Sempre prontu bele lori rezultadu diʼak

ITA sempre prontu atu uza oportunidade neʼebé mosu derrepente deʼit atu haklaken ka lae? Ita-nia irmaun sira iha sidade Turku iha rai-Finlándia sempre prontu, no ida-neʼe lori rezultadu diʼak.

Iha tempu balu liubá, irmaun sira iha Turku haree katak mane-lubun husi rai-Ázia toʼo iha sidade neʼe atu serbisu hodi halo kompletu ró neʼebé boot tebetebes. Tuirmai, irmaun ida hetan otél neʼebé serbisu-naʼin sira-neʼe hela. Irmaun neʼe mós rona informasaun katak iha dadeer-saan bís tula serbisu-naʼin sira-neʼe husi otél neʼebé sira hela toʼo sira-nia serbisu-fatin. Nia fó-hatene kedas kona-ba neʼe ba irmaun sira iha kongregasaun lia-inglés iha sidade Turku.

Irmaun katuas sira iha kongregasaun neʼe haree katak ida-neʼe hamosu oportunidade ba sira atu haklaken mensajen Reinu nian ba ema sira-neʼe neʼebé mai husi rai seluk, no sira arranja kedas kampaña espesiál ida. Iha loron-domingu iha semana neʼe, irmaun-irmán naʼin-sanulu halibur hamutuk besik iha bís fatin iha tuku hitu dadeer. Foufoun la iha serbisu-naʼin ida neʼebé mosu. Irmaun sira hanoin: ‘Karik ita tarde ona! Karik sira fila ona.’ Maibé, derrepente deʼit serbisu-naʼin ida ho farda serbisu nian mosu mai. Depois, serbisu-naʼin seluk tan tuir nia, no ikusmai serbisu-naʼin barak mosu. Lakleur deʼit, ema-lubun halibur hamutuk iha bís fatin. Irmaun-irmán sira hahú kedas atu hakbesik ba serbisu-naʼin sira-neʼe hodi uza livru sira iha lia-inglés atu haklaken. Serbisu-naʼin sira-neʼe presiza oras ida atu sira hotu hetan tuur-fatin iha bís sira, no ida-neʼe fó tempu ba irmaun sira atu koʼalia ho sira barak. Ikusmai, serbisu-naʼin sira simu broxura hamutuk 126 no livru fulan-fulan nian hamutuk 329!

Rezultadu diʼak neʼe fó laran-manas ba irmaun sira atu halo fali kampaña neʼe iha semana tuirmai, durante vizita husi katuas neʼebé iha knaar atu vizita kongregasaun sira. Maski udan, irmaun neʼe dirije reuniaun haklaken nian iha tuku neen ho balu dadeer, no haklaken-naʼin hamutuk 24 laʼo ba bís fatin. Iha tempu neʼe, sira mós lori livru sira iha lia-tagalu tanba irmaun sira haree katak serbisu-naʼin barak mai husi rai-Filipinas. Nuneʼe, serbisu-naʼin sira simu livru 7, broxura 69, no livru fulan-fulan nian hamutuk 479. Ita bele fiar katak irmaun no irmán sira neʼebé hola parte iha kampaña espesiál neʼe kontente tebes!

Antes serbisu-naʼin sira-neʼe fila fali ba sira-nia rai, irmaun sira vizita fali serbisu-naʼin balu iha otél neʼebé sira hela, atu esplika liután kona-ba mensajen Reinu nian. Serbisu-naʼin balu hatete ba irmaun sira katak sira hasoru ona Testemuña ba Jeová iha rai seluk. Serbisu-naʼin sira fó obrigadu ba irmaun sira-nia hakaʼas-an atu haklaken ba sira durante tempu neʼebé sira hela iha rai-Finlándia.

Ita sempre prontu atu uza oportunidade neʼebé mosu derrepente deʼit atu haklaken ka lae? Ita prontu atu haklaken ba ema sira neʼebé mai husi rai oioin ka lae? Se nuneʼe, karik ita mós bele haksolok ho esperiénsia diʼak hanesan ho ita-nia irmaun-irmán sira iha sidade Turku.

[Mapa/Dezeñu iha pájina 32]

(Atu hetan format kompletu, haree livru)

FINLÁNDIA

ELSÍNKIA

Turku

[Credit Line]

STX Europe