Tansá tenke respeita ferik-katuas sira?

IHA Kalifórnia, rai-Estadus Unidus, iha ai-hun ida ne’ebé furak tebetebes no ema barak gosta bá haree no hasai fotu. Ema fó naran ba ai-hun ne’e Lone Cypress (ai-sipreste ne’ebé hamriik mesak). Ema dehan katak ai-hun ne’e nia tinan 250 liu ona. Tanba ai-hun ne’e tahan tempu kleur, ema buka dalan oioin atu tau matan ba ai-hun furak ne’e. Porezemplu, ema kesi tali ba ai-hun ne’e no tau fatuk hale’u ninia hun hodi halo ai-hun ne’e hamriik metin nafatin.

Ai-hun Lone Cypress ne’e karik fó-hanoin mai ita kona-ba irmaun no irmán ferik-katuas sira iha ita-nia leet ne’ebé hatudu laran-metin nafatin ba Maromak Jeová. Dalan importante ida ne’ebé sira hatudu laran-metin mak hodi haklaken lia-foun di’ak. Profeta Joel fó-hatene nanis katak “katuas sira” sei haklaken Maromak nia Liafuan iha loron ikus sira. (Joel 2:28-32; Apos 2:16-21) Hanoin to’ok kona-ba tempu barak ne’ebé irmaun no irmán ferik-katuas sira gasta atu ajuda ema seluk aprende kona-ba “lia-foun reinu nian”! (Mt 24:14) Sira balu tahan hasoru susar no terus iha tinan barak. Se ema buka dalan oioin atu halo ai-hun Lone Cypress hamriik metin nafatin, sá tan ho ferik-katuas sira iha kongregasaun, sira merese duni atu simu respeitu!

Iha tempu uluk, Maromak Jeová haruka ninia povu: “Iha ema fuuk mutin nia oin, ó tenke hamriik, no ó tenke hanoin ema ne’ebé katuas ona.” (Lev 19:32) Ohin loron, iha Maromak Jeová nia atan sira-nia leet, ita mós bele hetan irmaun no irmán ferik-katuas sira ne’ebé laran-metin hodi ‘la’o ho Maromak’ ba tinan barak tiha  ona. (Miq 6:8) Nu’udar sira kontinua halo tuir Bíblia nia matadalan, sira-nia fuuk mutin sai duni hanesan “koroa furak” ida.—Prov 16:31.

Apóstolu Paulo fó konsellu ba joven Timóteo hodi hatete: “Keta si’ak ema ne’ebé katuas liu ó, maibé ko’alia ba nia hanesan ba ó-nia aman rasik; . . . no ferik sira hanesan ó-nia inan.” (1 Tim 5:1, 2) Sin, Timóteo tenke “hamriik” iha ema fuuk mutin sira-nia oin. Nune’e, klaru katak Maromak Jeová hakarak ita atu hatudu respeitu ba ferik-katuas sira kuandu ita ko’alia ho sira.

Roma 12:10 hatete: “Buka atu sai uluk atu hamta’uk maluk sira.” Katuas sira iha kongregasaun hatudu respeitu duni ba irmaun no irmán ferik-katuas sira. Maibé ita hotu tenke buka atu sai uluk atu hatudu respeitu ba malu.

Iha família laran, ema ida-idak iha responsabilidade espesiál ba sira-nia inan-aman no avó sira. Hanesan ema halo buat oioin atu ajuda ai-hun Lone Cypress atu tahan kleur, nune’e mós ita presiza halo buat oioin atu hatudu katak ita respeita no hafolin ita-nia inan-aman no avó sira. Porezemplu, hodi see tilun didi’ak kuandu sira ko’alia, ne’e sei ajuda ita atu hatene sira-nia sentimentu no atu la halo buat ruma tuir de’it ita-nia hakarak.—Prov 23:22; 1 Tim 5:4.

Maromak Jeová hafolin tebes irmaun no irmán ferik-katuas sira iha ita-nia leet. Nia nunka husik sira. (Sal 71:18) Tuir loloos, Maromak fó forsa ba sira atu sira bele serbí nia nafatin ho laran-metin. Tan ne’e, mai ita mós kontinua atu ajuda no hatudu respeitu ba ferik-katuas sira.

[Dezeñu iha pájina 7]

Hanesan ho ai-hun Lone Cypress, ferik-katuas sira mós presiza atu ita hafolin no respeita hodi ajuda sira

[Krédito]

American Spirit Images/age fotostock