Maromak nia haree kona-ba fó razaun

ADÃO dehan: “Feto neʼe, neʼebé Ita fó atu hamutuk ho haʼu, nia mak fó haʼu ai-fuan husi ai-hun neʼe no tan neʼe haʼu han.” Eva mós dehan: “Samea neʼe, nia lohi haʼu no tan neʼe haʼu han.” Liafuan sira-neʼe mak liafuan neʼebé ita-nia inan-aman primeiru hatete ba Maromak. Ida-neʼe mak dala primeiru ema fó razaun atu taka buat neʼebé sira halo, no hahalok hanesan neʼe kontinua toʼo ohin loron.—Gên 3:12, 13.

Hodi fó kastigu ba Adão no Eva, Maromak Jeová hatudu ho klaru katak nia la simu razaun neʼebé sira fó atu la halo tuir ninia lei. (Gên 3:16-19) Neʼe hatudu katak Maromak Jeová la simu razaun hotu neʼebé ema fó ka lae? Ka iha razaun balu neʼebé loos tuir Maromak nia haree? Se nuneʼe, oinsá mak ita bele hatene razaun neʼebé loos no la loos? Atu hatán, ulukliu mai ita koʼalia kona-ba tansá mak ema buka atu fó razaun.

Dala barak ema buka atu fó razaun hodi esplika tansá sira halo ka la halo buat ruma. Dala ruma ema fó razaun neʼebé loos kona-ba tansá nia la halo buat ruma, no ida-neʼe loke dalan atu hetan perdua. Maibé, hanesan Adão no Eva, ema mós fó razaun neʼebé la loos atu taka buat neʼebé loos. Ohin loron ema barak halo hanesan neʼe, tan neʼe baibain ema la fiar kuandu ema ruma fó razaun kona-ba buat neʼebé sira halo.

Kuandu ita fó razaun ruma, liuliu kona-ba ita-nia serbisu ba Maromak, ita tenke kuidadu atu la ‘bosok ita-nia an’ ho razaun falsu. (Tgo 1:22) Tan neʼe, mai ita hanoin kona-ba ezemplu balu iha Bíblia laran no mós matadalan sira neʼebé sei ajuda ita atu halo nafatin “buat neʼebé Naʼi hakarak”.—Ef 5:10.

Saida mak Maromak hakarak ita atu halo?

Iha Maromak nia Liafuan ita bele hetan ukun-fuan balu neʼebé Maromak Jeová nia atan sira presiza duni atu halo tuir. Porezemplu, Kristu haruka ita atu “bá hanorin nasaun hotu-hotu”. (Mt 28:19, 20) Ema kristaun loos ohin loron presiza halo tuir ida-neʼe. Sin, kumpre knaar neʼe mak importante tebes no tan neʼe apóstolu Paulo hatete: “Haʼu la haklaken evanjellu karik, susar boot mai haʼu!”—1 Kor 9:16.

Maski nuneʼe, ema balu neʼebé estuda Bíblia ba tempu kleur ona karik dada an atu la haklaken lia-foun diʼak kona-ba Maromak nia Reinu. (Mt 24:14) Ema seluk neʼebé haklaken ona ba tempu balu para atu halo ida-neʼe. Saida mak razaun balu neʼebé sira fó atu la hola parte iha serbisu haklaken? Iha tempu uluk, saida mak Maromak Jeová halo kuandu ema dada an atu la halo tuir buat neʼebé nia haruka?

Razaun neʼebé Maromak la simu

“Ida-neʼe susar liu.” Hola parte iha serbisu haklaken mak buat ida neʼebé susar ba ema balu, liuliu ba ema neʼebé moedór. Maibé, hanoin toʼok kona-ba buat neʼebé ita bele aprende husi Jonas. Maromak Jeová fó knaar ba Jonas neʼebé Jonas sente katak susar tebes atu halo, neʼe mak atu fó-hatene ba ema Níneve katak lakleur tan Maromak sei sobu sira-nia sidade. Ita komprende tansá mak Jonas sente katak knaar neʼe mak todan liu. Níneve mak sidade kapitál ba nasaun Asíria, no ema barak koñese sira nuʼudar ema aat neʼebé gosta halo violénsia. Karik Jonas hanoin: ‘Saida mak sei akontese ba haʼu? Sira sei halo saida ba haʼu?’  Tuirmai, nia halai ba fatin seluk. Maibé, Maromak Jeová la simu Jonas nia razaun atu la kumpre ninia knaar. Tan neʼe, dala ida tan Maromak Jeová haruka fali Jonas atu bá hodi haklaken ba ema Níneve sira. Iha tempu neʼe, Jonas ho aten-brani kumpre ninia knaar, no Maromak Jeová haraik bensaun ba ninia hakaʼas-an.—Jonas 1:1-3; 3:3, 4, 10.

Se Ita hanoin katak susar liu ba Ita atu halaʼo knaar hodi haklaken lia-foun diʼak, la haluha katak “ba Maromak buat hotu bele deʼit”. (Mc 10:27) Ita bele fiar katak Maromak Jeová sei fó forsa ba Ita kuandu Ita husu beibeik ninia ajuda no mós nia sei haraik bensaun ba Ita kuandu Ita hakaʼas an atu hatudu aten-brani hodi halaʼo Ita-nia knaar.—Lc 11:9-13.

“Haʼu lakohi atu halo ida-neʼe.” Saida mak Ita bele halo se Ita ladún iha hakarak atu halaʼo Ita-nia knaar kristaun nian? Hanoin-hetan katak Maromak Jeová bele book Ita-nia laran hodi iha hakarak atu halaʼo knaar ida-neʼe. Paulo hatete: “Maromak mak halo imi, laʼós deʼit atu hakarak, maibé mós atu halo duni buat neʼebé monu loos ba nia laran.” (Flp 2:13) Tan neʼe, Ita bele husu Maromak Jeová atu book Ita-nia laran hodi iha hakarak atu halo ninia serbisu. Liurai David mós husu ida-neʼe. Nia harohan ba Maromak Jeová: “Halo haʼu laʼo iha Ita-nia lia-loos.” (Sal 25:4, 5) Ita mós bele halo ida-neʼe hodi harohan ba Maromak Jeová atu nia bele book Ita-nia laran hodi iha hakarak atu halo buat neʼebé nia gosta.

Tuir loloos, dala ruma ita presiza obriga an atu tuir reuniaun kristaun sira no hola parte iha serbisu haklaken, liuliu kuandu ita kole ka sente laran-kraik. Maibé, ida-neʼe hatudu katak ita la hadomi Maromak Jeová ho laran ka lae? Lae duni. Maromak Jeová nia atan sira neʼebé laran-metin iha tempu uluk mós tenke hakaʼas an atu halo Maromak nia hakarak. Porezemplu, Paulo hatete katak nia tenke hakaʼas an atu ‘ukun ninia isin’ hodi nuneʼe nia bele halo tuir Maromak nia ukun-fuan sira. (1 Kor 9:26, 27) Entaun maski ita tenke obriga an atu halaʼo ita-nia knaar, maibé ita bele fiar katak Maromak Jeová sei haraik nia bensaun ba ita. Tanbasá? Tanba Maromak hatene katak ita obriga an atu halo nia hakarak tan ita-nia domin ba nia. Hodi halo nuneʼe, ita hatudu katak Satanás koʼalia bosok kuandu nia hatete katak Maromak nia atan sira sei la serbí tan Maromak iha tempu neʼebé susar.—Jó 2:4.

“Haʼu la iha tempu.” Ita tenke muda Ita-nia hanoin kona-ba buat neʼebé Ita haree mak importante liu iha Ita-nia moris, se Ita sente katak Ita la iha tempu atu hola parte iha serbisu haklaken. Jesus hatete: “Buka uluknanain Maromak nia reinu.” (Mt 6:33) Atu halo tuir matadalan ida-neʼe, karik Ita presiza halo simples liu Ita-nia moris, ka uza fali tempu ba atividade halimar nian atu halaʼo serbisu haklaken. Maski la sala atu halimar ka uza tempu atu halo buat neʼebé ita presiza, maibé buat sira-neʼe laʼós razaun atu ita la halaʼo Maromak nia serbisu. Sin, nuʼudar Maromak nia atan, Ita tau ulukliu Maromak nia Reinu iha Ita-nia moris.

“Haʼu-nia matenek la toʼo.” Karik Ita sente katak Ita-nia matenek la toʼo atu haklaken lia-foun diʼak. Iha tempu  Bíblia nian, Maromak Jeová nia atan balu neʼebé laran-metin mós sente katak sira-nia matenek la toʼo atu kumpre knaar neʼebé Maromak Jeová fó ba sira. Porezemplu hanoin toʼok kona-ba Moisés. Kuandu Moisés simu knaar husi Maromak Jeová, nia hatete: “Deskulpa, Naʼi Jeová, maibé haʼu laʼós ema neʼebé koʼalia moos, husi horisehik ka husi tempu uluk ka husi tempu neʼebé Ita koʼalia ba Ita atan, tanba haʼu-nia ibun-toos no nanál toos.” Maski Maromak Jeová promete atu ajuda Moisés, maibé nia hatete: “Deskulpa, Naʼi Jeová, maibé favór ida, haruka fali ema seluk neʼebé Ita hili.” (Êx 4:10-13) Saida mak Maromak Jeová halo?

Maski Moisés fó razaun hodi la halo knaar neʼe, maibé ida-neʼe la hapara Maromak Jeová atu nafatin haruka nia. Maromak Jeová mós hili Aarão atu apoia Moisés hodi kumpre knaar neʼe. (Êx 4:14-17) Durante tinan sira tuirmai, Maromak Jeová apoia Moisés no fó ba Moisés buat neʼebé nia presiza hodi bele kumpre knaar neʼebé nia simu husi Maromak. Ohin loron, Ita mós bele fiar katak Maromak Jeová sei book irmaun-irmán sira neʼebé iha esperiénsia atu ajuda Ita atubele kumpre Ita-nia knaar atu haklaken. Liután neʼe, liuhusi ninia Liafuan, Maromak Jeová promete ba ita katak nia sei fó matenek neʼebé ita presiza atubele kumpre serbisu neʼebé nia fó ba ita.—2 Kor 3:5; haree kaixa “Tempu neʼebé diʼak liu iha haʼu-nia moris.”

“Ema hakanek haʼu-nia laran.” Maluk kristaun balu lakohi tan atu haklaken no tuir reuniaun sira tanba maluk seluk hakanek sira-nia laran. Sira sente katak Maromak Jeová sei simu ida-neʼe nuʼudar razaun loos atu sira la halo tan sira-nia serbisu ba Maromak. Maski ita  sente laran-kanek duni kuandu ema hakanek ita-nia laran, maibé ida-neʼe mak razaun loos atu ita la hola parte tan iha atividade kristaun nian ka lae? Paulo no ninia maluk Barnabé karik sente laran-kanek duni depois tempu neʼebé sira “haksesuk malu makaʼas tebetebes”. (Apos 15:39) Maibé sira naʼin-rua husik ida-neʼe atu hapara sira atu halaʼo sira-nia serbisu ba Maromak ka lae? Lae duni!

Hanesan neʼe mós, kuandu Ita-nia maluk fiar-naʼin ida hakanek Ita-nia laran, diʼak atu hanoin-hetan katak loloos Ita-nia inimigu mak Satanás, laʼós Ita-nia maluk kristaun neʼebé sala-naʼin. Satanás buka atu han Ita, maibé nia sei la hetan susesu se Ita ‘tahan nia, hodi laran-metin ba Ita-nia fiar’. (1 Ped 5:8, 9; Gal 5:15) Se Ita iha fiar hanesan neʼe, Ita sei la “sidi” tanba razaun neʼebé la loos.—Rom 9:33.

Kuandu ita la bele halo buat barak

Husi razaun balu neʼebé ita koʼalia tiha ona, Bíblia hatudu ho klaru katak razaun neʼebé baibain ema fó laʼós razaun neʼebé loos atu la kumpre buat neʼebé Maromak Jeová haruka ita atu halo, inklui knaar atu haklaken lia-foun diʼak. Maski nuneʼe, karik ita iha duni razaun ruma kona-ba tansá ita la konsege atu halo buat barak iha Maromak nia serbisu. Porezemplu, ita-nia responsabilidade sira nuʼudar ema kristaun bele hamenus tempu neʼebé ita hakarak uza iha serbisu haklaken. No mós, dala ruma ita kole liu ka moras tebes, tan neʼe ita la bele halo buat barak iha Maromak Jeová nia serbisu. Maibé, Maromak nia Liafuan hatudu ho klaru katak Maromak Jeová hatene ita-nia hakarak iha laran, no nia hatene buat neʼebé ita bele ka la bele halo.—Sal 103:14; 2 Kor 8:12.

Tan neʼe, importante atu la tesi lia ba ita-nia an ka ba ema seluk kona-ba buat sira-neʼe. Apóstolu Paulo hakerek: “Basá imi sé atu tesi lia ba ema seluk nia atan? Iha nia naʼi nia oin mak nia hamriik ka monu.” (Rom 14:4) Duké kompara ita-nia situasaun ho ema seluk nian, diʼak atu ita hanoin-hetan katak “ita ida-ida sei hatán kona-ba nia an ba Maromak”. (Rom 14:12; Gal 6:4, 5) Kuandu ita hakbesik ba Maromak Jeová iha orasaun no fó-hatene ita-nia razaun sira ba nia, mai ita ida-idak halo ida-neʼe “ho laran moos”.—Ebr 13:18.

Tanbasá mak serbí Naʼi Jeová fó ita ksolok?

Maski ita hotu nia situasaun moris nian la hanesan, maibé ita bele serbí Maromak Jeová ho laran-ksolok tanba buat neʼebé nia husu ita atu halo la susar liu atu kumpre. Tanbasá mak ida-neʼe loos?

Maromak nia Liafuan hatete: “Keta tahan netik buat neʼebé diʼak ba sira neʼebé merese atu simu, kuandu ó iha kbiit atu halo nuneʼe.” (Prov 3:27) Husi eskritura neʼe, saida mak ita aprende kona-ba buat neʼebé Maromak husu ita atu halo? Maromak Jeová hatene Ita-nia situasaun no hatene Ita-nia kbiit, no nia la kompara Ita ho Ita-nia irmaun-irmán seluk. Maromak hakarak atu ita serbí nia tuir ita-nia “kbiit” neʼebé ita iha. Sin, maski ita iha kbiit ka ladún iha kbiit, ita ida-idak bele duni serbí Maromak Jeová ho laran tomak.—Lc 10:27; Kol 3:23.

[Kaixa/Dezeñu iha pájina 14]

“Tempu neʼebé diʼak liu iha haʼu-nia moris”

Maski ita iha problema saúde nian, diʼak atu la husik buat sira-neʼe halo ita hanoin katak ita la bele hola parte iha serbisu haklaken ho laran tomak. Atu komprende kona-ba neʼe, mai ita hanoin kona-ba buat neʼebé akontese ba irmaun ida iha rai-Kanadá naran Ernest.

Ernest koʼalia la moos tanba karik nia hasan-toos no nia mós moedór. Depois nia hetan asidente neʼebé estraga nia kotuk, nia tenke husik serbisu konstrusaun nian. Maski nia aleijadu, maibé ninia situasaun foun neʼe fó nia oportunidade atu uza tempu barak liután iha serbisu haklaken. Diskursu ida iha reuniaun kona-ba serbí nuʼudar pioneiru estra kona loos nia laran. Maibé, nia sente katak nia forsa la toʼo atu halo serbisu ida-neʼe.

Atu prova ba nia an katak nia la bele halo serbisu neʼe, nia aplika atu serbí nuʼudar pioneiru estra ba fulan ida. Nia hakfodak loos kuandu ikusmai nia bele kumpre duni ninia serbisu neʼe ho susesu. Tuirmai nia hanoin: ‘Haʼu nunka bele halo fali ida-neʼe.’ Nia koko atu prova ida-neʼe hodi aplika fali ba fulan ida tan. Fulan neʼe mós nia kumpre ninia serbisu neʼe ho susesu.

Ernest serbí nuʼudar pioneiru estra ba tinan ida, no depois neʼe nia hatete ba nia an: “Haʼu hatene duni katak haʼu sei nunka bele serbí nuʼudar pioneiru regulár.” Dala ida tan nia hakarak koko atu prova ba nia an kona-ba neʼe, entaun nia aplika atu serbí nuʼudar pioneiru regulár. Nia kontente tebes kuandu nia bele kumpre ninia serbisu nuʼudar pioneiru regulár ba tinan primeiru. Nia deside atu kontinua atu halo serbisu neʼe no nia haksolok hodi serbí nuʼudar pioneiru regulár ba tinan rua, toʼo ikusmai nia lakon nia moris tanba ninia saúde sai aat liu. Maibé, antes nia mate, nia ho matan-been sempre hatete ba ema neʼebé vizita nia, hodi dehan: “Tinan sira neʼebé haʼu serbí Maromak Jeová nuʼudar pioneiru mak tempu neʼebé diʼak liu iha haʼu-nia moris.”

[Dezeñu iha pájina 13]

Ita bele haksoit liu buat naran deʼit neʼebé bele hanetik ita atu haklaken

[Dezeñu iha pájina 15]

Maromak Jeová kontente kuandu ita serbí nia ho laran tomak hodi halo buat neʼebé ita bele tuir ita-nia situasaun