Hetan kmaan hodi moris tuir Maromak nia hakarak
Hetan kmaan hodi moris tuir Maromak nia hakarak
“Imi simu haʼu-nia ukun bá . . . , no imi sei hetan kmaan ba imi-nia klamar.”—MT 11:29, Liafuan diak ba imi, primeira edisaun.
1. Iha Foho Sinai, Maromak halo arranju kona-ba saida? Tanbasá mak nia halo nuneʼe?
KUANDU Maromak fó Ukun-Fuan iha Foho Sinai ba nasaun Izraél, neʼe inklui ukun-fuan kona-ba loron Sábadu. Liuhusi Moisés, Maromak Jeová hatete: “Durante loron neen, ó tenke halo ó-nia serbisu, maibé iha loron hitu ó tenke para, atu ó-nia karau no ó-nia kuda-burru bele deskansa no ó-nia atan-feto nia oan-mane no ema estranjeiru bele hetan kmaan ba sira-nia an.” (Êx 23:12) Sin, tanba Maromak Jeová hanoin sira neʼebé simu Ukun-Fuan, nia arranja loron ida ba sira atu deskansa hodi nuneʼe sira bele “hetan kmaan”.
2. Oinsá mak arranju kona-ba loron Sábadu lori bensaun ba ema Izraél sira?
2 Maibé loron Sábadu mak loron atu deskansa deʼit ka lae? Lae, arranju neʼe mak parte importante ba ema Izraél nia adorasaun ba Maromak Jeová. Hodi halo tuir loron Sábadu, família nia ulun bele iha tempu atu hanorin família atu “laʼo tuir Jeová nia dalan hodi halo buat neʼebé loos”. (Gên 18:19) Loron neʼe mós fó oportunidade ba família no kolega sira atu halibur malu hodi hanoin kleʼan kona-ba Maromak Jeová nia hahalok no mós atu haksolok hamutuk. (Isa 58:13, 14) Buat neʼebé importante liu kona-ba loron Sábadu mak loron neʼe reprezenta tempu neʼebé ema sei hetan kmaan neʼebé loos husi Kristu nia Ukun ba Tinan Rihun Ida. (Rom 8:21) Maibé oinsá ho ita-nia tempu? Iha neʼebé no oinsá mak ema kristaun loos neʼebé hakarak laʼo tuir Maromak Jeová nia dalan bele hetan kmaan?
Hetan kmaan husi maluk kristaun
3. Iha dalan saida deʼit mak ema kristaun iha tempu uluk ajuda malu? Sira hetan rezultadu saida?
3 Apóstolu Paulo hatete katak kongregasaun kristaun mak fatin neʼebé “tahan lia-loos no rai nia didiʼak”. (1 Tim 3:15) Ema kristaun iha tempu uluk hetan ajuda atu tuir lia-loos nafatin hodi fó laran-manas ba malu no hametin malu iha domin. (Ef 4:11, 12, 16) Kuandu apóstolu Paulo iha sidade Éfezu, nia simu vizita husi irmaun sira husi kongregasaun iha Korintu. Oinsá mak ida-neʼe book Paulo nia laran? Nia hakerek: “Haʼu haksolok wainhira Estéfanas, Fortunato no Acaico toʼo ona mai, . . . basá sira hafoun haʼu-nia laran.” (1 Kor 16:17, 18) Hanesan neʼe mós, kuandu Tito vizita Korintu atu serbí irmaun sira, Paulo hakerek ba kongregasaun iha neʼebá: “Imi hotu hafoun nia laran.” (2 Kor 7:13) Ohin loron mós Testemuña ba Jeová hafoun sira-nia laran ka hetan kmaan hodi ransu malu ho maluk kristaun.
4. Oinsá mak reuniaun sira bele fó kmaan ba ita?
4 Ita hotu hatene husi ita-nia esperiénsia rasik katak reuniaun sira halo ita haksolok tebes. Iha reuniaun, ita “hametin malu husi ita-nia fiar”. (Rom 1:12) Ita-nia irmaun no irmán iha kongregasaun laʼós ema neʼebé ita hatene deʼit. Sira mak ita-nia belun neʼebé loos, kolega neʼebé ita hadomi no respeitu. Ita hetan haksolok no kmaan hodi halibur malu beibeik iha ita-nia reuniaun.—Flm 7.
5. Oinsá mak ita bele fó kmaan ba malu iha reuniaun boot sira?
5 Ita mós bele hetan kmaan liuhusi ita-nia reuniaun boot sira. Iha neʼebá, ita bele hetan bee lia-loos nian husi Maromak nia Liafuan Bíblia, neʼebé fó moris mai ita. Liután neʼe reuniaun boot sira fó oportunidade mai ita atu ‘loke ita an [“ita-nia laran”, MF]’ hodi ransu malu ho maluk kristaun sira. (2 Kor 6:12, 13) Maibé oinsá se ita moe no sente susar atu koʼalia ho ema seluk? Dalan ida atu koñese didiʼak irmaun-irmán sira mak hodi halo serbisu voluntáriu ruma iha reuniaun boot. Irmán ida neʼebé ajuda hamoos salaun ba reuniaun boot internasionál, nia hatete: “Uluk haʼu la koñese ema barak, haʼu besik ho haʼu-nia família ho kolega balu deʼit. Maibé kuandu haʼu ajuda hamoos salaun, haʼu koñese irmaun no irmán barak! Ida-neʼe halo haʼu kontente tebes!”
6. Oinsá mak ita bele hetan kmaan iha tempu feriadu?
6 Ema Izraél sira iha toman atu halo viajen hodi tuir festa iha Jeruzalein tinan ida dala tolu. (Êx 34:23) Neʼe katak sira tenke husik sira-nia toʼos no loja no laʼo ain deʼit ba loron balu iha dalan neʼebé nakonu ho rai-rahun. Maski nuneʼe, saʼe ba templu halo sira “haksolok tebes”, tanba sira neʼebé tuir festa neʼe ‘fó hahiʼi ba Jeová’. (2 Crôn 30:21) Hanesan neʼe mós, Maromak Jeová nia atan ohin loron haree katak halo viajen nuʼudar família atu vizita Betel mak atividade neʼebé lori haksolok tebes ba sira. Ita mós bele halo planu atu halo hanesan neʼe iha Ita-nia feriadu ka lae?
7. (a) Han no halimar hamutuk bele lori rezultadu diʼak saida? (b) Saida deʼit mak bele ajuda ita atu ransu malu ho haksolok?
7 Ransu malu ho família no kolega sira hodi halimar no han hamutuk mós halo ita sente kontente. Liurai Salomão neʼebé matenek hatete: “Ba ema ida, la iha buat ida neʼebé diʼak liu duké nia han no hemu no halo nia an haree buat neʼebé diʼak husi ninia serbisu makaʼas.” (Ecle 2:24) Han no halimar hamutuk laʼós atu halo ita sente kmaan deʼit, maibé mós hametin ita-nia domin ba malu hodi koñese didiʼak ita-nia maluk kristaun. Oinsá mak ita halo tempu neʼe nuʼudar oportunidade atu haksolok no hametin domin ba malu? Diʼak atu la konvida ema barak demais, no diʼak mós iha ema ida atu tau matan didiʼak ba ema hotu neʼebé halibur malu, liuliu se hemu tua.
Haklaken lori kmaan mai ita
8, 9. (a) Saida mak la hanesan entre Jesus nia liafuan no ema farizeu sira-nian? (b) Ita bele hetan rezultadu diʼak saida hodi fahe lia-loos ba ema seluk?
8 Jesus badinas atu haklaken, no nia mós fó laran-manas ba nia dixípulu sira atu halo nuneʼe. Nia hatete: “Toʼos boot duni, maibé serbisu-naʼin uitoan. Neʼe duni imi harohan ba toʼos-naʼin atu haruka serbisu-naʼin sira bá nia toʼos.” (Mt 9:37, 38) Mensajen neʼebé Jesus lori halo ema sente kmaan duni, tanba nia lori “lia-foun diʼak”. (Mt 9:35; Lc 4:43) Jesus nia liafuan la hanesan duni ho ema farizeu nia ukun-fuan sira neʼebé hanehan ema.—Lee Mateus 23:4, 23, 24.
9 Kuandu ita fahe mensajen Reinu nian ba ema seluk, ita fó kmaan ba sira, no iha tempu hanesan, ida-neʼe mós ajuda ita rasik atu hafolin liután lia-loos husi Bíblia. Ema neʼebé hakerek salmo ida hatete: “Hahiʼi Jah, imi hotu. Tanba diʼak atu halo melodia ba ita-nia Maromak; neʼe mak furak.” (Sal 147:1) Ita mós bele aumenta Ita-nia haksolok hodi fó sasin kona-ba Maromak Jeová ba ema seluk ka lae?
10. Ita-nia susesu iha serbisu haklaken depende ba ema neʼebé simu ita-nia mensajen ka lae? Esplika.
10 Loos duni, iha fatin balu ema barak simu lia-foun diʼak, no iha fatin balu ema ladún simu. (Lee Apostolu 18:1, 5-8.) Se Ita hela iha área neʼebé ema ladún rona mensajen Reinu nian, hanoin toʼok kona-ba buat diʼak neʼebé ita kumpre daudauk iha serbisu haklaken. Hanoin nafatin katak Ita-nia hakaʼas-an atu haklaken Maromak Jeová nia naran sei la saugati deʼit. (1 Kor 15:58) Liután neʼe, ita-nia susesu iha serbisu haklaken la depende ba ema neʼebé simu ita-nia mensajen. Ita bele fiar katak Maromak Jeová sei fó oportunidade ba ema hotu neʼebé iha laran diʼak atu sira bele rona mensajen Reinu nian.—Joao 6:44.
Hetan kmaan husi Adorasaun Família nian
11. Maromak Jeová fó knaar saida ba inan-aman sira? Oinsá mak sira bele halaʼo knaar neʼe?
11 Inan-aman neʼebé hamtaʼuk Maromak iha knaar atu hanorin oan sira kona-ba Maromak Jeová no ninia dalan sira. (Deut 11:18, 19) Se Ita mak inan ka aman, Ita fahe tempu atu hanorin Ita-nia oan kona-ba ita-nia Aman iha lalehan ka lae? Atu ajuda Ita halaʼo knaar importante neʼe no atu hanorin família tuir sira-nia presiza, Maromak Jeová prepara ona buat barak mai ita liuhusi livru, vídeo, no CD sira. Ai-han espirituál neʼe halo família sira sente kmaan no hametin sira-nia fiar.
12, 13. (a) Saida mak Adorasaun Família nian? (b) Oinsá mak inan-aman bele halaʼo adorasaun família nian iha dalan neʼebé halo família hotu sente kmaan?
12 Liután neʼe, atan laran-metin no matenek halo arranju kona-ba Adorasaun Família nian. Neʼe mak tempu atu estuda Bíblia hamutuk nuʼudar família semana-semana. Família barak sente katak arranju neʼe ajuda sira atu haburas sira-nia domin ba malu no hametin sira-nia relasaun ho Maromak Jeová. Maibé oinsá mak inan-aman sira bele halaʼo sira-nia adorasaun nuʼudar família iha dalan neʼebé halo família hotu sente kmaan?
13 Adorasaun Família nian laʼós tempu atu sai sériu demais ka halo família baruk. Tuir loloos, ita adora “Maromak neʼebé kontente”, no nia hakarak ita atu haksolok ho ita-nia adorasaun. (1 Tim 1:11, MF; Flp 4:4) Tempu neʼebé uluk ita uza atu tuir reuniaun, agora ita uza fali atu halaʼo Adorasaun Família nian, no ida-neʼe lori bensaun boot ba família sira. Inan-aman bele uza dalan oioin no ideia oioin atu hanorin oan sira. Porezemplu, hanoin toʼok kona-ba labarik-mane ida ho tinan sanulu, naran Brandon. Nia gosta tebes samea, no nia la kontente ema sempre kompara samea ho Diabu. Tan neʼe nia aman husu nia atu hatoʼo diskursu ho tema: “Tansá mak Bíblia bolu Satanás nuʼudar samea?” Família balu lee Bíblia hamutuk no ema ida-idak halo finje sai hanesan ema iha istória neʼebé sira lee, ka sira halo drama tuir istória ruma iha Bíblia. Hanorin iha dalan hanesan neʼe bele halo labarik sira sente kontente, no ajuda mós labarik sira atu hola parte iha adorasaun família nian, hodi nuneʼe Bíblia nia matadalan sei kona sira-nia laran. *
Sees husi buat neʼebé hatodan Ita
14, 15. (a) Saida deʼit mak aumenta ita-nia estrese no problema iha loron ikus sira? (b) Problema saida tan mak ita ema kristaun bele hasoru?
14 Agora mak loron ikus sira ba mundu aat neʼe no ita-nia estrese no problema sira sai aat liután. Ema barak hasoru susar kona-ba osan, inklui serbisu la iha. Sira neʼebé iha serbisu mós sente katak osan neʼebé sira lori ba uma hanesan rai iha bolsu neʼebé iha kuak, neʼe katak osan neʼe la toʼo. (Kompara ho Ageu 1:4-6.) Ita haree katak ukun-naʼin sira hakaʼas an atu halakon terrorizmu no buat aat hotu neʼebé hanehan ema, maibé sira la konsege. Ema barak mós laran-tun tanba sira rasik nia fraku ka sala.—Sal 38:4.
15 Ita nuʼudar ema kristaun neʼebé loos mós hasoru susar oioin iha mundu neʼebé Satanás mak domina. (1 Joao 5:19) Liután neʼe, tanba ita halo tuir Kristu no hakaʼas an atu laran-metin nafatin ba Maromak Jeová, ita bele hasoru problema barak tan. Jesus hatete: “Sira fó terus haʼu karik, sira sei fó terus mós ba imi.” (Joao 15:20) Maibé, ita bele fiar katak maski ‘ema fó-terus ita’, Maromak sei ‘la husik ita’. (2 Kor 4:9) Tanbasá?
16. Saida mak ajuda ita atu haksolok nafatin?
16 Jesus hatete: “Mai besik haʼu, imi hotu neʼebé kole no terus; haʼu sei fó kmaan ba imi.” (Mt 11:28) Hodi tau fiar ba Kristu nia sakrifísiu, ita entrega ita-nia an ba Maromak Jeová nia liman. Hodi halo nuneʼe, ita hetan “kbiit makaʼas” husi nia. (2 Kor 4:7) Maromak nia espíritu santu mak “ksolok-naʼin” no hametin ita-nia fiar, laʼós deʼit atu tahan hasoru susar, maibé mós atu haksolok nafatin.—Joao 14:26; Tgo 1:2-4.
17, 18. (a) Ita presiza kuidadu kona-ba hanoin sala saida husi mundu neʼe? (b) Kuandu ita buka ita rasik nia haksolok deʼit, saida mak bele akontese ba ita?
17 Ohin loron ema kristaun neʼebé loos presiza kuidadu kona-ba mundu nia hanoin atu buka haksolok deʼit. (Lee Efeso 2:2-5.) Se lae, ita bele monu ba “hakarak aat isin nian, hakarak aat matan nian, no loko an moris nian”. (1 Joao 2:16) Ka ita bele hanoin sala katak halo tuir hakarak aat isin nian mak sei lori kmaan ba ita. (Rom 8:6) Porezemplu, ema balu buka haksolok hodi uza droga, hemu demais, haree pornografia, halo desportu neʼebé perigu, ka hahalok aat seluk. Liuhusi “babeur aat” sira-neʼe, Satanás koko atu halo ema fiar katak sira bele hetan kmaan hodi halo buat neʼebé Maromak la simu.—Ef 6:11.
18 Loos duni, la sala atu han, hemu, no halimar kuandu ita halo buat hirak-neʼe tuir Maromak nia matadalan. Maibé ita la husik buat hirak-neʼe atu sai buat neʼebé importante liu iha ita-nia moris. Ita presiza tetu didiʼak no kontrola ita-nia an, liuliu tanba ita moris iha tempu neʼebé importante tebes. Kuandu ita buka deʼit ita rasik nia hakarak, ida-neʼe bele hatodan ita toʼo ikusmai ita sei la laʼo tan iha lia-loos no la fó fuan tuir buat neʼebé ita aprende ona kona-ba Jesus.—2 Ped 1:8.
19, 20. Oinsá mak ita bele hetan kmaan neʼebé loos?
19 Kuandu ita hanoin tuir Maromak Jeová nia matadalan, ita komprende katak haksolok husi mundu neʼe sei la tahan kleur. Moisés hatene duni ida-neʼe, no ita mós hatene. (Ebr 11:25) Tuir loloos, haksolok neʼebé halo ita sente kmaan iha laran no kontente ba tempu kleur mai husi halo tuir ita-nia Aman iha lalehan nia hakarak.—Mt 5:6.
20 Mai ita nafatin hetan kmaan hodi moris tuir Maromak nia hakarak. Hodi halo nuneʼe, ita “husik buat hotu neʼebé la lori ba Maromak, no mós husik tiha hakarak aat mundu neʼe nian hotu . . . hodi hein daudaun Maromak no ita Naʼi Jesus Kristu nia glória”. (Tito 2:12, 13) Tan neʼe, mai ita nafatin hakruʼuk ba Jesus nia ukun hodi simu ninia matadalan. Kuandu halo nuneʼe, ita sei hetan ksolok no kmaan neʼebé loos!
[Nota–rodapé]
^ par. 13 Atu hetan informasaun liután kona-ba oinsá atu halaʼo Adorasaun Família nian, haree Livru Haklaken 15 Outubru 2009, pájina 29-31.
Oinsá ita hatán?
• Oinsá mak Maromak Jeová nia povu ohin loron hetan kmaan?
• Oinsá mak serbisu haklaken bele fó kmaan ba ita no mós ba ema neʼebé rona ita?
• Saida deʼit mak família nia ulun bele halo atu adorasaun família nian lori kmaan ba sira?
• Buat saida deʼit mak bele hatodan ita atu la laʼo tan iha lia-loos?
[Pergunta estudu nian]
[Dezeñu iha pájina 26]
Hodi simu Jesus nia ukun, ita hetan buat barak neʼebé lori kmaan mai ita