Book Ita-nia oan atu haburas hakarak atu lee no estuda

HAKAʼAS an atu hanorin ita-nia oan atu lee no estuda mak buat ida neʼebé ita bele halo atu sira iha futuru neʼebé diʼak. No ita-nia hakaʼas-an bele lori duni ksolok! Ema balu hanoin-hetan tempu diʼak neʼebé sira-nia inan-aman lee ba sira kuandu sira sei kiʼik. Lee lori ksolok, liuliu ba Maromak nia atan sira, tanba hodi estuda Bíblia ita bele haburas relasaun neʼebé besik ho Maromak Jeová. Aman kristaun ida hatete: “Lee no estuda kona buat neʼebé importante iha ita-nia moris.”

Toman diʼak atu estuda bele ajuda ita-nia oan atu hametin ninia relasaun ho Maromak. (Sal 1:1-3, 6) Maski hatene lee laʼós buat neʼebé presiza atu hetan salvasaun, maibé Bíblia hatudu katak lee bele lori bensaun barak. Porezemplu, Apokalipse 1:3 hatete: “Rahun-diʼak ba ema neʼebé lee lia-menon ida-neʼe, no rahun-diʼak ba sira neʼebé rona nia.” Liután neʼe, importante atu tau atensaun didiʼak kuandu ita lee no estuda. Apóstolu Paulo hatudu ida-neʼe iha ninia konsellu ba Timóteo hodi hatete: “Lee eskritura ba ema sira . . . Halo didiʼak ó-nia knaar.” Tansá? Paulo hatutan: “Atu ema hotu bele haree oinsá ó laʼo ba oin.”—1 Tim 4:13, 15.

Hatene atu lee no estuda, la dehan katak ida-neʼe deʼit bele ajuda ema ida iha nia moris. Ema barak neʼebé iha matenek atu lee no estuda, sira la uza buat neʼebé sira aprende, maibé sira uza sira-nia tempu atu halo buat neʼebé ladún importante. Entaun, oinsá mak inan-aman bele book sira-nia oan atu haburas hakarak atu lee no estuda?

Ita-nia domin no Ita-nia ezemplu

Labarik sira sei gosta tempu estudu nian bainhira inan-aman halaʼo ida-neʼe iha dalan neʼebé oan sira sente inan-aman nia domin. Feen-laʼen kristaun ida, naran Owen no Claudia, hanoin fali kona-ba sira-nia oan naʼin-rua hodi hatete: “Sira sempre hein ba tempu atu estuda tanba neʼe mak tempu espesiál. Iha tempu neʼe sira sente seguru no sente kmaan. Sira sente katak tempu atu halaʼo estudu mak tempu neʼebé nakonu ho domin.” Se inan-aman kontinua atu halaʼo estudu família nian ho domin, bainhira oan sira sai boot no tama ba tempu joven nian, neʼebé dala ruma lori problema, ida-neʼe sei kona oinsá sira sente kona-ba estuda. Agora, Owen no Claudia nia oan naʼin-rua serbí nuʼudar pioneiru no kontinua atu hetan buat diʼak husi lee no estuda, tanba sira-nia inan-aman book sira atu haburas hakarak ida-neʼe.

Buat ida tan neʼebé bele book oan sira atu hakarak lee no estuda mak inan-aman nia ezemplu. Labarik sira neʼebé haree sira-nia inan-aman lee no estuda beibeik bele komprende katak ida-neʼe mak parte importante iha sira-nia moris. Maibé oinsá mak Ita nuʼudar inan-aman bele hatudu ezemplu diʼak se lee mak buat neʼebé Ita ladún gosta atu halo? Se nuneʼe, karik Ita presiza hadiʼa Ita-nia hanoin ka toman kona-ba lee. (Rom 2:21) Se lee mak parte importante iha Ita-nia moris loroloron nian, ida-neʼe bele book oan sira-nia laran. Ita-nia hakaʼas-an, liuliu atu lee Bíblia, prepara ba reuniaun sira, no halaʼo estudu nuʼudar família, sei hatudu ba Ita-nia oan katak buat sira-neʼe mak importante tebes.

 Nuneʼe, Ita-nia domin no ezemplu diʼak mak importante atu book Ita-nia oan atu haburas sira-nia hakarak atu lee. Maibé hakat saida deʼit mak Ita bele halo atu fó laran-manas ba Ita-nia oan atu halo ida-neʼe?

Haburas hakarak atu lee

Hakat importante saida deʼit mak Ita bele halo atu ajuda Ita-nia oan atu haburas sira-nia hakarak atu lee? Husi kiʼik kedas diʼak atu husik sira kaer livru sira. Katuas kongregasaun nian ida neʼebé ninia inan-aman ajuda nia haburas hakarak atu lee, hatete: “Fó oportunidade ba Ita-nia oan atu kaer no uza didiʼak livru sira. Se sira halo nuneʼe, sira sei sai toman uza livru no sente katak livru mak parte importante iha sira-nia moris.” Livru sira neʼebé koʼalia kona-ba Bíblia, hanesan Livru Istória husi Bíblia, bele sai hanesan livru neʼebé labarik sira hadomi tebes maski sira sei kiʼik no seidauk hatene lee. Kuandu Ita lee livru hanesan neʼe hamutuk ho Ita-nia oan, ida-neʼe ajuda sira hatene kona-ba língua, no mós kona-ba “lia-loos espirituál” nian no “liafuan espíritu nian”.—1 Kor 2:13.

Lee beibeik ho lian makaʼas. Haburas toman atu lee hamutuk ho Ita-nia oan loroloron. Halo ida-neʼe sei hanorin sira oinsá atu lee no temi liafuan sira ho moos, no haburas sira-nia toman atu lee. Dalan neʼebé Ita lee mós importante. Lee ho laran-manas, no sira mós sei sente laran-manas. Dala ruma Ita-nia oan sei husu Ita atu lee istória neʼebé hanesan ba dala barak. Diʼak atu halo tuir buat neʼebé sira husu! Karik lakleur sira sei hakarak atu lee fali istória seluk. Maibé kuidadu atu la obriga Ita-nia oan atu lee hamutuk ho Ita ba tempu kleur liu. Jesus hatudu ezemplu diʼak hodi hanorin ninia rona-naʼin “tuir buat neʼebé sira bele komprende”. (Mc 4:33) Se Ita la obriga Ita-nia oan, sira sei haksolok hodi hein ba tempu tuirmai atu lee, no ida-neʼe mós sei ajuda sira atu haburas sira-nia hakarak atu lee.

Book oan atu hola parte, no koʼalia hamutuk kona-ba buat neʼebé Ita lee. Ita sei sente kontente tanba lakleur Ita-nia oan kiʼik sei hatene atu lee liafuan balu ho loos no komprende liafuan neʼebé nia lee. Koʼalia hamutuk kona-ba buat neʼebé Ita lee bele ajuda duni Ita-nia oan atu laʼo ba oin. Livru ida neʼebé esplika kona-ba oinsá atu ajuda labarik sira hatene lee ho diʼak, hatete katak koʼalia hamutuk bele ajuda oan atu “hatene liafuan sira-neʼebé sira presiza atu komprende kuandu sira lee”. Livru neʼe mós hatete: “Labarik sira gosta atu aprende buat barak, inklui aprende lee no hakerek. Tan neʼe, importante tebes atu koʼalia beibeik ho sira kona-ba ideia sira neʼebé mosu iha livru neʼebé sira lee.”

Husu Ita-nia oan atu lee ba Ita, no book sira atu husu pergunta sira. Karik Ita hakarak husu pergunta balu no ajuda sira atu hetan resposta. Hodi halo nuneʼe, labarik sira bele hatene katak livru sira fó sai informasaun barak. Halo ida-neʼe importante, liuliu kuandu Ita lee livru sira ho informasaun husi Maromak nia Liafuan, livru neʼebé diʼak liu hotu.—Ebr 4:12.

Maibé la haluha, lee mak laʼós buat neʼebé fasil. Presiza tempu no presiza treinu atubele halo ida-neʼe ho diʼak. * Nuneʼe gaba Ita-nia oan kuandu sira hakaʼas an atu haburas hakarak atu lee. Se Ita gaba Ita-nia oan, ida-neʼe bele fó laran-manas ba sira atu gosta lee.

Lee iha folin boot no halo ita kontente

Hanorin Ita-nia oan oinsá atu estuda ajuda sira atu hatene katak lee iha folin duni. Estuda envolve aprende kona-ba oinsá mak informasaun sira kona malu. Estuda mós envolve haburas kbiit atu hatene, hanoin-hetan no uza informasaun. Kuandu oan ida aprende oinsá atu estuda no komprende katak ida-neʼe bele ajuda nia, nia sei hafolin toman neʼe no sei kontente atu halo ida-neʼe.—Ecle 10:10.

Hatudu oinsá atu estuda. Halaʼo Adorasaun Família nian, koʼalia hamutuk kona-ba eskritura loroloron, no halo atividade seluk hanesan neʼe mak oportunidade diʼak atu hanorin oan sira oinsá atu estuda. Hodi tuur hakmatek ba tempu uitoan no hanoin didiʼak kona-ba informasaun  neʼebé sira lee daudauk, ida-neʼe sei hanorin oan sira oinsá atu tau atensaun. Tau atensaun mak importante tebes atu aprende buat ruma. Liután neʼe, Ita bele husu Ita-nia oan-mane atu fó-hatene oinsá mak buat neʼebé nia foin aprende kona buat neʼebé nia hatene ona. Ida-neʼe sei hanorin nia oinsá atu kompara buat ida ho buat ida seluk. Karik Ita bele husu Ita-nia oan-feto atu esplika fali ho ninia liafuan rasik buat neʼebé nia foin lee. Ida-neʼe sei ajuda nia atu komprende no hanoin-hetan. Repete katak fó sai fali buat importante husi informasaun neʼebé foin lee. Halo ida-neʼe sei ajuda oan sira atu hanoin-hetan. Ita mós bele hanorin labarik kiʼik sira atu hakerek nota badak durante tempu estuda ka durante reuniaun sira iha kongregasaun. Neʼe mós bele ajuda sira atu tau atensaun diʼak liután, loos ka lae? Hakat sira-neʼe bele halo tempu estudu nian sai buat neʼebé kapás no diʼak ba Ita no ba Ita-nia oan.

Buka fatin diʼak atu estuda no iha programa neʼebé metin. Fatin neʼebé la manas no iha naroman, no mós fatin neʼebé la barullu bele ajuda oan sira atu tau atensaun didiʼak. No, inan-aman nia hanoin kona-ba estuda mós importante. Inan ida hatete: “Importante tebes ba ita atu haburas toman kona-ba lee no estuda no halo ida-neʼe beibeik. Ida-neʼe bele ajuda ita-nia oan atu tetu didiʼak oinsá sira uza sira-nia tempu. Sira aprende katak sira tenke halo buat ruma tuir oras.” Inan-aman barak bandu oan sira atu la halo buat seluk iha tempu estuda nian. Tuir matenek-naʼin ida, halo ida-neʼe mak dalan diʼak atu hanorin ita-nia oan atu iha toman diʼak atu estuda.

Esplika tansá importante atu estuda. Ikusmai, ajuda Ita-nia oan atu hatene oinsá sira bele uza buat neʼebé sira estuda. Tuir loloos, neʼe mak razaun loos neʼebé ita hotu estuda. Irmaun joven ida hatete: “Se haʼu la haree oinsá informasaun neʼebé haʼu estuda bele ajuda haʼu, haʼu ladún iha hakarak atu estuda ida-neʼe. Maibé, se haʼu bele uza informasaun neʼe iha haʼu-nia moris, haʼu hakarak duni atu komprende liután kona-ba neʼe.” Kuandu joven sira haree katak buat neʼebé sira estuda bele ajuda sira atu kumpre sira rasik nia planu, sira sei hakaʼas an atu estuda ho didiʼak. Sira sei hein ho laran-manas tempu atu estuda, hanesan sira hein ho laran-manas tempu atu lee kuandu sira sei kiʼik.

Bensaun diʼak liu hotu

Hanoin toʼok buat diʼak balu neʼebé oan sira bele hetan tanba inan-aman hakaʼas an atu book sira atu iha hakarak atu lee no estuda. Sira bele hetan susesu iha eskola, iha serbisu-fatin, haburas relasaun diʼak ho ema seluk, komprende situasaun iha mundu, no sira bele nafatin iha relasaun diʼak ho sira-nia inan-aman. Bensaun diʼak ida tan mak lee no estuda bele lori haksolok ba sira. Tuir loloos, iha bensaun barak tan toʼo ita la bele sura.

Buat neʼebé importante liu mak hakarak atu estuda bele ajuda ita-nia oan atu sai ema neʼebé hadomi Maromak Jeová. Hakarak atu estuda mak importante atu loke oan sira-nia hanoin no laran “atu hatene luan no naruk, aas no kleʼan” kona-ba lia-loos husi Bíblia. (Ef 3:18) Tuir loloos, iha buat barak neʼebé inan-aman kristaun presiza hanorin ba sira-nia oan. Tan neʼe, nuʼudar inan-aman uza sira-nia tempu no kbiit hodi hakaʼas an atu ajuda sira-nia oan husi kiʼik kedas, sira bele iha esperansa katak sira-nia oan ikusmai sei hili atu serbí Maromak Jeová. Hanorin Ita-nia oan atu iha toman diʼak atu estuda sei ajuda sira atu haburas no nafatin iha relasaun diʼak ho Maromak. Entaun, inan-aman sira, husu Maromak Jeová nia tulun nuʼudar Ita hakaʼas an atu book Ita-nia oan haburas hakarak atu lee no estuda.—Prov 22:6.

[Nota–rodapé]

 [Kaixa/Dezeñu iha pájina 26]

Lee . . .

• Husik oan kaer livru sira

• Lee ho lian makaʼas

• Book oan atu hola parte

• Koʼalia hamutuk kona-ba buat neʼebé Ita lee

• Husu oan atu lee ba Ita

• Book oan atu husu pergunta sira

Estuda . . .

• Hatudu ezemplu diʼak

• Treinu oan sira atu . . .

○ tau atensaun

○ kompara

○ esplika fali

○ repete

○ hakerek nota

• Buka fatin diʼak atu estuda

• Esplika tansá importante atu estuda