Laran-manas iha Naʼi Jeová nia organizasaun

Esperiénsia husi Vernon Zubko

HAʼU sai boot iha knua ida naran Stenen, knua neʼe iha distritu Saskatchewan, iha rai-Kanadá. Haʼu-nia inan-aman, Fred no Adella, hakaʼas an atu tau matan no hanorin ami kona-ba Maromak Jeová. Toʼo ohin loron, haʼu, haʼu-nia biin Aurellia, no haʼu-nia alin seluk, Alvin, Allegra, no Daryl, agradese tebes ba sira-nia hakaʼas-an atu hanorin ami kona-ba lia-loos.

Haʼu-nia aman mak ema kristaun kose-mina ida, no nia laran-manas duni atu haklaken. Maski nia serbisu makaʼas atu hetan osan ba família nia presiza, maibé nia mós hakaʼas an atu halo ema hotu hatene katak nia mak Testemuña ida. Nia sempre koʼalia kona-ba lia-loos. Ninia brani no ninia laran-manas sei book haʼu-nia laran toʼo ohin loron. Dala barak nia hatete ba haʼu: “Kontinua laran-manas atu halo serbisu iha Maromak Jeová nia organizasaun no ó sei hasees an husi problema oioin.”

Dala barak ami halo serbisu haklaken iha estrada iha Stenen no iha knua balu seluk neʼebé besik ami. Ida-neʼe mak laʼós buat neʼebé fasil ba haʼu. Knua ida-idak sempre iha ema aat balu neʼebé hakbesik ami labarik sira no goza ami. Iha loron ida kuandu haʼu sei tinan ualu hela, haʼu hamriik iha estrada ninin ida ho livru The Watchtower no Awake! no ema joven lubun ida mai haleʼu haʼu. Sira hasai haʼu-nia xapeu foun husi haʼu-nia ulun no tau ida-neʼe iha ai-riin ida neʼebé besik haʼu. Haʼu agradese tebes tanba irmaun ida neʼebé tau matan ba haʼu haree buat neʼebé akontese. Nia hakbesik no husu: “Vern, iha problema ruma ka?” Ida-neʼe halo joven sira-neʼe halai namkari. Maski neʼe mak esperiénsia neʼebé aat, maibé ida-neʼe hanorin haʼu katak kuandu halo serbisu haklaken iha estrada, importante atu kontinua muda no labele hamriik metin hanesan ai-riin ida. Treinu sira hanesan neʼe neʼebé haʼu simu nuʼudar haʼu sai boot, halo haʼu sai aten-brani atu haklaken husi uma ba uma.

Haʼu hetan batizmu hamutuk ho Alvin iha fulan-Maiu 1951 kuandu haʼu tinan 13. Haʼu la haluha liafuan sira husi Irmaun Jack Nathan, neʼebé hatoʼo diskursu batizmu nian. * Nia fó laran-manas ba ami hotu atu la husik fulan ida liu leet deʼit hodi la koʼalia kona-ba Maromak Jeová. Ami-nia família sempre iha hanoin katak serbisu pioneiru mak serbisu neʼebé diʼak liu hotu atu halo. Tan neʼe depois haʼu ramata eskola iha tinan 1958, haʼu muda ba Winnipeg, Manitoba, atu serbí nuʼudar pioneiru. Maski haʼu-nia aman gosta atu haʼu serbisu hamutuk ho nia iha família nia kompañia atu halo kabeer ai sira, maibé nia no amá fó laran-manas mai haʼu atu serbí Maromak ba tempu-tomak. Tan neʼe sira apoia haʼu atu muda ba fatin seluk atubele serbí nuʼudar pioneiru.

Uma foun no kolega foun

Iha tinan 1959, sukursál konvida ema hotu neʼebé hakarak atu muda ba distritu Kebeke, iha  neʼebé presiza haklaken-naʼin barak tan. Tan neʼe haʼu bá atu serbí nuʼudar pioneiru iha sidade Montréal. Neʼe mudansa boot ba haʼu! Ida-neʼe la hanesan buat seluk neʼebé haʼu halo ona, tanba haʼu presiza aprende lia-fransés no tenke sai toman ho kultura neʼebé foun ba haʼu. Ami-nia katuas área nian hatete ba haʼu: “Nunka atu hatete, ‘Neʼe mak buat neʼebé ami halo iha ami-nia rai.’” Neʼe mak konsellu neʼebé diʼak tebes.—1 Kor 9:22, 23.

Haʼu la iha maluk pioneiru kuandu haʼu muda ba Kebeke. Maibé, irmán klosan ida naran Shirley Turcotte, neʼebé haʼu hasoru iha Winnipeg sai haʼu-nia belun ba nafatin kuandu ami kaben iha fulan-Fevereiru, tinan 1961. Nia mós sai boot iha família neʼebé hadomi Maromak Jeová. Husi tempu neʼebá toʼo agora nia sempre ajuda no fó laran-manas ba haʼu, no haʼu hafolin tebes nia.

Viajen haklaken nian iha Gaspé

Tinan rua depois ami-nia kazamentu, ami simu knaar atu serbí nuʼudar pioneiru espesiál iha Rimouski, Kebeke. Iha tinan tuirmai, sukursál husu ami atu halo viajen haklaken nian iha Gaspé, iha Kanadá nia parte leste. Ami-nia knaar mak atu kari fini lia-loos barak iha área neʼebá. (Ecle 11:6) Ami lori livru fulan-fulan nian hamutuk 1.000 no livru besik 400, no mós ami-nia hahán no roupa, no ami lori ami-nia karreta atu halo viajen haklaken nian ba fulan ida. Ami vizita knua kiʼik ida-idak iha Gaspé. Rádiu fó-hatene nanis katak Testemuña sira atu mai no sira fó avizu ba ema atu la simu ita-nia livru sira. Maibé ema barak komprende sala kona-ba avizu neʼe no sira hanoin katak ida-neʼe mak avizu atu simu livru neʼe, tan neʼe ema barak simu livru sira neʼebé ami fahe.

Iha tempu neʼebá, foin mak iha liberdade atu haklaken iha parte balu iha Kebeke, no dala ruma polísia hapara ami atu haklaken. Ida-neʼe akontese iha sidade ida neʼebé ema barak liu gosta atu simu ita-nia livru sira. Polísia ida husu ami atu tuir nia ba fatin polísia nian, no ami halo tuir. Lakleur haʼu komesa hatene katak advogadu ba sidade neʼe mak haruka atu hapara ami atu haklaken. Tanba iha loron neʼe xefe polísia nian la iha, haʼu fó ba advogadu neʼe surat husi sukursál iha Toronto neʼebé esplika kona-ba ita-nia direitu atu haklaken. Depois lee tiha surat neʼe, advogadu hatete: “Loloos, haʼu lakohi atu iha problema ho imi. Amlulik iha neʼe mak fó-hatene haʼu atu hapara imi.” Tanba ami hakarak ema hotu iha sidade neʼe hatene katak ami-nia serbisu mak laʼós serbisu neʼebé governu bandu, ami bá fali kedas área neʼebé polísia hapara ami no kontinua atu haklaken.

Loron tuirmai, ami bá fali atu hasoru xefe polísia nian, no nia sai hirus kuandu nia rona katak ema hapara ami atu haklaken. Nia telefone advogadu neʼe no hirus loos ho nia. Xefe polísia nian hatete ba ami katak se ami iha problema ruma, ami presiza telefone kedas nia no nia rasik sei rezolve situasaun neʼe. Maski ami mak ema foun iha área neʼe no ami seidauk koʼalia lia-fransés ho moos, maibé ema barak hatudu laran-diʼak ba ami. Dala barak ami hanoin: “Ema sira-neʼe sei simu lia-loos ka lae?” Tinan barak liutiha, ami hatene duni kona-ba neʼe kuandu ami filafali ba Gaspé atu harii Reuniaun-Fatin iha área oioin iha neʼebá. Ami kontente atu hatene katak ema barak neʼebé ami fó sasin, agora sai nuʼudar ita-nia maluk kristaun. Klaru katak Maromak Jeová mak ida neʼebé halo moris.—1 Kor 3:6, 7.

Ami simu liman-rohan ida

Ami-nia oan-feto Lisa moris iha tinan 1970. Nuʼudar liman-rohan husi Maromak Jeová, nia halo ami haksolok. Shirley no Lisa serbisu hamutuk ho haʼu atu harii Reuniaun-Fatin barak. Depois Lisa ramata ninia eskola, nia hatete: “Apá no amá, tanba haʼu halakon tiha ona imi-nia tempu barak atu serbí Maromak ba tempu-tomak, agora haʼu sei hakaʼas an atu selu fali hodi serbí nuʼudar pioneiru.” Tinan 20 liutiha, Lisa nafatin serbí nuʼudar pioneiru, maibé agora hamutuk ho nia laʼen Sylvain. Sira naʼin-rua agora iha knaar atu halo serbisu iha rai oioin atu harii uma neʼebé uza atu adora Maromak. Nuʼudar família, ami hakarak atu halaʼo moris neʼebé simples no halo ami-nia an prontu hodi Maromak Jeová bele uza ami iha ninia serbisu. Haʼu nunka haluha Lisa nia liafuan kuandu nia atu hahú serbí nuʼudar pioneiru. Tuir loloos, nia fó laran-manas ba haʼu  atu serbí fali nuʼudar pioneiru iha tinan 2001, no husi tempu neʼebá toʼo agora haʼu sei halo nuneʼe. Serbí nuʼudar pioneiru sempre ajuda haʼu atu tau fiar tomak ba Maromak Jeová iha buat hotu neʼebé haʼu halo no mós atu halaʼo moris neʼebé simples no kontente.

Presiza domin no laran-metin atubele halo serbisu atu harii uma

Buat neʼebé haʼu aprende husi Maromak Jeová mak se ita halo ita-nia an prontu no simu knaar naran deʼit neʼebé nia fó ba ita, ita sei hetan duni bensaun barak. Haʼu hafolin duni haʼu-nia knaar atu serbí iha komisaun neʼebé tau matan ba harii Reuniaun-Fatin sira no mós hola parte iha serbisu atu harii Reuniaun-Fatin hamutuk ho irmaun no irmán sira iha sidade Kebeke no iha fatin seluk.

Maski ema balu neʼebé halo serbisu voluntáriu neʼe karik la hatoʼo diskursu neʼebé furak, maibé kuandu harii Reuniaun-Fatin sira halo serbisu neʼebé furak loos. Ema sira-neʼe tau sira-nia laran tomak ba serbisu neʼebé sira halo, no ita bele haree sira-nia matenek atu halo buat ruma. Ikusmai ita bele haree uma kapás neʼebé bele uza atu adora Maromak Jeová.

Dala ruma ema husu haʼu: “Hahalok saida mak importante liu ba voluntáriu sira neʼebé halo serbisu atu harii Reuniaun-Fatin?” Husi haʼu-nia esperiénsia rasik haʼu bele hatete katak importante liu atu ema neʼe hadomi Maromak Jeová no ninia Oan, no mós hadomi ninia maluk kristaun. (1 Kor 16:14) Tuirmai, hahalok laran-metin mós importante. Dala ruma ema halo buat ruma la tuir buat neʼebé ita hakarak, maibé ema neʼebé laran-metin sei halo tuir nafatin matadalan husi Maromak nia organizasaun. No laran-metin bele mós book nia atu hola parte nafatin iha serbisu atu harii Reuniaun-Fatin iha futuru.

Haʼu agradese tebes ba Maromak Jeová

Maski haʼu-nia aman mate iha tinan 1985, maibé ninia konsellu kona-ba kontinua laran-manas atu halo serbisu iha Maromak Jeová nia organizasaun sei belit metin iha haʼu-nia neon. Hanesan ema seluk neʼebé simu ona sira-nia knaar iha Maromak Jeová nia organizasaun iha lalehan, haʼu fiar katak nia laran-manas nafatin atu halo serbisu iha neʼebá. (Apok 14:13) Haʼu-nia inan agora tinan 97 ona. Tanba nia kona moras isin-mate, nia la bele koʼalia ho moos hanesan tempu uluk, maibé nia hanoin-hetan eskritura sira. Nia temi eskritura sira iha ninia karta no nia fó laran-manas ba ami atu kontinua serbí Maromak Jeová ho laran-metin. Ami oan hotu agradese tebes tanba bele iha inan-aman neʼebé hadomi ami!

Haʼu mós agradese tebes ba Maromak Jeová tanba nia fó haʼu Shirley, haʼu-nia feen no belun neʼebé laran-metin. Nia sempre hanoin-hetan ninia inan nia konsellu neʼebé dehan: “Vernon sei iha serbisu barak atu halo iha Maromak nia organizasaun, no ó presiza aprende katak nia laʼós ó-nian deʼit.” Kuandu ami kaben tinan 49 liubá, ami deside katak ami sei sai ferik-katuas hamutuk hodi serbí Maromak Jeová no se karik ami hetan salvasaun iha mundu aat neʼe nia rohan, ami sei sai fali joven hamutuk no kontinua serbí Maromak nafatin. Sin, durante ami-nia moris ami hakaʼas an atu “badinas nafatin ba Naʼi nia serbisu”. (1 Kor 15:58) Maromak Jeová rasik tau matan duni ba ami no tan neʼe ami la falta buat ida.

[Nota–rodapé]

[Dezeñu iha pájina 31]

“Nuʼudar família, ami hakarak atu halaʼo moris neʼebé simples no halo ami-nia an prontu hodi Maromak Jeová bele uza ami iha ninia serbisu”