‘Imi-nia moris sei sai oinsá loos?’
‘Imi-nia moris sei sai oinsá loos?’
“Neʼe duni, tan buat hotu neʼe sei lakon, imi-nia moris no imi-nia hamtaʼuk Maromak sei sai oinsá loos?”—2 PED 3:11.
1. Tanbasá mak Pedro nia karta segundu diʼak duni ba ema kristaun iha ninia tempu?
KUANDU apóstolu Pedro hakerek ninia karta segundu, kongregasaun kristaun tahan ona terus barak husi ema seluk, maibé terus sira-neʼe la halakon sira-nia laran-manas no sira nafatin sai barak. Tan neʼe Diabu uza dalan seluk atu koko sira, dalan neʼe hetan susesu dala barak ona. Pedro fó sai katak Satanás koko atu hafoʼer Maromak nia povu nia hanoin liuhusi mestre bosok sira neʼebé sira-nia “matan buka deʼit sala-foʼer” no sira-nia “fuan nakonu ho hakarak aat”. (2 Ped 2:1-3, 14; Jud 4) Nuneʼe iha Pedro nia karta segundu, nia hakarak duni atu fó laran-manas ba ninia maluk kristaun atu laran-metin nafatin ba Maromak.
2. Segundu Pedro kapítulu 3 koʼalia liuliu kona-ba saida? Pergunta saida deʼit mak ita tenke husu ba ita-nia an?
2 Pedro hatete: “Haʼu hanoin, katak wainhira haʼu sei iha isin, haʼu halo loos duni atu hakaʼas imi hodi halo hanoin fali, basá haʼu hatene katak lakleur haʼu sei mate, . . . wainhira haʼu la iha ona, imi sei hanoin fali sira-neʼe iha tempu hotu.” (2 Ped 1:13-15) Sin, Pedro hatene katak ninia mate besik ona, maibé nia hakarak katak ema kristaun hanoin-hetan nafatin ninia konsellu neʼebé nia fó iha tempu loos. Tuir loloos, ninia liafuan sai parte iha Bíblia no ohin loron ita hotu bele lee. Kapítulu 3 husi Pedro nia karta segundu importante tebes mai ita tanba koʼalia liuliu kona-ba “loron ikus” mundu aat neʼe nian no kona-ba tempu neʼebé lalehan no rai neʼe nian sei lakon. (2 Ped 3:3, 7, 10) Konsellu saida mak Pedro fó mai ita? Oinsá mak halo tuir ninia konsellu bele ajuda ita atu halo Maromak Jeová kontente?
3, 4. (a) Saida mak Pedro hatete atu book ema nia hanoin? Nia fó avizu saida? (b) Ita sei koʼalia kona-ba buat tolu saida?
3 Depois Pedro koʼalia tiha kona-ba oinsá Satanás nia mundu sei lakon, nia hatete: “Imi-nia moris no imi-nia hamtaʼuk Maromak sei sai oinsá loos?” (2 Ped 3:11, 12) Tuir loloos, Pedro hakerek liafuan sira-neʼe hodi book ema atu hanoin didiʼak. Pedro hatene katak sira neʼebé halo tuir Maromak Jeová nia hakarak no hatudu hahalok neʼebé Maromak simu mak sei hetan salvasaun iha “loron iha neʼebé [Maromak] sei tesi lia”. (Isa 61:2) Tan neʼe, Pedro hatutan tan dehan: “Neʼe duni, imi neʼebé hatene ona buat ida-neʼe, matan-moris bá atu imi-nia laran-metin la bele namlele, hafoin husik ema aat [mestre bosok] nia hanorin laloos neʼe lori lakon imi.”—2 Ped 3:17.
4 Pedro hatene katak iha loron ikus sira, ema kristaun sei presiza hakaʼas an liután atu matan-moris atu sira bele laran-metin nafatin. Apóstolu João mós esplika ho klaru kona-ba tansá ida-neʼe importante. Nia haree nanis tempu neʼebé Maromak duni tun Satanás husi lalehan no mós oinsá Satanás ho “laran-nakali” hasoru “sira hotu neʼebé halo tuir Maromak nia ukun-fuan no fó sasin ba Jesus”. (Apok 12:9, 12, 17) Maromak nia atan neʼebé kose-mina hamutuk ho sira-nia maluk “bibi seluk” neʼebé laran-metin mak sei manán. (Joao 10:16) Maibé oinsá ho ita ida-idak? Ita sei laran-metin nafatin ka lae? Ita sei hetan ajuda atu halo ida-neʼe se ita hakaʼas an atu (1) haburas hahalok neʼebé Maromak simu, (2) nafatin moris la foʼer no sala-laek iha dalan morál no iha ita-nia adorasaun, no (3) iha hanoin neʼebé loos kuandu hasoru susar. Mai ita koʼalia kona-ba buat tolu neʼe.
Haburas hahalok neʼebé Maromak simu
5, 6. Hahalok saida deʼit mak ita tenke haburas? Tanbasá mak ita presiza “hakaʼas an” atu halo ida-neʼe?
5 Iha Pedro nia karta segundu, nia mós hatete: “Hakaʼas an atu halo boot liután imi-nia fiar ho hahalok diʼak sira; hahalok diʼak sira-neʼe ho matenek; matenek neʼe ho imi-nia ukun an; ukun an ho laran-metin; laran-metin ho laran-manas kona-ba Maromak; no laran-manas kona-ba Maromak ho domin ba malu nuʼudar maun-alin; domin ba malu nuʼudar maun-alin ho domin loloos. Basá wainhira imi iha ona buat sira-neʼe no imi iha barak, sira-neʼe sei hadook imi husi hahalok neʼebé folin-laek eh ai-fuan la iha atu hatene ita Naʼi Jesus Kristu.”—2 Ped 1:5-8.
6 Loos, ita presiza “hakaʼas an” atu hola parte iha atividade neʼebé ajuda ita atu haburas hahalok neʼebé Maromak simu. Porezemplu, ita presiza hakaʼas an atu tuir reuniaun hotu, atu lee Bíblia loroloron, no atu iha toman diʼak atu estuda mesak hodi tuir ita-nia programa. No karik ita presiza hakaʼas an duni atu halo planu didiʼak atubele halaʼo Adorasaun Família nian semana-semana iha dalan neʼebé halo família gosta no kontente. Maibé kuandu ita iha toman neʼebé diʼak atu halo atividade sira-neʼe, neʼe sei sai fasil liu atu halo nafatin, liuliu se ita haree katak neʼe lori rezultadu diʼak.
7, 8. (a) Saida mak ema balu hatete kona-ba Adorasaun Família nian? (b) Buat diʼak saida mak Ita rasik hetan husi adorasaun nuʼudar família?
7 Irmán ida fó sai ninia hanoin kona-ba Adorasaun Família nian, nia hatete: “Ida-neʼe fó ami oportunidade atu aprende kona-ba informasaun oioin.” Irmán ida tan hatete: “Tuir loloos, haʼu lakohi reuniaun estudu livru nian atu ramata. Haʼu gosta liu reuniaun neʼe. Maibé agora, tanba ami iha kalan ida atu halaʼo Adorasaun Família nian, haʼu haree katak Maromak Jeová hatene duni buat neʼebé ami presiza no bainhira mak ami presiza ida-neʼe.” Família ida nia ulun hatete: “Adorasaun nuʼudar família ajuda ami tebetebes. Estuda kona-ba informasaun neʼebé tuir ami-nia presiza nuʼudar kaben-naʼin mak buat neʼebé kapás! Ami sente katak ami hatudu hahalok neʼebé espíritu lori mai iha dalan neʼebé diʼak liután, no ami kontente liután iha serbisu haklaken.” Família ida tan nia ulun hatete: “Labarik sira buka informasaun rasik no aprende buat barak, no sira gosta halo ida-neʼe. Adorasaun Família nian halo ami fiar liután katak Maromak Jeová hatene ami-nia presiza no katak nia hatán ami-nia orasaun.” Ita mós sente hanesan kona-ba arranju kapás neʼe husi Maromak ka lae?
8 Labele husik buat ruma atu hanetik ita atu halaʼo adorasaun nuʼudar família. Kaben-naʼin ida hatete: “Kada loron-kinta iha semana haat neʼebé liu ona, sempre iha buat ruma neʼebé besik atu hapara ami atu estuda nuʼudar família, maibé ami la husik ida-neʼe hanetik ami.” Sin, maski dala ruma ita presiza troka uitoan ita-nia programa, maibé hakaʼas an atu nunka lakon kalan ida atu halaʼo Adorasaun Família nian.
9. Oinsá mak Maromak Jeová ajuda Jeremias? Saida mak ita bele aprende husi Jeremias nia ezemplu?
9 Profeta Jeremias fó ezemplu diʼak mai ita. Nia presiza Maromak Jeová nia liafuan no hanorin, no nia hafolin tebes ida-neʼe. Maromak nia liafuan ajuda Jeremias atu tahan iha ninia serbisu haklaken maski ema lakohi rona nia. Jeremias hatete: “Maromak Jeová nia liafuan . . . sai hanesan ahi neʼebé lakan, neʼebé metin iha haʼu-nia ruin sira.” (Jer 20:8, 9) Ida-neʼe mós ajuda nia tahan tempu susar neʼebé boot liu kuandu ema sobu Jeruzalein. Ohin loron, ita iha ona Maromak nia Liafuan kompletu. Hodi estuda Bíblia ho didiʼak no hakaʼas an atu iha hanoin hanesan Maromak nian, ita bele sai hanesan Jeremias hodi tahan nafatin iha ita-nia serbisu haklaken, laran-metin nafatin maski hasoru susar, no ita sei moos nafatin iha dalan morál no iha ita-nia adorasaun.—Tgo 5:10.
Nafatin “moris la foʼer no sala-laek”
10, 11. Tanbasá mak ita presiza hakaʼas an atu nafatin “moris la foʼer no sala-laek”? Ida-neʼe inklui saida deʼit?
10 Nuʼudar ema kristaun, ita hatene katak ita moris iha loron ikus sira. Tan neʼe, ita la hakfodak atu haree katak ema iha mundu neʼe gosta liu buat neʼebé Maromak odi, hanesan karak-teen, hahalok seksuál neʼebé aat, no violénsia. Satanás nia hanoin kona-ba oinsá atu hapara ita atu serbí Maromak mak neʼe: ‘Se la bele halo taʼuk Maromak nia atan, karik bele hafoʼer sira-nia hanoin.’ (Apok 2:13, 14) Nuneʼe, ita presiza halo tuir Pedro nia konsellu neʼebé dehan: “Hakaʼas an atu moris la foʼer no sala-laek iha Naʼi futar oin, iha dame laran.”—2 Ped 3:14.
11 Pedro nia konsellu atu “hakaʼas an” mós hanesan ho ninia konsellu neʼebé nia hakerek uluk. Ida-neʼe hatudu ho klaru katak Maromak Jeová, ida neʼebé haleno Pedro ho espíritu santu atu hakerek konsellu sira-neʼe, hatene katak ita presiza hakaʼas an atu nafatin “moris la foʼer no sala-laek”, no atu la husik Satanás nia mundu hafoʼer ita. Hakaʼas an inklui mós proteje ita-nia laran atu la husik hakarak aat domina ita. (Lee Provérbios 4:23; * Tiago 1:14, 15.) Ida-neʼe inklui mós hamriik metin nafatin maski ema bilán ho ita-nia moris nuʼudar ema kristaun no “hasara [ita]” ho liafuan aat oioin.—1 Ped 4:4.
12. Tuir Lucas 11:13, ita bele fiar saida?
12 Tanba ita ema sala-naʼin, dala barak susar atu halo buat neʼebé loos. (Rom 7:21-25) Ita bele hetan susesu se ita buka deʼit ajuda husi Maromak Jeová, tanba ho laran-diʼak nia sei fó espíritu santu ba sira neʼebé husu ho laran. (Lc 11:13) Espíritu neʼe sei ajuda ita atu haburas hahalok sira neʼebé Maromak simu no neʼebé ajuda ita atu tahan hasoru tentasaun sira iha ita-nia moris, no mós atu tahan susar oioin neʼebé karik sei aumenta liután nuʼudar Maromak Jeová nia loron besik daudauk.
Tahan susar hametin ita-nia fiar
13. Kuandu ita hasoru susar, saida mak sei ajuda ita atu tahan?
13 Tanba ita sei moris iha mundu tuan neʼe, ita sei nafatin hasoru susar oioin. Duké sente laran-tun, diʼak atu ita haree susar sira-neʼe nuʼudar oportunidade atu hatudu domin ba Maromak no atu hametin fiar ba nia no ba ninia Liafuan. Dixípulu Tiago hatete: “Maun-alin sira: haksolok bá wainhira imi hetan susar oioin, basá imi hatene katak wainhira imi-nia fiar manán babeur, imi laran-metin liután.” (Tgo 1:2-4) Hanoin-hetan mós katak “Naʼi [Jeová] hatene soi ema sira neʼebé hamtaʼuk [nia] husi babeur”.—2 Ped 2:9.
14. Oinsá mak José nia ezemplu ajuda Ita rasik?
14 Hanoin toʼok ezemplu diʼak husi Jacob nia oan, José, neʼebé nia maun sira faʼan tiha atu sai nuʼudar atan. (Gên 37:23-28; 42:21) José lakon ninia fiar tanba hahalok aat neʼe ka lae? José sai hirus ho Maromak tanba Maromak husik buat aat neʼe akontese ba nia ka lae? Maromak nia Liafuan hatudu ho klaru katak lae! Liután neʼe, José hasoru susar seluk tan. Ema duun katak nia koko atu estraga feto no tan neʼe ema hatama nia iha dadur laran. Maibé, dala ida tan nia nafatin laran-metin ba Maromak. (Gên 39:9-21) Hodi tahan susar sira-neʼe, José hametin ninia fiar, no tan neʼe nia hetan bensaun barak husi Maromak.
15. Saida mak ita bele aprende husi Noemi nia ezemplu?
15 Klaru katak susar sira bele halo ita sente triste no laran-tun. Kuandu José hasoru susar, karik nia mós sente hanesan neʼe. Maromak nia atan sira seluk mós sente nuneʼe. Hanoin toʼok kona-ba Noemi, neʼebé lakon nia laʼen no ninia oan-mane naʼin-rua. Nia hatete: “Keta bolu haʼu Noemi. Bolu haʼu Mara [katak “Moruk”], tanba Ida neʼebé Forsa Boot Liu Hotu halo haʼu-nia moris nakonu ho susar.” (Rute 1:20, 21) Ita bele komprende tansá Noemi koʼalia hanesan neʼe. Maibé, hanesan José, Noemi mós la lakon ninia fiar no ninia relasaun diʼak ho Maromak, no nia nafatin laran-metin ba Maromak. Tan neʼe, Maromak Jeová haraik bensaun ba nia. (Rute 4:13-17, 22) Liután neʼe, iha mundu foun, Maromak sei hadiʼa buat aat hotu neʼebé Satanás no ninia mundu aat halo. “Buat uluk nian sei la hanoin-hetan fali, no sei la mosu tan iha ema nia laran.”—Isa 65:17.
16. Ita tenke hanoin oinsá kona-ba orasaun? Tanbasá?
16 Maski ita hasoru susar oioin, maibé hodi hatene katak Maromak sempre hadomi ita, ida-neʼe sei ajuda ita atu tahan susar sira. (Lee Roma 8:35-39.) Satanás sei koko nafatin atu hapara ita atu serbí Maromak, maibé nia la bele hetan susesu se ita nafatin “moris ho oin moos” no nafatin hanoin atu “bele reza”. (1 Ped 4:7) Jesus hatete: “Neʼe duni, imi matan-moris hodi hamulak nafatin bá, atu imi bele hetan kbiit hodi hadook an husi buat hotu neʼebé sei mosu no bele hamriik metin iha Oan-Mane nia oin.” (Lc 21:36) Jesus uza liafuan “hamulak”, neʼe katak halo orasaun ho laran tomak. Hodi fó konsellu neʼe, Jesus hatudu katak importante tebes atu ita hanoin didiʼak kona-ba ita-nia relasaun ho nia no ho ninia Aman. Ema sira neʼebé iha relasaun diʼak ho Maromak mak sei hetan salvasaun iha Maromak Jeová nia loron.
Badinas nafatin iha Maromak Jeová nia serbisu
17. Maski dala ruma susar atu haklaken iha fatin balu, oinsá mak ezemplu diʼak husi Maromak nia atan sira iha tempu uluk bele ajuda Ita?
17 Hola parte beibeik iha ita-nia serbisu ba Maromak halo ita sente kmaan. Neʼe halo ita hanoin-hetan Pedro nia liafuan neʼebé hatete: “Imi-nia moris no imi-nia hamtaʼuk Maromak sei sai oinsá loos?” (2 Ped 3:11) Buat neʼebé importante liu iha ita-nia moris mak haklaken lia-foun diʼak. (Mt 24:14) Loos katak iha haklaken-fatin balu dala ruma susar atu haklaken, karik tanba ema la hatudu interese ka kontra ita, ka karik tanba ema okupadu demais iha sira-nia moris loroloron nian. Maromak Jeová nia atan iha tempu uluk mós hasoru susar hanesan neʼe. Maibé, sira nunka para, sira bá “fila-fila” atu hatoʼo mensajen husi Maromak. (Lee 2 Crônicas 36:15; * Jer 7:24-26) Saida mak ajuda sira atu tahan? Sira haree sira-nia knaar tuir Maromak Jeová nia haree laʼós tuir mundu nian. No mós, sira haree katak reprezenta Maromak nia naran mak buat neʼebé espesiál tebes.—Jer 15:16.
18. Oinsá mak serbisu haklaken sei hahiʼi Maromak nia naran iha futuru?
18 Ita mós iha knaar espesiál atu haklaken Maromak Jeová nia naran no ninia hakarak. Hanoin toʼok kona-ba ida-neʼe: Liuhusi ita-nia serbisu haklaken, Maromak nia inimigu sira la bele nega katak sira seidauk rona buat ida kuandu Maromak nia loron tesi-lia nian mai. Loos duni, hanesan Faraó iha tempu uluk, sira sei hatene katak Maromak Jeová mak funu hasoru sira. (Êx 8:1, 20; 14:25) Maibé iha tempu neʼe mós, Maromak Jeová sei hatudu sai ho klaru katak ninia atan sira neʼebé laran-metin mak loloos reprezenta nia.—Lee Ezequiel 33:33. *
19. Oinsá mak ita bele hatudu katak ita hafolin Maromak Jeová nia pasiénsia?
19 Iha parte ikus husi Pedro nia karta segundu, nia hatete ba ninia maluk fiar-naʼin: “Imi haree ita Naʼi nia laran-luak nuʼudar maksoin ba imi.” (2 Ped 3:15) Sin, mai ita kontinua atu hafolin Maromak Jeová nia laran-luak ka pasiénsia. Oinsá? Ita bele halo ida-neʼe hodi haburas hahalok neʼebé halo nia kontente, hodi nafatin “moris la foʼer no sala-laek”, hodi iha hanoin neʼebé loos kuandu hasoru susar, no hodi badinas nafatin iha Maromak nia serbisu. Hodi halo buat sira-neʼe, ita sei simu bensaun ba nafatin bainhira Maromak halo “lalehan foun no rai foun”.—2 Ped 3:13.
[Nota–rodapé]
^ par. 11 Provérbios 4:23: “Liután buat sira-neʼe hotu neʼebé mak ó tenke proteje, proteje bá ó-nia laran, tanba husi nia mak moris nia hun.”
^ par. 17 2 Crônicas 36:15: “No Jeová, sira-nia beiʼala nia Maromak kontinua fó avizu ba sira hodi haruka ninia manu-ain sira, nia haruka sira fila-fila, tanba nia hatudu laran-sadiʼa ba ninia povu no ba ninia hela-fatin.
^ par. 18 Ezequiel 33:33: “Kuandu buat neʼe sai loos ona, haree! buat neʼe sei sai loos duni, sira mós sei hatene katak profeta ida mak iha sira-nia leet.”
Ita hanoin-hetan?
• Oinsá mak ita bele haburas hahalok neʼebé Maromak simu?
• Oinsá mak ita bele “moris la foʼer no sala-laek”?
• Saida mak ita bele aprende husi José no Noemi?
• Tanbasá mak hola parte iha serbisu haklaken mak knaar neʼebé espesiál?
[Pergunta estudu nian]
[Dezeñu iha pájina 9]
Saida mak sei ajuda Ita laʼen sira atu haburas hahalok neʼebé Maromak simu iha Ita-nia an no Ita-nia família?
[Dezeñu iha pájina 10]
Saida mak ita bele aprende husi José nia ezemplu kona-ba tahan susar sira?