karik, nia sei husu Maromak bá. Nia sei fó ba ema hotu-hotu ho laran-luak hodi la si’ak, no ema ne’e sei hetan matenek.” (Tgo 1:5) Ita fiar liafuan husi Bíblia ne’e ka lae? Maromak hatán ba Salomão nia orasaun hodi fó ba nia “fuan ne’ebé matenek, ne’ebé bele hatene”. Rezultadu mak Salomão bele hatene saida mak loos no saida mak sala kuandu nia tesi lia ba povu. (1 Reis 3:7-14) Loos, Salomão nia situasaun espesiál. Maibé, ita bele fiar duni katak Maromak sei fó matenek ba sira ne’ebé simu knaar atu tau matan ho didi’ak ba ninia bibi sira.—Prov 2:6.

13, 14. (a) Oinsá mak “Kristu nia domin book” Paulo? (b) “Kristu nia domin” tenke book ita atu halo saida de’it?

 ¹³ Buat seluk tan ne’ebé bele ajuda ita haburas ita-nia hakarak atu serbí ema seluk mak hanoin kle’an kona-ba buat ne’ebé Maromak Jeová no nia Oan Jesus halo tiha ona mai ita. Porezemplu, hanoin to’ok kona-ba 2 Korinto 5:14, 15. (Lee.) Oinsá mak “Kristu nia domin book” ita? Kristu hadomi ita to’o saran nia moris hodi halo tuir Maromak nia hakarak no salva ita. Kuandu ita hanoin didi’ak kona-ba domin boot ne’e, ita sei hafolin liu Jesus nia domin, no ida-ne’e sei kona ita-nia fuan. Domin ba Kristu book maka’as Paulo. Nia la hanoin demais kona-ba nia rasik nia hakarak, maibé buka atu serbí Maromak no serbí ema seluk iha kongregasaun laran no li’ur.

¹⁴ Hodi hanoin kle’an kona-ba domin ne’ebé Kristu hatudu ba ema, no hodi hafolin liután domin ne’e, ida-ne’e sei book ita-nia fuan iha dalan hanesan. Ita sei haree katak la iha folin duni atu “kari iha to’os hakarak aat sira-nian” hodi buka uluk ita rasik nia hakarak. Maibé, ita sei troka oinsá ita hala’o ita-nia moris, atubele buka uluk knaar sira-ne’ebé mai husi Maromak. Kristu nia domin sei book ita atu ‘serbí maluk’ tan ita hadomi sira. (Lee Galasia 5:13.) Hodi hanoin katak ita hanesan atan ne’ebé ho haraik-an serbí maluk fiar-na’in, ne’ebé dedika tiha sira-nia an ba Maromak Jeová, ita sei nafatin hafolin no respeitu sira. Tuir loloos, ita lakohi haleno Satanás nia hahalok hodi kritika ema seluk iha kongregasaun.—Apok 12:10.

Família nia apoiu

15, 16. Família iha responsabilidade saida de’it atu irmaun ida bele kumpre kritériu atubele serbí nu’udar katuas ka atan ministeriál?

¹⁵ Irmaun ne’ebé kaben-na’in no iha oan sira, ninia família nia hahalok mós importante. Família nia relasaun ho Maromak Jeová no sira-nia naran di’ak mak parte husi Bíblia nia kritériu ba irmaun ne’ebé atu serbí nu’udar atan ministeriál ka katuas. Ida-ne’e hatudu katak família iha mós knaar atu apoia sira-nia aman ka la’en nu’udar nia haka’as an atubele serbí nu’udar katuas ka atan ministeriál.—Lee 1 Timoteo 3:4, 5, 12.

¹⁶ Maromak Jeová kontente bainhira família tomak serbisu hamutuk atu apoia no ajuda malu. (Ef 3:14, 15) Família nia ulun tenke tetu didi’ak kona-ba oinsá mak nia bele hala’o ninia responsabilidade sira ba kongregasaun hodi nia mós bele “tau matan didi’ak ba nia família”. Nune’e, importante tebes ba katuas no atan ministeriál ida atu estuda Bíblia hamutuk ho nia kaben no oan sira hodi sira bele uza didi’ak tempu Adorasaun Família nian semana-semana, atu hametin sira-nia relasaun ho Maromak Jeová. No mós, nia tenke iha toman atu bá haklaken hamutuk ho nia família. Tanba ne’e, importante mós ba família tomak atu tuir família nia ulun nia haka’as-an atu sai toman hodi estuda no haklaken hamutuk.

Ita bele serbí fali ka lae?

17, 18. (a) Se irmaun ida labele ona serbí nu’udar katuas ka atan ministeriál, karik nia tenke halo saida? (b) Se irmaun ida la serbí tan ona nu’udar katuas ka atan ministeriál, oinsá mak nia bele haree ninia situasaun ne’e?

¹⁷ Karik iha tempu uluk Ita serbí nu’udar katuas ka atan ministeriál, maibé agora Ita la iha ona knaar ne’e. Ita nafatin hadomi Maromak Jeová no Ita bele fiar katak nia mós hadomi Ita. (1 Ped 5:6, 7) Karik, Ita iha buat ruma ne’ebé Ita tenke hadi’a. Entaun, simu katak Ita iha fraku ruma no husu ajuda husi Maromak atu hadi’a problema ne’e. Kuidadu atu labele sai laran-hirus. Hatudu matenek, no sente  haksolok nu’udar Ita haka’as an atu la’o ba oin. Irmaun ida ne’ebé serbí nu’udar katuas ba tinan barak ona maibé depois labele serbí tan, hatete: “Iha tempu ne’ebé ha’u labele serbí tan, ha’u halo desizaun atu nafatin tuir toman di’ak ne’ebé uluk ha’u iha kuandu ha’u sei serbí nu’udar katuas, hanesan tuir reuniaun sira, bá haklaken no lee Bíblia. No ha’u konsege halo nune’e. Ha’u hanoin katak ha’u sei simu fali knaar atu serbí depois tinan ida ka rua, maibé ikusmai ha’u sai fali katuas depois tinan hitu. Ida-ne’e ajuda ha’u aprende oinsá atu hatudu pasiénsia. Durante tinan hitu ne’e, ha’u la sai laran-tun, maibé ha’u kontinua haka’as an atubele serbí fali nu’udar katuas, no husi ha’u-nia esperiénsia ne’e ha’u aprende buat barak.”

¹⁸ Se Ita mak irmaun ida ne’ebé hasoru situasaun hanesan ne’e, keta sai laran-tun. Hanoin kona-ba bensaun sira ne’ebé Ita simu daudaun iha Ita-nia serbisu haklaken no iha Ita-nia família laran. Ajuda Ita-nia família atu hametin liután sira-nia relasaun ho Maromak, vizita ema ne’ebé moras, no fó tulun ba sira ne’ebé fraku iha lia-loos. Buat ne’ebé importante liu mak nafatin hafolin Ita-nia knaar atu hahi’i Maromak Jeová no haklaken lia-foun di’ak Reinu nian nu’udar Testemuña ba Jeová ida. *—Sal 145:1, 2; Isa 43:10-12.

Hanoin didi’ak kona-ba Ita-nia situasaun

19, 20. (a) Di’ak ba mane hotu ne’ebé hetan batizmu ona atu halo saida? (b) Saida mak ita sei estuda iha lisaun tuirmai?

¹⁹ Agora kongregasaun sira presiza barak liután katuas no atan ministeriál sira. Tan ne’e, ami husu mane hotu ne’ebé hetan batizmu ona atu hanoin didi’ak kona-ba sira-nia situasaun. Favór ida, husu Ita-nia an: ‘Saida de’it mak hanetik ha’u atu serbí nu’udar atan ministeriál ka katuas?’ Husik Maromak nia espíritu ajuda Ita atu hanoin didi’ak kona-ba kongregasaun nia presiza no mós Ita-nia situasaun.

²⁰ Irmaun-irmán hotu hetan di’ak tanba maluk sira haka’as an atu halo serbisu di’ak iha kongregasaun laran maski karik sira lakon buat ruma. Kuandu ita serbí ema seluk ho laran-di’ak, ita mós sente haksolok tanba ita ajuda sira no kari iha to’os espíritu nian. Maibé, ita mós hakarak sees husi halo Maromak nia espíritu santu laran-susar. Iha lisaun tuirmai ita sei ko’alia kona-ba ida-ne’e.

[Nota–rodapé]

Oinsá ita hatán?

• Tanbasá mak liafuan iha Miquéias 5:5 halo ita sente kmaan?

• Serbisu maka’as no mós sai prontu atu fó ajuda maski lakon buat ruma, envolve saida de’it?

• Oinsá mak ita bele haburas ita-nia hakarak atu serbí ema seluk?

• Família iha responsabilidade saida de’it atu irmaun ida bele kumpre kritériu atubele serbí nu’udar katuas ka atan ministeriál?

[Pergunta estudu nian]

[Dezeñu iha pájina 25]

Saida mak Ita bele halo atu hetan knaar atu serbí iha kongregasaun laran?