Unidade mak sinál ba adorasaun neʼebé loos
Unidade mak sinál ba adorasaun neʼebé loos
“Haʼu sei tau sira hamutuk iha unidade, hanesan bibi-lubun ida iha luhan nia laran.”—MIQ 2:12.
1. Oinsá mak kriasaun hatudu Maromak nia matenek?
EMA neʼebé hakerek salmu ida hatete: “Buat neʼebé Ita halo mak barak tebetebes, Oh, Jeová! Buat sira-neʼe hotu Ita halo ho matenek. Mundu nakonu ho buat neʼebé Ita halo.” (Sal 104:24) Ita bele haree Maromak nia matenek liuhusi kriasaun oioin neʼebé rihun ba rihun hanesan ai-moris, animál boot ka animál kiʼik sira, no baktéria sira; buat sira-neʼe depende ba malu no apoia malu atubele kontinua moris. No mós, iha ita-nia isin laran iha prosesu rihun ba rihun neʼebé halaʼo iha parte isin nian neʼebé boot toʼo parte isin nian neʼebé kiʼik liu iha sélula sira. Prosesu hotu neʼe apoia malu hodi ita bele iha saúde diʼak.
2. Hanesan hatudu iha pájina 13, tanbasá mak ema kristaun nia unidade haree hanesan milagre ida?
2 Maromak Jeová kria ema laʼós atu sira moris ketaketak, maibé atu apoia malu. Ita ema iha oin neʼebé la hanesan, iha hanoin neʼebé la hanesan no iha matenek oioin. Liután neʼe, Maromak kria ema primeiru ho hahalok hanesan ninian atu sira bele serbisu hamutuk no apoia malu. (Gên 1:27; 2:18) Maski nuneʼe, tanba mundu aat neʼe haketak an husi Maromak, toʼo agora ema hotu la bele moris hamutuk ho unidade. (1 Joao 5:19) Maibé, mai ita hanoin toʼok kona-ba ema iha kongregasaun kristaun iha apóstolu sira-nia tempu. Sira mai husi situasaun moris nian oioin hanesan atan husi Éfezu, feto Grésia neʼebé naran-boot, ema judeu neʼebé eskola-boot, no sira neʼebé uluk adora lulik, maibé sira iha unidade, no ida-neʼe karik haree hanesan milagre ida.—Apos 13:1; 17:4; 1 Tes 1:9; 1 Tim 6:1.
3. Saida mak Bíblia hatete kona-ba ema kristaun nia unidade? Saida deʼit mak ita sei estuda iha lisaun neʼe?
3 Adorasaun neʼebé loos ajuda ema atu serbisu hamutuk ho dame hanesan parte sira iha isin ida. (Lee 1 Korinto 12:12, 13.) Iha lisaun neʼe ita sei estuda kona-ba pergunta sira tuirmai neʼe: Oinsá mak adorasaun loos ajuda ema atu iha unidade? Tanbasá mak Maromak Jeová deʼit bele halo ema rihun ba rihun husi nasaun oioin atu iha unidade? Maromak Jeová bele ajuda ita atu hasoru susar saida deʼit neʼebé taka dalan ba unidade? No, oinsá mak ema kristaun loos nia unidade la hanesan ho kristaun falsu?
Oinsá mak adorasaun neʼebé loos halo ema iha unidade?
4. Oinsá mak adorasaun neʼebé loos halo ema iha unidade?
4 Ema sira neʼebé halaʼo adorasaun loos hatene katak Maromak Jeová deʼit mak Ukun-Naʼin neʼebé loos ba lalehan no rai tanba nia mak kria buat hotu. (Apok 4:11) Entaun maski ema kristaun neʼebé loos moris iha rai oioin no iha situasaun neʼebé la hanesan, maibé sira hotu halo tuir Maromak nia lei sira neʼebé hanesan no mós moris tuir Bíblia nia matadalan neʼebé hanesan. Sira hotu neʼebé tuir adorasaun neʼebé loos bele bolu Maromak Jeová nuʼudar “Aman”. (Isa 64:8; Mt 6:9) Tan neʼe, sira hotu sai hanesan família ida deʼit no moris ho kontente iha unidade hanesan eskritura tuirmai hatete: “Haree bá! Diʼak no furak duni kuandu maun-alin sira hela hamutuk iha unidade!”—Sal 133:1.
5. Saida mak ajuda ema kristaun neʼebé loos atu iha unidade?
5 Maski ema kristaun neʼebé loos mak ema sala-naʼin, maibé sira hotu adora Maromak ho unidade tanba sira aprende ona atu hadomi malu. Domin neʼebé Maromak Jeová hanorin ba sira la bele hetan iha fatin seluk. (Lee 1 Joao 4:7, 8.) Ninia Liafuan hatete: “Tau laran-luak, laran-kmaus, haraik-an, laran-sadiʼa no pasiénsia nuʼudar imi-nia hatais. Simu malu didiʼak, tahan malu wainhira imi iha buat ruma hasoru ema seluk. Imi sei perdua malu nuʼudar Naʼi fó perdua ona ba imi. Iha sira-neʼe hotu nia leten, tau tan domin neʼebé kesi metin sira seluk atu sai buat furak ida deʼit.” (Kol 3:12-14) Domin mak sinál ba ema kristaun neʼebé loos. Ita rasik haree ona ka lae, katak unidade mak buat ida neʼebé halo adorasaun loos la hanesan ho adorasaun falsu?—Joao 13:35.
6. Oinsá mak fiar ba Maromak nia Reinu ajuda ita atu iha unidade?
6 Ema neʼebé adora Maromak neʼebé loos mós iha unidade tanba sira hotu fiar katak Maromak nia Governu deʼit mak bele salva ema. Sira hatene katak lakleur tan Maromak nia Governu sei halakon ema nia governu no sei lori dame neʼebé loos ba ema neʼebé halo tuir ninia ukun. (Isa 11:4-9; Dan 2:44) Tan neʼe, ema kristaun halo tuir buat neʼebé Jesus hatete kona-ba ninia dixípulu sira: “Sira laʼós mundu neʼe nian nuʼudar haʼu mós laʼós mundu neʼe nian.” (Joao 17:16) Ema kristaun neʼebé loos la envolve an iha mundu nia polítiku; tan neʼe, sira haksolok ho unidade iha sira leet maski ema seluk funu hasoru malu.
Dalan ida deʼit atu hetan hanorin loos
7, 8. Iha dalan saida deʼit mak Bíblia nia matadalan ajuda ita atu iha unidade?
7 Ema kristaun iha apóstolu sira-nia tempu haksolok ho unidade tanba sira hotu simu hanorin husi hun ida deʼit. Sira rekoñese katak Jesus hanorin no dirije kongregasaun liuhusi grupu administradór, neʼe mak apóstolu sira no katuas sira iha Jeruzalein. Mane sira-neʼe laran-metin ba Maromak no halo desizaun tuir Maromak nia Liafuan, no sira fó matadalan ba kongregasaun sira iha rai barak liuhusi katuas sira neʼebé iha knaar atu vizita kongregasaun. Kona-ba katuas sira-neʼe, Bíblia hatete: “Iha sidade sira neʼebé sira liu ba, sira hateten ba sarani sira atu halo tuir buat neʼebé apóstolu sira hamutuk katuas sira koʼalia ona iha Jeruzalein.”—Apos 15:6, 19-22; 16:4.
8 Ohin loron mós, ema kristaun kose-mina balu mak serbí nuʼudar Grupu Administradór no arranju ida-neʼe ajuda kongregasaun iha mundu tomak atu iha unidade. Grupu Administradór prepara informasaun iha livru sira neʼebé tradús ba língua oioin hodi hametin ema kristaun nia relasaun ho Maromak. Ai-han espirituál sira-neʼe mai husi Maromak nia Liafuan. Tan neʼe, buat neʼebé sira hanorin mai husi Maromak Jeová, laʼós husi ema.—Isa 54:13.
9. Oinsá mak halo Maromak nia serbisu ajuda ita atu iha unidade?
9 Katuas sira iha kongregasaun mós haburas unidade hodi hatudu ezemplu diʼak kona-ba halo serbisu haklaken. Ema neʼebé serbí hamutuk atu halaʼo Maromak nia hakarak iha relasaun neʼebé besik liu se kompara ho ema neʼebé halibur hamutuk atu halimar deʼit. Kongregasaun kristaun harii laʼós atu sai nuʼudar fatin atu ransu malu deʼit, maibé atu fó glória ba Maromak Jeová no halo serbisu ida, neʼe mak atu haklaken lia-foun diʼak, halo dixípulu, no hametin kongregasaun. (Rom 1:11, 12; 1 Tes 5:11; Ebr 10:24, 25) Tan neʼe, apóstolu Paulo hatete ida-neʼe kona-ba ema kristaun: “Imi laran-metin iha espíritu ida deʼit, hodi buka tahan imi-nia fiar iha evanjellu ho laran ida deʼit.”—Flp 1:27.
10. Iha dalan saida deʼit mak ita iha unidade nuʼudar Maromak nia povu?
10 Klaru katak nuʼudar Maromak Jeová nia povu, ita iha unidade tanba ita simu Maromak Jeová nia ukun, hadomi ita-nia maluk, fiar ba Maromak nia Reinu, ka governu, no respeitu sira neʼebé Maromak hili atu tau matan ita. Nuʼudar ema sala-naʼin dala ruma ita hatudu hahalok neʼebé bele estraga ita-nia unidade, maibé Maromak Jeová fó ajuda hodi ita bele hasees an husi hahalok sira-neʼe.—Rom 12:2.
Hasees an husi hahalok foti-an no laran-moras
11. Tanbasá mak hahalok foti-an haketak ema? Oinsá mak Maromak Jeová ajuda ita hasees an husi hahalok neʼe?
11 Hahalok foti-an haketak ema. Ema neʼebé foti-an hanoin katak nia diʼak liu fali ema seluk no gosta atu gaba an. Baibain hahalok hanesan neʼe taka netik dalan ba unidade tanba sira neʼebé rona nia gaba an karik bele sai laran-moras. Dixípulu Tiago ho klaru fó-hatene ita: “Loko-an neʼe aat liu.” (Tgo 4:16) Ita la hatudu domin se ita haree ema seluk kiʼik liu fali ita. Maromak Jeová hatudu ezemplu diʼak kona-ba haraik-an hodi hanoin no ajuda ita maski ita ema sala-naʼin. David hatete kona-ba Maromak Jeová: “Ita-nia haraik-an mak halo haʼu boot.” (2 Sam 22:36) Maromak nia Liafuan ajuda ita atu hasees an husi hahalok foti-an hodi hanorin ita atu hanoin iha dalan neʼebé loos. Paulo hatete: “Sé mak fó kmanek liu ba imi? Imi iha buat saida neʼebé imi la simu uluk? Maibé imi simu tiha karik, tansá imi loko an hanesan imi la simu nia?”—1 Kor 4:7.
12, 13. (a) Tanbasá mak fasil atu sai laran-moras? (b) Rezultadu diʼak saida mak ita hetan hodi tuir Maromak Jeová nia haree kona-ba ema seluk?
12 Laran-moras mak buat ida tan neʼebé bele halakon unidade. Tanba ita hotu sala-naʼin, ita hotu “bele sai laran-moras”, no ema kristaun neʼebé serbí Maromak ba tempu kleur ona mós dala ruma laran-moras kona-ba ema seluk nia situasaun, sasán, responsabilidade, ka matenek ruma. (Tgo 4:5, MF) Porezemplu, irmaun ida neʼebé iha família karik sente laran-moras ba irmaun seluk neʼebé hetan knaar espesiál ruma tanba serbí Maromak ba tempu-tomak, no haluha katak irmaun ida-neʼe mós karik bele sente laran-moras ba nia tanba nia iha oan. Oinsá mak ita bele hasees an husi laran-moras neʼebé bele estraga ita-nia unidade?
13 Atu ajuda ita hasees an husi laran-moras, diʼak atu hanoin-hetan katak Bíblia kompara kongregasaun husi ema kristaun kose-mina ho ema nia parte isin nian. (Lee 1 Korinto 12:14-18.) Porezemplu, maski ita-nia matan ema bele haree duké ita-nia fuan, maibé sira rua iha folin duni, loos ka lae? Nuneʼe mós, Maromak Jeová hafolin ema hotu iha kongregasaun laran maski ita haree katak ema balu iha responsabilidade boot liu fali ema seluk. Entaun, mai ita haree maluk kristaun sira tuir Maromak Jeová nia haree. Duké sai laran-moras ba ema seluk, ita bele hatudu katak ita hafolin no hanoin sira. Hodi halo nuneʼe, ita hatudu katak ema kristaun loos la hanesan ho ema kristaun falsu.
Ema kristaun falsu la iha unidade
14, 15. Oinsá mak relijiaun kristaun falsu fahe malu?
14 Ema kristaun loos nia unidade la hanesan ho grupu kristaun falsu nian neʼebé sempre diskute malu. Maizumenus besik tinan 300 liutiha Kristu ema kristaun falsu sai barak liután no liurai jentiu ida husi Roma komesa atu ukun relijiaun kristaun falsu, no ida-neʼe halo buras lalais liután kristaun falsu. Tuirmai, nasaun barak haketak an husi Roma no ikusmai nasaun sira-neʼe harii sira rasik nia igreja.
15 Durante tinan atus ba atus nasaun sira-neʼe halo funu hasoru malu. Husi tinan 1600 toʼo tinan 1800, ema iha rai-Bretaña, rai-Fransa, no rai-Estadus Unidus fó laran-manas ba sira-nia povu atu kaer metin ba nasionalizmu, katak hadomi liu sira-nia nasaun, toʼo ikusmai ideia ida-neʼe sai hanesan relijiaun ida. Husi tinan 1800 ba oin, nasionalizmu mak domina ema barak nia hanoin. Ikusmai, relijiaun kristaun falsu fahe ba igreja oioin, no sira barak simu nasionalizmu. Tanba sira simu nasionalizmu, dala ruma membru husi igreja sira halo funu ho ema husi nasaun seluk neʼebé iha relijiaun hanesan sira-nian. Klaru katak ohin loron relijiaun kristaun falsu fahe malu tanba iha fiar ba doutrina oioin no fiar ba nasionalizmu.
16. Hanorin saida deʼit mak halo relijiaun kristaun falsu haketak malu?
16 Ohin loron iha ona grupu kristaun falsu nian atus ba atus no maizumenus tinan atus ida liubá sira balu komesa habelar ideia atu igreja sira iha fali unidade. Maibé sira-nia hakaʼas-an ba tinan barak hetan susesu uitoan deʼit, no membru husi igreja sira nafatin iha hanorin neʼebé la hanesan kona-ba evolusaun, halo abortu, feto sai amlulik, no sala-foʼer entre mane ho mane ka feto ho feto. Ulun-naʼin igreja nian balu buka atu halo ema husi grupu kristaun oioin atu iha unidade hodi hanorin katak ladún importante atu kaer metin ba doutrina ruma. Maibé hodi halo ida-neʼe ema nia fiar sai fraku no la lori unidade ba relijiaun kristaun falsu neʼebé haketak malu ona.
Adorasaun loos manán hasoru nasionalizmu
17. Saida mak profeta Miquéias fó-hatene nanis kona-ba adorasaun loos neʼebé ajuda ema atu iha unidade “iha loron sira-neʼe nia rohan”?
17 Maski ohin loron mundu neʼe haketak malu duni, maibé sira neʼebé adora Maromak loos hatudu katak sira iha unidade. Maromak nia profeta ida naran Miquéias fó-hatene nanis: “Haʼu sei tau sira hamutuk iha unidade, hanesan bibi-lubun ida iha luhan nia laran.” (Miq 2:12) Miquéias fó-hatene nanis katak adorasaun loos sei sai aas liu fali adorasaun sira seluk, hanesan adorasaun ba maromak falsu no adorasaun ba nasaun ida. Nia hakerek: “Sei mosu duni iha loron sira nia rohan, katak foho, uma Jeová nian, sei hamriik metin aas liu fali foho sira seluk, no loloos sei sai aas liu fali foho sira, no ema sei laʼo nadodon ba neʼebá. Ba ema hotu, sira sei laʼo ho sira ida-ida nia maromak nia naran, maibé ita, ba ita, ita sei laʼo iha Jeová ita-nia Maromak nia naran.”—Miq 4:1, 5.
18. Adorasaun loos ajuda ita atu troka buat saida deʼit?
18 Miquéias mós esplika kona-ba oinsá mak adorasaun neʼebé loos sei halo ema neʼebé uluk odi malu atu iha unidade. “[Ema husi] nasaun barak sei bá duni no dehan: ‘Mai, imi hotu, no mai ita saʼe ba Jeová nia foho no ba Jacob nia Maromak nia uma; no nia sei hanorin ita kona-ba nia dalan sira, no ita sei laʼo iha ninia dalan sira.’ . . No sira sei baku sira-nia surik sai ai-suak no sira-nia diman sai kateri ai-sanak nian. Sira sei la hiʼit surik, nasaun sei la hasoru nasaun, no sira mós sei la aprende tan funu.” (Miq 4:2, 3) Sira neʼebé husik tiha adorasaun ba maromak neʼebé ema mak halo ka ba nasaun hodi simu fali adorasaun ba Maromak Jeová haksolok tanba iha unidade ho maluk fiar-naʼin sira iha mundu tomak. Maromak hanorin sira atu laʼo iha dalan domin nian.
19. Tanba ema rihun ba rihun halaʼo adorasaun loos ho unidade, ida-neʼe hatudu ho klaru kona-ba saida?
19 Ohin loron iha mundu tomak ema kristaun loos iha unidade. Ida-neʼe buat neʼebé úniku no hatudu ho klaru katak Maromak Jeová kontinua atu dirije ninia povu liuhusi ninia espíritu santu. Iha ema nia istória ita seidauk haree katak ema husi nasaun hotu iha unidade hanesan neʼe. Buat furak neʼe kumpre profesia neʼebé temi iha Apokalipse 7:9, 14, no ida-neʼe hatudu katak lakleur tan Maromak nia anju sira sei husik “anin” neʼebé sei halakon mundu aat neʼe. (Lee Apokalipse 7:1-4, 9, 10, 14.) Entaun, ita hafolin duni oportunidade atu sai parte ba família kristaun iha mundu tomak neʼebé iha unidade ka lae? Saida mak ita ida-idak bele halo atu haburas unidade neʼe? Ita sei aprende kona-ba neʼe iha lisaun tuirmai.
Oinsá ita hatán?
• Oinsá mak adorasaun loos halo ema iha unidade?
• Oinsá mak ita bele hasees an husi laran-moras neʼebé bele estraga ita-nia unidade?
• Tanbasá mak nasionalizmu la haketak ema neʼebé halaʼo adorasaun loos?
[Pergunta estudu nian]
[Dezeñu iha pájina 13]
Ema kristaun iha apóstolu sira-nia tempu mai husi situasaun oioin
[Dezeñu iha pájina 15]
Oinsá mak serbisu atu harii ka tau matan ba Salaun Reinu bele haburas unidade?