Importante atu tuir oras!

HALO buat hotu tuir oras mak laʼós buat neʼebé fasil. Buat balu neʼebé halo susar ba ita atu toʼo fatin ida tuir oras mak karik ita presiza laʼo dook, karreta no motor barak liu iha dalan, no iha atividade barak liu atu halo. Maski nuneʼe, importante duni atu halo buat hotu tuir oras. Porezemplu, se ema ida iha serbisu-fatin sempre tuir oras, baibain ema tau fiar ba nia no haree nia nuʼudar ema neʼebé badinas. Iha parte seluk, ema neʼebé sempre tarde bele halo susar ba serbisu-naʼin seluk no karik serbisu neʼebé sira halo ladún fó rezultadu diʼak. Eskola-oan neʼebé tarde karik sei lakon lisaun eskola nian ruma no ida-neʼe karik sei halo susar ba nia atu hetan valór diʼak ka atu pasa ezame. No mós se ita tarde atu ba konsulta tuir arranju neʼebé halo tiha ona, ida-neʼe karik sei kona tratamentu neʼebé ita simu.

Maibé, iha rai balu ema hanoin katak ladún importante atu halo buat hotu tuir oras. Iha fatin sira hanesan neʼe, karik ita bele sai toman atu sempre tarde. Se nuneʼe, diʼak tebes ba ita atu haburas hakarak atu halo buat hotu tuir oras. Hodi komprende katak halo buat hotu tuir oras mak importante, ida-neʼe sei book ita atu hakaʼas an atu la tarde. Entaun, tanbasá mak ita presiza halo buat hotu tuir oras? Saida deʼit mak bele ajuda ita atu halo buat hotu tuir oras? No bensaun saida deʼit mak ita bele hetan kuandu halo buat hotu tuir oras?

Aman Jeová halo buat hotu tuir oras

Razaun importante liu neʼebé book ita atu halo buat hotu tuir oras mak ita hakarak atu banati-tuir Maromak neʼebé ita adora. (Ef 5:1)  Maromak Jeová mak hatudu ezemplu diʼak liu hotu kona-ba halo buat hotu tuir oras. Nia nunka tarde. Nia sempre tuir buat neʼebé nia deside ona hodi bele kumpre ninia hakarak tuir oras. Porezemplu, kuandu nia deside atu halakon mundu aat ho rai-nabeen, nia hatete ba Noé: “Halo ba ó-nia an rasik ró boot ida hodi uza ai-gofer.” Nuʼudar tempu sai besik daudauk, Maromak Jeová haruka Noé atu tama iha ró laran no Maromak mós fó-hatene: “Hela deʼit loron hitu haʼu sei halo udan tau ba rai ba loron haatnulu no kalan haatnulu; no haʼu sei halakon buat moris hotu neʼebé haʼu halo ona iha rai leten.” Maromak halo tuir duni buat neʼebé nia deside ona ka lae? Bíblia hatete: “Loron hitu tuirmai, rai-nabeen komesa atu mosu ba rai.” (Gên 6:14; 7:4, 10) Hanoin toʼok kona-ba saida mak sei akontese ba Noé no ninia família se sira la tama ba ró tuir oras. Hanesan Maromak neʼebé sira adora, sira mós tenke halo buat hotu tuir oras.

Maizumenus tinan 450 depois rai-nabeen, Maromak Jeová hatete ba Abraão katak nia sei iha oan-mane ida, no liuhusi ninia oan-mane neʼe mak bei-oan neʼebé promete nanis ona sei mosu mai. (Gên 17:15-17) Maromak hatete katak Isaac sei moris “iha loron neʼe iha tinan oin”. Ida-neʼe  sai loos duni ka lae? Bíblia hatete: “Sara sai isin-rua no tuirmai nia tuur-ahi oan-mane ida ba Abraão iha ninia idade boot, tuir tempu neʼebé Maromak hatete ona ba nia.”—Gên 17:21; 21:2.

Iha Bíblia laran iha ezemplu barak neʼebé hatudu katak Maromak sempre halo buat hotu tuir oras. (Jer 25:11-13; Dan 4:20-25; 9:25) Bíblia fó avizu ba ita atu kontinua hein ba Maromak nia loron tesi-lia nian neʼebé atu mai. Maski karik ita ema sente katak loron neʼe “demora”, maibé Maromak promete katak “ida-neʼe sei la tarde”.—Hab 2:3

Iha adorasaun importante atu tuir oras

Tinan-tinan mane Izraél nian hotu tenke tuir “festa ba Jeová” no iha tempu neʼebé loos sira tenke bá fatin neʼebé deside ona atu halaʼo festa sira-neʼe. (Lev 23:2, 4) Maromak mós deside kona-ba oras neʼebé ema presiza hasaʼe sakrifísiu balu. (Êx 29:38, 39; Lev 23:37, 38) Buat sira-neʼe hatudu ho klaru katak Maromak hakarak duni nia atan sira atu halo buat hotu tuir oras iha sira-nia adorasaun.

Kuandu apóstolu Paulo fó matadalan ba ema kristaun sira iha Korintu kona-ba oinsá atu halaʼo reuniaun, nia hatete: “Buat hotu sei halo loloos no momoos.” (1 Kor 14:40) Neʼe katak ema kristaun nia reuniaun atu halaʼo adorasaun tenke hahú tuir oras neʼebé deside ona. Maromak Jeová nia haree kona-ba halo buat hotu tuir oras nunka troka. (Mal 3:6) Entaun, saida mak ita bele halo atu bele tuir reuniaun sira-neʼe ho oras?

Oinsá atu halo buat hotu tuir oras

Ema balu haree katak halo planu didiʼak bele ajuda sira atu halo buat hotu tuir oras. (Prov 21:5) Porezemplu, se ita presiza laʼo dook ba oras ida atu toʼo fatin ruma, karik diʼak atu ita hahú laʼo sedu liu duké hela tan oras ida mak ita foin komesa atu sai husi uma. Matenek liu atu sai sedu hodi nuneʼe ita sei la bele tarde, liuliu tan buat ruma bele akontese iha dalan. (Ecle 9:11) Joven ida naran José * neʼebé sempre halo buat hotu tuir oras, hatete: “Buat neʼebé bele ajuda ema atu toʼo fatin ruma tuir oras mak hatene nanis oras hira mak nia presiza uza atu bele toʼo fatin neʼe.”

Ba ema kristaun balu, karik sira presiza halo arranju atu sai husi serbisu-fatin sedu liu atu nuneʼe bele iha tempu atu toʼo reuniaun-fatin iha oras neʼebé loos. Testemuña ida iha rai-Etiópia halo nuneʼe. Nia haree katak nia sei tarde minutu 45 atu tuir reuniaun se nia hein toʼo nia maluk serbisu-naʼin mai atu troka nia. Tan neʼe, nia husu ninia serbisu maluk atu toʼo serbisu-fatin sedu iha kalan reuniaun nian hodi bele troka nia. No irmaun neʼe promete atu halo tan serbisu ba oras hitu atu bele taka ninia maluk neʼe.

Se ita iha oan kiʼik, karik ida-neʼe halo susar liu ba ita atu toʼo reuniaun-fatin sedu. Baibain inan sira mak iha knaar atu prepara oan sira atu tuir reuniaun, maibé tuir loloos sira seluk iha família laran mós tenke ajuda. Inan ida naran Esperanza, husi rai-Méxiku, nia mesak deʼit atu haboot nia oan naʼin-ualu. Agora ninia oan ida neʼebé kiʼik liu mak tinan lima no ida neʼebé boot liu mak tinan 23. Esperanza esplika kona-ba oinsá mak sira bele halo buat hotu tuir oras, nia dehan: “Haʼu-nia oan-feto neʼebé boot ajuda sira-nia alin kiʼik sira atu bele prontu ba reuniaun. Ida-neʼe fó tempu ba haʼu atu halo hotu serbisu iha uma laran no halo prontu haʼu-nia an atu ami hotu bele sai husi uma tuir oras neʼebé deside ona.” Família neʼe deside nanis ona kona-ba oras neʼebé sira presiza sai husi uma, no ema hotu iha família laran ajuda malu atu kumpre ida-neʼe.

Halo tuir oras iha reuniaun bele lori bensaun

Kuandu hanoin kona-ba bensaun neʼebé ita hetan hodi toʼo sedu iha reuniaun kristaun sira, ida-neʼe bele haburas ita-nia hakarak atu hakaʼas an atu sempre tuir oras. Feto joven ida naran Sandra, neʼebé iha toman atu toʼo reuniaun-fatin sedu, dehan: “Haʼu sempre gosta atu toʼo reuniaun-fatin sedu tanba haʼu bele iha oportunidade atu hasé, no koʼalia ho irmaun no irmán sira, no neʼe bele ajuda haʼu atu koñese sira diʼak liután.” Kuandu ita toʼo sedu iha Salaun Reinu, ita bele hetan laran-manas hodi rona esperiénsia  husi irmaun-irmán sira neʼebé tahan maski hasoru susar no neʼebé laran-metin iha sira-nia serbisu ba Maromak. Toʼo reuniaun sedu mós fó oportunidade ba ita atu bele koʼalia buat neʼebé fó laran-manas ba irmaun-irmán sira, hodi nuneʼe ita bele “hakaʼas malu atu hadomi no halo hahalok diʼak”.—Ebr 10:24, 25.

Parte importante husi ita-nia adorasaun mak knananuk no orasaun neʼebé loke ita-nia reuniaun sira. (Sal 149:1) Ita-nia knananuk sira fó hahiʼi ba Maromak Jeová, fó-hanoin ita kona-ba hahalok sira neʼebé ita presiza haburas no mós fó laran-manas mai ita atu kontinua halo ita-nia serbisu haklaken ho laran-kontente. Oinsá kona-ba orasaun atu loke reuniaun? Iha tempu antigu, Maromak Jeová bolu nia templu nuʼudar ninia “uma orasaun nian”. (Isa 56:7) Ohin loron, ita halibur hamutuk iha reuniaun sira atu halo orasaun ba Maromak. Iha orasaun atu loke reuniaun, ita husu Maromak Jeová atu fó matadalan no fó espíritu santu, no mós kuandu ita halo orasaun, ida-neʼe ajuda ita atu prepara ita-nia laran no ita-nia neon atu simu informasaun sira neʼebé sei hatoʼo iha reuniaun. Tan neʼe, mai ita hakaʼas an atu toʼo sedu atu bele hola parte iha knananuk no orasaun atu loke reuniaun.

Helen neʼebé tinan 23 esplika kona-ba tansá mak nia hakarak toʼo reuniaun-fatin sedu, nia hatete: “Haʼu sente katak ida-neʼe mak dalan diʼak ida atu hatudu haʼu-nia domin ba Maromak Jeová, tanba nia mak Ida neʼebé fó informasaun hotu iha reuniaun, neʼe inklui knananuk no orasaun atu loke reuniaun.” Ita mós presiza atu iha hanoin hanesan neʼe, loos ka lae? Sin, loos duni! Tan neʼe, mai ita hotu hakaʼas an atu haburas toman atu halo buat hotu tuir oras, liuliu kuandu ita halaʼo ita-nia adorasaun ba Maromak neʼebé loos.   

[Nota–rodapé]

[Dezeñu iha pájina 26]

Prepara nanis

[Dezeñu iha pájina 26]

La haluha katak buat ruma bele akontese

[Dezeñu iha pájina 26]

Hetan bensaun hodi toʼo reuniaun sedu