Keta halo Maromak Jeová nia espíritu santu laran-susar
Keta halo Maromak Jeová nia espíritu santu laran-susar
“Keta halo Maromak nia espíritu santu laran-susar; iha nia mak imi simu sinál.”—EF 4:30.
1. Saida mak Maromak Jeová halo tiha ona ba ema rihun ba rihun? Ita iha devér atu halo saida?
MAROMAK JEOVÁ halo tiha ona buat espesiál ba ema rihun ba rihun ne’ebé hasoru susar oioin iha mundu ne’e. Nia loke dalan ba sira atu hakbesik nia liuhusi ninia Oan-Mane mesak, Jesus Kristu. (Joao 6:44) Se Ita dedika Ita-nia an ba Maromak tiha ona no moris tuir dedikasaun ne’e, ne’e katak Ita mós ema ida ne’ebé simu ona buat espesiál ne’e. Nu’udar ema ne’ebé hetan ona batizmu hodi espíritu santu nia naran, Ita iha devér atu tuir matadalan husi espíritu santu.—Mt 28:19.
2. Ita sei ko’alia kona-ba pergunta sira saida de’it?
2 Ita ‘kari iha to’os espíritu nian’ hodi sai tiha ema foun. (Gal 6:8; Ef 4:17-24) Maibé apóstolu Paulo fó konsellu no avizu mai ita atu la halo Maromak nia espíritu santu laran-susar. (Lee Efeso 4:25-32.) Agora mai ita haree didi’ak apóstolu ne’e nia konsellu. Paulo nia liafuan ne’e katak sá? Oinsá mak ema ida ne’ebé dedika an tiha ona bele halo ida-ne’e? No oinsá mak ita bele sees husi hahalok sira ne’ebé bele fó laran-susar ba Maromak Jeová nia espíritu santu?
Paulo nia liafuan katak sá?
3. Oinsá mak Ita bele esplika liafuan ne’ebé hakerek iha Efeso 4:30?
3 Ulukliu, haree to’ok Paulo nia liafuan ne’ebé hakerek iha Efeso 4:30. Nia hakerek: “Keta halo Maromak nia espíritu santu laran-susar; iha nia mak imi simu sinál ba loron maksoin nian.” Paulo lakohi ninia maluk kristaun sira atu estraga sira-nia relasaun ho Maromak. Liuhusi Maromak Jeová nia espíritu, sira “simu sinál ba loron maksoin nian”. Iha tempu ne’ebá, no mós iha tempu agora, Maromak nia espíritu mak sinál, ka “prenda”, ba ema kose-mina sira kona-ba buat ne’ebé sira sei simu iha futuru. (2 Kor 1:22) Sinál ne’e hatudu katak sira mak Maromak ninian, no katak sira bele simu moris iha lalehan. Sira ne’ebé simu sinál ne’e mak hamutuk na’in-144.000.—Apok 7:2-4.
4. Tanbasá mak importante atu labele halo Maromak nia espíritu laran-susar?
4 Espíritu santu mak Maromak nia forsa ne’ebé ajuda ema kristaun atu halo tuir Maromak nia hakarak. Maibé halo espíritu laran-susar bele sai hanesan hakat primeiru atu la simu tan espíritu ne’e. Ita hatene kona-ba ne’e husi David nia liafuan kuandu nia halo sala ho Batseba. David hakribi nia sala no hamulak ba Maromak hodi dehan: “Keta soe ha’u husi Ita-nia oin, no Ita-nia espíritu santu, Oh, keta foti fali husi ha’u.” (Sal 51:11) Ema kose-mina sira-ne’ebé “laran-metin to’o mate”, sira de’it mak sei simu “koroa moris nian”, katak prezente atu simu moris ne’ebé la bele mate tan, iha lalehan. (Apok 2:10; 1 Kor 15:53) Ema kristaun ne’ebé iha esperansa atu moris iha mundu mós presiza espíritu santu nia ajuda atu bele laran-metin nafatin ba Maromak no simu prezente moris rohan-laek tan fiar ba Kristu nia sakrifísiu. (Joao 3:36; Rom 5:8; 6:23) Tan ne’e, ita hotu tenke matan-moris atu la halo Maromak Jeová nia espíritu laran-susar.
Oinsá mak ema kristaun ida bele halo espíritu laran-susar?
5, 6. Oinsá mak ema kristaun ida bele halo Maromak Jeová nia espíritu laran-susar?
5 Nu’udar ema kristaun ne’ebé dedika an, ita bele sees husi halo espíritu santu laran-susar. Ita sees husi ne’e bainhira ita husik ‘espíritu lori ita’, tanba hanesan ne’e ita sei la monu ba hakarak ne’ebé sala no sei la hatudu hahalok ne’ebé Maromak la simu. (Gal 5:16, 25, 26) Maibé situasaun ne’e bele troka. Ita bele komesa atu fó laran-susar ba Maromak nia espíritu hodi neineik-neineik halo hahalok ne’ebé Maromak nia Liafuan, ne’ebé nia leno ho espíritu, bandu.
6 Se ita kontinua atu kontra espíritu santu nia matadalan, ne’e katak ita fó laran-susar ba espíritu no mós ba Maromak Jeová tanba nia mak espíritu nia hun. Hodi estuda liután Efeso 4:25-32, ita bele hatene kona-ba saida mak ita tenke halo atu labele halo Maromak nia espíritu laran-susar.
Oinsá atu sees husi halo espíritu laran-susar
7, 8. Tanbasá mak ita tenke ko’alia ho loloos?
7 Ita tenke ko’alia ho loloos. Iha Efeso 4:25 Paulo hakerek: “Husik tiha lia-bosok; ema ida-ida ko’alia loloos ba malu, basá ema ida-ida liman-ain ba malu.” Tanba ita sai ida de’it nu’udar “liman-ain ba malu”, ita nunka hakarak lohi ema seluk ka ko’alia buat ne’ebé ladún loos ba maluk kristaun, tanba ne’e hanesan de’it bosok sira. Ema ida-ne’ebé kontinua halo hanesan ne’e, ikusmai nia sei halakon nia relasaun ho Maromak.—Lee Provérbios 3:32.
8 Liafuan no hahalok ne’ebé bele lohi ema seluk bele estraga kongregasaun nia unidade. Tan ne’e, ita tenke sai hanesan profeta Daniel, nia mak ema ne’ebé ema seluk bele fiar, ne’ebé la halo korrupsaun. (Dan 6:4) No mós ita hakarak hanoin-hetan apóstolu Paulo nia konsellu ba ema kristaun ne’ebé iha esperansa atu sa’e ba lalehan, katak sira hanesan liman-ain iha “Kristu nia isin-lolon” ne’ebé tenke nafatin sai ida de’it ho maluk kose-mina sira seluk ne’ebé tuir Jesus ho loloos. (Ef 4:11, 12) Se ita iha esperansa atu moris ba nafatin iha mundu, ita mós presiza ko’alia ho loloos, hodi halo nune’e ita hametin ita-nia unidade ho maluk kristaun sira iha mundu tomak.
9. Tanbasá mak importante tebes atu halo tuir Efeso 4:26, 27?
9 Ita tenke halo funu hasoru Diabu, hodi la fó oportunidade ba nia atu estraga ita-nia relasaun ho Maromak. (Tgo 4:7) Espíritu santu ajuda ita tahan hasoru Satanás. Porezemplu, espíritu bele ajuda ita la sai hirus demais. Paulo hakerek: “Imi hirus karik, keta halo sala; keta husik loron monu ba imi-nia laran-nakali. Keta fó fatin ba Diabu.” (Ef 4:26, 27) Se ita iha razaun loos atu sai hirus, ita bele halo kedas orasaun iha laran hodi bele hetan “espíritu ne’ebé hakmatek” no kontrola an; duké halo buat ruma ne’ebé bele halo Maromak nia espíritu laran-susar. (Prov 17:27) Entaun, ita lakohi duni sai laran-hirus ba tempu naruk hodi bele fó oportunidade ba Satanás atu book ita halo buat ne’ebé aat. (Sal 37:8, 9) Dalan ida atu kontra hasoru Diabu mak halo tuir Jesus nia konsellu atu rezolve lalais problema ruma ho ema seluk.—Mt 5:23, 24; 18:15-17.
10, 11. Tanbasá mak ita tenke labele na’ok ka halo buat ne’ebé la loos?
10 Ita labele monu ba tentasaun atu na’ok ka halo buat ne’ebé la loos. Paulo hakerek kona-ba ema ne’ebé na’ok: “Ema ne’ebé uluk na’ok, lalika na’ok tan, maibé buka serbisu ho liman atu bele hetan buat ruma atu fó ba ema ne’ebé iha susar laran.” (Ef 4:28) Se ema kristaun ne’ebé dedika an tiha ona mak na’ok buat ruma, nia loloos ‘ataka Maromak nia naran’ hodi hafo’er naran ne’e. (Prov 30:7-9) Maski ita kiak, ita labele na’ok. Sira ne’ebé hadomi Maromak no maluk sira hatene katak nunka iha razaun ida atu na’ok.—Mc 12:28-31.
11 Paulo la ko’alia de’it kona-ba buat ne’ebé ita labele halo, nia mós ko’alia kona-ba buat ne’ebé ita tenke halo. Se ita husik espíritu santu kona ita-nia moris tomak, ita sei haka’as an atu tau matan didi’ak ba família no mós atu hetan “buat ruma atu fó ba ema ne’ebé iha susar laran”. (1 Tim 5:8) Jesus no nia apóstolu sira rai osan ne’ebé bele uza atu ajuda ema kiak sira, maibé traidór Judas Iscariotes na’ok osan ne’e balu. (Joao 12:4-6) Judas la husik espíritu santu lori nia, loos ka lae? Maibé ita ne’ebé husik Maromak nia espíritu hatudu matadalan mai ita ‘moris ho laran-moos iha buat hotu ne’ebé ita halo’. (Ebr 13:18) Hanesan ne’e, ita la fó laran-susar ba Maromak Jeová nia espíritu santu.
Dalan seluk tan atu sees husi halo espíritu laran-susar
12, 13. (a) Tuir Efeso 4:29, ita tenke sees husi ko’alia iha dalan oinsá? (b) Ita tenke ko’alia iha dalan oinsá?
12 Ita tenke kuidadu kona-ba dalan ne’ebé ita ko’alia. Paulo dehan: “Keta husik liafuan aat sai husi imi-nia ibun. Ko’alia de’it liafuan ne’ebé di’ak atu hametin imi-nia maluk.” (Ef 4:29) Dala ida tan, Paulo la ko’alia de’it kona-ba buat ne’ebé ita labele halo, nia mós ko’alia kona-ba buat ne’ebé ita tenke halo. Maromak nia espíritu bele book ita ko’alia ‘liafuan ne’ebé di’ak atu hametin ita-nia maluk’. Liután ne’e, ita la husik ‘liafuan aat sai husi ita-nia ibun’. Iha lia-gregu, liafuan ne’ebé tradús nu’udar “aat” katak buat ne’ebé dois no dodok ona, hanesan ai-fuan, ikan ka na’an. Hanesan ita hakribi hahán sira-ne’e, ita mós hakribi ko’alia liafuan sira ne’ebé Maromak Jeová la simu.
13 Ita-nia ko’alia tenkesér moos, ho laran-di’ak, “hodi tau masin uitoan”. (Kol 3:8-10; 4:6) Ema tenke haree katak ita mak ema ne’ebé la hanesan ema seluk tanba ita-nia ko’alia ne’ebé moos no di’ak. Entaun, mai ita ajuda ema seluk hodi ko’alia “liafuan ne’ebé di’ak atu hametin” malu, la’ós liafuan ne’ebé aat. Sin, ita hakarak sente hanesan ema ne’ebé hakerek Salmo 19:14, ne’ebé kanta: “Ha’u hein katak liafuan husi ha’u-nia ibun no hanoin iha ha’u-nia laran sai buat ne’ebé monu loos ba Ita, oh, Jeová, ha’u-nia Fatuk no ha’u-nia Na’i ne’ebé Sosa Fali ha’u.”
14. Tuir Efeso 4:30, 31, ita tenke halakon saida de’it husi ita-nia laran?
14 Ita tenke halakon laran-moras, laran-hirus, lia-aat, no buat aat hotu husi ita-nia laran. Depois Paulo hakerek kona-ba keta fó laran-susar ba Maromak nia espíritu, nia hatutan tan: “Hadook tiha husi imi leet laran-moras tomak, laran-hirus, laran-nakali, lia-aat no lia hasoru Maromak no mós laran-dodok.” (Ef 4:30, 31) Nu’udar ema sala-na’in, ita hotu tenke haka’as an atu kontrola ita-nia hanoin no buat ne’ebé ita halo. Se ita la kontrola an, no sai ema ne’ebé ‘laran-moras, laran-hirus ka laran-nakali’, ita bele halo Maromak nia espíritu laran-susar. No se ita komesa la halo tuir Bíblia nia konsellu balu, ita bele haburas hahalok sira-ne’ebé, ikusmai, lori ita atu halo sala hasoru espíritu santu. Ne’e mak rezultadu ne’ebé aat tebes!
15. Se ema halo sala hasoru ita, saida mak ita tenke halo?
15 Ita tenke hatudu laran-di’ak, laran-sadi’a no fó perdua ba malu. Paulo hakerek: “Imi laran-di’ak ba malu, nu’udar Maromak haraik tiha ba imi iha Kristu.” (Ef 4:32) Maski ita sente laran-kanek tebes tanba ema seluk nia hahalok ruma, mai ita fó perdua, hanesan Maromak. (Lc 11:4) Hanoin to’ok, se Ita rona katak Ita-nia maluk kristaun ida ko’alia ladi’ak kona-ba Ita. Ita hakarak halo dame, no Ita hakbesik irmaun ka irmán ne’e. Nia mós triste ba buat ne’ebé nia ko’alia, no husu deskulpa. Maski Ita fó perdua, maibé ne’e la to’o. Levítico 19:18 hatete: “Ó labele selu aat fali ka rai odi hasoru ó-nia povu rasik, no ó tenke hadomi ó-nia maluk hanesan ó-nia an rasik. Ha’u mak Jeová.”
Matan-moris bá
16. Fó to’ok ezemplu ida ne’ebé hatudu katak, dala ruma ita tenke troka buat ruma iha ita-nia moris atu sees husi fó laran-susar ba Maromak nia espíritu.
16 Ita mós hasoru tentasaun atu halo buat ruma ne’ebé kontra Maromak nia hakarak kuandu ita mesak. Porezemplu, karik irmaun ida rona beibeik ba múzika ne’ebé ladún di’ak. Ikusmai, nia laran fó-sala ba nia an, tanba hatene katak nia la halo tuir Bíblia nia matadalan ne’ebé esplika iha livru sira husi ‘atan laran-metin no matenek’. (Mt 24:45) Karik nia halo orasaun kona-ba ninia problema no nia hanoin-hetan Paulo nia liafuan ne’ebé hakerek iha Efeso 4:30. Tanba nia lakohi duni atu halo Maromak nia espíritu laran-susar, nia deside atu sees husi múzika hotu ne’ebé ladún di’ak. Maromak Jeová sei apoia irmaun ne’e nia desizaun. Nune’e, mai ita matan-moris nafatin atu sees husi fó laran-susar ba Maromak nia espíritu.
17. Saida mak bele akontese se ita la matan-moris no la halo orasaun beibeik?
17 Se ita la matan-moris no la halo orasaun beibeik, ita bele monu ba hahalok sala ruma ne’ebé halo Maromak nia espíritu santu laran-susar. (Ef 4:30) Ne’e dehan katak ita kontra hasoru Maromak nia espíritu santu no halo Maromak rasik sente laran-susar. Ita lakohi duni atu halo hanesan ne’e. Ema eskriba sira iha Jesus nia tempu halo sala hodi duun matak katak milagre ne’ebé Jesus halo mai husi Satanás. (Lee Marcos 3:22-29.) Kristu nia inimigu sira-ne’e “hateten aat espíritu santu”, no tan ne’e sira halo sala ne’ebé labele hetan perdua. Mai ita haka’as an atu la halo sala hanesan ne’e!
18. Saida mak hatudu katak ema ida la halo sala hasoru espíritu santu?
18 Tanba ita lakohi duni atu halo sala ne’ebé labele hetan perdua, ita hakarak hanoin nafatin Paulo nia konsellu kona-ba labele fó laran-susar ba espíritu santu. Maibé oinsá se ita halo tiha ona sala ne’ebé boot? Se ita hakribi sala ne’e no hetan ona ajuda husi katuas sira, ita bele fiar katak Maromak fó perdua ona mai ita no ita-nia sala la’ós sala hasoru espíritu santu. Ho Maromak nia ajuda, ita mós bele sees husi halo espíritu laran-susar.
19, 20. (a) Ita tenke sees husi saida de’it? (b) Ita tenke haka’as an atu halo saida?
19 Liuhusi espíritu ne’ebé Maromak haraik, ita goza domin, ksolok, no unidade iha ita-nia leet. (Sal 133:1-3) Tan ne’e, ita tenke sees husi halo espíritu laran-susar hodi konta ema nia vida, ka hatete buat ruma ne’ebé bele halo ema seluk la respeitu bibi-atan sira ne’ebé espíritu mak foti. (Apos 20:28; Jud 8) Iha parte seluk, ita tenke haburas unidade no hatudu respeitu ba malu iha kongregasaun laran. Loos, ita lakohi ema iha kongregasaun atu fahe malu, tan ne’e ita hakarak ransu ho Maromak nia povu hotu. Paulo hakerek: “Ha’u husu imi hodi Na’i Jesus Kristu nia naran, atu imi hotu neon ida de’it kona-ba buat ne’ebé imi dehan; imi keta haketak malu, maibé buka sai neon ida de’it ho hanoin ida de’it no laran ida de’it.”—1 Kor 1:10.
20 Maromak Jeová hakarak ita atu la halo nia espíritu laran-susar no nia bele ajuda ita. Mai ita kontinua halo orasaun hodi husu Maromak nia espíritu santu no haka’as an atu la halo espíritu laran-susar. Mai ita nafatin ‘kari iha to’os espíritu nian’, hodi buka espíritu nia matadalan agora no ba nafatin.
Oinsá ita hatán?
• Halo Maromak nia espíritu laran-susar katak sá?
• Oinsá mak ema ne’ebé dedika an tiha ona ba Maromak Jeová bele halo ninia espíritu laran-susar?
• Oinsá mak ita bele sees husi halo espíritu santu laran-susar?
[Pergunta estudu nian]
[Dezeñu iha pájina 30]
Rezolve lalais problema ruma ho ema seluk
[Dezeñu iha pájina 31]
Ita-nia ko’alia hanesan ai-fuan ida ne’ebé?