Pergunta husi lee-na’in

Maski Maromak Jeová bandu adora estátua, maibé tanbasá mak nia la fó kastigu ba Aarão ne’ebé halo karau-oan husi osan-mean?

Êxodo kapítulu 32 konta katak Aarão halo karau-oan husi osan-mean. Ida-ne’e kontra Maromak nia ukun-fuan. (Êx 20:3-5) Tan ne’e, “Maromak Jeová sai hirus tebes [ba Aarão] to’o Nia atu halakon nia; maibé [Moisés] mós harohan kona-ba Aarão iha tempu ne’ebá”. (Deut 9:19, 20) Moisés, ema di’ak ne’e, nia orasaun “maka’as tebetebes” iha Maromak nia oin ka lae? (Tgo 5:16) Sin. Karik tanba Moisés nia orasaun no mós ho razaun sira seluk, Maromak la fó kastigu ba Aarão. Mai ita buka-hatene kona-ba razaun rua.

Ita bele fiar katak razaun ida mak Aarão laran-metin ba Maromak ba tempu kleur ona. Kuandu Moisés simu knaar atu ko’alia ba Faraó no lori ema Izraél sai husi rai-Ejitu, Maromak Jeová mós fó knaar ba Aarão atu bá hamutuk ho Moisés no sai nu’udar lia-na’in ba Moisés. (Êx 4:10-16) Mane rua ne’e halo tuir hodi bá hasoru Faraó ba dala barak, maski Faraó ulun-toos no ko’alia arbiru de’it. Hodi halo nune’e, Aarão halo naran di’ak ho Maromak Jeová, tanba nia serbí ho laran-metin duni.—Êx 4:21.

No mós, hanoin to’ok kona-ba saida mak akontese foin antes Aarão halo karau-oan osan-mean ne’e. Moisés sa’e ba Foho Sinai ba loron 40. Bainhira “povu haree katak Moisés gasta tempu barak iha foho ne’e”, sira haka’as Aarão atu halo estátua ba sira. Aarão halo tuir sira-nia hakarak no halo estátua karau-oan osan-mean nian. (Êx 32:1-6) Maibé, buat ne’ebé Aarão halo depois ne’e hatudu katak, tuir loloos, nia la simu atu fó adorasaun ba estátua. Karik, nia sai fraku ba tempu uitoan de’it tanba ema obriga nia. Kuandu Moisés hatudu ho klaru katak adora estátua ne’e mak sala ne’ebé kontra duni Maromak, ema Levi hotu, inklui mós Aarão, hamriik metin iha Maromak Jeová nia sorin. Iha tempu ne’ebá, ema na’in-3.000 hetan kastigu-mate tanba sira apoia duni adorasaun ba estátua.—Êx 32:25-29.

Tuirmai, Moisés hatete ba povu tomak: “Imi halo tiha ona sala ne’ebé boot.” (Êx 32:30) Nune’e, Aarão hamutuk ho povu tomak mak halo sala hasoru Maromak. Maibé, Maromak Jeová hatudu laran-sadi’a no fó perdua ba sira.

Rezolve tiha problema kona-ba karau-oan osan-mean nian, Maromak Jeová haruka Moisés atu foti Aarão sai amlulik boot. Maromak dehan ba Moisés: “Ó tenke fó hatais Aarão ho roupa santu ne’e no kose mina ba nia no halo nia sai santu, ho nune’e nia sei serbí nu’udar amlulik ba ha’u.” (Êx 40:12, 13) Klaru katak Maromak fó perdua ba Aarão nia hahalok fraku ne’e. Tuir loloos, Aarão mak fiar-na’in ne’ebé laran-metin, la’ós traidór ne’ebé apoia adorasaun ba estátua.