“Livru neʼe ajuda haʼu atu book ema nia laran”

PÔRTO ALEGRE mak sidade ida iha rai-Brazíl nia parte súl. Tempu balu liubá, iha sidade neʼe ema halaʼo reuniaun internasionál nian hodi koʼalia kona-ba problema neʼebé ema barak hasoru. Ema rihun ba rihun husi nasaun 135 mai hodi tuir reuniaun neʼe. Durante tempu deskansa, Testemuña balu husi kongregasaun ida iha Pôrto Alegre hakbesik ba bainaka sira-neʼe atu fahe mensajen Reinu nian husi Bíblia ba sira. Oinsá mak sira bele koʼalia ho bainaka sira-neʼe?

Pioneiru ida naran Elizabete hatete: “Ami uza livru kiʼik ho títulu Kabar Baik bagi Orang-Orang dari Segala Bangsa.” Nia hatutan tan dehan: “Bainaka barak seidauk rona lia-foun diʼak kona-ba Maromak nia Reinu, maibé sira simu ho diʼak ami-nia haklaken. Ami koʼalia ba ema husi Bolívia, Xina, Fransa, Índia, Izraél, no Nijéria. Ami mós iha livru iha bainaka balu nia língua, no sira kontente tebes atu simu livru sira-neʼe.”

Iha rai-Méxiku, pioneiru ida naran Raúl mós uza livru neʼe no ida-neʼe lori rezultadu diʼak. Tempu balu liubá, nia hakbesik ba mane Arabi ida neʼebé tinan 80 ona, mane neʼe nia feen foin mate. Kuandu mane neʼe lee tiha informasaun iha livru neʼe neʼebé koʼalia kona-ba Maromak nia Reinu iha lia-arabi, ninia matan-been tun tanba nia haksolok tebes. Tanbasá? Maromak nia promete kona-ba mate sei la iha tan, neʼebé hakerek iha Apokalipse 21:3, 4, kona duni nia laran, liuliu kuandu nia lee ida-neʼe iha ninia lia rasik. Iha tempu seluk, kuandu nia haklaken mesak, Raúl hasoru mane ida neʼebé koʼalia lia-portugés. Mane neʼe mós triste hela tanba nia oan-mane mate. Raúl hatudu ba nia informasaun iha livru neʼe neʼebé iha lia-portugés. Depois lee tiha informasaun neʼe, mane neʼe dehan katak nia hakarak atu hatene liután kona-ba Bíblia, no nia kontente atu hahú estuda Bíblia.

Raúl uza ona livru Kabar Baik bagi Orang-Orang dari Segala Bangsa atu haklaken ba ema neʼebé koʼalia lia-arméniu, xinés, inglés, fransés, alemaun, hindi, koreanu, mises, persa, rusu, no zapotekas. Nia hatete: “Haʼu haree katak importante duni atu uza livru neʼe iha haʼu-nia serbisu haklaken. Livru neʼe ajuda haʼu atu book ema nia laran maski haʼu la koʼalia sira-nia língua.”

Ohin loron, ema barak tebes laʼo ba rai seluk no hela iha neʼebá, tan neʼe ita iha oportunidade barak tan atu bele hasoru ema neʼebé koʼalia lian seluk. Hodi uza livru Kabar Baik bagi Orang-Orang dari Segala Bangsa ita bele fahe mensajen Reinu nian ba sira. Ita sempre lori livru neʼe hamutuk ho Ita ka lae?

[Dezeñu iha pájina 32]

Raúl uza livru kiʼik neʼebé ajuda nia atu bele book ema nia laran