Hetan protesaun iha Maromak nia povu nia leet

“Haʼu sei hahiʼi Ita iha kongregasaun boot nia laran.”—SAL 35:18.

1-3. (a) Oinsá mak ema kristaun bele tama iha situasaun neʼebé perigu, neʼebé bele halakon nia relasaun ho Maromak? (b) Maromak nia povu bele hetan protesaun iha neʼebé?

DURANTE Joe no nia feen nia feriadu, sira nani iha fatin neʼebé bee ladún kleʼan. Sira uza ókulu-protesaun atu haree ahu-ruin no ikan barak, balu kiʼik, balu boot ho kór oioin. Depois, sira nani dook uitoan atu haree ahu-ruin no ikan iha tasi neʼebé kleʼan uitoan. Kuandu tasi kleʼan toʼo labele haree rai-henek, Joe nia feen hatete: “Haʼu hanoin ita dook liu husi tasi-ibun.” Joe hatete fali: “Kalma deʼit. Fiar deʼit haʼu.” Tuirmai, Joe mós komesa hanoin tanba ikan sira komesa lakon. Sira hatene kedan tansá ikan sira lakon. Husi tasi kleʼan tibaraun boot ida mosu, no nani ba Joe. Joe la bele halo buat ida atu halai! Kuandu tibaraun neʼe besik ona Joe, derrepente tibaraun fila ba kotuk no nani ba tasi kleʼan.

² Ema kristaun bele uza tempu barak ba serbisu, atividade halimar nian, atu buka rikusoin no buat seluk tan husi Satanás nia mundu neʼe, toʼo nia tama iha situasaun hanesan nia nani iha bee kleʼan, iha fatin perigu. Joe, neʼebé katuas kristaun ida, dehan: “Haʼu-nia esperiénsia kona-ba perigu neʼe halo haʼu hanoin kona-ba ransu ho ema seluk. Ransu ho ema husi kongregasaun mak hanesan nani iha tasi neʼebé la kleʼan, katak fatin seguru.” Entaun keta nani iha tasi kleʼan. Neʼe katak keta dook husi kongregasaun, keta bá fatin neʼebé perigu iha dalan espirituál. Se ita toʼo iha tasi kleʼan, katak dook husi kongregasaun, fila fali lalais ba fatin seguru. Se lae, ita bele lakon ita-nia relasaun ho Maromak Jeová.

³ Ohin loron, mundu neʼe mak fatin perigu ba ema kristaun sira. (2 Tim 3:1-5) Satanás hatene katak ninia tempu badak ona, no nia hakarak tolan ema kristaun naran deʼit neʼebé nani toʼo tasi kleʼan. (1 Ped 5:8; Apok 12:12, 17) Maibé, iha buat ruma neʼebé bele proteje ita. Neʼe mak kongregasaun kristaun neʼebé Maromak Jeová fó nuʼudar fatin seguru ida, fatin atu hetan protesaun.

4, 5. Ema barak sente oinsá kona-ba futuru? Tanbasá?

⁴ Iha mundu neʼe, ema bele hetan protesaun husi perigu ruma, maibé sira la bele fiar metin ba protesaun neʼe. Ema barak la sente seguru tanba hanoin kona-ba krime, violénsia, osan la toʼo, no problema ambiente nian. Ema hotu hasoru problema kona-ba sai ferik-katuas no sai moras. No sira neʼebé iha serbisu, uma, osan barak, no saúde diʼak hanoin katak sira mós bele lakon buat sira-neʼe.

⁵ Ema barak mós buka atu sente hakmatek, maibé ladún hetan. Triste loos, tanba ema barak buka moris hakmatek liuhusi moris família nian, maibé problema mosu beibeik ho sira-nia kaben no iha família laran. Sira barak neʼebé buka protesaun husi Maromak liuhusi relijiaun ka igreja mós sente bilán no laran-tun, tanba sira laran-rua kona-ba matadalan husi fatin sira-neʼe. Sira sente hanesan neʼe, liuliu tanba dala barak ulun-naʼin husi relijiaun sira hatudu hahalok aat no hanorin buat neʼebé kontra Bíblia. Tan neʼe, ema barak fiar deʼit ba siénsia, ka ba ema seluk neʼebé hatudu laran-diʼak. Maibé, buat sira-neʼe hotu halo ema laran-rua kona-ba futuru, toʼo sira lakohi hanoin kleʼan kona-ba futuru.

6, 7. (a) Tanbasá mak ema kristaun loos no ema seluk iha hanoin neʼebé la hanesan kona-ba futuru? (b) Ita sei estuda kona-ba saida?

 ⁶ Ema neʼebé parte husi kongregasaun kristaun, sira-nia hanoin la hanesan duni ho ema neʼebé la tuir lia-loos! Maski ita, nuʼudar Maromak Jeová nia povu, tenke hasoru problema no susar sira-neʼebé hanesan ho ema seluk, maibé ita gosta tebes atu hanoin kona-ba futuru. (Isaías 65:13, 14; lee Malaquias 3:18. *) Tanbasá? Tanba ita hatene lia-loos husi Bíblia kona-ba tansá mak iha problema no susar barak, no ita hetan ona matadalan atu hasoru problema sira-neʼe. Rezultadu mak ita la hanoin demais kona-ba futuru. No mós, tanba ita adora Naʼi Jeová, ita hetan protesaun husi problema sira-neʼebé mosu ba ema neʼebé halo hahalok foʼer, ka fiar lia-bosok neʼebé kontra Bíblia. Nuneʼe, ema neʼebé parte husi kongregasaun kristaun sente dame iha laran neʼebé ema seluk la bele sente.—Isa 48:17, 18; Flp 4:6, 7.

⁷ Ezemplu sira tuirmai bele ajuda ita hanoin kleʼan kona-ba protesaun neʼebé Maromak Jeová haraik ba nia atan sira, kompara ho problema sira neʼebé ema seluk hasoru daudaun. Ezemplu sira-neʼe bele book ita atu hanoin kona-ba ita rasik nia hahalok, hodi haree se ita tenke halo tuir diʼak liután Maromak nia konsellu ruma, neʼebé fó protesaun mai ita.—Isa 30:21.

“Haʼu-nia ain besik atu tuir dalan seluk”

8. Husi tempu uluk toʼo agora, Maromak Jeová nia atan sira tenke halo saida?

⁸ Horiuluk kedas, sira neʼebé hakarak adora Maromak Jeová tenke sees husi sira neʼebé la adora Maromak. Tuir loloos, Maromak Jeová rasik fó-hatene nanis katak sira neʼebé adora nia no sira neʼebé halo tuir Satanás sei odi malu. (Gên 3:15) Tanba Maromak nia povu laran-metin ba Maromak nia matadalan, sira-nia hahalok la hanesan ho ema seluk nian. (Joao 17:15, 16; 1 Joao 2:15-17) Dala ruma, sai  laran-metin hanesan neʼe la fasil. Tuir loloos, dala ruma Maromak Jeová nia atan balu husu: ‘Moris hodi husik buat barak atu serbí Maromak, loloos iha folin ka lae?’

9. Ema neʼebé hakerek Salmo 73 iha dúvida kona-ba saida?

⁹ Maromak Jeová nia atan ida neʼebé hakerek Salmo 73 komesa husu pergunta hanesan neʼe. Karik ema neʼe mak Asaf nia bei-oan ida, no nia mós naran Asaf. Asaf husu tansá mak dala barak ema aat hetan susesu, no sira haree hanesan kontente no riku nafatin, maibé ema neʼebé hakaʼas an atu serbí Maromak iha problema beibeik.—Sal 73:1-13.

10. Tuir Ita-nia hanoin, tanbasá mak importante atu hanoin kona-ba Asaf nia liafuan?

¹⁰ Dala ruma Ita mós husu pergunta sira hanesan Asaf husu ka lae? Se nuneʼe, lalika hanoin katak Ita halo sala boot, no katak Ita-nia fiar sai fraku duni. Tuir loloos, Maromak Jeová nia atan balu, inklui ema balu neʼebé hakerek Bíblia, mós husu pergunta hanesan neʼe. (Jó 21:7-13; Sal 37:1; Jer 12:1; Hab 1:1-4, 13) Sin, ema hotu neʼebé hakarak serbí Maromak Jeová tenkesér fó resposta ba pergunta ida-neʼe: Diʼak liu atu serbí no halo tuir Maromak ka lae? Ita tenke halo nuneʼe tanba lia neʼebé Satanás hasaʼe kona-ba Maromak nia direitu atu ukun iha jardín Eden. (Gên 3:4, 5) Tan neʼe, diʼak ba ita hotu atu hanoin didiʼak kona-ba Asaf nia liafuan. Ita tenke sente laran-moras ba ema aat neʼebé gaba an no haree hanesan sira la iha problema ruma ka lae? Ita tenke “tuir dalan seluk”, katak la serbí tan Maromak Jeová, hodi tuir sira ka lae? Tuir loloos, Satanás hakarak ita atu halo hanesan neʼe.

11, 12. (a) Saida mak ajuda Asaf atu la sente laran-rua tan? (b) Tanbasá mak Ita rasik sente hanesan Asaf?

¹¹ Saida mak ajuda Asaf atu la sente laran-rua tan? Maski nia hatete katak nia besik atu rende an no la moris tuir lia-loos, maibé nia troka ninia hanoin kuandu nia bá toʼo “Maromak nia fatin santu neʼebé boot”. Neʼe katak nia bá hamutuk ho Maromak nia povu iha tabernákulu ka templu, no hanoin kleʼan kona-ba Maromak nia hakarak. Iha tempu neʼebá, Asaf hatene ho loos katak nia lakohi simu buat neʼebé ema aat sei simu. Nia haree katak sira-nia situasaun hanesan laʼo iha “rai neʼebé namdoras”, tanba desizaun sira-neʼebé sira halo iha sira-nia moris. Nia hatene katak ema hotu neʼebé husik Maromak Jeová atu halo sala-foʼer no adora maromak falsu, ikusmai sira sei mate ho “terus neʼebé mosu derrepente deʼit”, maibé Maromak Jeová sei apoia ninia atan sira. (Sal 73:16-19, 27, 28) Klaru katak Ita apoia lia-loos neʼe. Ema barak hanoin deʼit kona-ba sira rasik nia diʼak no ksolok hodi husik Maromak nia ukun-fuan sira, maibé ikusmai sira la bele halai husi rezultadu aat neʼebé sei mosu duni.—Gal 6:7-9.

¹² Saida tan mak ita bele aprende husi Asaf? Nia hetan protesaun iha Maromak nia povu nia leet. Bainhira nia bá toʼo fatin neʼebé ema adora Maromak Jeová, nia hetan ema neʼebé matenek, no nia rasik mós komesa hanoin ho loloos. Ohin loron mós hanesan, ita bele hetan matenek husi informasaun neʼebé ita estuda iha kongregasaun nia reuniaun sira, no husi irmaun-irmán neʼebé iha esperiénsia barak liu. Tan neʼe mak Maromak Jeová haruka ninia atan sira atu halibur iha reuniaun kristaun sira. Iha neʼebá mak fiar-naʼin sira fó laran-manas ba malu atu laʼo ho matenek.—Isa 32:1, 2; Ebr 10:24, 25.

Hili ho didiʼak Ita-nia kolega sira

13-15. (a) Dina hasoru susar saida? Saida mak ita aprende husi ida-neʼe? (b) Tanbasá mak ransu ho ema kristaun sira mak hanesan protesaun?

¹³ Jacob nia oan-feto Dina nia ezemplu hatudu katak ita bele hetan problema boot kuandu ita ransu ho ema mundu. Ninia istória iha livru Gênesis fó-hatene katak nia iha toman atu bá vizita feto-klosan sira husi rai-Kanaán, neʼebé hela besik nia. Ema Kanaán la halo tuir morál sira-neʼebé Maromak Jeová nia povu halo tuir. Tuir loloos, buat neʼebé matenek-naʼin kona-ba istória hetan, hatudu  katak ema Kanaán nia hahalok sai aat toʼo ikusmai sira-nia rai nakonu ho adorasaun ba imajen sira, sala-foʼer oioin, adorasaun falsu neʼebé envolve hahalok seksuál neʼebé foʼer, no violénsia. (Êx 23:23; Lev 18:2-25; Deut 18:9-12) Hanoin toʼok kona-ba saida mak akontese tanba Dina ransu beibeik ho ema sira-neʼe.

¹⁴ Mane husi fatin neʼe, naran Siquém, mak “ema neʼebé iha naran-boot iha ninia aman nia umakain tomak”. Loron ida nia haree Dina no “tuirmai lori nia no toba hamutuk ho nia no hafoʼer nia”. (Gên 34:1, 2, 19) Neʼe aat tebes, loos ka lae? Tuir Ita-nia hanoin, Dina hatene nanis katak ida-neʼe sei akontese ka lae? Karik nia hakarak sai kolega deʼit ho joven sira husi fatin neʼe, no nia hanoin neʼe la iha perigu ida. Maibé, hodi hanoin hanesan neʼe Dina bosok nia an.

¹⁵ Saida mak ita bele aprende husi istória ida-neʼe? Ita labele ransu ho ema neʼebé laʼós fiar-naʼin hodi hanoin katak ita sei la hetan rezultadu aat. Bíblia hatete katak “hela hamutuk ho ema laran-aat sira halakon lisan diʼak”. (1 Kor 15:33) Iha parte seluk, ransu ho ema neʼebé iha fiar hanesan ita-nian, no neʼebé halo tuir morál hanesan ita-nian, no neʼebé hadomi Maromak Jeová hanesan ita, neʼe sai hanesan protesaun boot. Ransu ho ema diʼak hanesan neʼe sei fó laran-manas ba ita atu laʼo ho matenek.—Prov 13:20.

“Imi fase moos ona”

16. Saida mak apóstolu Paulo hatete kona-ba ema balu husi kongregasaun iha Korintu?

¹⁶ Kongregasaun kristaun ajuda ona ema barak atu sai moos husi hahalok foʼer sira. Bainhira apóstolu Paulo hakerek ninia karta primeiru ba kongregasaun iha sidade Korintu, nia koʼalia kona-ba ema balu neʼebé troka sira-nia hahalok atubele halo tuir Maromak nia matadalan sira. Uluk sira halo sala hanesan sala-foʼer, adora imajen, relasaun seksuál ho ema neʼebé laʼós sira-nia kaben, sala-foʼer mane ho mane ka feto ho feto, naʼok, hemu-lanu, no buat seluk tan. Paulo dehan ba sira: “Maibé ohin imi fase moos ona.”—Lee 1 Korinto 6:9-11.

17. Oinsá mak moris tuir Bíblia nia matadalan troka ema balu nia moris?

¹⁷ Ema neʼebé la tuir fiar neʼebé loos, sira tuir matadalan oioin iha sira-nia moris. Sira balu inventa matadalan ba sira an rasik, sira seluk tuir deʼit hahalok aat neʼebé ema seluk halo, hanesan deʼit ho ema balu iha Korintu antigu antes sira aprende lia-loos. (Ef 4:14) Maibé, bainhira ema hatene loloos Maromak nia Liafuan no Ninia hakarak, ida-neʼe iha forsa atu troka sira-nia moris kuandu sira halo tuir matadalan husi Bíblia. (Kol 3:5-10; Ebr 4:12) Ema barak neʼebé sai parte husi kongregasaun kristaun ohin loron bele fó-hatene katak antes sira aprende no halo tuir Maromak Jeová nia matadalan, sira halo hahalok naranaran deʼit. Maibé iha tempu neʼebá, sira la kontente. Sira sente hakmatek iha laran bainhira sira komesa ransu ho Maromak nia povu no moris tuir Ninia matadalan sira.

18. Konta toʼok feto-klosan ida nia esperiénsia. Ida-neʼe hanorin lisaun saida?

¹⁸ Iha parte seluk, iha ema balu neʼebé uluk deside atu husik ‘tasi neʼebé la kleʼan’, katak kongregasaun kristaun, no ikusmai sira laran-triste loos kona-ba desizaun neʼe. Irmán ida, naran Tania (neʼe laʼós nia naran loos), esplika katak nia “sai boot iha lia-loos”, maibé bainhira tinan 16, nia husik kongregasaun atu “buka haksolok iha mundu”. Nia hasoru  problema barak, hanesan nia sai isin-rua no halo abortu. Agora nia hatete: “Haʼu husik kongregasaun ba tinan tolu, no agora haʼu sente haʼu-nia laran kanek nafatin. Haʼu hanoin nafatin katak hodi halo abortu haʼu oho haʼu-nia oan. . . . Haʼu hakarak fó-hatene klosan sira neʼebé hakarak ‘koko’ mundu ba tempu uitoan: ‘Keta!’ Hodi koko mundu neʼe, ulukliu Ita sente diʼak, maibé ikusmai Ita sei hatene katak mundu neʼe midar iha liʼur maibé moruk iha laran. Mundu neʼe lori laran-susar deʼit. Haʼu hatene. Haʼu koko tiha ona. Nafatin hela iha Maromak Jeová nia organizasaun! Neʼe mak dalan ida deʼit atu hetan moris neʼebé kontente.”

19, 20. Protesaun saida mak ita bele hetan iha kongregasaun laran? No oinsá?

¹⁹ Hanoin toʼok saida mak bele akontese ba Ita se Ita husik Ita-nia fatin seguru, katak kongregasaun kristaun. Irmaun-irmán balu hanoin-hetan kona-ba sira-nia moris neʼebé nakonu ho problema antes sira tama lia-loos, no sira hakribi moris hanesan neʼe. (Joao 6:68, 69) Ita bele kontinua atu sente seguru no hetan protesaun husi problema no susar sira neʼebé mosu beibeik iha Satanás nia mundu hodi nafatin hakbesik ho ita-nia irmaun-irmán sira. Kuandu ransu ho sira no halibur an iha reuniaun kongregasaun sira, neʼe book ita atu hanoin-hetan Maromak Jeová nia matenek no moris tuir ninia matadalan sira. Loos, ita iha razaun barak atu ‘hahiʼi Maromak Jeová iha kongregasaun boot’, hanesan David halo.—Sal 35:18.

²⁰ Klaru katak dala ruma ita ema kristaun hotu hasoru situasaun ruma neʼebé susar atu hatudu laran-metin. Iha tempu neʼebá, karik ema kristaun neʼe presiza rona deʼit liafuan balu neʼebé hatudu dalan neʼebé loos. Saida mak ita ida-idak iha kongregasaun laran bele halo atu ajuda ita-nia maluk neʼebé hasoru problema ruma? Lisaun tuirmai sei koʼalia kona-ba oinsá ita bele nafatin ‘fó aten-brani ba malu no hametin malu’.—1 Tes 5:11.

[Nota–rodapé]

Oinsá ita hatán?

• Saida mak ita aprende husi Asaf nia esperiénsia?

• Saida mak ita aprende husi Dina nia esperiénsia?

• Tanbasá mak ita bele hetan protesaun iha kongregasaun kristaun?

[Pergunta estudu nian]

[Dezeñu iha pájina 7]

Nani iha fatin seguru; nafatin hela iha kongregasaun!