Pergunta husi lee-naʼin

Tanbasá mak Jesus hatete ba feto ida neʼebé ema hatene nuʼudar feto-aat katak ninia sala sira hetan ona perdua?—Lc 7:37, 48.

Kuandu Jesus han iha uma husi ema farizeu ida naran Simão, feto ida hakbesik hodi ‘tuur iha Jesus nia ain kotuk’. Nia habokon Jesus nia ain ho ninia matan-been no hamaran ho ninia fuuk rasik. Tuirmai nia reʼi Jesus nia ain no kose ho mina-morin. Evanjellu hatete katak ema hatene feto neʼe nuʼudar “feto-aat ida husi sidade”. Maski nuneʼe, ba ema hanesan neʼe Jesus hatete: “Ó-nia sala sira kasu tiha ona.” (Lc 7:36-38, 48) Jesus nia liafuan neʼe katak sá? Tanba Jesus seidauk fó nia an nuʼudar sakrifísiu, oinsá mak nia bele kasu ema nia sala?

Antes Jesus fó perdua ba feto neʼebé fase no kose Jesus nia ain ho mina, Jesus uza ai-knanoik ida atu esplika ba Simão lisaun ida neʼebé importante. Jesus kompara sala hanesan tusan boot neʼebé la bele selu fali. Nia hatete ba Simão: “Ema ida empresta osan ba ema naʼin-rua: ida halo tusan osan-mean atus lima, ida seluk limanulu. Tanba sira naʼin-rua la bele selu fali, nia kasu tiha sira-nia tusan. Neʼe duni, ida neʼebé mak sei hadomi nia liután? Simão hatán dehan: ‘Haʼu hanoin katak ida neʼebé nia kasu tusan boot liu.’ No Jesus dehan: ‘Ita hanoin loos!’” (Lc 7:41-43) Ita hotu tenke halo tuir Maromak. Tan neʼe, kuandu ita la halo tuir nia no halo sala, ida-neʼe hanesan ita la bele selu fali buat neʼebé nia merese atu simu. Nuneʼe ita halibur tusan barak tan ba ita-nia an. Maski nuneʼe, Maromak Jeová mak hanesan empresta-naʼin neʼebé prontu atu taka ita-nia tusan. Tan neʼe mak Jesus fó laran-manas ba ninia dixípulu sira atu harohan hodi husu ba Maromak: “Haraik perdua ba ami-nia tusan, nuʼudar ami perdua sira neʼebé iha tusan ho ami.” (Mt 6:12) Hodi kompara eskritura neʼe ho Lucas 11:4 klaru katak tusan neʼe mak ema nia sala.

Antes Kristu mai, oinsá mak Maromak fó perdua ba ema nia sala? Tuir Maromak nia justisa neʼebé loos, kastigu ba sala mak mate. Tan neʼe, Adão selu duni nia sala ho nia moris rasik. Maibé tuir Lei neʼebé Maromak Jeová fó ba nasaun Izraél hatudu katak nia sei fó perdua ba ema neʼebé halo sala se sira hasaʼe sakrifísiu animál nian ba nia. Apóstolu Paulo hatete: “Loloos, tuir ukun-fuan, buat hotu-hotu tenke hamoos lai ho raan; no raan la fakar karik, la iha perdua ba sala sira.” (Ebr 9:22) Ema judeu hatene katak la iha dalan seluk tan atu bele hetan perdua husi Maromak. Tan neʼe mak ema neʼebé rona Jesus nia liafuan la simu buat neʼebé nia hatete ba feto neʼe. Sira neʼebé han hamutuk ho Jesus koʼalia iha sira-nia laran hodi dehan: “Ema neʼe sé loos atu kasu ema nia sala?” (Lc 7:49) Entaun, oinsá mak Jesus bele fó perdua ba feto neʼe, neʼebé halo sala boot?

Maromak Jeová hatoʼo profesia primeiru ba Adão no Eva depois sira kontra nia. Profesia neʼe hatudu sai Maromak nia hakarak atu hamosu “bei-oan” neʼebé ninia ain-tuban Satanás no ninia “bei-oan” sei hakanek. (Gên 3:15) Ida-neʼe akontese kuandu Maromak nia inimigu sira oho Jesus. (Gal 3:13, 16) Jesus nia raan neʼebé nakfakar ona sai nuʼudar sakrifísiu neʼebé bele halo ema hotu livre husi sala no mate. Tanba la iha buat ida neʼebé bele hapara Maromak Jeová atu kumpre nia hakarak, entaun kuandu Maromak dehan sai tiha liafuan neʼebé hakerek iha Gênesis 3:15, iha ninia haree iha ona sakrifísiu neʼebé selu tiha atu bele kasu ema nia sala. Husi tempu neʼebá nia bele fó perdua ba ema neʼebé tau fiar ba ninia promesa.

 Antes Jesus mai, Maromak Jeová haree ona ema balu nuʼudar ema loos. Sira balu mak Enoc, Noé, Abraão, Raab, no Job. Ho fiar, sira hein ba Maromak nia promesa atu sai loos. Dixípulu Tiago dehan katak “Abraão fiar Maromak, no Maromak sura ida-neʼe nuʼudar nia justisa”, neʼe katak Maromak haree Abraão nuʼudar ema loos. Tiago mós koʼalia kona-ba “feto-aat Raab” neʼebé sai ema loos “husi hahalok”.—Tgo 2:21-25.

Liurai David iha Izraél antigu halo sala ruma neʼebé sériu tebes, maibé nia iha fiar metin ba Maromak neʼebé loos no hatudu katak nia arrepende an duni kuandu nia halo sala. Liután neʼe, Bíblia hatete: “Maromak tau nuʼudar buat karan hodi [Jesus] nia raan, . . . neʼe atu hatudu Maromak nia justisa, basá tan Maromak nia laran-luak, nia fó perdua ba sala sira neʼebé ema halo tiha ona, atu hatudu iha tempu neʼe katak nia loos no nia halo loos sira neʼebé fiar iha Jesus Kristu.” (Rom 3:25, 26) Hodi uza folin husi sakrifísiu neʼebé Jesus sei fó iha futuru, Maromak Jeová bele fó perdua ba David nia sala sira, no iha tempu neʼebé hanesan Maromak rasik la kontra ninia lei sira kona-ba justisa.

Klaru katak feto neʼebé kose Jesus nia ain ho mina mós iha situasaun neʼebé hanesan. Maski nia moris nuʼudar feto-aat, maibé nia hakribi ona ninia sala. Nia rekoñese katak nia presiza hetan perdua husi nia sala no liuhusi ninia hahalok nia hatudu katak nia hafolin duni ida neʼebé Maromak Jeová uza atu kasu sala. Maski Jesus seidauk mate nuʼudar sakrifísiu, maibé folin husi sakrifísiu neʼe hanesan selu tiha ona no bele uza atu fó perdua ba ema hanesan feto neʼe. Tan neʼe, Jesus hatete ba nia: “Ó-nia sala sira kasu tiha ona.”

Istória neʼe hatudu ho klaru katak Jesus la hakribi ema sala-naʼin sira. Nia halo diʼak ba sira. Liután neʼe, Maromak Jeová prontu atu fó perdua ba ema sala-naʼin sira neʼebé arrepende an. Nuʼudar ema sala-naʼin, ita hotu sente kmaan no haksolok tebes atu hatene katak Maromak prontu atu fó perdua ba ita-nia sala sira.

[Dezeñu iha pájina 7]

Maromak haree sira nuʼudar ema loos