“Keta taʼuk. Haʼu rasik sei ajuda ó”

JESUS fó avizu nanis ba ninia dixípulu sira hodi hatete: “Diabu sei hatama imi balun ba dadur laran atu koko [imi].” Maibé, antes Jesus fó avizu neʼe, nia hatete: “Keta taʼuk terus sira neʼebé sei mosu ba ó.” Tanba Satanás kontinua hakaʼas an atu hapara ita-nia serbisu haklaken hodi hatama ita balu iha dadur laran, ita la hakfodak katak ukun-naʼin balu sei haterus ema kristaun loos. (Apok 2:10; 12:17) Entaun, saida mak sei ajuda ita atu prepara ita-nia an ba Satanás nia lasu sira no “keta taʼuk” hanesan Jesus hatete?

Loos katak ita barak dala ruma hasoru situasaun neʼebé halo ita sente taʼuk. Maski nuneʼe, Bíblia promete katak ho Maromak Jeová nia ajuda, ita sei la sente taʼuk demais. Oinsá? Dalan ida neʼebé Maromak Jeová ajuda ita mak hodi hatudu sai buat neʼebé Satanás no ninia maluk sira uza atu fó terus mai ita. (2 Kor 2:11) Atu komprende liután kona-ba neʼe, mai ita hanoin kona-ba buat neʼebé akontese iha tempu Bíblia nian. Ita mós sei haree ezemplu husi ita-nia maluk fiar-naʼin ohin loron neʼebé laran-metin no neʼebé ‘bele hasoru Diabu nia babeur aat hotu’.—Ef 6:11-13.

Liurai diʼak hasoru ukun-naʼin neʼebé aat

Maizumenus besik tinan 700 molok Kristu, liurai aat husi Asíria naran Senaquerib manán ona nasaun barak. Tan neʼe, nia foti-an hodi hakarak mós manán Maromak Jeová nia povu no sira-nia sidade Jeruzalein, neʼebé Ezequias mak ukun nuʼudar liurai. (2 Reis 18:1-3, 13) Ita bele fiar katak Satanás aproveita situasaun neʼe hodi book Senaquerib atu halaʼo ninia planu atu halakon adorasaun loos husi rai.—Gên 3:15.

Senaquerib haruka ema balu ba Jeruzalein atu husu ema iha sidade neʼe atu rende an. Ema sira neʼebé Senaquerib haruka inklui mós Rabsaqué, neʼebé sai nuʼudar liurai nia manu-ain. * (2 Reis 18:17) Rabsaqué nia hakarak mak atu halo taʼuk ema judeu hodi sira bele rende an deʼit, lalika halo funu. Dalan saida deʼit mak Rabsaqué uza atu halo ema judeu taʼuk hodi sira bele rende an?

Laran-metin maski mesak

Rabsaqué hatete ba ema neʼebé reprezenta liurai Ezequias: “Ida-neʼe mak buat neʼebé liurai boot, liurai husi rai-Asíria, hatete ona: ‘Ó tau fiar ba saida? . . . Haree bá! Ó tau ó-nia fiar ba ajuda husi fafulu neʼebé rahun ona, neʼe mak Ejitu, neʼebé se ema ida sadere ba nia, neʼe sei sona borus ninia liman.’” (2 Reis 18:19, 21) Rabsaqué nia liafuan neʼe bosok, tanba Ezequias la buka ajuda husi rai-Ejitu. Maski nuneʼe,  Rabsaqué nia lia-bosok neʼe hatudu buat neʼebé nia hakarak ema judeu atu hanoin-hetan, neʼe mak: ‘La iha ema ida neʼebé sei mai atu ajuda sira. Sira mesak deʼit.’

Ohin loron, ema neʼebé kontra hasoru adorasaun loos mós koko atu hataʼuk ema kristaun loos hodi halo sira hanoin katak sira mesak deʼit. Irmán ida tama iha komarka tanba ninia fiar no nia dook husi nia maluk fiar-naʼin sira ba tinan barak. Ikusmai nia konta fali kona-ba saida mak ajuda nia atu la sente taʼuk demais. Nia hatete: “Orasaun ajuda haʼu atu hakbesik ba Maromak Jeová . . . Haʼu hanoin-hetan buat neʼebé Maromak promete iha Isaías 66:2, neʼebé dehan katak Maromak haree ‘ba ema neʼebé iha terus laran’. Liafuan sira-neʼe mak sempre fó forsa no fó kmaan mai haʼu.” Nuneʼe mós, irmaun ida seluk neʼebé tama iha komarka ba tempu kleur, hatete: “Haʼu foin hatene katak kuartu kiʼik ida iha komarka laran bele sai hanesan fatin luan tebes se ema iha relasaun neʼebé besik ho Maromak.” Sin, relasaun neʼebé besik ho Maromak Jeová fó forsa ba ema kristaun naʼin-rua neʼe atu tahan hasoru sente mesak. (Sal 9:9, 10) Maski ema bele haketak sira husi sira-nia família, kolega, maluk fiar-naʼin, maibé irmaun-irmán sira iha komarka laran hatene katak la iha buat ida neʼebé bele haketak sira husi Maromak Jeová.—Rom 8:35-39.

Tan neʼe, importante tebes atu ita uza oportunidade hotu atu hametin ita-nia relasaun ho Maromak Jeová! (Tgo 4:8) Ita tenke husu beibeik ba ita-nia an: ‘Haʼu fiar duni ba Maromak Jeová ka lae? Ninia liafuan book haʼu iha haʼu-nia moris loroloron nian kuandu haʼu halo desizaun kiʼik ka boot ka lae?’ (Lc 16:10) Kuandu ita hakaʼas an atu nafatin iha relasaun neʼebé besik ho Maromak, ita la iha razaun atu sente taʼuk. Profeta Jeremias koʼalia hodi reprezenta ema judeu sira neʼebé iha terus laran, nia hatete: “Haʼu bolu Ita-nia naran, oh, Jeová, husi rai-kuak neʼebé kleʼan tebes. . . . Ita hakbesik ba haʼu iha loron neʼebé haʼu bolu Ita. Ita hatete: ‘Keta taʼuk.’”—Lam 3:55-57.

Lia-bosok la halo Maromak nia atan monu

Rabsaqué koʼalia lia-bosok hodi hamosu dúvida iha ema nia hanoin. Nia hatete: “Maibé, [Jeová] mak ida neʼebé Ezequias halakon ninia fatin aas sira no ninia altár sira, . . . loos ka lae? . . . Jeová rasik hatete ba haʼu: ‘Bá funu hasoru rai neʼe, no ó tenke halakon nia.’” (2 Reis 18:22, 25) Rabsaqué nia liafuan neʼe mak atu halo povu fiar katak Maromak Jeová sei la salva Ninia povu tanba Nia la kontente ona ho sira. Maibé, neʼe la loos. Tuir loloos, Maromak Jeová kontente ho Ezequias no ho ema judeu tanba sira halaʼo fali ona adorasaun neʼebé loos.—2 Reis 18:3-7.

Ohin loron, ema sira neʼebé fó terus ba ema kristaun bele uza informasaun neʼebé loos no kahur ida-neʼe ho lia-bosok uitoan atu hamosu dúvida iha ema nia hanoin. Porezemplu, ema hatete ba irmaun no irmán sira neʼebé tama iha komarka katak irmaun neʼebé tau matan ba serbisu Reinu nian iha sira-nia rai husik tiha ona ninia fiar, no tan neʼe la sala atu sira mós husik sira-nia fiar. Maski nuneʼe, buat sira-neʼe la hamosu dúvida ba ema kristaun neʼebé matan-moris.

Hanoin toʼok buat neʼebé akontese ba irmán ida durante Funu Mundial Segundu. Kuandu nia iha komarka, ema ida hatudu ba nia surat ida neʼebé fó sai katak irmaun ida neʼebé iha knaar espesiál iha Maromak nia organizasaun  husik ona ninia fiar. Ema neʼe husu se nia fiar irmaun neʼe ka lae. Irmán neʼe hatán: “[Nia] mós ema sala-naʼin.” Irmán neʼe hatutan tan katak se nia kontinua halo tuir Bíblia nia matadalan, Maromak uza nia. “Maibé tanba ninia surat neʼe hatudu katak nia la halo tuir ona Bíblia, nia laʼós tan haʼu-nia irmaun.” Irmán neʼe ho laran-metin halo tuir Bíblia nia konsellu neʼebé dehan: “Keta tau imi-nia fiar ba ulun-naʼin sira, ka ba ema iha rai, neʼebé la iha kbiit atu fó salvasaun.”—Sal 146:3.

Hetan koñesimentu neʼebé loos kona-ba Bíblia no halo tuir ninia konsellu sei ajuda ita atu la husik lia-bosok atu halakon ita-nia forsa atu tahan susar sira. (Ef 4:13, 14; Ebr 6:19) Tan neʼe, atu prepara ita-nia an hodi bele iha hanoin neʼebé loos kuandu hasoru susar, ita presiza fó tempu atu lee Bíblia loroloron no estuda mesak. (Ebr 4:12) Sin, agora mak tempu atu aumenta ita-nia koñesimentu no atu hametin ita-nia fiar. Irmaun ida neʼebé tahan ba tinan barak iha komarka laran hatete: “Haʼu hakarak fó laran-manas ba ema hotu atu hafolin hahán espirituál hotu neʼebé Maromak fó mai ita, tanba ita la hatene oinsá mak ida-neʼe sei ajuda ita iha aban-bainrua.” Tuir loloos, se ita estuda didiʼak Maromak nia Liafuan no livru sira neʼebé atan laran-metin no matenek fó mai ita ohin loron, iha tempu susar nia laran espíritu santu sei “halo [ita] hanoin fali” buat neʼebé ita aprende.—Joao 14:26.

Hetan protesaun kuandu ema halo ita taʼuk

Rabsaqué koko atu hataʼuk ema judeu sira. Nia hatete: “[Imi] bele taru ho haʼu-nia naʼi, liurai husi Asíria, no haʼu sei fó kuda rihun rua ba [imi], atu haree toʼok se [imi] bele buka ema atu saʼe kuda sira-neʼe. Entaun, oinsá mak [imi] bele halo governadór ida husi haʼu-nia naʼi nia atan sira neʼebé kiʼik liu atu halai husi [imi]?” (2 Reis 18:23, 24) Tuir ema nia haree, Ezequias no ninia povu la iha kbiit atu hasoru rai-Asíria nia tropa neʼebé iha forsa boot.

Ohin loron ema neʼebé kontra ita bele mós hatudu katak sira iha forsa boot, liuliu kuandu sira hetan apoiu husi ukun-naʼin sira. Neʼe mak buat neʼebé akontese ho ema Nazi neʼebé fó terus ba Maromak nia povu iha Funu Mundial Segundu. Sira koko atu hataʼuk Maromak nia atan barak. Ita-nia irmaun ida neʼebé tama komarka ba tinan barak konta fali oinsá mak ema hataʼuk nia. Iha loron ida, polísia husu ba nia: “Ó haree ona oinsá mak ema tiru ó-nia alin? Saida mak ó aprende husi neʼe?” Nia hatán: “Haʼu mak testemuña ida ba Jeová no sei nafatin nuʼudar ninia testemuña.” No polísia ameasa irmaun neʼe hodi dehan: “Se nuneʼe, ó mak ami sei tiru tuirmai.” Maski nuneʼe, ita-nia irmaun hamriik metin nafatin, no inimigu sira para atu hataʼuk nia. Saida mak ajuda irmaun neʼe atu tahan hasoru ameasa sira-neʼe? Nia hatán: “Haʼu tau fiar ba Maromak Jeová nia naran.”—Prov 18:10.

Hodi tau fiar tomak ba Maromak Jeová, ida-neʼe hanesan ita lori eskudu ida neʼebé bele proteje ita husi buat hotu neʼebé Satanás uza atu estraga ita-nia relasaun ho Maromak. (Ef 6:16) Tan neʼe, diʼak atu husu Maromak Jeová iha orasaun atu ajuda ita hametin ita-nia fiar. (Lc 17:5) Ita mós presiza aproveita buat hotu neʼebé atan laran-metin no matenek fó atu hametin ita-nia fiar. Kuandu hasoru susar, ita bele hetan forsa bainhira ita hanoin-hetan buat neʼebé Maromak promete ba profeta Ezequiel, tanba nia presiza hatoʼo mensajen ba ema ulun-toos sira. Maromak Jeová hatete ba nia: “Haree! Haʼu halo ona ó-nia oin sai toos hanesan duni ho sira-nia oin no ó-nia reen-toos sai toos hanesan duni ho sira-nia reen-toos. Haʼu halo ó-nia reen-toos hanesan fatuk-diamante, toos liu fali fatuk-ahi.” (Eze 3:8, 9) Kuandu presiza, Maromak Jeová bele ajuda ita atu sai toos hanesan fatuk-murak atubele tahan, hanesan nia halo ba Ezequiel.

Tahan hasoru tentasaun

Ema neʼebé kontra Maromak nia povu hatene katak kuandu dalan seluk la hetan susesu ona, dala ruma tentasaun atu hetan prezente  diʼak bele halakon ema nia laran-metin. Rabsaqué mós uza dalan neʼe. Nia hatete ba sira neʼebé iha Jeruzalein: “Ida-neʼe mak liurai husi Asíria hatete: ‘Rende an ba haʼu, no sai mai atu hamutuk ho haʼu . . . toʼo tempu neʼebé haʼu mai no haʼu loloos sei lori imi ba rai neʼebé hanesan imi-nian, rai neʼebé iha fini barak no tua-uvas foun, rai neʼebé iha paun no toʼos-uvas sira, rai neʼebé iha ai-oliveira no bani-been, no imi sei kontinua moris no la mate.’” (2 Reis 18:31, 32) Hanoin kona-ba han paun no hemu tua-uvas foun karik halo ema sira iha sidade laran, neʼebé la bele sai ba liʼur, sente hakarak tebes atu hetan buat sira-neʼe.

Polísia balu mós koko atu uza dalan neʼe atu halakon irmaun misionáriu ida nia laran-metin kuandu nia iha komarka laran. Polísia hatete ba nia katak sira sei lori nia ba “uma neʼebé kapás” ho “jardín neʼebé furak” ba fulan neen, hodi nia bele hanoin didiʼak. Maski nuneʼe, irmaun neʼe nafatin laran-metin no la husik ninia fiar. Saida mak ajuda irmaun neʼe? Nia esplika: “Haʼu sempre hanoin katak Maromak nia Reinu mak nuʼudar esperansa neʼebé loos. . . . Hatene didiʼak kona-ba Maromak nia Reinu, fiar tebes kona-ba neʼe, no nunka iha dúvida, sira la bele book haʼu atu husik haʼu-nia laran-metin.”

Ita fiar duni ba Maromak nia Reinu ka lae? Abraão, apóstolu Paulo, no Jesus rasik bele tahan hasoru susar naran deʼit tanba sira fiar duni kona-ba Maromak nia Reinu. (Flp 3:13, 14; Ebr 11:8-10; 12:2) Se ita kontinua atu tau uluk Maromak nia Reinu iha ita-nia moris no hanoin nafatin kona-ba bensaun rohan-laek neʼebé Reinu neʼe sei lori mai, ita sei la monu ba tentasaun atu simu buat neʼebé tahan ba tempu uitoan deʼit.—2 Kor 4:16-18.

Maromak Jeová sei la husik ita

Maski Rabsaqué hakaʼas an atu hataʼuk ema judeu iha dalan oioin, maibé Ezequias no ninia povu tau fiar nafatin ba Maromak Jeová. (2 Reis 19:15, 19; Isa 37:5-7) Maromak Jeová hatán sira-nia orasaun hodi haruka anju ida atu oho tropa Asíria hamutuk naʼin-185.000 iha kalan ida deʼit. Loron tuirmai, Senaquerib hamutuk ho ninia tropa uitoan deʼit halai fali ba ninia sidade Nínive.—2 Reis 19:35, 36.

Klaru katak Maromak Jeová nunka husik sira neʼebé tau fiar ba nia. Ezemplu husi ita-nia irmaun no irmán sira neʼebé hamriik metin maski hasoru susar, hatudu katak Maromak Jeová mós nunka husik ninia atan sira ohin loron. Ita bele fiar ba buat neʼebé ita-nia Aman iha lalehan promete ba ita: “Haʼu Jeová, ó-nia Maromak, haʼu kaer ó-nia liman-loos, Ida neʼebé hatete ba ó: ‘Keta taʼuk. Haʼu rasik sei ajuda ó.’”—Isa 41:13.

[Nota–rodapé]

[Liafuan ne’ebé foti husi pájina 13]

Ba dala 30 liu iha ninia Liafuan, Maromak Jeová rasik fó-hatene ba nia atan sira atu “keta taʼuk”

[Dezeñu iha pájina 12]

Oinsá mak lasu neʼebé Rabsaqué uza hanesan mós ho lasu neʼebé inimigu husi Maromak nia povu uza ohin loron?

[Dezeñu iha pájina 15]

Relasaun neʼebé besik ho Maromak Jeová ajuda ita atu nafatin laran-metin maski hasoru susar