Tahan nafatin maski Ita-nia kaben la hatudu laran-metin

MARGARITA no nia laʼen Raúl serbí Maromak Jeová hamutuk nuʼudar pioneiru ba tinan barak. * Maibé, depois sira-nia oan primeiru moris, Raúl komesa hadook an husi Maromak Jeová. Ikusmai, Raúl halo sala-foʼer no kongregasaun hasai nia. Margarita hatete: “Kuandu ida-neʼe akontese, haʼu sente haʼu atu mate deʼit. Haʼu sente laran-kanek, no la hatene atu halo saida.”

Ema mós bele hatudu hahalok neʼebé la laran-metin iha dalan seluk. Porezemplu, hanoin toʼok kona-ba feto ida naran Jane. Depois nia kaben, nia laʼen komesa baku nia. Jane dehan: “Dala primeiru nia baku haʼu, haʼu hakfodak no sente moe. Nia sai toman atu baku haʼu no husu haʼu atu fó perdua. Haʼu hanoin katak nuʼudar ema kristaun, haʼu tenke fó perdua no la hanoin tan kona-ba nia sala. Haʼu mós hanoin katak sala atu koʼalia kona-ba ami-nia problema ba ema seluk, inklui mós ba katuas sira iha kongregasaun. Ninia toman mak baku haʼu no husu perdua fali, nia kontinua halo ida-neʼe ba tinan barak. Durante tempu neʼebá haʼu komesa iha hanoin hanesan neʼe: ‘Karik iha buat ruma neʼebé haʼu bele halo hodi haʼu-nia laʼen bele hadomi haʼu fali.’ Ikusmai nia husik haʼu no ami-nia oan-feto. Iha tempu neʼebá haʼu hanoin katak haʼu mak la halo buat ruma hodi bele hametin ami-nia moris kaben nian. Haʼu sente katak haʼu mak ida neʼebé halo sala.”

Hanesan Margarita no Jane, karik Ita mós  hasoru susar kona-ba osan, sente estrese, no mós sente Ita-nia relasaun ho Maromak Jeová sai fraku, tanba Ita-nia laʼen la hatudu laran-metin ba Ita. Karik Ita mak laʼen neʼebé hasoru susar no estrese, tanba Ita-nia feen la hatudu laran-metin ba Ita. Klaru katak, hanesan Bíblia fó-hatene nanis, ita moris iha “loron ikus sira” neʼebé “susar barak sei mosu mai”. Profesia neʼe hatudu katak domin sei menus, no ema balu sei la hatudu laran-metin ba Maromak. Buat hotu neʼe bele halo susar ba família sira. (2 Tim 3:1-5) Ema kristaun loos mós hasoru problema hanesan neʼe. Entaun, saida mak Ita bele halo kuandu Ita-nia kaben la hatudu laran-metin ba Ita?

Haree Ita-nia an hanesan Maromak Jeová haree Ita

Ulukliu, karik susar atu fiar katak ema neʼebé Ita hadomi bele hakanek Ita. Karik Ita mós komesa atu duun Ita-nia an, no hanoin katak Ita-nia hahalok mak book nia atu halo sala.

Maibé, la haluha katak, maski Jesus mak ema perfeitu, ema ida neʼebé nia hadomi no tau fiar mós la laran-metin ba nia. Jesus hanoin didiʼak no halo orasaun antes nia hili nia belun neʼebé besik liu, neʼe mak apóstolu sira. Iha tempu neʼebá sira naʼin-12 hotu mak serbí Maromak Jeová ho laran-metin. Klaru katak Jesus sente laran-susar duni kuandu Judas “saran nia” ba mate. (Lc 6:12-16) Maibé, Maromak Jeová la duun Jesus kona-ba Judas nia hahalok.

Klaru katak kaben-naʼin hotu la perfeitu. Sira naʼin-rua mós ema sala-naʼin. Maromak leno ema ida atu hakerek salmo ida neʼebé dehan: “Se sala sira deʼit mak Ita haree, Oh, Jah, Oh, Jeová, sé mak bele tahan?” (Sal 130:3) Hanesan neʼe, sira naʼin-rua presiza atu fó perdua ba malu, hodi banati-tuir Maromak Jeová nia ezemplu.—1 Ped 4:8.

Maibé, ema “ida-ida sei hatán kona-ba nia an ba Maromak”. (Rom 14:12) Se kaben-naʼin ida sai toman atu hakanek nia kaben, hodi koʼalia makaʼas ka baku nia, ema neʼe sei hatán ba Maromak kona-ba ninia hahalok. Maromak Jeová odi violénsia no nia mós odi koʼalia aat hodi hatún ema. La iha razaun ida ba kaben-naʼin atu hatudu hahalok neʼebé la respeitu no la hatudu domin. (Sal 11:5; Ef 5:33; Kol 3:6-8) Tuir loloos, se ema kristaun ida mak iha toman atu sai hirus beibeik, no nia la hakribi nia sala no la troka nia hahalok, katuas kongregasaun nian tenke hasai ema neʼe husi kongregasaun. (Gal 5:19-21; 2 Joao 9, 10) La sala ba kaben-naʼin ida atu fó-hatene katuas sira kona-ba hahalok aat hanesan neʼe. Ita fiar katak Maromak Jeová hanoin ema neʼebé simu terus hanesan neʼe.

Kaben-naʼin ida neʼebé halo sala-foʼer, halo sala neʼe laʼós deʼit hasoru nia kaben, maibé mós halo sala hasoru Maromak Jeová. (Mt 19:4-9; Ebr 13:4) Maibé oinsá kona-ba kaben-naʼin neʼebé la halo sala? Se nia hakaʼas an nafatin hodi moris tuir Bíblia nia matadalan, nia lalika duun nia an no sente sala kona-ba ninia kaben nia hahalok neʼebé la laran-metin.

La haluha katak Maromak Jeová hatene didiʼak Ita-nia sentimentu. Nia fó-hatene ba nasaun Izraél katak nia sai nuʼudar laʼen ba sira, no nia Liafuan temi dala barak kona-ba oinsá nia sente laran-kanek tanba nasaun neʼe la hatudu laran-metin atu adora nia. (Isa 54:5, 6; Jer 3:1, 6-10) Ita bele fiar katak Maromak Jeová hatene duni Ita-nia susar no matabeen, se karik Ita-nia kaben hatudu hahalok neʼebé la laran-metin ba Ita. (Mal 2:13, 14) Nia hatene katak Ita presiza duni hetan kmaan no ajuda.

Oinsá mak Maromak Jeová fó kmaan no ajuda?

Dalan ida neʼebé Maromak fó ajuda mai ita mak liuhusi kongregasaun. Jane simu ajuda hanesan neʼe, no nia hatete: “Irmaun neʼebé iha knaar atu vizita kongregasaun sira vizita ami iha tempu neʼebé haʼu sente laran-tun tebes. Nia hatene katak haʼu sente laran-tun kuandu rona haʼu-nia laʼen enxe daudauk formuláriu atu soe malu. Nia uza tempu atu ajuda haʼu hodi uza eskritura balu, hanesan 1 Korinto 7:15. Eskritura sira-neʼe, no mós nia  liafuan diʼak sira, ajuda haʼu atu la duun demais haʼu-nia an, no halo haʼu sente laran-kmaan. *

Margarita, neʼebé temi uluk, mós aprende katak Maromak Jeová haraik duni ajuda liuhusi kongregasaun. Nia dehan: “Kuandu haʼu hatene katak haʼu-nia laʼen la hakribi nia sala, haʼu lori haʼu-nia oan sira atu hela iha sidade seluk. Iha neʼebá haʼu aluga kuartu rua. Loron tuirmai, kuandu haʼu haloot ami-nia roupa ho laran-triste, haʼu rona ema ida dere odamatan. Iha haʼu-nia hanoin, ema neʼe mak uma-naʼin, neʼebé hela iha sorin. Maibé haʼu hakfodak tebes tanba haree ema neʼebé mai mak irmán neʼebé estuda Bíblia ho haʼu-nia inan, no ajuda haʼu-nia família hatene lia-loos. Nia nunka iha planu atu vizita haʼu, maibé tuir loloos ninia planu mak atu vizita uma-naʼin, hodi estuda Bíblia ho nia. Haʼu sente laran-kmaan tebes, no ikusmai haʼu la bele kontrola haʼu-nia sentimentu neʼe. Haʼu esplika haʼu-nia situasaun ba nia, no ami tanis hamutuk. Nia halo planu kedan atu ami tuir reuniaun, iha loron neʼe duni. Kongregasaun neʼe simu ami ho kontente, no katuas sira halo arranju hodi haʼu bele tau matan ba haʼu-nia família nia presiza iha dalan espirituál.”

Oinsá mak ema seluk bele ajuda?

Ema iha kongregasaun bele ajuda iha dalan oioin. Porezemplu, iha situasaun neʼebá, Margarita presiza buka serbisu atu hetan osan. Família ida iha kongregasaun dehan katak sira prontu atu tau matan ba labarik sira bainhira nia bá serbisu.

Margarita hatutan: “Buat neʼebé haʼu gosta tebes mak kuandu irmaun-irmán sira konvida haʼu no haʼu-nia oan atu haklaken hamutuk ho sira.” Hodi fó ajuda hanesan neʼe, ema iha kongregasaun bele ‘lori sira-nia maluk nia todan’, no nuneʼe sira “halo tuir Kristu nia ukun-fuan”.—Gal 6:2.

Ema neʼebé hetan susar tanba ema seluk nia sala hafolin duni ajuda hanesan neʼe. Monica nia laʼen husik nia, no susar liután mak nia laʼen debe osan husi banku dolar 15.000. Neʼe katak Monica tenkesér haboot nia oan naʼin-haat no mós selu osan ba banku. Nia dehan: “Haʼu-nia irmaun-irmán sira hatudu domin boot. Se haʼu mesak, haʼu la hatene oinsá atu hasoru situasaun hanesan neʼe. Haʼu sente katak Maromak Jeová rasik ajuda haʼu liuhusi irmaun sira, no sira hakaʼas an atu ajuda haʼu-nia oan sira. Haʼu kontente tebes haree haʼu-nia oan sira iha relasaun diʼak ho Maromak Jeová, tanba sira simu ajuda hanesan neʼe. Kuandu  haʼu presiza matadalan, katuas sira ajuda haʼu. Kuandu haʼu presiza atu koʼalia sai haʼu-nia sentimentu, sira prontu atu rona haʼu.”—Mc 10:29, 30.

Loos duni, belun neʼebé hatudu domin sei hatene tempu neʼebé diʼak no tempu neʼebé ladiʼak atu koʼalia kona-ba nia maluk nia situasaun triste. (Ecle 3:7) Margarita hatete: “Baibain, haʼu gosta atu koʼalia ho irmán sira iha kongregasaun foun kona-ba haklaken, estudu Bíblia, no kona-ba oan sira. Haʼu kontente koʼalia kona-ba buat saida deʼit, maibé kona-ba haʼu-nia problema deʼit mak haʼu lakohi koʼalia. Haʼu kontente tanba sira la koʼalia kona-ba haʼu-nia problema neʼebé haʼu husik ona ba kotuk, no sira ajuda haʼu atu komesa halaʼo haʼu-nia moris foun.”

Keta hanoin atu selu aat fali

Dala ruma, duké hanoin katak Ita-nia hahalok ruma mak book Ita-nia kaben atu halo sala, Ita sai hirus tebes hodi hanoin katak Ita hetan susar boot tanba Ita-nia kaben nia sala. Se Ita husik hirus neʼe aumenta ba beibeik, ida-neʼe mós bele halo fraku Ita-nia laran-metin ba Maromak Jeová. Porezemplu, karik Ita komesa hanoin atu buka dalan atu selu aat fali ba Ita-nia kaben neʼebé la laran-metin ba Ita.

Se hanoin aat hanesan neʼe komesa sai buras iha Ita-nia laran, diʼak atu hanoin kona-ba Josué no Caleb nia ezemplu diʼak. Nuʼudar espiaun, sira tau sira-nia moris iha perigu laran hodi hafuhu rai neʼebé Maromak promete nanis. Maibé espiaun sira seluk la tau fiar ba Maromak Jeová no halo povu barak la halo tuir. Povu balu sai hirus tebes toʼo hakarak tuda mate Josué no Caleb kuandu sira naʼin-rua fó laran-manas ba povu atu fiar metin ba Maromak Jeová. (Núm 13:25–14:10) Tanba buat neʼebé nasaun Izraél halo, Josué no Caleb tenkesér laʼo iha rai-fuik ba tinan 40 maski sira rasik la halo sala.

Karik Josué no Caleb sente triste kona-ba neʼe, maibé sira la husik ida-neʼe sai buras iha sira-nia laran. Sira kontinua hanoin uluk kona-ba serbisu ba Maromak Jeová. Liutiha tinan 40, hamutuk ho ema levita sira, Josué no Caleb hetan sira-nia kolen. Husi sira-nia jerasaun, sira deʼit mak tama iha rai neʼebé Maromak promete nanis ona.—Núm 14:28-30; Jos 14:6-12.

Karik Ita hetan susar ba tempu kleur tanba Ita-nia kaben nia hahalok aat. Porezemplu maski Ita soe malu ona, maibé Ita nafatin sente estrese no mós hasoru susar kona-ba osan. Maski nuneʼe, keta hanoin demais kona-ba susar neʼe. No mós keta haluha katak Maromak Jeová mak sei tesi lia no fó kastigu ba ema neʼebé la halo tuir ninia ukun-fuan, hanesan nia halo ba ema Izraél iha rai-fuik.—Ebr 10:30, 31; 13:4.

Ita bele tahan!

Diʼak liu atu halo Ita-nia neon nakonu ho Maromak Jeová nia hanoin duké husik susar domina Ita nia hanoin. Jane hatete: “Haʼu gosta rona Livru Haklaken no Sedarlah! neʼebé grava ona, ida-neʼe ajuda haʼu atu tahan hasoru susar. Reuniaun sira mós fó forsa mai haʼu atu tahan. Hola parte iha reuniaun ajuda haʼu atu la hanoin tan kona-ba haʼu-nia problema sira. Nuneʼe mós ho serbisu haklaken. Hodi ajuda ema seluk atu hametin sira-nia fiar ba Maromak Jeová, ida-neʼe mós hametin haʼu rasik nia fiar. Tau matan ba haʼu-nia estudante sira ajuda haʼu atu tau uluk buat neʼebé importante liu iha haʼu-nia moris.”

Monica, neʼebé temi uluk ona, hatete: “Hodi tuir reuniaun beibeik no sempre hakaʼas an atu hola parte iha serbisu haklaken, haʼu bele tahan toʼo agora. Relasaun entre haʼu no haʼu-nia oan sira sai metin liután no ami sente ami besik ho kongregasaun. Liuhusi susar neʼe, haʼu hatene haʼu-nia fraku. Susar neʼe koko haʼu-nia fiar, maibé ho Maromak Jeová nia ajuda, haʼu bele tahan susar neʼe.”

Ita mós bele tahan hasoru susar hanesan neʼe. Maski Ita-nia kaben la hatudu laran-metin ba Ita no halo Ita laran-kanek, hakaʼas an atu halo tuir apóstolu Paulo nia konsellu: “Keta kole halo hahalok diʼak sira; ita la baruk karik hodi bá oin nafatin, loron sei toʼo mai wainhira ita sei halibur fuan sira.”—Gal 6:9.

[Nota–rodapé]

[Dezeñu iha pájina 31]

Hodi haklaken hamutuk, ita bele fó kmaan ba ita-nia maluk neʼebé nia kaben husik nia