Mane sira, imi hakru’uk ba Kristu nu’udar ulun ka lae?
Mane sira, imi hakru’uk ba Kristu nu’udar ulun ka lae?
“Kristu mak ema ida-ida nia ulun.”—1 KOR 11:3.
1. Oinsá mak ita bele hatene katak Maromak Jeová la’ós Maromak runguranga nian?
IHA Apokalipse 4:11 hatete: “Ita-Boot mak ami-nia Na’i no ami-nia Maromak. Ita-Boot so’i atu simu glória, hana’i no kbiit, basá Ita-Boot hakiak [ka, kria] buat hotu no tan de’it Ita-Boot nia hakarak mak buat hotu mosu no iha.” Tanba Maromak Jeová mak Kriadór, nia de’it mak iha direitu atu sai Ukun-Na’in Boot Liu Hotu, ulun ba ninia kriatura hotu. Kuandu ita hatene oinsá mak nia organiza ninia família iha lalehan, katak anju sira, ita bele hatene katak Jeová “la’ós Maromak runguranga nian maibé Maromak dame nian”.—1 Kor 14:33; Isa 6:1-3; Ebr 12:21-23.
2, 3. (a) Sé mak Maromak Jeová kria ulukliu? (b) Saida mak Maromak nia pozisaun kompara ho ninia Oan primeiru nia pozisaun?
2 Antes kria buat hotu, Maromak moris mesak ba tempu ne’ebé la bele sura. Kriatura espíritu ne’ebé nia kria ulukliu mak iha naran “Liafuan” tanba Maromak Jeová uza nia nu’udar Lia-Na’in. Tuirmai, Maromak kria buat hotu seluk liuhusi Liafuan. Tinan rihun ba rihun tuirmai, nia mai to’o mundu nu’udar ema sala-laek, nia mak Jesus Kristu.—Lee Joao 1:1-3, 14. *
3 Saida mak eskritura hatete kona-ba Maromak nia pozisaun kompara ho ninia Oan primeiru nia pozisaun? Maromak haruka apóstolu Paulo atu hakerek: “Ha’u hakarak katak imi hatene katak Kristu mak ema ida-ida nia ulun; no la’en mak nia feen nia ulun, no Maromak mak Kristu nia ulun.” (1 Kor 11:3) Hakru’uk ba arranju ulun nian ne’e mak importante tebes hodi kriatura hotu ne’ebé matenek bele moris hamutuk ho dame. Ida ne’e inklui Jesus ne’ebé “iha nia mak Maromak hakiak buat hotu-hotu”, nia mós tenke hakru’uk ba Maromak nu’udar Ulun.—Kol 1:16.
4, 5. Jesus sente oinsá kona-ba hakru’uk ba Maromak Jeová nu’udar ulun?
4 Jesus sente oinsá kona-ba hakru’uk ba Maromak Jeová nu’udar ulun no simu knaar atu mai to’o mundu? Eskritura sira hatete: “Wainhira buat hotu iha ona nia ukun, hafoin mak Oan-Mane rasik sei haraik an mós ba Ida ne’ebé tau hotu iha nia ukun, atu nune’e Maromak bele sai buat hotu ba ema hotu.” (1 Kor 15:28) “Maski nia Oan-Mane, nia aprende atu halo tuir husi buat ne’ebé nia terus.”—Ebr 5:8.
5 Iha situasaun hotu, Jesus ho haraik an hakru’uk ba ninia Aman nia hakarak. Nia hatete: “Ha’u mesak labele halo buat ida husi ha’u an rasik. . . . Ha’u-nia tesi-lia loos, basá ha’u la tuir ha’u-nia hakarak, maibé Ida ne’ebé haruka ha’u nia hakarak.” (Joao 5:30) Nia mós hatete: “Ha’u halo nafatin buat ne’ebé fó ksolok ba [ha’u Aman].” (Joao 8:29) Iha kalan ikus antes Jesus mate, nia hatete ba nia Aman iha orasaun: “Ha’u hahi’i ona Ita iha rai, hodi halo to’o rohan serbisu ne’ebé Ita haruka ha’u atu halo.” (Joao 17:4) Klaru katak Jesus simu no halo tuir Maromak nu’udar nia ulun.
Oan simu bensaun tan hakru’uk ba Aman
6. Jesus hatudu hahalok furak saida de’it?
6 Bainhira Jesus sei iha mundu, nia hatudu hahalok sira ne’ebé furak. Hahalok sira-ne’e inklui domin ne’ebé nia hatudu ba nia Aman. Nia dehan: “Ha’u hadomi Aman.” (Joao 14:31) Nia mós hatudu domin ne’ebé boot ba ema. (Lee Mateus 22:35-40.) Jesus hatudu laran-di’ak no hanoin ema, nia la si’ak no la obriga ema seluk atu halo tuir nia. Nia dehan: “Mai besik ha’u, imi hotu ne’ebé kole no terus; ha’u sei fó kmaan ba imi. Simu ha’u-nia ukun bá hodi banati-tuir ha’u, tan ha’u laran-kmaus no haraik-an.” (Mt 11:28-30) Ema hanesan bibi-malae, ne’ebé idade ki’ik to’o boot, liuliu sira ne’ebé iha susar laran tanba ema seluk hanehan, sira sente kmaan kuandu hamutuk ho Jesus no rona ninia mensajen.
7, 8. Tuir Moisés nia Ukun-Fuan, feto ne’ebé moras fakar raan labele halo saida? Maibé, saida mak Jesus halo?
7 Hanoin to’ok oinsá Jesus nia haree kona-ba feto sira. Durante ema nia istória, mane sira trata aat feto sira. Iha Izraél antigu ulun-na’in relijiaun sira mós halo nune’e. Maibé Jesus hatudu respeitu ba feto sira. Porezemplu hanoin to’ok kona-ba feto ne’ebé moras fakar raan ba tinan 12. “Nia terus tebetebes iha doutór barak sira liman” no nia gasta osan barak atu hetan isin-di’ak. Maski nune’e, nia moras “sai aat liután”. Tuir Moisés nia Ukun-Fuan, nia ema ne’ebé la moos. No mós ema hotu ne’ebé kona nia sei sai la moos.—Lev 15:19, 25.
8 Bainhira feto ne’e rona katak Jesus fó isin-di’ak ba ema moras sira, nia tuir ema barak ne’ebé hale’u Jesus. Nia hatete ba nia an: “Ha’u kona de’it karik nia hena, ha’u sei hetan isin-di’ak.” Nia kona Jesus no iha oras ne’e kedas nia hetan isin-di’ak. Jesus hatene katak feto ne’e labele kona nia roupa. Maski nune’e, nia la hirus feto ne’e. Maibé, Jesus hatudu laran-di’ak ba nia. Jesus hatene oinsá feto ne’e sente tanba moras ba tempu kleur, no katak feto ne’e presiza duni ajuda. Ho laran-sadi’a, Jesus dehan ba nia: “Ha’u oan-feto, ó-nia fiar mak soi ó. La’o bá iha dame laran.”—Mc 5:25-34.
9. Kuandu Jesus nia dixípulu sira koko hapara labarik sira atu hakbesik nia, saida mak Jesus halo?
9 Labarik sira mós sente kmaan kuandu hamutuk ho Jesus. Loron ida ema lori labarik sira ba nia, maibé nia dixípulu sira la fó lisensa tanba hanoin katak Jesus lakohi gasta tempu ho labarik sira. Maibé Jesus la sente hanesan ne’e. Kona-ba situasaun ne’e, Bíblia hatete: “Wainhira Jesus haree [ida-ne’e], nia hirus hodi dehan ba sira, ‘Husik labarik sira mai hakbesik ha’u; keta taka dalan ba sira. Loloos, reinu lalehan ba sira ne’ebé hanesan ne’e.’” Liután ne’e, “nia hako’ak labarik sira, tau liman ba sira hodi fó bensa ba sira”. Jesus gosta labarik sira no nia simu sira ho laran-di’ak.—Mc 10:13-16.
10. Oinsá mak Jesus bele hatudu hahalok ne’ebé furak kuandu nia moris iha mundu?
10 Oinsá mak Jesus bele hatudu hahalok sira-ne’e kuandu nia moris iha mundu? Kuandu nia sei iha lalehan, durante tinan rihun ba rihun nia haree no aprende nia Aman nia hahalok sira. (Lee Provérbios 8:22, 23, 30. *) Nia mós haree oinsá Maromak Jeová tau matan ho domin ba ninia kriatura hotu, no banati-tuir nia Aman nia ezemplu. Jesus bele aprende husi nia Aman nia ezemplu tanba nia hakru’uk ba nia Aman. Sin, nia kontente atu hakru’uk ba nia Aman, no Aman Jeová kontente iha Oan hanesan ne’e. Kuandu Jesus iha mundu, nia hatudu ho loloos nia Aman iha lalehan nia hahalok furak sira. Ita kontente tebes atu hakru’uk ba Kristu, ida ne’ebé Maromak hili nu’udar Liurai ba nia Reinu iha lalehan, loos ka lae?
Banati-tuir Kristu nia hahalok sira
11. (a) Ita tenke haka’as an atu banati-tuir sé nia ezemplu? (b) Tanbasá mak importante ba mane sira iha kongregasaun atu halo tuir Kristu nia ezemplu?
11 Ema kristaun hotu iha kongregasaun laran tenke haka’as an nafatin atu banati-tuir Kristu nia hahalok. Hanesan dehan tiha ona uluk, Bíblia hatete: “Kristu mak ema ida-ida nia ulun.” Hanesan Kristu halo tuir nia Ulun, Maromak ne’ebé loos, ema kristaun mós tenke haka’as an atu halo tuir Kristu nu’udar sira-nia ulun. Kuandu apóstolu Paulo sai ema kristaun, nia mós halo nune’e. Nia fó laran-manas ba nia maluk kristaun: “Imi buka halo tuir ha’u-nia hahalok, nu’udar ha’u halo tuir Kristu.” (1 Kor 11:1) No apóstolu Pedro mós hatete: “Basá ba ida-ne’e mak Maromak bolu imi; Kristu rasik terus tanba imi, hodi fó ezemplu ba imi atu imi mós la’o tuir nia ain-fatin.” (1 Ped 2:21) Liuliu, importante ba mane sira atu halo tuir Kristu nia ezemplu tanba sira mak sei serbí nu’udar katuas no atan ministeriál. Hanesan Kristu kontente atu banati-tuir Aman Jeová nia ezemplu, mane kristaun mós kontente atu banati-tuir Kristu nia hahalok furak sira.
12, 13. Katuas sira tenke tau matan ba Maromak nia bibi sira iha dalan saida de’it?
12 Katuas sira iha kongregasaun iha responsabilidade atu aprende kona-ba oinsá mak sira bele hatudu hahalok sira hanesan Kristu nian. Pedro fó konsellu tuirmai ne’e ba katuas sira: “Tau matan ba Maromak nia luhan ne’ebé Nia tau ba imi-nia liman, la’ós tanba laran-todan maibé ho laran-haksolok; la’ós atu manán buat ruma hodi la moe ida, maibé ho laran-kmaan; la’ós hodi ukun ho kro’at sira ne’ebé iha imi-nia liman, maibé hodi sai ezemplu ba imi-nia luhan.” (1 Ped 5:1-3) Katuas iha kongregasaun labele si’ak ka hatodan maluk kristaun. Hodi banati-tuir Kristu, sira haka’as an atu hanoin ema seluk, hatudu domin, haraik-an no laran-di’ak kuandu tau matan ba Maromak nia bibi sira.
13 Tanba sira ne’ebé iha knaar atu tau matan ba kongregasaun mak ema sala-na’in, sira tenke hatene kona-ba sira rasik nia fraku. (Rom 3:23) Sira tenke haburas hakarak atu aprende kona-ba Jesus no banati-tuir nia domin. Nune’e, sira presiza ulukliu hanoin kle’an kona-ba oinsá mak Maromak no Kristu hatudu hahalok di’ak ba ema, no tuirmai haka’as an atu banati-tuir sira. Pedro fó konsellu ba ita: “Imi hotu, tau hatais haraik-an ba malu nian, basá ‘Maromak hakribi ema loko-an maibé fó grasa ba ema haraik-an.’”—1 Ped 5:5.
14. Katuas sira sente oinsá kona-ba maluk kristaun sira?
14 Bainhira ajuda Maromak nia bibi sira, katuas no atan ministeriál sira presiza hatudu hahalok ne’ebé furak. Ne’e inklui hamta’uk, ka respeitu maluk sira. Iha Roma 12:10 hatete: “Hadomi malu ho domin loos; buka atu sai uluk atu hamta’uk maluk sira.” Hanesan ema kristaun hotu, mane sira-ne’e ‘la halo buat ida hodi hanoin de’it sira-nia an nia di’ak, eh hodi hakarak hetan naran-boot, maibé haraik an ba malu, hodi hanoin katak ema seluk di’ak liu fali sira’. (Flp 2:3) Sin, katuas sira tenke hanoin katak ema seluk mak di’ak liu fali sira. Hodi sente hanesan ne’e, sira halo tuir Paulo nia konsellu: “Ita ne’ebé maka’as sei iha pasiénsia ba ema kbiit-laek nia sala, hodi la buka ita rasik nia ksolok. Ita ida-ida buka atu fó ksolok ba ita-nia maluk, atu hetan di’ak, atu harii. Basá Kristu la buka fó ksolok ba nia an.”—Rom 15:1-3.
‘Hamta’uk feen sira’
15. La’en tenke hatudu hahalok saida ba nia kaben?
15 Hanoin to’ok kona-ba Pedro nia konsellu seluk ba la’en sira. Nia hakerek: “Imi la’en sira, buka moris hodi hanoin imi-nia feen, hodi hamta’uk feto sira nu’udar ema kbiit-laek.” (1 Ped 3:7) Hamta’uk ema katak hafolin ema ne’e. Kuandu halo nune’e, Ita sei hanoin kona-ba nia hanoin, presiza, no hakarak, no Ita sei tuir ninia hakarak kuandu ida-ne’e la kontra buat ne’ebé loos. Entaun, la’en tenke hatudu hahalok hanesan ne’e ba nia kaben.
16. Tuir Bíblia, tanbasá mak la’en tenke hamta’uk ninia kaben?
16 Kuandu Pedro fó konsellu ba la’en sira atu hamta’uk sira-nia kaben, Pedro hatutan tan: “Atu nune’e imi-nia orasaun bele la’o loloos.” (1 Ped 3:7) Ida-ne’e hatudu ho klaru katak hahalok sira-ne’ebé la’en hatudu ba nia kaben mós importante ba Maromak Jeová. Se la’en ida la hatudu respeitu ba nia feen, ida-ne’e bele hanetik ninia orasaun. Maibé kuandu la’en hatudu respeitu ba nia, sai fasil liu mós ba feen atu respeitu no hadomi fali la’en, loos ka lae?
17. Tanba domin, la’en tenke prontu atu halo saida?
17 Maromak nia Liafuan mós fó konsellu ba la’en sira kona-ba hadomi sira-nia feen: “Mane sira sei hadomi sira-nia kaben hanesan sira hadomi sira rasik nia isin-lolon. . . . Ema ida la hirus nia isin-lolon, maibé nia fó han no tau matan ba nia nu’udar Kristu tau matan ba kreda. . . . Mane ida-ida sei hadomi nia kaben; hadomi nia hanesan nia an rasik.” (Ef 5:28, 29, 33) La’en sira tenke hatudu domin ne’ebé kle’an tebes ba sira-nia kaben. Paulo hakerek: “Mane sira, hadomi imi-nia kaben nu’udar Kristu hadomi kreda no saran nia moris tanba nia.” (Ef 5:25) Sin, la’en tenke prontu atu saran nia moris tan nia kaben, hanesan Kristu halo. Kuandu la’en kristaun hatudu laran-maus, hanoin kona-ba nia kaben no see tilun beibeik ba nia, sai fasil liu ba nia feen atu hakru’uk ba nia nu’udar ulun.
18. Saida mak bele ajuda mane sira atu kaer responsabilidade iha kaben laran?
18 Ne’e susar liu ba la’en sira atu hamta’uk sira-nia kaben ka lae? Lae, tanba Maromak Jeová nunka husu sira atu halo buat ne’ebé sira la bele halo. Liután ne’e, ema ne’ebé adora Maromak Jeová bele simu forsa ida-ne’ebé boot liu hotu, katak Maromak nia espíritu santu. Jesus hatete: “Ne’e duni, maski imi ema laran-aat hatene fó buat di’ak ba imi-nia oan sira, oinsá liután mak imi-nia Aman iha lalehan sei haraik espíritu santu ba sira ne’ebé husu ba Nia?” (Lc 11:13) Bainhira halo orasaun, la’en sira bele husu Maromak Jeová atu haraik nia espíritu atu ajuda sira hatudu hahalok di’ak, liuliu ba sira-nia kaben.—Lee Apostolu 5:32.
19. Iha lisaun tuirmai, ita sei ko’alia kona-ba saida?
19 Loos duni, mane sira iha responsabilidade boot atu aprende oinsá mak sira bele hakru’uk ba Kristu no banati-tuir nia ezemplu nu’udar ulun. Maibé oinsá ho feto sira, liuliu ho feen sira? Lisaun tuirmai sei ko’alia kona-ba oinsá feto sira tenke haree sira-nia pozisaun tuir Maromak Jeová nia arranju.
[Nota–rodapé]
^ par. 2 Joao 1:1, MF: “Horiuluk kedas Liafuan iha nanis, no Liafuan hamutuk ho Maromak, no Liafuan mak maromak ida.”
^ par. 10 Provérbios 8:22, 23, 30: “Maromak Jeová rasik mak kria ha’u ulukliu buat hotu ne’ebé nia halo, husi serbisu di’ak hotu ne’ebé nia halo iha tempu uluk, ha’u mak primeiru. Husi tempu ne’ebé la bele sura Maromak foti ona ha’u, antes mundu iha, antes buat hotu hahú. Iha tempu ne’ebá, ha’u iha ninia sorin nu’udar Badain, no ha’u mak ida ne’ebé nia gosta liu husi loron ba loron, no ha’u haksolok iha nia oin ba tempu hotu.”
Ita hanoin-hetan?
• Ita tenke banati-tuir Jesus nia hahalok saida de’it?
• Katuas sira tenke tau matan ba Maromak nia bibi sira iha dalan saida de’it?
• La’en tenke hatudu hahalok saida de’it ba nia kaben?
[Pergunta estudu nian]
[Dezeñu iha pájina 10]
Banati-tuir Jesus hodi hatudu respeitu ba ema seluk