Kontinua hametin malu iha kongregasaun laran
Kontinua hametin malu iha kongregasaun laran
“Fó aten-brani ba malu, hametin malu nuʼudar imi halo daudaun ona.”—1 TES 5:11.
1. Sai parte husi kongregasaun kristaun lori bensaun saida deʼit? Maibé, ita hasoru problema saida deʼit?
ATU sai parte husi kongregasaun kristaun mak bensaun boot. Ita iha relasaun neʼebé diʼak ho Maromak Jeová. Tanba ita kaer metin ba ninia Liafuan, ida-neʼe proteje ita husi rezultadu aat neʼebé ema hetan tan la moris tuir morál kristaun nian. Ita iha belun barak neʼebé diʼak, no sira hakarak duni atu ita hetan susesu iha ita-nia moris. Loos duni, ita iha bensaun barak. Maski nuneʼe, ema kristaun barak luta hasoru problema ruma. Sira balu presiza ajuda atu komprende buat neʼebé kleʼan liu kona-ba Maromak nia Liafuan. Sira seluk sai moras ka iha depresaun, katak laran-kraik todan. Sira seluk tan hasoru rezultadu aat tanba sira rasik nia desizaun neʼebé la matenek. No ita hotu moris iha mundu neʼebé la halo tuir Maromak, no ida-neʼe lori susar oioin.
2. Saida mak ita tenke halo kuandu ita-nia maluk hasoru susar ruma? Tanbasá?
2 Ita hotu la kontente hodi haree maluk kristaun ida hasoru susar ruma. Apóstolu Paulo kompara kongregasaun hanesan ho isin-lolon no hatete katak “liman ain ida terus karik, liman ain hotu terus hamutuk ho nia”. (1 Kor 12:12, 26) Bainhira situasaun neʼe mosu, ita tenke hakaʼas an atu ajuda ita-nia irmaun no irmán sira. Bíblia konta istória balu kona-ba irmaun no irmán neʼebé hetan ajuda husi sira-nia maluk iha kongregasaun laran. Agora, nuʼudar ita koʼalia kona-ba ezemplu balu, hanoin toʼok oinsá Ita bele fó ajuda se situasaun neʼebé hanesan mosu iha Ita-nia kongregasaun. Oinsá mak Ita bele ajuda Ita-nia irmaun-irmán sira atu kontinua serbí Maromak Jeová no nafatin hametin Maromak nia kongregasaun?
Sira “fó-hatene didiʼak ba nia”
3, 4. Oinsá mak Áquila no Priscila ajuda Apolo?
3 Bainhira Apolo muda ba sidade Éfezu, nia sai tiha ona haklaken-naʼin neʼebé laran-manas. Livru Apostolu hatete: “Nia hatene barak kona-ba Naʼi nia Dalan no ho laran-manas nia koʼalia no hanorin momoos kona-ba Jesus, maski nia hatene deʼit João nia batizmu.” Eskritura neʼe dehan Apolo la hatene kona-ba batizmu “hodi Aman, Oan no espíritu santu nia naran”, no karik ida-neʼe tanba João Batista nia dixípulu hanorin lia-loos ba nia, ka haklaken-naʼin neʼebé tuir Jesus hanorin nia antes loron Pentekostes iha tinan 33. Maski Apolo laran-manas, maibé iha buat barak neʼebé nia seidauk hatene. Hodi ransu malu ho maluk fiar-naʼin, ida-neʼe ajuda nia ka lae?—Apos 1:4, 5; 18:25; Mt 28:19.
4 Kaben-naʼin kristaun, Áquila no Priscila, rona Apolo koʼalia ho aten-brani iha sinagoga, no sira konvida nia atu bá hamutuk ho sira hodi sira bele hanorin buat kleʼan liu kona-ba lia-loos. (Lee Apostolu 18:24-26.) Hodi halo nuneʼe sira hatudu domin ba nia. Klaru katak Áquila no Priscila koʼalia ba Apolo ho laran-maus hodi bele ajuda nia, laʼós atu hatún nia. Tuir loloos, problema mak Apolo seidauk hatene saida mak akontese iha kongregasaun kristaun depois tinan 33. No mós, klaru katak Apolo agradese ba sira tanba hanorin nia lia-loos sira-neʼe. Kuandu nia hatene lia-loos ho kleʼan liután, Apolo “fó tulun makaʼas” ba nia maluk sira iha Akaia no fó sasin makaʼas ba ema seluk.—Apos 18:27, 28.
5. Haklaken-naʼin Reinu nian rihun ba rihun fó ajuda saida ba ema seluk? Saida mak rezultadu?
5 Ohin loron, ema barak iha kongregasaun kristaun agradese ba maluk sira-neʼebé hanorin lia-loos husi Bíblia ba sira. Estudante no mestre barak sai ona belun diʼak neʼebé hadomi malu ba tempu kleur. Baibain, mestre tenke uza tempu barak semana-semana ba fulan balu atubele ajuda ema seluk hatene lia-loos. Maibé, haklaken-naʼin Reinu nian kontente atu fó tempu neʼe tanba sira hatene katak estuda lia-loos bele salva ema nia moris. (Joao 17:3) No sira kontente tebes kuandu haree ema simu lia-loos, moris tuir lia-loos neʼe, no uza sira-nia moris atu halo tuir Maromak Jeová nia hakarak!
Sira “koʼalia didiʼak kona-ba nia”
6, 7. (a) Tanbasá mak Paulo hili Timóteo atu sai ninia ajudante? (b) Oinsá mak Paulo ajuda Timóteo?
6 Durante apóstolu Paulo nia viajen misionáriu segundu, nia no Silas bá vizita sidade Listra. Iha neʼebá, sira hasoru mane-klosan naran Timóteo, neʼebé karik tinan 17 liu ka 20 liu. “Maun alin sira iha Listra ho Ikóniu koʼalia didiʼak kona-ba nia.” Timóteo nia inan, Eunice, no nia avó-feto, Lóide, mak ema kristaun neʼebé dedika an ba Maromak, maibé nia aman laʼós fiar-naʼin. (2 Tim 1:5) Karik Paulo koñese família neʼe kuandu nia vizita fatin neʼe tinan rua liubá. Maibé agora Paulo hatudu interese liu ba Timóteo tanba klosan neʼe haree hanesan nia iha kapasidade atu simu knaar espesiál. Nuneʼe, grupu katuas nian husi Timóteo nia kongregasaun hatán atu nia sai Paulo nia ajudante iha serbisu misionáriu nian.—Lee Apostolu 16:1-3.
7 Timóteo bele aprende buat barak husi nia maluk serbisu neʼebé idade liu. No nia loloos aprende buat barak duni toʼo ikusmai Paulo haruka nia atu reprezenta nia hodi fó tulun ba kongregasaun balu. Durante tinan 15 neʼebé Timóteo hamutuk ho Paulo, mane-klosan neʼebé karik moedór neʼe laʼo ba oin no sai katuas kristaun neʼebé matenek.—Flp 2:19-22; 1 Tim 1:3.
8, 9. Oinsá mak irmaun-irmán iha kongregasaun bele book ema klosan sira hakaʼas an atu hetan knaar iha Maromak nia serbisu? Konta toʼok ezemplu ida.
8 Ohin loron kongregasaun sira iha mane-klosan no feto-klosan barak neʼebé iha mós kapasidade atu simu knaar espesiál iha aban-bainrua. Kuandu maluk sira neʼebé hatudu ona ezemplu diʼak apoia no fó laran-manas ba klosan sira-neʼe, ida-neʼe book sira atu hakaʼas an hodi simu knaar ruma iha Maromak Jeová nia povu nia leet. Haree ba klosan sira iha Ita-nia kongregasaun! Iha ka lae, ema neʼebé bele sai hanesan Timóteo? Ho Ita-nia ajuda, karik sira bele sai pioneiru, misionáriu, katuas neʼebé vizita kongregasaun sira, ka serbí iha Betel. Saida mak Ita bele halo atu ajuda sira hetan knaar hanesan neʼe?
9 Martin, neʼebé serbí iha Betel ba tinan 20 ona, agradese ba katuas ida neʼebé iha knaar atu vizita kongregasaun sira. Tinan 30 liubá sira bá haklaken hamutuk, no katuas neʼe konta ho laran-manas kona-ba tempu neʼebé nia klosan no serbí iha Betel. Nia fó laran-manas ba Martin atu hanoin kona-ba oinsá Martin mós bele serbí Maromak Jeová iha dalan neʼebé hanesan. Martin sente katak katuas neʼe nia liafuan book nia atu halo desizaun neʼebé matenek kona-ba nia moris. Karik Ita mós bele koʼalia ba klosan sira iha Ita-nia kongregasaun kona-ba sira-nia planu atu serbí Maromak. Karik Ita-nia liafuan mós sei book sira iha dalan neʼebé hanesan.
“Fó aten-brani” ba sira neʼebé depresaun
10. Oinsá mak Epafrodito sente, no tanbasá?
10 Epafrodito laʼo dook husi sidade Filipe toʼo Roma atu vizita apóstolu Paulo neʼebé sai dadur tan nia fiar. Epafrodito reprezenta fiar-naʼin sira iha Filipe. Nia la lori deʼit sira-nia prezente ba Paulo, maibé nia mós planu atu hela ho Paulo hodi ajuda nia durante tempu susar neʼe. Maibé, Epafrodito sai moras iha Roma toʼo nia “besik atu mate”. Nia sente katak nia la kumpre nia knaar, no tan neʼe nia laran-kraik todan, ka depresaun.—Flp 2:25-27.
11. (a) Tanbasá mak ita la hakfodak se maluk iha kongregasaun kona depresaun? (b) Saida mak Paulo hakerek kona-ba Epafrodito?
11 Ohin loron ema depresaun tanba razaun oioin. Informasaun husi Organização Mundial da Saúde hatudu katak karik porsentu 20 husi ema hotu kona depresaun ba tempu balu iha sira-nia moris. Depresaun mós kona Maromak Jeová nia povu. Karik irmaun ka irmán sente laran-kraik tanba nia halo sala, ka problema iha família, ka moras, ka razaun seluk. Saida mak Epafrodito nia maluk sira iha Filipe bele halo atu ajuda nia? Paulo hakerek ba sira: “Neʼe duni, simu nia ho ksolok, hanesan loloos iha Naʼi. Haree didiʼak ema sira hanesan nia, neʼebé, tanba Kristu nia serbisu, hakbesik mate, laran hadiʼa an atu lakon nia moris atu serbí haʼu iha imi-nia fatin, wainhira imi la bele serbí haʼu.”—Flp 2:29, 30.
12. Oinsá mak ita bele ajuda ema neʼebé kona depresaun?
12 Ita mós tenke fó laran-manas ba maluk neʼebé laran-kraik ka depresaun. Klaru katak ita bele koʼalia ho sira kona-ba serbisu diʼak neʼebé sira halo ona ba Maromak Jeová. Karik sira troka buat barak iha sira-nia moris atu sai ema kristaun loos ka serbí nuʼudar pioneiru. Ita hafolin sira-nia hakaʼas-an, no ita bele fó-hatene sira katak Maromak Jeová mós sente hanesan neʼe. Maski fiar-naʼin balu la bele halo buat barak tanba moras ka sai ferik-katuas, maibé sira-nia maluk sei respeitu sira nafatin no hafolin serbisu neʼebé sira halo ona. Tuir loloos, iha situasaun naran deʼit, Maromak Jeová nia konsellu mak: “Fó aten-brani ba sira neʼebé taʼuk; tau matan ba sira neʼebé kbiit-laek, no pasiénsia ba ema hotu.”—1 Tes 5:14.
“Fó perdua ba nia no konsola nia”
13, 14. (a) Kongregasaun Korintu tenke halo saida, no tanbasá? (b) Saida mak rezultadu husi dixiplina neʼe?
13 Kongregasaun Korintu antigu hasoru situasaun neʼebé susar. Iha sira-nia leet iha ema ida neʼebé halo sala-foʼer no la hakribi sala neʼe. Ninia hahalok neʼe bele halo kongregasaun sai la moos, no ninia hahalok neʼe mós halo ema laʼós fiar-naʼin sente hakfodak. Tan neʼe, Paulo haruka atu hasai ema neʼe husi kongregasaun.—1 Kor 5:1, 7, 11-13.
14 Dixiplina neʼe fó rezultadu diʼak. Hodi hasai ema neʼebé halo sala, ida-neʼe proteje kongregasaun, no ajuda ema neʼe atu rekoñese no loloos hakribi ninia sala. Ikusmai ema neʼe hatudu liuhusi ninia hahalok katak nia arrepende duni nia sala, no tan neʼe iha Paulo nia karta segundu ba kongregasaun Korintu, nia haruka sira atu simu fali ema neʼe. Maibé, simu fali mós la toʼo. Paulo mós fó-hatene sira atu ho laran-diʼak “fó perdua ba nia no konsola nia [ka, fó laran-kmaan ba nia]; lae karik, susar boot liu neʼe bele halakon nia”.—Lee 2 Korinto 2:5-8.
15. Oinsá mak ita tenke sente ba ema neʼebé arrepende an no kongregasaun simu fali?
15 Saida mak ita aprende husi istória neʼe? Ita sente triste bainhira kongregasaun tenke hasai ema neʼebé la hakribi sala. Karik ema neʼe hafoʼer Maromak nia naran no Ita-nia kongregasaun nia naran. Karik nia halo sala hasoru Ita. Maibé, iha katuas sira-neʼebé simu knaar atu tesi lia ba situasaun neʼe hodi tuir Maromak Jeová nia matadalan. No, kuandu sira deside atu simu fali ema neʼebé halo sala neʼe tanba nia arrepende an, neʼe hatudu katak Maromak Jeová mak fó perdua ona ba nia. (Mt 18:17-20) Iha situasaun neʼe, ita tenke banati-tuir Maromak nia ezemplu, loos ka lae? Tuir loloos, se ita ulun-toos no lakohi fó perdua, neʼe hanesan ita kontra Maromak Jeová. Atu kongregasaun bele iha dame no sai ida deʼit, no monu loos ba Maromak Jeová nia laran, ita tenke ‘hafoun ita-nia domin’ ba sala-naʼin neʼebé kongregasaun simu fali tanba nia arrepende an. Ita mós apoia ida-neʼe, loos ka lae?—Mt 6:14, 15; Lc 15:7.
“Nia nuʼudar tulun ba haʼu”
16. Tanbasá mak Paulo sente laran-tun kona-ba Marcos?
16 Ezemplu ida tan husi Bíblia hatudu katak ita labele hanoin beibeik kona-ba ema nia fraku maski sira-nia hahalok halo ita laran-tun. Porezemplu, João Marcos halo apóstolu Paulo laran-tun tebes. Tanbasá? Bainhira Paulo no Barnabé komesa sira-nia viajen misionáriu primeiru, Marcos laʼo hamutuk atu ajuda sira. Maibé, tan razaun ruma, nia husik sira no fila fali ba uma maski viajen neʼe seidauk hotu. Paulo sente laran-tun kona-ba neʼe toʼo nia lakohi konvida Marcos atu tuir viajen misionáriu segundu, no Paulo no Barnabé istori malu kona-ba ida-neʼe.—Lee Apostolu 13:1-5, 13; 15:37, 38.
17, 18. Oinsá mak Paulo no Marcos rezolve sira-nia problema? Saida mak ita bele aprende husi ida-neʼe?
17 Maski Paulo la simu Marcos, Marcos la sai triste demais, maibé nia kontinua serbí nuʼudar misionáriu iha fatin seluk hamutuk ho Barnabé. (Apos 15:39) Ita hatene katak Marcos mak ema laran-metin tanba tinan balu tuirmai Paulo gaba nia. Kuandu Paulo sai dadur iha Roma, nia hakerek karta atu husu Timóteo mai toʼo Roma. Iha karta neʼebé hanesan, Paulo hakerek: “Halo Marcos mai ho ó; haʼu hetan nia nuʼudar tulun diʼak ba haʼu-nia serbisu.” (2 Tim 4:11) Sin, Paulo fiar katak Marcos laʼo ba oin ona iha lia-loos.
18 Ita bele aprende lisaun husi ida-neʼe. Marcos haburas hahalok sira-neʼebé diʼak nuʼudar misionáriu. Nia la sidi maski ulukliu Paulo la simu nia. Nia no mós Paulo iha hanoin hanesan Maromak nian, no sira la rai hirus ba malu. Tuir loloos, ikusmai Paulo haree Marcos nuʼudar ajudante neʼebé diʼak. Entaun, kuandu irmaun hasoru problema ruma, maibé rezolve problema neʼe, buat neʼebé diʼak mak haluha deʼit problema no kontinua atu ajuda sira laʼo ba oin iha lia-loos. Hodi hanoin kona-ba sira-nia hahalok diʼak, ida-neʼe ajuda atu hametin ita-nia kongregasaun.
Ita-nia kongregasaun no Ita
19. Oinsá mak ema kristaun hotu iha kongregasaun laran bele ajuda malu?
19 ‘Iha loron ikus sira, susar barak mosu mai’, tan neʼe Ita presiza ajuda husi Ita-nia irmaun no irmán sira iha Ita-nia kongregasaun. No sira mós presiza Ita-nia ajuda. (2 Tim 3:1) Dala ruma, ema kristaun ida ladún hatene dalan neʼebé loos atu hasoru problema ruma, maibé Maromak Jeová hatene. Nia bele uza irmaun-irmán iha kongregasaun laran, inklui Ita, atu ajuda ema neʼe hetan dalan neʼebé loos. (Isa 30:20, 21; 32:1, 2) Entaun, mai ita hotu halo tuir apóstolu Paulo nia konsellu! Kontinua atu “fó aten-brani ba malu, hametin malu nuʼudar imi halo daudaun ona”.—1 Tes 5:11.
Oinsá ita hatán?
• Tanbasá mak ita presiza hametin malu iha kongregasaun laran?
• Ita bele ajuda maluk sira atu hasoru susar saida deʼit?
• Tanbasá mak ita presiza ajuda husi maluk sira iha ita-nia kongregasaun?
[Pergunta estudu nian]
[Dezeñu iha pájina 11]
Kuandu maluk kristaun ida luta hasoru susar ruma, ita bele fó tulun ba nia
[Dezeñu iha pájina 12]
Ohin loron iha mane-klosan no feto-klosan barak neʼebé iha kapasidade atu simu knaar espesiál iha aban-bainrua