Kampaña espesiál iha rai-Bulgária hetan susesu

“Toʼos boot duni, maibé serbisu-naʼin uitoan. Neʼe duni imi harohan ba toʼos-naʼin atu haruka serbisu-naʼin sira ba nia toʼos.”—MT 9:37, 38.

JESUS nia liafuan sira iha leten sai loos duni iha rai-Bulgária, rai furak ida iha rai-Europa nia parte súl no parte leste nia klaran! Iha rai neʼe presiza duni serbisu-naʼin barak tan atu bele fahe lia-loos ba ema millaun hitu liu. Iha rai-Bulgária iha haklaken-naʼin hamutuk 1.700, tan neʼe susar ba sira atu haklaken ba ema hotu iha sira-nia rai. Entaun, Grupu Administradór fó lisensa atu konvida haklaken-naʼin sira neʼebé koʼalia lia-búlgaru husi rai balu iha Europa atu mai no hola parte iha kampaña espesiál ida iha tinan 2009. Kampaña neʼe halaʼo durante semana hitu iha tempu bailoro, no ramata ho reuniaun boot ba loron tolu ho tema “Matan-Moris bá!” neʼebé halaʼo iha sidade Sófia, iha loron 14-16 Agostu 2009.

Ema barak hakarak ajuda

Irmaun sira iha sukursál iha sidade Sófia la hatene ema naʼin-hira mak sei hakarak atu ajuda, husi rai-Fransa, Alemaña, Grésia, Itália, Polónia, no España. Voluntáriu sira-neʼe tenke bá rai-Bulgária ho sira-nia osan rasik no tenke foti feriadu atu bele haklaken iha neʼebá. Irmaun sira haksolok tebes kuandu semana-semana haklaken-naʼin sira neʼebé husu lisensa atu ajuda aumenta beibeik, no ikusmai sira hotu hamutuk naʼin-292! Tanba ema barak hakarak atu ajuda, sukursál bele haruka sira atu haklaken iha sidade tolu iha rai-Bulgária: Sidade Kazanlak, Sandanski, no Silistra. Irmaun sira neʼebé serbí nuʼudar katuas área nian iha rai-Bulgária mós konvida pioneiru no haklaken-naʼin balu husi sira-nia área atu apoia kampaña neʼe. Ikusmai iha ema voluntáriu naʼin-382 neʼebé haklaken ho laran-manas iha fatin balu neʼebé ladún rona lia-foun diʼak.

Irmaun sira husi kongregasaun neʼebé besik sidade tolu neʼe haruka irmaun balu atu bá uluk hodi bele aluga hela-fatin ka otél neʼebé baratu. Irmaun sira-neʼe serbisu makaʼas atu ajuda ema voluntáriu sira no tau matan ba sira-nia presiza. Iha sidade tolu neʼe, sira mós aluga fatin atu halaʼo reuniaun sira no irmaun sira neʼebé mai atu vizita mak iha knaar atu halaʼo reuniaun. Diʼak tebes atu haree katak iha fatin neʼebé la iha Testemuña ida, haklaken-naʼin hamutuk 50 halibur atu fó hahiʼi ba Maromak Jeová.

Ema voluntáriu sira-neʼe laran-manas tebes atu halaʼo kampaña espesiál neʼe. Durante tempu bailoro, rai-Bulgária bele sai manas toʼo grau 40°. Maski nuneʼe, la iha buat ida neʼebé bele hapara irmaun-irmán sira-nia laran-manas. Iha semana tolu primeiru husi kampaña neʼe, ema iha Silistra, sidade ida iha Mota-Danúbiu neʼebé iha ema naʼin-50.000 liu, hetan sasin ho didiʼak. Tan neʼe, irmaun sira hakaʼas an atu haklaken fali iha sidade seluk neʼebé besik, toʼo sira mós haklaken iha sidade Tutrakan neʼebé dook kilómetru 55, iha parte oeste husi sidade Silistra. Baibain sira hahú haklaken iha tuku 9.30 dadeer. Depois han-meiudia, sira kontinua fali haklaken toʼo tuku 7.00 ka liu iha kalan. Nuneʼe mós iha sidade Kazanlak no Sandanski, tanba irmaun sira laran-manas, sira mós haklaken iha sidade seluk neʼebé besik.

 Kampaña lori rezultadu saida?

Durante semana hitu neʼe nia laran ema barak liu simu sasin kona-ba lia-foun diʼak. Hanesan ho apóstolu sira-nia tempu, ema husi sidade sira-neʼe mós bele dehan: ‘Imi hakonu ami-nia sidade ho imi-nia hanorin.’ (Apos 5:28) Sira neʼebé hola parte iha kampaña neʼe fahe livru fulan-fulan nian hamutuk 50.000 no hahú estuda Bíblia hamutuk 482. Ita hotu kontente atu haree katak iha loron 1 Setembru 2009, kongregasaun harii iha Silistra, no iha mós grupu iha sidade Kazanlak no Sandanski. Ita mós kontente atu haree katak ema foun sira neʼebé foin rona lia-foun diʼak ba dala primeiru durante kampaña neʼe laʼo ba oin iha lia-loos.

Iha semana primeiru husi kampaña neʼe, irmán pioneiru tempu-tomak ida, neʼebé mai husi rai-España neʼebé koʼalia lia-búlgaru fó sasin ba feto ida naran Karina neʼebé faʼan jornál iha estrada iha sidade Silistra. Karina hatudu interese ba buat neʼebé nia rona no nia bá atu tuir reuniaun. Nia kontente atu hahú estuda Bíblia, maibé ninia laʼen mak ema neʼebé la fiar katak Maromak iha. Tan neʼe, nia husu atu halaʼo estudu Bíblia iha jardín deʼit laʼós iha ninia uma. Ninia oan-feto naʼin-rua mós tuir estuda neʼe. Ninia oan-feto boot, Daniela, hafolin tebes lia-loos husi Bíblia. Nia lee hotu livru Bíblia Hanorin iha semana ida nia laran deʼit no komesa kedas atu halo tuir buat neʼebé Bíblia hatete kona-ba la uza imajen sira iha adorasaun. Tuirmai, nia fahe lia-loos ba ninia kolega sira. Semana tolu depois nia tuir reuniaun ba dala primeiru, nia hatete ba irmán neʼebé estuda ho nia, dehan: “Haʼu sente katak agora haʼu sai parte ona ba imi. Entaun, saida mak haʼu tenke halo atu haʼu mós bele komesa atu haklaken?” Daniela kontinua laʼo ba oin iha lia-loos, hamutuk ho ninia inan no ninia alin-feto.

Irmaun ida naran Orlin haklaken iha sidade Kazanlak, nia ema búlgaru, maibé nia hela iha rai-Itália. Depois haklaken, nia laʼo fali ba ninia hela-fatin, no iha dalan nia haklaken ba mane joven naʼin-rua neʼebé tuur hela iha kadeira ida iha jardín laran. Nia fó ba sira livru Bíblia Hanorin no halo arranju atu vizita fali sira iha loron tuirmai. Iha vizita neʼe, Orlin hahú estuda Bíblia ho Svetomir no estudu neʼe kontinua tan iha loron tuirmai. Iha loron sia nia laran, Orlin estuda ho Svetomir ba dala ualu. Svetomir hatete: “Loron rua antes haʼu hasoru Ita, haʼu halo orasaun ba Maromak atu ajuda haʼu hatene nia diʼak liután. No haʼu promete katak se nia ajuda haʼu, haʼu sei dedika haʼu-nia an ba nia.” Depois Orlin fila fali ba rai-Itália, irmaun sira seluk kontinua fali atu estuda ho Svetomir, no nia hakaʼas an atu halo tuir lia-loos neʼebé nia aprende.

 Bensaun barak ba sira neʼebé hakaʼas an

Ema sira neʼebé ho laran-luak uza sira-nia tempu feriadu no uza sira-nia osan rasik atu laʼo ba rai seluk hodi haklaken lia-foun diʼak, sente oinsá kona-ba neʼe? Katuas kongregasaun nian ida neʼebé serbí iha rai-España hakerek: “Kampaña neʼe ajuda irmaun sira neʼebé haklaken ba sira neʼebé koʼalia lia-búlgaru iha rai-España atu sente besik liu ba malu. Ida-neʼe book duni sira-nia laran.” Kaben-naʼin ida husi rai-Itália hakerek: “Ida-neʼe mak fulan neʼebé kapás liu hotu iha ami-nia moris!” Sira hatutan tan: “Kampaña neʼe muda ami-nia moris! Ami-nia hanoin la hanesan uluk ona.” Kaben-naʼin neʼe komesa atu hanoin didiʼak kona-ba oinsá atu muda ba rai-Bulgária atu hela iha neʼebá ba nafatin hodi bele ajuda iha fatin neʼebé presiza haklaken-naʼin. Irmán ida naran Carina neʼebé serbí nuʼudar pioneiru regulár iha rai-España mós hola parte iha kampaña neʼe iha sidade Silistra. Tuirmai nia husik ninia serbisu iha rai-España no muda ba rai-Bulgária atu apoia kongregasaun foun iha sidade neʼe. Carina rai ona osan uitoan atu bele ajuda nia atu hela iha rai-Bulgária ba tinan ida. Carina esplika kona-ba ninia desizaun: “Haʼu kontente tebes tanba Maromak Jeová fó oportunidade ba haʼu atu serbí iha rai-Bulgária, no haʼu hein katak haʼu sei bele kontinua atu hela iha neʼe ba tempu neʼebé kleur. Haʼu estuda Bíblia ho ema naʼin-lima, no sira naʼin-tolu tuir ona reuniaun sira.”

Irmán ida husi rai-Itália hakarak tebes atu hola parte iha kampaña neʼe, maibé nia mós foin tama serbisu ida, no tan neʼe nia la iha loron feriadu nian. Maski nuneʼe, ho brani nia husu atu feriadu ba fulan ida hodi la simu osan no nia mós prontu atu husik serbisu se patraun la fó lisensa ba nia atu tuir kampaña neʼe. Maibé nia kontente tebes kuandu nia patraun hatete: “Ó bele bá, maibé ó tenke halo buat ida: Ó tenke haruka ba haʼu kartaun postál husi rai-Bulgária.” Irmán neʼe sente katak Maromak Jeová hatán duni ninia orasaun.

Irmán joven ida naran Stanislava husi sidade Varna iha rai-Bulgária iha serbisu neʼebé diʼak no manán osan barak. Nia mós foti feriadu atu hola parte iha kampaña espesiál iha sidade Silistra. Kuandu nia haree pioneiru barak ho haksolok mai husi rai dook atu haklaken lia-foun diʼak iha ninia rai, ida-neʼe book tebes nia no halo ninia matan-been tun. Nia komesa hanoin kona-ba buat neʼebé nia halo ona ho nia moris, neʼe mak atu tau uluk serbisu atu manán osan. Depois semana rua liutiha kuandu nia fila fali ba nia uma, nia husik ninia serbisu no komesa serbí nuʼudar pioneiru regulár. Agora nia sente kontente tebes tanba nia hakaʼas an atu hanoin ninia Kriadór iha ninia tempu joven.—Ecle 12:1.

Halo Maromak Jeová nia serbisu ho badinas mak buat neʼebé diʼak duni mai ita. La iha buat ida neʼebé diʼak liu fali se ita uza ita-nia tempu no kbiit tomak atu halo serbisu importante atu hanorin no haklaken lia-foun diʼak. Ita mós bele hola parte barak liután iha serbisu atu salva ema nia moris ka lae? Karik iha área balu iha ita-nia rai rasik presiza haklaken-naʼin barak liután. Se nuneʼe, ita bele muda ba fatin sira-neʼe ka lae? Ka karik ita mós bele aprende língua foun atu bele ajuda ema iha ita-nia rai neʼebé hamrook ba lia-loos. Maski dala ruma ita presiza troka buat ruma atu ita bele hola parte barak liután iha serbisu haklaken, maibé ita bele fiar katak Maromak Jeová sei haraik duni bensaun barak mai ita.—Prov 10:22.

[Kaixa/​Dezeñu iha pájina 32]

Loron neʼebé ema la haluha

Ema barak neʼebé mai husi rai seluk atu apoia kampaña espesiál iha rai-Bulgária mós halo planu atu tuir reuniaun boot ba loron tolu ho tema “Matan-Moris bá!” neʼebé halaʼo iha sidade Sófia. Irmaun-irmán sira iha rai-Bulgária haksolok tebes atu hasoru bainaka barak husi rai oioin. Ema naʼin-2.039 neʼebé tuir reuniaun neʼe haksolok tebes kuandu irmaun Geoffrey Jackson husi Grupu Administradór fó sai katak agora Bíblia Tradusaun Mundu Foun kompletu iha ona iha lia-búlgaru! Sira hotu neʼebé tuir reuniaun neʼe iha loron-sesta hatudu sira-nia agradese hodi basa liman makaʼas no ba tempu naruk. Ema barak haksolok toʼo matan-been tun. Tradusaun neʼe, neʼebé klaru no fasil atu komprende, sei ajuda duni ema laran-maus sira iha rai-Bulgária atu hatene Maromak Jeová.

[Mapa iha pájina 30, 31]

Atu hetan format kompletu, haree livru

RAI-BULGÁRIA

SÓFIA

Sandanski

Silistra

Kazanlak

[Dezeñu iha pájina 31]

Durante semana hitu nia laran deʼit ema barak rona lia-foun diʼak