Oinsá mak Jesus nia sakrifísiu salva ita?
Oinsá mak Jesus nia sakrifísiu salva ita?
“Ema neʼebé fiar iha Oan-Mane hetan moris rohan-laek; maibé ema neʼebé lakohi rona Oan-Mane sei la haree moris, no Maromak nia laran-nakali horik iha nia.”—JOAO 3:36.
1, 2. Tanbasá mak estudante Bíblia komesa halo livru Zionʼs Watch Tower?
LIVRU Zionʼs Watch Tower fulan-Outubru tinan 1879 hatete: “Ema neʼebé estuda Bíblia ho didiʼak sei haree katak Kristu nia mate mak buat neʼebé importante duni.” * Informasaun neʼe ramata ho avizu tuirmai neʼe: “Ita tenke kuidadu atu la simu hanorin sira neʼebé nega katak Kristu nia mate laʼós sakrifísiu neʼebé taka ema nia sala.”—Lee 1 Joao 2:1, 2.
2 Estudante Bíblia halo livru Zionʼs Watch Tower komesa husi fulan-Jullu tinan 1879. Razaun ida ba sira atu halo livru neʼe mak atu defende Bíblia nia hanorin kona-ba Jesus nia sakrifísiu. Livru neʼe fó duni ai-han “sira iha tempu loloos”, tanba iha tempu neʼebá, ema barak neʼebé bolu an kristaun komesa iha dúvida kona-ba oinsá mak Jesus nia mate sai hanesan sakrifísiu ida neʼebé kasu ema nia sala. (Mt 24:45) Ema barak komesa fiar ba teoria evolusaun, maibé ideia neʼe kontra lia-loos neʼebé dehan katak ema monu ba sala no la perfeitu ona. Evolusaun hanorin katak ema sempre iha mudansa hodi neineik-neineik sai diʼak liu no tan neʼe la presiza sakrifísiu atu salva ema. Entaun, apóstolu Paulo nia konsellu ba Timóteo mós diʼak mai ita, nia hatete: “Haree didiʼak buat hotu neʼebé ami tau iha ó-nia liman. Keta lakon tempu hodi haksesuk malu kona-ba hanorin neʼebé folin-laek no doutrina kona-ba ‘matenek’ neʼebé laʼós matenek loloos; hodi simu sira-neʼe, ema balun lakon tiha sira-nia fiar.”—1 Tim 6:20, 21.
3. Ita sei koʼalia kona-ba pergunta saida deʼit?
3 Klaru katak ita lakohi duni atu ‘lakon ita-nia fiar’. Tan neʼe, diʼak atu hanoin kona-ba pergunta sira tuirmai neʼe: Tanbasá mak haʼu presiza Jesus nia sakrifísiu? Maromak no Jesus lakon buat folin-boot saida atu bele fó sakrifísiu neʼe? Oinsá mak haʼu bele hetan bensaun husi Jesus nia sakrifísiu atu salva haʼu husi Maromak nia laran-nakali?
Hetan salvasaun husi Maromak nia laran-nakali
4, 5. Ohin loron, oinsá mak ita hatene katak Maromak nia laran-nakali horik ho mundu aat neʼe?
4 Bíblia no ema nia istória hatudu katak husi tempu Adão monu ba sala, “Maromak nia laran-nakali horik” iha ema hotu. (Joao 3:36) Porezemplu, ema hotu la bele hasees an husi mate. No mós Satanás nia ukun la bele proteje ema husi susar sira neʼebé mosu beibeik, no ema nia governu la iha kbiit atu fó buat neʼebé sira-nia povu presiza. (1 Joao 5:19) Tan neʼe mak funu, violénsia no kiak nunka atu lakon.
5 Buat sira-neʼe hatudu ho klaru katak Maromak Jeová la haraik nia bensaun ba mundu aat neʼe. Paulo hatete katak “husi lalehan Maromak hatudu nia laran-nakali hasoru ema fiar-laek no laran-aat”. (Rom 1:18-20) Tan neʼe, ema sira neʼebé kontinua halaʼo moris neʼebé kontra Maromak nia dalan sira, sei la bele hasees an husi rezultadu neʼebé mosu tan sira-nia hahalok aat. Ohin loron Maromak hatudu nia laran-nakali liuhusi mensajen tesi-lia nian neʼebé hanesan malisan iha bikan neʼebé fakar daudauk ba Satanás nia mundu. Mensajen sira-neʼe ita bele haree iha ita-nia livru sira neʼebé esplika kona-ba Bíblia.—Apok 16:1.
6, 7. Ema kristaun kose-mina hatudu ezemplu diʼak hodi halo serbisu saida? Oportunidade saida mak sei nakloke hela ba ema ida-idak neʼebé sei sai parte ba Satanás nia mundu?
6 Maibé ida-neʼe katak tarde ona ba ema ida-idak neʼebé hakarak sai livre husi Satanás nia ukun atubele hadame malu fali ho Maromak, ka lae? Lae, tanba odamatan sei nakloke hela ba ema hotu atu hadame malu ho Maromak Jeová. Ema kristaun kose-mina sira, neʼebé hanesan “Kristu nia manu-ain [“embaixadór”, MF]”, hatudu ezemplu diʼak iha serbisu haklaken hodi konvida ema husi nasaun hotu atu: “Hadame malu ho Maromak.”—2 Kor 5:20, 21.
7 Apóstolu Paulo hatete katak Jesus “hasai ita husi Maromak nia laran-nakali neʼebé atu mai”. (1 Tes 1:9, 10) Ikusmai, Maromak Jeová nia laran-nakali sei halakon ba nafatin sira neʼebé la hakribi sira-nia hahalok aat. (2 Tes 1:6-9) Sé mak sei hetan salvasaun? Bíblia hatete: “Ema neʼebé fiar iha Oan-Mane hetan moris rohan-laek; maibé ema neʼebé lakohi rona Oan-Mane sei la haree moris, no Maromak nia laran-nakali horik iha nia.” (Joao 3:36) Sin, ema hotu neʼebé hatudu fiar ba Jesus no ninia sakrifísiu sei hetan salvasaun iha loron ikus iha tempu neʼebé Maromak hatudu sai nia laran-nakali hodi halakon mundu aat neʼe.
Oinsá mak Jesus nia sakrifísiu ajuda ita
8. (a) Uluk, Adão no Eva iha futuru kapás saida? (b) Oinsá mak Maromak Jeová hatudu katak nia mak Maromak neʼebé iha justisa loos?
8 Maromak kria Adão no Eva nuʼudar ema perfeitu. Se sira nafatin halo tuir Maromak, mundu neʼe sei sai nakonu ho sira-nia bei-oan neʼebé moris haksolok hamutuk ho sira iha Paraízu. Maibé buat neʼebé triste tebes mak ita-nia inan-aman primeiru ho hakarak rasik kontra Maromak nia mandamentu. Tan neʼe, sira hetan kastigu atu mate ba nafatin no Maromak duni sai sira husi Paraízu. Antes Adão no Eva iha oan, sira mak ema sala-naʼin ona no ikusmai sira sai ferik-katuas no mate. Neʼe hatudu katak Maromak Jeová nunka bosok kona-ba buat neʼebé nia hatete. Liután neʼe, nia mak Maromak neʼebé iha justisa loos. Maromak Jeová fó avizu nanis ona ba Adão katak se nia han ai-fuan neʼebé bandu, rezultadu mak nia sei mate, no ida-neʼe sai loos duni.
9, 10. (a) Tanbasá mak Adão nia bei-oan sira mate? (b) Oinsá mak ita bele sai livre husi kastigu atu mate ba nafatin?
9 Tanba Adão hadaʼet sala ba nia bei-oan, ita hotu mós la perfeitu no tan neʼe sempre halo sala no ikusmai mate. Ita bele dehan katak ita hotu sei iha hela iha Adão nia isin kuandu nia halo sala, no tan neʼe ita mós simu kastigu-mate. Se Maromak Jeová halakon deʼit kastigu-mate hodi la selu buat ruma atu taka sala, neʼe hatudu katak Maromak bosok kona-ba buat neʼebé nia hatete. Paulo koʼalia kona-ba ita hotu kuandu nia dehan: “Ita hatene katak ukun-fuan mak buat neʼebé espíritu nian, maibé haʼu fali isin nian neʼebé faʼan tiha ona atu sai atan ba sala. Haʼu kasian loos duni! Sé mak sei hasai haʼu husi haʼu-nia isin neʼebé sei mate neʼe?”—Rom 7:14, 24.
10 Maromak Jeová deʼit mak bele halo arranju neʼebé tuir justisa loos atu fó perdua ba ita-nia sala no halo ita livre husi kastigu atu mate ba nafatin. Nia halo ida-neʼe hodi haruka nia Oan doben husi lalehan atu moris mai nuʼudar ema perfeitu, hodi bele saran nia moris nuʼudar sakrifísiu atu salva ita. La hanesan ho Adão, Jesus nafatin ema perfeitu. Tuir loloos, “nia la halo sala ida”. (1 Ped 2:22) Nuneʼe, Jesus iha kbiit atu bele sai aman ba ema perfeitu. Maibé, nia husik Maromak nia inimigu sira oho nia hodi nuneʼe nia bele sai fali aman-hakiak ba Adão nia bei-oan sira neʼebé sala-naʼin, no loke dalan atu fó moris rohan-laek ba sira neʼebé tau fiar ba nia. Bíblia hatete: “Iha Maromak mesak ida deʼit, no iha Maromak no ema hotu sira leet iha lia-naʼin ida deʼit. Nia mós ema: Kristu Jesus, neʼebé saran an atu soi ema hotu.”—1 Tim 2:5, 6.
11. (a) Konta toʼok ai-knanoik ida kona-ba oinsá mak Jesus nia sakrifísiu ajuda ita? (b) Jesus nia sakrifísiu lori bensaun ba sé deʼit?
11 Atu komprende kona-ba oinsá mak Jesus nia sakrifísiu ajuda ita, hanoin toʼok kona-ba ai-knanoik tuirmai neʼe. Ema balu lakon sira-nia osan hotu iha banku tanba patraun banku nian mak naʼok sira-nia osan no ida-neʼe karik halo sira atu deve osan toʼo sira iha tusan barak. Patraun neʼe merese duni atu hetan kastigu ba tinan barak iha komarka. Maibé oinsá ho ema neʼebé lakon sira-nia osan? Tanba osan la iha, ema sira-neʼe moris kiak no la iha esperansa. Maibé se ema ida neʼebé laran-diʼak no riku mak sai fali patraun ba banku neʼe no nia fó fali hotu osan neʼebé lakon, ema sira-neʼe bele sai livre husi sira-nia tusan. Nuneʼe mós, Maromak Jeová no ninia Oan doben sosa fali Adão nia bei-oan no halakon sira-nia sala hodi Jesus nia raan neʼebé fakar ona. Tan neʼe mak João Batista hatete ida-neʼe kona-ba Jesus: “Neʼe mak Maromak nia Bibi-Oan neʼebé kasu mundu nia sala.” (Joao 1:29) Jesus nia sakrifísiu mak kasu ema hotu nia sala, ema neʼebé moris no mós ema neʼebé mate.
Saida deʼit mak Maromak Jeová no Jesus lakon
12, 13. Saida mak ita aprende husi Abraão neʼebé prontu atu fó Isaac nuʼudar sakrifísiu?
12 Ita ema la bele komprende buat hotu neʼebé ita-nia Aman iha lalehan no nia Oan tenke lakon atu fó sakrifísiu neʼebé taka ita-nia sala. Maibé Bíblia konta istória balu neʼebé bele ajuda ita atu hanoin kleʼan kona-ba neʼe. Porezemplu, hanoin toʼok oinsá mak Abraão sente nuʼudar nia halo viajen loron tolu ba rai Moriá atu halo tuir mandamentu neʼebé Maromak fó: “Favór ida lori ó-nia oan, ó-nia oan-mane mesak neʼebé ó hadomi tebes, Isaac, no laʼo ba rai Moriá, no iha neʼebá ó hasaʼe nia nuʼudar sakrifísiu sunu nian iha foho ida, foho neʼebé haʼu sei hatudu ba ó.”—Gên 22:2-4.
13 Ikusmai Abraão toʼo iha fatin neʼebé Maromak hili tiha ona. Hanoin toʼok kona-ba Abraão nia laran-triste kuandu nia kesi Isaac nia liman no ain no latan nia iha altár leten, altár neʼebé nia rasik mak harii. Ita bele fiar katak Abraão neon-susar tebes kuandu nia hiʼit tudik atu oho nia oan! Hanoin mós kona-ba oinsá mak Isaac sente nuʼudar nia latan iha altár leten hodi hein tudik kroʼat neʼebé sei sona nia, hodi hakanek no oho nia. Maibé Maromak Jeová nia anju hapara kedas Abraão iha tempu neʼebé nia atu oho ninia oan. Buat neʼebé Abraão halo ba Isaac iha tempu neʼebá ajuda ita atu komprende buat saida mak Maromak Jeová lakon hodi husik Satanás nia liman-ain sira atu oho Ninia Oan. No mós, hodi halo tuir Abraão nia hakarak, Isaac haleno oinsá mak Jesus prontu atu hetan terus no mate ba ita.—Ebr 11:17-19.
14. Oinsá mak buat neʼebé akontese ba Jacob ajuda ita atu komprende buat neʼebé Maromak Jeová lakon?
14 Istória ida kona-ba Jacob nia moris mós bele ajuda ita atu komprende kona-ba buat neʼebé Maromak Jeová lakon. Husi Jacob nia oan-mane hotu, nia hadomi liu José. Maibé triste katak José nia maun sira laran-moras no odi nia. Maski nuneʼe, kuandu Jacob haruka José atu bá haree ninia maun sira iha fatin dook, nia prontu atu halo ida-neʼe. Iha tempu neʼebá, ninia maun sira hein Jacob nia bibi sira maizumenus dook kilómetru 100, iha parte norte husi sira-nia hela-fatin iha Hebron. Hanoin toʼok oinsá mak Jacob sente kuandu ninia oan sira seluk lori fali José nia hatais neʼebé nakonu ho raan! Nia halerik hodi dehan: “Neʼe mak haʼu-nia oan nia unuk naruk! Animál siʼak ida mak han tiha ona nia! José karik lees tiha ona sai pedasuk ba pedasuk!” Buat sira-neʼe halo Jacob laran-susar duni, tan neʼe nia tanis ba José ba loron barak. (Gên 37:33, 34) Dalan neʼebé Maromak Jeová hatudu sai ninia laran-susar la hanesan ho dalan neʼebé ema la perfeitu hatudu. Maski nuneʼe hodi hanoin kleʼan kona-ba buat neʼebé akontese ba Jacob bele ajuda ita atu hatene oinsá mak Maromak sente kuandu ema fó terus no ikusmai oho ninia Oan doben.
Bensaun husi Jesus nia sakrifísiu
15, 16. (a) Oinsá mak Maromak Jeová hatudu katak nia simu Jesus nia sakrifísiu? (b) Bensaun saida deʼit mak ita hetan ona husi Jesus nia sakrifísiu?
15 Maromak Jeová halo Jesus moris hiʼas nuʼudar kriatura espíritu neʼebé kmanek. (1 Ped 3:18) Ba loron 40, Jesus neʼebé moris hiʼas ona mosu ba ninia dixípulu sira hodi hametin sira-nia fiar no prepara sira atu halaʼo serbisu haklaken neʼebé sei halo toʼo mundu nia rohan. Ikusmai nia saʼe ba lalehan. Iha neʼebá, nia fó ba Maromak folin husi ninia raan neʼebé fakar ona. No folin neʼe Maromak bele uza ba Jesus nia dixípulu sira neʼebé tau fiar ba ninia sakrifísiu. Maromak Jeová hatudu katak nia simu Kristu nia sakrifísiu hodi fó knaar ba nia atu fakar espíritu santu ba ninia dixípulu sira neʼebé halibur iha Jeruzalein iha loron Pentekostes 33.—Apos 2:33.
16 Kristu nia dixípulu kose-mina sira hahú kedas atu fó avizu ba ema seluk atu hadook an husi Maromak nia hirus hodi hetan batizmu iha Jesus Kristu nia naran no hetan perdua ba sira-nia sala. (Lee Apostolu 2:38-40.) Husi tempu neʼebá toʼo ohin loron, Maromak dada ema rihun ba rihun husi nasaun hotu atu hakbesik ba nia no iha relasaun diʼak ho nia tanba sira tau fiar ba Jesus nia sakrifísiu. (Joao 6:44) Agora diʼak atu hanoin kona-ba pergunta rua tan: Maromak fó ita esperansa atu moris rohan-laek tanba serbisu diʼak neʼebé ita rasik halo, ka lae? Ita bele lakon ita-nia esperansa ba futuru ka lae?
17. Ita sente oinsá kona-ba bensaun atu sai nuʼudar Maromak nia belun?
17 Ita ema la merese atu simu Jesus nia sakrifísiu. Maski nuneʼe, hodi tau fiar ba sakrifísiu neʼe, ohin loron ema rihun ba rihun sai ona Maromak Jeová nia belun no iha esperansa atu moris ba nafatin iha paraízu iha rai. Maibé, sai ona Maromak nia belun, neʼe la dehan katak ita sei la bele lakon relasaun diʼak neʼe. Atu hasees an husi Maromak nia loron hirus neʼebé atu mai, ita tenke hatudu nafatin katak ita hafolin Kristu Jesus nia sakrifísiu.—Rom 3:24; lee Filipe 2:12.
Kontinua tau fiar ba Jesus nia sakrifísiu
18. Tau fiar ba Jesus nia sakrifísiu inklui halo saida?
18 Eskritura tema ba lisaun ida-neʼe, Joao 3:36, hatudu katak tau fiar ba Naʼi Jesus Kristu inklui mós rona ka halo tuir nia. Hodi hafolin Jesus nia sakrifísiu, ida-neʼe sei book ita atu moris tuir Jesus nia hanorin, inklui ninia hanorin kona-ba morál. (Mc 7:21-23) “Maromak nia laran-nakali” sei tun ba ema hotu neʼebé la arrepende an hodi kontinua halo hahalok hanesan sala-foʼer, koʼalia lia-foʼer, no halo “buat foʼer tomak”, ida-neʼe inklui haree beibeik pornografia.—Ef 5:3-6.
19. Iha dalan saida deʼit mak ita bele hatudu katak ita tau fiar ba Jesus nia sakrifísiu?
19 Atu hatudu katak ita hafolin Jesus nia sakrifísiu ho laran, ita tenke hakaʼas an atu halo hahalok neʼebé hatudu katak ita “hamtaʼuk Maromak”. (2 Ped 3:11) Mai ita fahe tempu ho matenek atu bele halo orasaun beibeik ho laran, estuda Bíblia mesak, tuir reuniaun sira, halaʼo adorasaun família nian, no badinas iha serbisu haklaken. No diʼak mós atu la “haluha halo hahalok diʼak nafatin no fahe imi-nia rikusoin ba malu, basá sakrifísiu sira-neʼe mak sakrifísiu neʼebé monu loos ba Maromak nia laran”.—Ebr 13:15, 16.
20. Ema hotu neʼebé tau fiar ba Jesus nia sakrifísiu bele hein bensaun diʼak saida iha futuru?
20 Kuandu Maromak Jeová hatudu sai ninia laran-nakali ba mundu aat neʼe, ita sei haksolok tebes tanba ita hatudu ona katak ita tau fiar ba Jesus nia sakrifísiu no nafatin hafolin ida-neʼe! No iha mundu foun neʼebé Maromak promete nanis ona, ita sei agradese nafatin ba Maromak nia laran-diʼak atu halo arranju neʼebé salva ita husi ninia laran-nakali.—Lee Joao 3:16; Apokalipse 7:9, 10, 13, 14.
[Nota–rodapé]
^ par. 1 Livru Zionʼs Watch Tower mak naran uluk ba livru fulan-fulan nian ho naran The Watchtower, ka iha lia-tetun bolu Livru Haklaken.
Oinsá ita hatán?
• Tanbasá mak ita presiza Jesus nia sakrifísiu?
• Maromak no Jesus lakon buat saida deʼit atu bele fó sakrifísiu?
• Bensaun saida deʼit mak ita simu husi Jesus nia sakrifísiu?
• Oinsá mak ita hatudu katak ita tau fiar ba Jesus nia sakrifísiu?
[Pergunta estudu nian]
[Dezeñu iha pájina 13]
Odamatan sei nakloke hela ba ema atu bele hadame malu ho Maromak Jeová
[Dezeñu iha pájina 15]
Hodi hanoin kleʼan kona-ba buat neʼebé akontese ba Abraão, Isaac, no Jacob, bele ajuda ita atu hafolin buat neʼebé Maromak no Jesus lakon tanba ita