Ita-nia ulun-naʼin nia atividade sira
Ita-nia ulun-naʼin nia atividade sira
“Nia bá tiha ona, atu laʼo husi funu ba funu hodi manán hotu.”—APOK 6:2.
1, 2. (a) Saida mak Bíblia hatudu kona-ba Kristu nuʼudar liurai? (b) Saida deʼit mak Jesus halo depois nia sai liurai iha tinan 1914?
MAROMAK JEOVÁ foti Kristu atu sai nuʼudar Liurai ba ninia Reinu, ka governu iha tinan 1914. Tuir ita-nia hanoin saida mak Jesus halo? Nia hanesan liurai neʼebé tuur deʼit iha ninia kadunan no dala ruma hateke ba rai atu hatene saida mak akontese iha ninia kongregasaun ka lae? Se ita hanoin hanesan neʼe, ita tenke troka ita-nia hanoin. Livru Salmos no livru Apokalipse hatudu kona-ba Jesus nuʼudar liurai ida neʼebé saʼe kuda funu nian no laran-manas atu “laʼo husi funu ba funu hodi manán hotu” toʼo ikusmai “hetan susesu”.—Apok 6:2; Sal 2:6-9; 45:1-4.
2 Buat primeiru neʼebé Kristu halo depois nia sai liurai mak manán funu hasoru Satanás no ninia anju aat sira. Kristu nuʼudar arkanju Miguel hamutuk ho ninia anju sira, soe tun Satanás no ninia anju aat sira ba rai. (Apok 12:7-9) Tuirmai, nuʼudar “aliansa nia manu-ain” ba Maromak Jeová, Jesus mai hamutuk ho nia Aman atu haree kondisaun iha templu espirituál. (Mal 3:1) Nia tesi lia ba relijiaun kristaun falsu, parte husi ‘Babilónia Boot’ neʼebé aat tebetebes tanba fakar ema barak nia raan no la laran-metin ba Maromak hodi envolve an iha polítika mundu nian.—Apok 18:2, 3, 24.
Kristu hamoos ninia atan iha rai
3, 4. (a) Nuʼudar Maromak Jeová nia “manu-ain”, Kristu halo saida? (b) Saida mak Kristu no ninia Aman hetan kuandu sira mai haree kondisaun iha templu? Saida mak Jesus halo nuʼudar Ulun ba kongregasaun?
3 Kuandu Maromak Jeová no ninia “manu-ain” mai atu haree kondisaun iha templu espirituál nia parte iha rai, sira hetan grupu kristaun loos ida, neʼebé laʼós parte husi relijiaun falsu. Maibé, grupu ema kristaun kose-mina neʼe, ka “Levi nia oan sira”, presiza atu sai moos liután. Profeta Malaquias fó-hatene nanis kona-ba neʼe hodi dehan: “Nia [Jeová] tenke tuur nuʼudar ida neʼebé hamoos osan-mutin ho ahi no tenke hamoos Levi nia oan sira; no nia tenke hamoos sira hanesan osan-mean no hanesan osan-mutin, no ba Jeová sira sei sai duni povu ida neʼebé hasaʼe sakrifísiu justisa nian.” (Mal 3:3) Maromak Jeová uza “aliansa nia manu-ain”, Kristu Jesus, atu hamoos ema Izraél Maromak nian.
4 Kristu rekoñese katak grupu kristaun kose-mina neʼe mak laran-metin no hakaʼas an atu fó ai-han espirituál ba sira-nia maluk fiar-naʼin. Komesa husi tinan 1879, maski hasoru susar oioin, sira kontinua fó sai lia-loos husi Bíblia kona-ba Maromak nia Reinu, ka ukun, iha livru ida-neʼe. Jesus fó-hatene nanis ona katak kuandu nia “fila mai” atu haree ninia atan sira-nia kondisaun durante loron ikus sira husi ‘mundu neʼe nian’, nia sei hetan atan ida neʼebé “fó-han” ba maluk atan sira “iha tempu loloos”. Jesus sei gaba atan neʼe no sei “tau nia rikusoin tomak” iha rai ba atan neʼe nia liman. (Mt 24:3, 45-47) Nuʼudar Ulun ba kongregasaun kristaun, Kristu uza atan neʼe neʼebé “laran-metin no matenek” atu tau matan ba buat hotu iha rai neʼebé uza atu apoia Maromak nia ukun. Nia fó matadalan ba ninia atan kose-mina sira no sira-nia maluk “bibi seluk” liuhusi Grupu Administradór.—Joao 10:16.
Serbisu koʼa nian iha raiklaran
5. Iha apóstolu João nia vizaun, nia haree liurai halo saida?
5 Apóstolu João haree vizaun ida kona-ba buat ida tan neʼebé Liurai Mesias sei halo “iha loron Naʼi nian” depois Kristu sai liurai iha tinan 1914. João hakerek: “Iha haʼu-nia vizaun, haʼu haree kalohan mutin ida, no iha nia ema ida tuur hela; hanesan Oan-Mane ho koroa osan-mean nian iha nia ulun no tudik koʼa hare nian iha nia liman.” (Apok 1:10; 14:14) João rona anju ida husi Maromak Jeová hatete ba ida neʼebé halo serbisu koʼa nian atu lolo nia tudik koʼa nian tanba “hare raiklaran nian tasak ona”.—Apok 14:15, 16.
6. Saida mak Jesus hatete kona-ba buat neʼebé sei akontese antes tempu koʼa nian?
6 Serbisu koʼa nian iha raiklaran, fó-hanoin mai ita Jesus nia ai-knanoik kona-ba trigu no duʼut aat. Jesus kompara nia an ho toʼos-naʼin neʼebé kari fini iha ninia toʼos hodi bele koʼa trigu diʼak. Trigu diʼak neʼe reprezenta “reinu nia oan sira”, katak ema kristaun kose-mina neʼebé sei ukun hamutuk ho nia iha ninia governu. Maibé iha kalan nakukun, inimigu ida, “Diabu”, kari tan iha toʼos, fini duʼut aat nian, ida-neʼe reprezenta aat-naʼin nia oan sira. Toʼos-naʼin neʼe haruka nia serbisu-naʼin sira atu husik trigu no duʼut aat atu sai boot hamutuk toʼo tempu koʼa nian, iha ‘mundu nia rohan’. Iha tempu neʼebá, nia sei haruka nia anju sira atu haketak trigu husi duʼut aat.—Mt 13:24-30, 36-41.
7. Oinsá mak Kristu halaʼo serbisu koʼa nian iha raiklaran?
7 Jesus halaʼo serbisu koʼa nian iha mundu tomak, no ida-neʼe kumpre João nia vizaun. Serbisu koʼa nian iha raiklaran komesa hodi halibur restu husi ema naʼin-144.000 neʼebé nuʼudar “reinu nia oan sira”, ka “trigu” iha Jesus iha nia ai-knanoik. Depois Funu Mundiál Primeiru, iha buat barak neʼebé hatudu katak ema kristaun falsu la hanesan duni ho ema kristaun loos, no ida-neʼe book ema husi bibi seluk atu hola parte iha adorasaun neʼebé loos. Ida-neʼe mak parte segundu husi serbisu koʼa nian iha raiklaran neʼe. Sira laʼós parte husi “reinu nia oan sira”, maibé, sira mak “ema-lubun boot” neʼebé hakruʼuk an ba Reinu neʼe. Jesus halibur sira husi “nasaun, rasa, umakain no lia hotu-hotu”. Sira hakruʼuk an ba Mesias nia Reinu, ka governu, neʼebé Kristu Jesus no “santu sira” ka ema naʼin-144.000 mak ukun iha lalehan.—Apok 7:9, 10; Dan 7:13, 14, 18.
Ulun-naʼin ba kongregasaun sira
8, 9. (a) Saida mak hatudu katak Kristu laʼós haree deʼit buat neʼebé kongregasaun ida-idak halo maibé haree mós ema ida-idak iha kongregasaun laran nia moris? (b) Hanesan hatudu iha pájina 26, saida mak Satanás nia “mistériu” ka buat kleʼan, neʼebé ita tenke hasees an?
8 Hanesan ita haree ona iha lisaun uluk, Jesus hatene didiʼak situasaun husi kongregasaun ida-idak iha apóstolu sira-nia tempu. Ohin loron, nuʼudar Liurai neʼebé simu tiha ona “kbiit tomak iha lalehan no rai”, Kristu, ita-nia Ulun-Naʼin dirije kongregasaun hotu iha mundu tomak no dirije sira neʼebé tau matan ba kongregasaun. (Mt 28:18; Kol 1:18) Maromak Jeová “halo nia sai . . . ulun” ba kongregasaun ema kose-mina sira. (Ef 1:22) Tan neʼe, nia haree buat hotu neʼebé akontese iha kongregasaun Testemuña ba Jeová nian ida-idak iha mundu tomak neʼebé hamutuk 100.000 liu.
9 Ba kongregasaun iha Tiatira antigu, Jesus dehan: “Neʼe mak lia-menon Oan-Mane nian neʼebé iha matan hanesan ahi-lakan, . . . haʼu hatene ó-nia . . . hahalok.” (Apok 2:18, 19) Jesus fó konsellu makaʼas ba ema iha kongregasaun neʼe tanba sira-nia hahalok foʼer, no sira moris hodi buka deʼit sira rasik nia hakarak. Jesus hatete: “Haʼu mak koko ema nia fuan no hanoin sira, no fó ba imi ida-ida buat neʼebé imi-nia hahalok sira soʼi atu simu.” (Apok 2:23) Liafuan sira-neʼe hatudu katak Kristu laʼós deʼit haree buat neʼebé kongregasaun ida-idak halo, maibé nia mós haree oinsá ema ida-idak iha kongregasaun laran halaʼo sira-nia moris. Jesus gaba ema kristaun iha Tiatira tanba sira “la hanorin an kona-ba Satanás nia mistériu sira”. (Apok 2:24) Ohin loron, nia mós simu ema hotu, joven no ferik-katuas, neʼebé lakohi atu buka hatene kona-ba “Satanás nia mistériu sira” ka buat kleʼan husi Satanás, liuhusi internét ka video game neʼebé nakonu ho violénsia, no sira mós la simu ema nia hanoin kona-ba hahalok sira neʼebé kontra Maromak nia matadalan. Nia kontente tebes atu haree ema kristaun sira neʼebé hakaʼas an atu halo buat hotu neʼebé sira bele atu halo tuir ninia matadalan iha sira-nia moris tomak.
10. Oinsá mak livru Apokalipse hatudu katak Kristu dirije katuas sira iha kongregasaun? Maibé, katuas sira presiza rekoñese arranju saida?
10 Kristu ho domin tau matan ba ninia kongregasaun sira iha rai hodi uza katuas sira neʼebé nia hili. (Ef 4:8, 11, 12) Iha apóstolu sira-nia tempu, katuas hotu neʼebé tau matan ba kongregasaun mak ema kose-mina. Iha livru Apokalipse sira mak hanesan fitun iha Kristu nia liman-loos. (Apok 1:16, 20) Ohin loron, mane barak neʼebé serbí nuʼudar katuas kongregasaun nian mak parte husi bibi seluk. Maibé, liuhusi orasaun no liuhusi espíritu santu nia matadalan mak sira simu knaar atu sai katuas kongregasaun nian, no tan neʼe ita bele fiar katak Kristu mak dirije sira ho ninia liman rasik. (Apos 20:28) Maski nuneʼe, sira rekoñese katak Kristu uza grupu kiʼik husi ema kristaun kose-mina sira nuʼudar Grupu Administradór atu tau matan no dirije ninia dixípulu sira iha rai.—Lee Apostolu 15:6, 28-30.
“Mai, Naʼi Jesus”
11. Tanbasá mak ita hakarak tebes atu haree ita Ulun-Naʼin mai?
11 Iha apóstolu João nia vizaun, dala barak Jesus hatete katak nia sei mai lalais. (Apok 2:16; 3:11; 22:7, 20) Klaru katak nia koʼalia kona-ba tempu neʼebé nia mai atu fó kastigu ba Babilónia Boot no ba buat seluk husi Satanás nia mundu aat neʼe. (2 Tes 1:7, 8) Tanba apóstolu João hakarak tebes atu haree buat hotu neʼebé fó-hatene ona atu sai loos, nia hatete: “Amen; mai, Naʼi Jesus.” Ita neʼebé hela iha loron ikus husi mundu aat neʼe, mós hakarak tebes atu haree ita-nia Ulun-Naʼin, Jesus mai ho kbiit nuʼudar Liurai atu halo santu ninia Aman nia naran no atu hatudu katak ninia Aman deʼit mak iha direitu atu ukun.
12. Saida mak Kristu sei halo antes anin neʼebé sei halakon Satanás nia mundu aat neʼe huu ba rai?
12 Antes Jesus halakon Satanás nia organizasaun iha rai, restu husi ema naʼin-144.000 neʼebé parte husi Izraél Maromak nian sei simu sinál ikus. Neʼe hatudu katak sira sei la lakon ona sira-nia kolen. Ita hatene ida-neʼe tanba Bíblia hatudu ho klaru katak “anin” neʼebé sei halakon Satanás nia mundu aat neʼe sei la huu ba rai antes restu husi ema naʼin-144.000 simu sira-nia sinál ikus.—Apok 7:1-4.
13. Oinsá mak parte primeiru husi ‘terus boot’ hahú hodi hatudu sai Kristu nia ukun?
13 Ema barak liu iha mundu neʼe la rekoñese katak iha tinan 1914 mak Kristu “hiʼit an mai” ona ka ukun ona nuʼudar liurai. (2 Ped 3:3, 4) Maibé, lakleur tan nia sei hatudu sai ninia ukun ba ema hotu hodi fó kastigu ba buat hotu neʼebé iha Satanás nia mundu aat neʼe. Buat ida neʼebé nia sei halakon mak “funu-balun boot” katak ulun-naʼin sira husi relijiaun kristaun falsu. (Lee 2 Tesalonika 2:3, 8.) Ida-neʼe sei hatudu ho klaru katak Kristu komesa halaʼo ninia knaar nuʼudar Tesi-Lia Naʼin neʼebé Maromak Jeová hili atu fó kastigu. (Lee 2 Timoteo 4:1.) Maromak Jeová sei tau iha polítiku-naʼin sira-nia laran hakarak atu halakon Babilónia Boot katak relijiaun falsu iha mundu tomak neʼebé Bíblia kompara ho feto-aat. (Apok 17:15-18) Parte primeiru husi Babilónia Boot neʼebé sei lakon mak relijiaun kristaun falsu, tanba sira-nia hahalok neʼebé aat liu. Ida-neʼe hatudu katak parte primeiru husi ‘terus boot’ hahú ona.—Matt. 24:21.
14. (a) Tanbasá mak parte primeiru husi loron ‘terus boot’ nian sei habadak? (b) “Oan-Mane nia sinál” katak sá ba Maromak Jeová nia povu?
14 Jesus hatete katak loron ‘terus boot’ nian sei habadak tanba “sira neʼebé naʼi fihir ona”, katak restu husi ema kose-mina sira neʼebé sei iha rai. (Mt 24:22) Kuandu polítiku-naʼin sira halakon relijiaun falsu, Maromak Jeová sei la husik sira atu halakon ema kose-mina sira no sira-nia maluk bibi seluk. Jesus hatete liután katak “liutiha susar boot loron hirak-neʼe nian”, iha sinál sira neʼebé sei “mosu iha loron, iha fulan no fitun sira” no tuirmai “Oan-Mane nia sinál sei mosu iha lalehan”. Nuneʼe, “povu sira hotu iha raiklaran sei baku sira-nia hirus-matan”. Maibé ema kose-mina sira neʼebé iha esperansa atu bá lalehan no sira-nia maluk neʼebé iha esperansa atu moris iha rai sei la halo nuneʼe. Sira sei ‘foti aas sira-nia ulun, tan sira-nia maksoin besik ona’.—Mt 24:29, 30; Lc 21:25-28.
15. Antes Kristu halakon hotu mundu aat neʼe, saida mak nia sei halo?
15 Antes Oan-Mane halakon hotu mundu aat neʼe, nia sei halo buat ida tan. Jesus hatete: “Wainhira Oan-Mane mai iha nia glória no nia anju sira hotu hamutuk ho nia, nia sei tuur iha nia kadunan glória nian. Povu hotu sei halibur an iha nia oin. Nia sei haketak ema sira hanesan bibi-atan haketak bibi-malae husi bibi-timor. Nia sei tau bibi-malae iha nia sorin-kuana, bibi-timor iha nia sorin-karuk.” (Mt 25:31-33) Eskritura sira-neʼe hatudu katak Kristu nuʼudar Tesi-Lia Naʼin sei haketak “povu hotu” ba grupu rua: “bibi-malae”, mak sira neʼebé apoia Jesus nia alin sira (ema kristaun kose-mina neʼebé iha rai) no “bibi-timor” mak sira neʼebé “lakohi simu ita Naʼi Jesus Kristu nia evanjellu”. (2 Tes 1:7, 8) Bibi-malae, ka “sira neʼebé diʼak”, sei hetan “moris rohan-laek” iha rai, maibé “bibi-timor” sei lakon ba nafatin.—Mt 25:34, 40, 41, 45, 46.
Jesus manán funu hotu
16. Oinsá mak Kristu ita-nia Ulun-Naʼin sei manán funu hotu?
16 Kuandu Kristu fó tiha sinál ikus ba ninia maluk hotu neʼebé sei sai nuʼudar liurai no amlulik, no nia haketak tiha bibi-malae hodi tau iha sorin-loos atu hetan salvasaun, nia sei kontinua atu manán funu hotu. (Apok 5:9, 10; 6:2) Nuʼudar ulun ba anju sira neʼebé iha forsa boot, no ba ninia alin sira neʼebé moris fali, nia sei halakon buat hotu iha Satanás nia mundu aat neʼe, inklui buat polítiku nian, militár, no ekonomia. (Apok 2:26, 27; 19:11-21) Kristu sei manán funu hotu hodi halakon buat hotu husi Satanás nia mundu neʼe. Tuirmai, nia sei hatama Satanás no ninia anju aat sira iha rai-kuak neʼebé kleʼan tebetebes ba tinan rihun ida.—Apok 20:1-3.
17. Durante Kristu nia Ukun ba Tinan Rihun Ida, nia sei lori bibi seluk ba neʼebé? Ita ida-idak hakarak duni atu halo saida?
17 Kuandu apóstolu João fó-hatene kona-ba “ema-lubun boot” husi bibi seluk neʼebé sei moris liu susar boot, nia mós hatete katak “Bibi-Oan neʼebé tuur iha kadunan sei sai sira-nia Bibi-Atan no nia sei lori sira ba bee-matan bee moris nian”. (Apok 7:9, 17) Sin, durante Kristu nia Ukun ba Tinan Rihun Ida, nia sei kontinua atu ukun bibi seluk, neʼebé loloos sei rona ba nia lian, no nia sei lori sira ba moris rohan-laek. (Lee Joao 10:16, 26-28.) Tan neʼe, mai ita ho laran-metin halo tuir ita-nia Ulun-Naʼin no Liurai, agora no iha mundu foun neʼebé Maromak Jeová promete ona!
Hodi hanoin fali
• Saida deʼit mak Kristu halo depois nia sai liurai iha tinan 1914?
• Sé deʼit mak Kristu uza atu dirije kongregasaun sira?
• Nuʼudar ita-nia Ulun-Naʼin, Kristu sei mai atu halo saida deʼit?
• Oinsá mak Kristu sei kontinua atu dirije ita iha mundu foun?
[Pergunta estudu nian]
[Dezeñu iha pájina 29]
Hodi halakon Satanás nia mundu aat neʼe, Kristu sei hatudu sai katak nia ukun ona