Koʼalia ho “laran-diʼak neʼebé nakonu ho domin”
Koʼalia ho “laran-diʼak neʼebé nakonu ho domin”
“Nia loke nia ibun hodi koʼalia buat neʼebé matenek, no nia nanál sempre koʼalia ho laran-diʼak neʼebé nakonu ho domin.”—PROV 31:26.
1, 2. (a) Hahalok saida mak Maromak Jeová nia atan sira presiza haburas? (b) Ita sei koʼalia kona-ba saida iha lisaun neʼe?
LIURAI LEMUEL iha tempu antigu hetan lia-menon neʼebé importante husi ninia inan, ida-neʼe inklui hahalok diʼak neʼebé feto ida hatudu atu sai feen neʼebé diʼak. Lia-menon neʼe dehan: “Nia loke nia ibun hodi koʼalia buat neʼebé matenek, no nia nanál sempre koʼalia ho laran-diʼak neʼebé nakonu ho domin.” (Prov 31:1, 10, 26) Feto neʼebé matenek no ema sira neʼebé hakarak atu halo kontente Maromak Jeová, presiza iha nanál neʼebé sempre koʼalia ho laran-diʼak neʼebé nakonu ho domin. (Lee Provérbios 19:22. *) Sin, importante duni ba ema hotu neʼebé halaʼo adorasaun neʼebé loos atu koʼalia iha dalan neʼebé hatudu katak sira iha laran-diʼak neʼebé nakonu ho domin.
2 Saida mak laran-diʼak neʼebé nakonu ho domin? Ba sé mak ita tenke hatudu hahalok neʼe? Saida mak sei ajuda ita atu tau “laran-diʼak neʼebé nakonu ho domin” iha ita-nia nanál? Oinsá mak hodi halo ida-neʼe bele kona dalan neʼebé ita koʼalia ba ita-nia família no maluk kristaun?
Saida mak laran-diʼak neʼebé nakonu ho domin
3, 4. (a) Saida mak laran-diʼak neʼebé nakonu ho domin? (b) Esplika toʼok oinsá mak hahalok laran-diʼak la hanesan ho laran-diʼak neʼebé nakonu ho domin?
3 Klaru katak hahalok laran-diʼak neʼebé nakonu ho domin mai husi hahalok rua, domin no laran-diʼak. Laran-diʼak inklui hatudu interese ba ema seluk no hatudu katak ita hanoin sira hodi fó ajuda no fó laran-manas ba sira. No kuandu ita hatudu interese ba ema nia diʼak, ita halo ida-neʼe tan ita hadomi sira. Iha lia orijinál, liafuan neʼebé tradús nuʼudar laran-diʼak neʼebé nakonu ho domin iha mós arti neʼebé luan liu fali, tanba hahalok neʼe mós inklui kontinua atu hatudu domin ho laran-metin toʼo buat neʼebé planu ona fó rezultadu diʼak.
4 Baibain ema mós bele hatudu laran-diʼak ba ema neʼebé sira la koñese. Porezemplu, ema neʼebé hela iha rai-Malta hatudu laran-diʼak ba apóstolu Paulo no ema naʼin-275 kuandu sira-nia ró sai aat, maski sira seidauk koñese malu. (Apos 27:37–28:2) Maibé, laran-diʼak neʼebé nakonu ho domin mak hahalok laran-metin entre ema naʼin-rua neʼebé iha ona relasaun diʼak. * Ema keni sira hatudu hahalok neʼe ba “Izraél-oan hotu iha tempu neʼebé sira sai husi Ejitu”.—1 Sam 15:6.
Importante atu hanoin kleʼan no halo orasaun
5. Saida mak bele ajuda ita atu ukun ita-nia nanál?
5 Dala ruma susar atu koʼalia ho laran-diʼak neʼebé nakonu ho domin. Dixípulu Tiago koʼalia kona-ba ema nia nanál hodi dehan: “Ema ida seidauk hamaus nia nanál. Nanál neʼe aat no susar atu ukun, nakonu ho venenu.” (Tgo 3:8) Saida mak bele ajuda ita atu ukun parte isin nian neʼe neʼebé susar atu kontrola? Jesus nia liafuan ba ulun-naʼin relijiaun sira bele ajuda ita atu hetan resposta ba pergunta ida-neʼe. Nia hatete: “Basá ibun fakar sai buat neʼebé rai hela iha laran.” (Mt 12:34) Atu ita bele koʼalia ho laran-diʼak neʼebé nakonu ho domin, ita presiza haburas hahalok neʼe iha ita-nia fuan-laran. Mai ita haree oinsá mak hanoin kleʼan no halo orasaun bele ajuda ita atu halo ida-neʼe.
6. Tanbasá mak ita presiza atu hanoin kleʼan kona-ba Maromak nia hahalok laran-diʼak neʼebé nakonu ho domin?
6 Bíblia hatete katak Maromak Jeová “nakonu ho domin neʼebé laran-metin”. (Êx 34:6) Ema neʼebé hakerek salmu ida dehan: “Ita-nia laran-diʼak neʼebé nakonu ho domin, Oh, Jeová, hakonu rai.” (Sal 119:64) Bíblia konta istória barak kona-ba oinsá mak Maromak Jeová hatudu laran-diʼak neʼebé nakonu ho domin ba ema neʼebé adora nia. Hodi uza tempu atu hanoin kleʼan kona-ba ‘Maromak Jeová nia hahalok sira’, bele book ita atu haburas hakarak atu hatudu hahalok hanesan ninian.—Lee Salmo 77:12. *
7, 8. (a) Oinsá mak Maromak Jeová hatudu laran-diʼak neʼebé nakonu ho domin ba Lot no nia família? (b) Oinsá mak David sente tanba nia simu Maromak nia laran-diʼak neʼebé nakonu ho domin?
7 Porezemplu, hanoin toʼok kona-ba oinsá mak Maromak Jeová salva Abraão nia sobriñu Lot ho ninia família iha tempu neʼebé Maromak atu sobu sidade Sodoma, sira-nia hela-fatin. Nuʼudar tempu sai besik liu ona, anju sira neʼebé bá vizita Lot obriga nia atu lori ninia família no sai lalais husi sidade neʼe. Bíblia hatete: “Tanba nia demora hela, [anju] sira-neʼe kaer nia liman no nia feen nia liman no mós ninia oan-feto naʼin-rua nia liman, tan Maromak Jeová nia laran-sadiʼa ba nia. Sira lori nia sai toʼo sidade nia liʼur.” Kuandu ita hanoin didiʼak kona-ba dalan neʼebé Maromak Jeová salva sira, ita bele haree katak Maromak hatudu duni ninia laran-diʼak neʼebé nakonu ho domin. Ida-neʼe book duni ita-nia laran, loos ka lae?—Gên 19:16, 19.
8 Hanoin mós kona-ba ezemplu husi Liurai David husi Izraél antigu. Iha nia knananuk nia dehan: “[Maromak Jeová] neʼebé fó perdua ba ó-nia sala hotu. Neʼebé kura ó-nia moras hotu.” Ita bele fiar katak David hafolin duni Maromak Jeová nia laran-diʼak tanba fó perdua ba ninia sala ho Batseba! Nia hahiʼi Maromak Jeová hodi dehan: “Basá nuʼudar lalehan aas liu fali rai, ninia laran-diʼak neʼebé nakonu ho domin boot liu ba sira neʼebé taʼuk ba nia.” (Sal 103:3, 11) Hodi hanoin kleʼan kona-ba istória neʼe no kona-ba istória seluk iha Bíblia laran, ita sei sente agradese tebes ba Maromak Jeová nia laran-diʼak neʼebé nakonu ho domin, no ida-neʼe sei book ita atu hahiʼi no fó obrigadu ba nia. Kuandu ita-nia laran nakonu ho agradese ba Maromak, ida-neʼe sei book ita atu banati-tuir Maromak neʼebé loos.—Ef 5:1.
9. Tanbasá mak importante ba Maromak Jeová nia povu atu hatudu laran-diʼak neʼebé nakonu ho domin iha sira-nia moris loroloron nian?
9 Ezemplu sira husi Bíblia hatudu katak Maromak Jeová hatudu ninia laran-diʼak neʼebé nakonu ho domin, ka ninia domin neʼebé laran-metin, ba sira neʼebé iha ona relasaun diʼak ho nia. Maibé oinsá ho sira neʼebé la iha relasaun diʼak ho Maromak neʼebé loos? Maromak Jeová hatudu laran-aat ba sira ka lae? Lae duni! Lucas 6:35 hatete: “[Maromak] laran-diʼak ba ema aat no ema laran-aat sira.” Bíblia mós dehan: “[Maromak] halo loron saʼe ba ema aat no ba ema diʼak, halo mós udan-been tun ba ema laran loos no ba ema laran la loos.” (Mt 5:45) Antes ita aprende no moris tuir lia-loos, ita simu ona Maromak nia laran-diʼak neʼebé nia hatudu ba ema hotu. Maibé kuandu ita sai nuʼudar Maromak nia povu, ita simu ninia domin neʼebé laran-metin ka ninia laran-diʼak neʼebé nakonu ho domin. (Lee Isaías 54:10. *) Ita agradese tebes ba Maromak tan buat neʼebé nia fó, loos ka lae? Ida-neʼe book duni ita atu hatudu laran-diʼak neʼebé nakonu ho domin iha ita-nia liafuan hotu no iha buat sira seluk iha ita-nia moris loroloron nian.
10. Tanbasá mak orasaun nuʼudar prezente furak neʼebé ajuda ita atu hatudu laran-diʼak neʼebé nakonu ho domin?
10 Orasaun mak prezente furak ida husi Maromak, no ida-neʼe bele ajuda ita atu haburas hahalok laran-diʼak neʼebé nakonu ho domin. Hahalok sira neʼebé espíritu santu lori mai inklui domin no laran-diʼak, no buat rua neʼe mak parte importante ba hahalok laran-diʼak neʼebé nakonu ho domin. (Gal 5:22) Ita bele haburas hahalok neʼe iha ita-nia fuan-laran hodi husik Maromak nia espíritu santu hatudu dalan ba ita. Dalan diʼak liu hotu atu hetan Maromak Jeová nia espíritu mak hodi husu iha orasaun. (Lc 11:13) Tan neʼe importante tebes ba ita atu halo beibeik orasaun hodi husu Maromak atu haraik ninia espíritu, no husik espíritu neʼe hatudu matadalan mai ita. Sin, importante duni atu hanoin kleʼan no halo orasaun se ita hakarak atu nafatin koʼalia ho laran-diʼak neʼebé nakonu ho domin.
Koʼalia ho laran-diʼak nuʼudar kaben-naʼin
11. (a) Oinsá mak ita hatene katak Maromak Jeová hakarak laʼen sira atu hatudu hahalok laran-diʼak neʼebé nakonu ho domin ba sira-nia feen? (b) Iha dalan saida deʼit mak hahalok laran-diʼak neʼebé nakonu ho domin ajuda laʼen atu kontrola nia nanál?
11 Apóstolu Paulo fó konsellu ba laʼen sira: “Mane sira, hadomi imi-nia kaben nuʼudar Kristu hadomi kreda no saran nia moris tanba nia.” (Ef 5:25) Liután neʼe, Paulo mós fó-hanoin ba laʼen sira liafuan neʼebé Maromak Jeová hatete ona ba Adão no Eva. Nia hakerek: “Mane husik nia aman no inan hodi moris hamutuk ho nia feen, no sira naʼin-rua sai isin ida deʼit.” (Ef 5:31) Klaru katak Maromak Jeová hakarak duni atu laʼen sira laran-metin ba sira-nia feen, hodi sempre hatudu hahalok laran-diʼak neʼebé nakonu ho domin. Laʼen neʼebé sempre koʼalia ho domin neʼebé laran-metin, sei la fó sai ninia feen nia sala ka hamoe nia iha ema barak nia oin. Nia kontente atu gaba nia. (Prov 31:28) Se problema ruma mosu iha família laran, hahalok laran-diʼak neʼebé nakonu ho domin sei book laʼen atu kontrola ninia nanál hodi la hatún ninia feen.
12. Oinsá mak feen hatudu katak hahalok laran-diʼak neʼebé nakonu ho domin kontrola ninia nanál?
12 Feen mós presiza hakaʼas an nafatin atu koʼalia ho laran-diʼak neʼebé nakonu ho domin. Nia la bele husik espíritu mundu neʼe atu kontrola nia nanál. Hodi “hamtaʼuk nia laʼen”, nia sei koʼalia buat neʼebé diʼak kona-ba nia iha ema nia oin, no ida-neʼe bele halo ema seluk respeitu liután ninia laʼen. (Ef 5:33) No mós feen sei lakohi atu diskute malu ka kontra nia laʼen nia hanoin iha oan sira-nia oin, hodi nuneʼe nia la hamenus oan nia respeitu ba sira-nia aman. Nia buka atu rezolve problema hanesan neʼe kuandu sira naʼin-rua mesak. Bíblia hatete: “Feto neʼebé loloos matenek harii ona ninia umakain.” (Prov 14:1) Nia halo nia uma laran sai fatin neʼebé kmaan no hakmatek ba nia família hotu.
13. Iha fatin neʼebé mak importante liu atu koʼalia ho laran-diʼak neʼebé nakonu ho domin? Oinsá mak ita bele halo ida-neʼe?
13 Maski kaben-naʼin sira mesak iha sira-nia uma, sira mós tenke kontinua uza sira-nia nanál iha dalan neʼebé hatudu respeitu ba malu. Paulo hakerek: “Halakon sira-neʼe hotu: hirus, hakarak aat, laran-nakali, laran-aat, lia-bosok kona-ba ema, eh lia-foʼer.” No nia mós dehan: “Tau laran-luak, laran-kmaus, haraik-an, laran-sadiʼa no pasiénsia nuʼudar imi-nia hatais. Simu malu didiʼak, tahan malu wainhira imi iha buat ruma hasoru ema seluk. Imi sei perdua malu nuʼudar Naʼi fó perdua ona ba imi. Iha sira-neʼe hotu tau tan domin neʼebé kesi metin sira seluk atu sai buat furak ida deʼit.” (Kol 3:8, 12-14) Kuandu oan sira haree katak sira-nia inan-aman toman atu koʼalia ho domin no laran-diʼak iha uma laran, ida-neʼe sei halo oan sira laran-kontente no fasil ba sira atu halo tuir dalan neʼebé inan-aman koʼalia.
14. Iha dalan saida deʼit mak família nia ulun uza sira-nia nanál atu fó ksolok ba sira-nia família?
14 Ema ida neʼebé hakerek salmu ida koʼalia kona-ba Maromak Jeová hodi dehan: “Favór ida, halo Ita-nia laran-diʼak neʼebé nakonu ho domin, fó ksolok mai haʼu.” (Sal 119:76) Dalan importante neʼebé Maromak Jeová uza atu fó ksolok ba ninia povu mak hodi fó konsellu no matadalan. (Sal 119:105) Oinsá mak família nia ulun bele halo tuir ezemplu husi ita-nia Aman iha lalehan no uza sira-nia nanál atu fó ksolok ba sira-nia família? Sira bele halo ida-neʼe hodi fó laran-manas no fó matadalan neʼebé família presiza. Adorasaun Família nian mak oportunidade diʼak atu família bele aprende informasaun neʼebé folin-boot husi Bíblia.—Prov 24:4.
Hatudu domin neʼebé laran-metin ba maluk fiar-naʼin
15. Oinsá mak katuas sira no sira seluk neʼebé iha esperiénsia barak uza sira-nia nanál atu proteje maluk sira iha kongregasaun laran?
15 Liurai David harohan: “Husik Ita-nia laran-diʼak neʼebé nakonu ho domin no Ita-nia lia-loos rasik mak sempre sai nuʼudar buat neʼebé proteje haʼu.” (Sal 40:11) Oinsá mak katuas kristaun sira no sira seluk neʼebé iha esperiénsia barak iha kongregasaun bele banati-tuir Maromak Jeová nia ezemplu neʼe? Hodi uza ita-nia nanál atu koʼalia kona-ba informasaun husi Bíblia mak dalan ida atu ita hatudu laran-diʼak neʼebé nakonu ho domin.—Prov 17:17.
16, 17. Iha dalan saida deʼit mak ita bele hatudu katak hahalok laran-diʼak neʼebé nakonu ho domin mak ukun ita-nia nanál?
16 Saida mak ita tenke halo se ita haree maluk kristaun ida komesa laʼo tuir dalan neʼebé kontra matadalan husi Bíblia? Klaru katak laran-diʼak neʼebé nakonu ho domin sei book ita atu uza ita-nia nanál hodi ajuda nia, loos ka lae? (Sal 141:5) Se ita hatene katak maluk ida halo sala neʼebé sériu, ita-nia domin neʼebé laran-metin sei book ita atu fó laran-manas ba nia atu “bolu katuas kreda nian” atu sira bele “reza ba nia” no ajuda nia. (Tgo 5:14) Maibé se nia la halo tuir buat neʼebé ita hatete, no ita rasik mós lakohi atu fó-hatene ba katuas sira, neʼe katak ita la hatudu laran-diʼak neʼebé nakonu ho domin. Dala ruma ita-nia maluk balu sente laran-tun, sente mesak, sente la iha folin, ka sente estrese. Nuneʼe, dalan diʼak ida atu ita hatudu laran-diʼak neʼebé nakonu ho domin mak uza ita-nia nanál hodi “hametin malu”.—1 Tes 5:11.
17 Saida mak ita sei halo kuandu Maromak nia inimigu habelar lia-bosok kona-ba ita-nia maluk fiar-naʼin sira? Duké iha dúvida kona-ba ita-nia maluk nia laran-metin, ita lakohi duni atu simu liafuan sira-neʼe. Ka karik ita mós bele husu ba ema neʼebé duun ita-nia maluk atu esplika kona-ba se nia hatene duni informasaun neʼe nia hun, ka nia rona deʼit husi ema seluk? Se Maromak nia povu nia inimigu hakarak buka-hatene hela-fatin husi maluk kristaun sira atu fó terus ba sira, ita-nia domin neʼebé laran-metin sei book ita atu la fó sai informasaun ruma kona-ba sira.—Prov 18:24.
Ema neʼebé iha “laran-diʼak neʼebé nakonu ho domin sei hetan moris”
18, 19. Iha ita-nia relasaun ho maluk kristaun, tanbasá mak ita lakohi atu husik laran-diʼak neʼebé nakonu ho domin sai dook husi ita-nia nanál?
18 Iha situasaun hotu ita tenke hatudu domin neʼebé laran-metin ba maluk sira neʼebé adora Maromak Jeová. Maski ita hasoru situasaun neʼebé susar, maibé ita sei nunka husik laran-diʼak neʼebé nakonu ho domin sai dook husi ita-nia nanál. Maromak Jeová sente la kontente kuandu ema Izraél nia laran-diʼak neʼebé nakonu ho domin “sai hanesan mahon-been neʼebé lakon lalais deʼit”. (Os 6:4, 6) Maibé, Maromak Jeová kontente loos kuandu ema iha toman atu hatudu laran-diʼak neʼebé nakonu ho domin. Haree toʼok oinsá mak nia haraik bensaun ba ema neʼebé hatudu hahalok neʼe.
19 Provérbios 21:21 hatete: “Ema neʼebé buka justisa no laran-diʼak neʼebé nakonu ho domin sei hetan moris, justisa no glória.” Bensaun ida neʼebé ema laran-diʼak sei hetan mak nia moris laʼós ba tempu badak deʼit, maibé moris rohan-laek. Maromak Jeová sei ajuda nia atu “hetan moris neʼebé mesak mak loloos”. (1 Tim 6:12, 19) Tan neʼe, mai ita hotu “kontinua hatudu ba malu hahalok laran-diʼak neʼebé nakonu ho domin”.—Zac 7:9.
[Nota–rodapé]
^ par. 1 Provérbios 19:22: “Buat neʼebé folin-boot iha ema mak ninia laran-diʼak neʼebé nakonu ho domin; no ema neʼebé kiak mak diʼak liu fali ema bosok-teen.”
^ par. 4 Atu hetan informasaun liután kona-ba saida mak la hanesan entre laran-metin, domin, no laran-diʼak, se kompara ho laran-diʼak neʼebé nakonu ho domin, haree Menara Pengawal 15 Mei 2002, pájina 12-13, 18-19.
^ par. 6 Salmo 77:12: “No haʼu sei hanoin kleʼan kona-ba Ita-nia serbisu hotu. No haʼu sei hanoin beibeik kona-ba Ita-nia hahalok sira.”
^ par. 9 Isaías 54:10: “‘Tanba foho sira rasik karik sei lakon, no foho kiʼik sira karik nakdoko, maibé haʼu-nia laran-diʼak neʼebé nakonu ho domin sei la lakon husi ó, no haʼu-nia aliansa dame nian sei la nakdoko,’ Jeová, Ida neʼebé hatudu laran-sadiʼa ba ó mak hatete.”
Ita bele hatán?
• Oinsá mak ita esplika hahalok laran-diʼak neʼebé nakonu ho domin?
• Saida mak bele ajuda ita atu sempre koʼalia ho laran-diʼak neʼebé nakonu ho domin?
• Oinsá mak kaben-naʼin sira hatudu domin neʼebé laran-metin iha sira-nia koʼalia?
• Oinsá mak ita bele hatudu laran-diʼak neʼebé nakonu ho domin ba ita-nia maluk fiar-naʼin sira?
[Pergunta estudu nian]
[Dezeñu iha pájina 23]
David hahiʼi Maromak Jeová nia laran-diʼak neʼebé nakonu ho domin
[Dezeñu iha pájina 24]
Ita iha toman atu halaʼo beibeik Adorasaun Família nian ka lae?