Maromak Jeová rona ema kbiit-laek nia halerik atu husu ajuda

LIURAI matenek ida iha rai-Izraél antigu, naran Salomão, hatete: “Tempu no akontesimentu neʼebé mosu derrepente deʼit monu ba [ita] hotu.” (Ecle 9:11) Kuandu mosu terus ka akontesimentu neʼebé aat, ida-neʼe bele hamosu susar boot ba ita-nia moris. Porezemplu, se ema ida iha ita-nia família mate derrepente deʼit, ida-neʼe bele halo ita-nia laran sente kanek duni. Iha semana ka fulan sira tuirmai, karik ita sente laran-tun tebes no karik ita mós sente katak ita la iha hakarak atu hasoru moris loroloron nian. Iha situasaun hanesan neʼe, ema mós bele sai bilán toʼo sira sente katak sira la merese atu hakbesik ba Maromak Jeová iha orasaun.

Ema neʼebé hasoru situasaun neʼe, presiza ema seluk atu fó laran-manas no hatudu domin ba sira. Iha livru Salmos, David hatete: “Naʼi Jeová fó apoia ba sira hotu neʼebé monu, no nia sei foti saʼe sira hotu neʼebé laran-kraik.” (Sal 145:14) Bíblia mós hatete katak “[Jeová nia] matan hateke bá-mai iha rai hotu atu hatudu ninia forsa atu ajuda sira neʼebé fó sira-nia laran tomak ba nia”. (2 Crôn 16:9) Sin, Maromak “hamutuk . . . ho ema neʼebé laran-kanek no laran-kraik, atu hametin ema kbiit-laek nia laran no atu kura ema nia laran neʼebé kanek”. (Isa 57:15) Oinsá mak Maromak Jeová fó apoia ba sira neʼebé laran-kanek, no hametin sira neʼebé laran-kraik?

‘Liafuan ida iha tempu loos’

Dalan ida neʼebé Maromak Jeová fó apoia iha tempu neʼebé loos mak liuhusi maluk kristaun sira. Maromak fó konsellu ba ema kristaun hotu atu “tau matan ba sira neʼebé kbiit-laek”. (1 Tes 5:14, 15) Liafuan neʼebé ita-nia maluk sira hatoʼo hodi hatudu katak sira hanoin no hadomi ita, ida-neʼe bele hametin ita durante tempu neʼebé ita sente laran-tun no triste. Maski koʼalia ba tempu uitoan deʼit, maibé liafuan neʼebé diʼak bele fó kmaan fali ba ema neʼebé laran-kraik. Liafuan diʼak sira-neʼe karik mai husi ema neʼebé hasoru ona susar neʼebé hanesan. Ka karik ida-neʼe mai husi ita-nia belun neʼebé iha esperiénsia barak ona kona-ba situasaun oioin. Sin, liuhusi maluk kristaun sira, Maromak Jeová bele hametin ema neʼebé laran-kraik.

Hanoin toʼok kona-ba katuas kristaun ida naran Alex neʼebé foin kaben. Derrepente deʼit ninia feen mate tanba moras boot neʼebé la bele kura. Katuas área nian ida hatudu domin hodi koʼalia no hametin Alex. Irmaun neʼe mós nia feen mate ona, maibé nia kaben fali. Nia konta kona-ba tempu neʼebé nia laran-triste tebes. Maski nia sente kmaan kuandu nia ba haklaken hamutuk ho ema seluk no mós kuandu tuir reuniaun sira, maibé kuandu nia tama ba  ninia kuartu no taka odamatan, nia sente mesamesak fali. Alex hatete: “Haʼu sente kmaan loos atu hatene katak buat neʼebé haʼu sente mak buat neʼebé ema seluk mós sente no hasoru.” Klaru katak “liafuan ida iha tempu neʼebé loos” bele fó kmaan ba ema durante tempu susar.—Prov 15:23.

Katuas kristaun ida tan, neʼebé koʼalia ona ho ema barak neʼebé faluk, mós hatoʼo liafuan neʼebé fó laran-manas ba Alex. Ho domin, irmaun neʼe fó-hanoin ba Alex katak Maromak Jeová hatene kona-ba buat neʼebé nia sente no presiza. Irmaun neʼe hatete: “Iha fulan ka tinan sira tuirmai, se ó sente katak ó presiza duni ema ida atu sai ó-nia belun hodi ó la sente mesamesak tan, Maromak Jeová ho domin fó lisensa atu kaben fali.” Klaru katak, laʼós ema hotu neʼebé faluk ona bele kaben fali, maski sira hakarak atu halo nuneʼe. Maibé, hodi hanoin kona-ba irmaun neʼe nia liafuan, Alex hatete: “Kuandu haʼu hanoin kona-ba kaben fali iha futuru haʼu sente katak haʼu la hatudu laran-metin ba haʼu-nia feen neʼebé mate ona ka ba Maromak Jeová neʼebé halo arranju kaben nian. Maibé hodi fó-hanoin haʼu katak Maromak Jeová fó lisensa atu kaben fali, ida-neʼe halo haʼu sente kmaan duni.”—1 Kor 7:8, 9, 39.

Iha livru Salmos, David, neʼebé mós hasoru susar barak hakerek: “Naʼi Jeová nia matan haree ba ema loos sira, no nia see tilun hodi rona ba sira-nia halerik atu husu ajuda.” (Sal 34:15) Sin, ita bele fiar katak Maromak Jeová rona ema laran-kraik nia halerik no iha tempu loloos nia sei ajuda sira liuhusi maluk kristaun neʼebé koʼalia liafuan sira ho domin. Arranju neʼe mak diʼak tebes no iha folin boot.

Hetan ajuda liuhusi reuniaun kristaun

Dala ruma ema neʼebé sente laran-kraik bele hanoin buat oioin no hakarak atu mesamesak deʼit. Maibé, Provérbios 18:1 fó avizu: “Ema neʼebé hakarak mesamesak sei buka nia rasik nia hakarak deʼit; nia sei kontra hasoru matenek neʼebé loos.” Alex hatete: “Kuandu ema ida nia kaben mate, nia neon sai nakonu ho hanoin oioin.” Alex hanoin-hetan tempu neʼebé nia husu ba nia an: “‘Kuandu haʼu-nia feen moris hela, haʼu mak laʼen neʼebé la diʼak karik? Karik haʼu tenke hatudu domin liután ba nia, ka hanoin nia liután?’ Kuandu nia mate ona,  haʼu lakohi atu moris mesak. Haʼu lakohi atu moris nuʼudar ema faluk. Susar tebes ba haʼu atu halakon hanoin sira-neʼe, tanba loron-loron haʼu sempre haree buat barak neʼebé fó-hanoin haʼu katak agora haʼu moris mesak.”

Ema neʼebé laran-kanek presiza duni atu ransu malu ho ema neʼebé diʼak. Ita bele hetan kolega neʼebé diʼak iha reuniaun kristaun sira. No mós, iha reuniaun sira-neʼe ita bele halo nakonu ita-nia neon ho hanoin neʼebé loos husi Maromak, no ida-neʼe bele hametin ita.

Reuniaun kristaun sira ajuda ita atu iha hanoin neʼebé loos kona-ba situasaun neʼebé ita hasoru. Hodi rona no hanoin kleʼan kona-ba eskritura husi Bíblia, ita sei hanoin liuliu kona-ba buat neʼebé importante liu, neʼe mak apoia Maromak nia direitu atu ukun no halo santu Maromak nia naran. Liután neʼe, kuandu ita simu hanorin iha reuniaun sira kona-ba Maromak Jeová, ita sei hetan laran-manas hodi hatene katak maski ema seluk karik la hatene susar hotu neʼebé ita hasoru, maibé Maromak Jeová komprende no hatene buat neʼebé ita sente. Nia hatene katak “laran neʼebé kanek mak hamosu laran-kraik”. (Prov 15:13) Sin, hodi hatene katak Maromak neʼebé loos hakarak atu ajuda ita, ida-neʼe bele fó laran-manas no forsa mai ita atu kontinua laʼo ba oin.—Sal 27:14.

Kuandu Liurai David hetan susar boot husi nia inimigu, nia halerik ba Maromak: “Haʼu lakon ona haʼu-nia aten-brani; haʼu-nia laran la sente tan ona buat ida.” (Sal 143:4) Sin, susar neʼebé ita hasoru bele halakon forsa no halo ita sente laran-tun tebes, karik ida-neʼe bele halo ita-nia laran la sente tan ona buat ida. Maski ita hasoru susar oioin hanesan sai moras ka sai aleijadu, maibé ita bele fiar duni katak Maromak Jeová sei ajuda ita atu tahan hasoru susar sira-neʼe. (Sal 41:1-3) Ita hatene katak ohin loron Maromak la halo milagre atu kura ita, maibé nia fó matenek no forsa ba ema neʼebé hetan susar atubele tahan hasoru situasaun hotu. Keta haluha katak kuandu David hasoru susar sira neʼebé nia sente todan liu, nia hanoin no halo orasaun ba Maromak Jeová. Iha livru Salmos, nia kanta: “Haʼu hanoin fali kona-ba loron sira husi tempu uluk; haʼu hanoin kleʼan kona-ba Ita-nia hahalok hotu; ho hakarak rasik haʼu hanoin kona-ba serbisu neʼebé Ita halo ho Ita-nia liman.”—Sal 143:5.

Maromak Jeová haleno ema atu hakerek liafuan hanesan neʼe iha Bíblia atu hatudu katak nia loloos komprende buat neʼebé ita sente. Liafuan sira-neʼe hametin ita-nia fiar katak Maromak rona ita-nia halerik. Se ita aproveita Maromak Jeová nia ajuda, ‘nia rasik sei apoia ita’.—Sal 55:22.

“Hamulak beibeik”

Tiago 4:8 hatete: “Hakbesik ba Maromak, no nia sei hakbesik imi.” Dalan ida atu hakbesik ba Maromak mak liuhusi orasaun. Apóstolu Paulo fó-hanoin mai ita atu “hamulak beibeik”. (1 Tes 5:17) Maski susar ba ita atu fó sai buat neʼebé ita sente, “maibé espíritu rasik [sei] harohan” ba ita. (Rom 8:26, 27) Sin, Maromak Jeová komprende buat hotu neʼebé ita sente.

Irmán ida naran Monika hatete: “Liuhusi orasaun, lee Bíblia, no estuda mesak, neʼe halo haʼu sente katak Maromak Jeová sai nuʼudar haʼu-nia belun neʼebé besik liu. Haʼu sempre sente katak nia tau matan ba haʼu iha haʼu-nia moris loroloron nian. Haʼu sente kmaan tanba hatene katak maski dala ruma susar ba haʼu atu fó sai buat neʼebé haʼu sente, maibé nia loloos komprende haʼu. Haʼu hatene katak ninia laran-diʼak no ninia bensaun la iha rohan.”

Tan neʼe, mai ita hafolin liafuan sira neʼebé ita-nia maluk kristaun sira ho domin hatoʼo ba ita. No mós mai ita halo tuir konsellu diʼak husi reuniaun kristaun sira neʼebé hametin ita-nia fiar, no la haluha atu fó sai buat hotu neʼebé ita sente ba Maromak Jeová liuhusi orasaun. Sin, liuhusi buat sira-neʼe Maromak Jeová hatudu katak nia hanoin no tau matan ba ita. Husi Alex nia esperiénsia rasik, nia hatete: “Se ita hakaʼas an atu aproveita ho diʼak buat hotu neʼebé Maromak Jeová fó mai ita hodi ita bele iha relasaun neʼebé metin ho nia, ita sei simu duni ‘kbiit makaʼas’ atu tahan susar oioin neʼebé ita hasoru.”—2 Kor 4:7.

[Kaixa/Dezeñu iha pájina 18]

Liafuan diʼak ba ema kbiit-laek

Livru Salmos nakonu ho liafuan sira neʼebé hatudu sai buat neʼebé ema sente. No mós livru neʼe dala barak fó sai katak Maromak Jeová rona duni ba ema kbiit-laek sira-nia halerik. Hanoin toʼok kona-ba eskritura balu tuirmai neʼe:

“Iha haʼu-nia susar, haʼu kontinua bolu Naʼi Jeová, no ba haʼu-nia Maromak haʼu kontinua bolu atu husu ajuda. Husi ninia templu nia rona haʼu-nia lian, no haʼu-nia halerik iha ninia oin atu hetan ajuda toʼo ona ninia tilun.”—Sal 18:6.

“Jeová sei besik ba ema neʼebé sente susar iha laran, no salva ema neʼebé laran-kraik.”—Sal 34:18.

“Nia [Jeová] kura ema neʼebé laran-kanek, no nia falun sira-nia kanek sira.”—Sal 147:3.

[Dezeñu iha pájina 17]

“Liafuan ida iha tempu neʼebé loos” bele duni ajuda ita iha tempu susar!