Unidade ho domin—Relatóriu husi reuniaun tinan nian

EMA hotu neʼebé halibur hamutuk iha Salaun ba Reuniaun Boot husi Testemuña ba Jeová, iha Sidade Jersey, Nova Jersey, Estadus Unidus Amérika, sente laran-manas tebes. Iha 3 Outubru 2009, iha dadeer-saan, ema naʼin-5.000 liu halibur hamutuk hodi asiste reuniaun tinan nian ba dala 125, husi Watch Tower Bible and Tract Society of Pennsylvania. Iha tempu hanesan, ema naʼin-8.000 liu mós rona no haree programa neʼe iha fatin tolu iha Betel Estadus Unidus no Betel Kanadá. Ema hamutuk naʼin-13.235 haksolok ho programa neʼe durante oras tolu, no haksolok ho unidade tanba sira-nia domin ba Maromak Jeová.

Geoffrey Jackson husi Grupu Administradór mak serbí nuʼudar ulun-naʼin ba programa neʼe. Nia loke programa hodi konvida grupu husi Betel atu kanta knananuk balu husi ita-nia livru knananuk foun. David Splane husi Grupu Administradór mak dirije grupu kanta neʼe, no nia mós hatoʼo liafuan balu hodi esplika katak múzika mak parte importante ba ita-nia adorasaun loos. Nia konvida rona-naʼin atu kanta knananuk foun tolu. Grupu kanta nian mak kanta uluk, no tuirmai rona-naʼin no grupu neʼe kanta hamutuk. Maibé, iha reuniaun boot neʼe deʼit mak iha grupu kanta nian. Ida-neʼe laʼós atu fó ezemplu ba kongregasaun ka reuniaun boot sira.

Relatóriu husi sukursál sira

Irmaun sira husi Grupu Koordenadór ba Sukursál lima hatoʼo relatóriu ba rona-naʼin. Kenneth Little dehan katak lakleur Betel iha rai-Kanadá sei halo livru fulan-fulan nian barak ba Estadus Unidus no Kanadá. Neʼe katak livru fulan-fulan nian neʼebé sira halo sei aumenta ba dala sanulu. Atu halo ida-neʼe, mákina foun neʼebé sira uza laʼo ba oras 16 iha loron ida nia laran, no presiza grupu rua neʼebé troka malu atu tau matan.

Reiner Thompson hatoʼo relatóriu kona-ba serbisu Reinu nian iha Repúblika Dominikana, no Albert Olih koʼalia kona-ba atividade iha rai-Nijéria. Emile Kritzinger husi rai-Mosambike esplika katak depois hetan terus boot ba tinan barak, ikusmai Testemuña ba Jeová hetan rejistu iha tinan 1992. Iha rai tolu neʼe, númeru ba haklaken-naʼin sira foin aumenta barak. Viv Mouritz husi sukursál Austrália koʼalia kona-ba mudansa ba serbisu iha rai-Timor Leste, neʼebé sukursál Austrália mak tau matan.

Grupu Administradór

Komesa iha tinan 1976 Grupu Administradór forma komisaun neen atu toma konta ba atividade hotu husi Testemuña ba Jeová. Tuirmai, irmaun balu husi bibi seluk hetan knaar atu ajuda komisaun sira-neʼe, no agora iha irmaun naʼin-23 neʼebé halaʼo knaar neʼe. Iha reuniaun boot ida-neʼe irmaun naʼin-neen husi sira hetan entrevista. Sira-nia serbisu ba tempu tomak hamutuk tinan 341, neʼe katak sira ida-idak serbí maizumenus ba tinan 57.

Don Adams, neʼebé komesa serbí iha Betel iha tinan 1943, esplika katak koordenadór ida-idak husi komisaun lima mak hamutuk forma Komisaun Koordenadór nian, no Komisaun Koordenadór nian simu knaar atu haree katak komisaun lima serbisu hamutuk ho diʼak. Komisaun Koordenadór nian mós toma konta ba emerjénsia, dezastre naturál, terus boot neʼebé irmaun sira hasoru, kazu iha tribunál, ka buat seluk neʼebé kona Testemuña ba Jeová iha mundu tomak neʼebé tenke rezolve lalais.

 Don Molchan koʼalia kona-ba Komisaun Serbisu-naʼin nian, neʼebé tau matan ba buat isin nian no buat espirituál nian ba ema Betel naʼin-19.851 iha mundu tomak. David Sinclair mós esplika katak Komisaun Editora nian mak toma konta kona-ba hola sasán no mákina ba sukursál sira. Tuirmai, Robert Wallen, neʼebé serbí iha Betel maizumenus tinan 60, dehan katak Komisaun Serbisu nian mak tau matan ba atividade ba Maromak nia povu iha serbisu haklaken no mós iha kongregasaun laran. William Malefant mós koʼalia kona-ba Komisaun Hanorin nian, no oinsá sira halo serbisu badinas atu prepara programa ba reuniaun boot sira. Ikusmai, John Wischuk esplika kona-ba Komisaun Hakerek nian, no oinsá sira prepara ho diʼak informasaun ba ita-nia livru sira. *

Eskritura ba tinan 2010 kona-ba domin

Irmaun sira husi Grupu Administradór mak hatoʼo diskursu tolu tuirmai. Gerrit Lösch komesa nia diskursu hodi husu pergunta neʼe: “Ita hakarak ema seluk hadomi ita ka lae?” Nia esplika katak domin mak buat neʼebé ema hotu presiza duni, no ita hotu moris kontente kuandu simu domin. Ita hotu moris tanba domin, tan domin loos mak book Maromak Jeová atu kria ema. Domin ba Maromak Jeová mós book ita atu halaʼo serbisu haklaken no hanorin.

Ita tuir Maromak nia ezemplu hodi hatudu domin laʼós deʼit ba maluk sira, maibé mós ba funu-balun sira. (Mt 5:43-45) Irmaun Lösch husu rona-naʼin atu hanoin kona-ba Jesus nia domin ba ita. Tan domin Jesus tahan hasoru terus oioin hanesan ema baku, hasara, tafui kabeen no sona nia. Maski nuneʼe, nia halo orasaun ba soldadu sira neʼebé fó-terus ba nia. Ida-neʼe book ita atu hadomi nia liután, loos ka lae? Tuirmai, Irmaun Lösch fó-hatene ba rona-naʼin eskritura tinan nian ba 2010: 1 Korinto 13:7, 8, ‘Domin tahan terus hotu. Domin hela nafatin.’ Ita iha esperansa, laʼós deʼit atu moris ba nafatin, maibé mós atu hatudu no simu domin ba nafatin.

Ita-nia karreta iha gazolina ka lae?

Samuel Herd loke nia diskursu hodi hatoʼo ai-knanoik ida. Hanoin toʼok katak Ita-nia kolega tula Ita atu laʼo ba fatin dook kilómetru 50. Ita haree ponteiru gazolina nian hatudu katak besik hotu. Ita fó-hatene Ita-nia kolega katak gazolina besik hotu. Maibé nia dehan: ‘La buat ida, sei hela gazolina uitoan.’ Lakleur gazolina hotu duni. Entaun, matenek atu kontinua laʼo ho gazolina uitoan deʼit, maski karik karreta para iha fatin naran deʼit ka lae? Diʼak liu sempre iha tanke neʼebé nakonu! Ai-knanoik neʼe katak sá? Ita hanesan karreta. Gazolina hanesan estuda kona-ba Maromak Jeová.

Nuneʼe ita tenke enxe gazolina beibeik. Atu halo ida-neʼe iha dalan haat. Primeiru, estuda mesak, neʼe katak hatene Bíblia didiʼak hodi lee  loron-loron. Segundu, halaʼo didiʼak ita-nia Adorasaun Família nian. Semana-semana ita halo ita-nia tanke nakonu, ka enxe uitoan deʼit? Terseiru mak reuniaun kongregasaun sira, iha neʼebé ita estuda Bíblia hamutuk. Ikus mak uza tempu atu hanoin kleʼan kona-ba Maromak Jeová nia hahalok. Salmo 143:5 dehan: “Haʼu hanoin kona-ba loron sira husi tempu uluk; Haʼu hanoin kleʼan kona-ba buat hotu neʼebé Ita-Boot halo.”

“Ema diʼak sira sei nabilan hanesan loron”

John Barr mak hatoʼo diskursu ikus, neʼebé esplika Jesus nia ai-knanoik kona-ba trigu no duʼut aat. (Mt 13:24-30, 38, 43) Ai-knanoik neʼe temi ‘loron koʼa nian’, no iha tempu neʼe toʼos nia atan sira haloot “reinu nia oan sira”, no sira hili no sunu duʼut aat.

Irmaun Barr esplika katak tempu atu haloot sei la kontinua ba nafatin. Nia temi Mateus 24:34, neʼebé hatete: “Molok jerasaun neʼe liu ona, buat sira-neʼe hotu sei mosu mai.” Nia lee ba dala rua fraze tuirmai neʼe: “Ita bele fiar katak jerasaun neʼe mak ema kose-mina sira neʼebé haree sinál komesa sai klaru iha tinan 1914 maibé mate antes terus boot, no mós ema kose-mina sira neʼebé moris depois tinan 1914 maibé moris iha tempu hanesan ho sira neʼebé haree sinál iha tinan 1914, no sira balu sei moris hela kuandu terus boot hahú.” Ita la hatene loron hira ka tinan hira mak “jerasaun neʼe” sei kontinua atu iha, maibé ita hatene katak jerasaun neʼe inklui grupu rua. Maski ema kose-mina sira-nia idade la hanesan, maibé jerasaun neʼe inklui grupu rua neʼebé moris iha tempu hanesan durante parte husi loron ikus sira. Ita kontente tanba hatene katak ema kose-mina balu sei moris hela kuandu terus boot hahú!

“Reinu nia oan sira” hein hela sira-nia kolen atu bá lalehan, maibé ita hotu tenke fiar-metin no nabilan toʼo rohan. Ita hotu neʼebé moris agora iha oportunidade furak atu haree tempu haloot “trigu”.

Reuniaun neʼe ramata ho kanta knananuk, no Theodore Jaracz husi Grupu Administradór halo orasaun atu taka. Klaru katak programa husi reuniaun tinan nian fó laran-manas duni ba rona-naʼin!

[Nota–rodapé]

[Kaixa iha pájina 5]

ESKOLA BA KATUAS SIRA

Iha reuniaun tinan nian, Anthony Morris husi Grupu Administradór fó-hatene katak sei iha treinu tan ba katuas sira iha kongregasaun. Eskola foun ba katuas sira husi Estadus Unidus komesa iha tinan 2008, iha fatin edukasaun iha Patterson, Novaiorke. Sira foin ramata klase ba dala 72, no katuas neʼebé hetan treinu ona hamutuk 6.720. Maibé sei iha serbisu barak atu halo, tanba iha Estadus Unidus deʼit, iha katuas naʼin-86.000 resin. Nuneʼe Grupu Administradór fó lisensa atu iha eskola ida tan, neʼebé sei halaʼo iha Brooklyn, Novaiorke, komesa 7 Dezembru 2009.

Irmaun naʼin-haat neʼebé iha knaar atu vizita kongregasaun sira sei hetan treinu ba fulan rua iha Patterson, atu sai mestre ba eskola neʼe. Sira sei bá Brooklyn atu hanorin, no irmaun naʼin-haat seluk sei hetan treinu mós. Irmaun naʼin-haat foun neʼe sei hanorin fali iha Brooklyn, hodi irmaun naʼin-haat seluk neʼe bele vizita Salaun Reinu no Salaun ba Reuniaun Boot sira atu hanorin eskola ba katuas sira. Ida-neʼe sei kontinua toʼo iha mestre naʼin-12 atu hanorin eskola neen semana-semana iha lia-inglés, iha Estadus Unidus. Tuirmai irmaun naʼin-haat sei hetan treinu atu hanorin iha lia-españól. Eskola neʼe laʼós atu troka Eskola Serbisu Reinu nian, maibé eskola neʼe atu ajuda katuas sira kontinua atu laʼo ba oin iha lia-loos. Komesa 2011 sukursál sira iha mundu tomak sei halaʼo eskola neʼe iha Salaun Reinu no Salaun ba Reuniaun Boot sira.

[Dezeñu iha pájina 4]

Reuniaun tinan nian loke hodi kanta knananuk husi ita-nia livru knananuk foun, “Bernyanyilah bagi Yehuwa”