Naʼi Jeová mak ita-nia ukun-naʼin boot liu!
Naʼi Jeová mak ita-nia ukun-naʼin boot liu!
“Haʼu halo Naʼi Jeová, Ukun-Naʼin Boot Liu, sai haʼu-nia fatin protesaun.”—SAL 73:28.
1. Saida mak Paulo hatudu husi ninia liafuan neʼebé hakerek iha 1 Korinto 7:31?
APÓSTOLU PAULO hatete: “Mundu neʼe nia situasaun muda beibeik.” (1 Kor 7:31, MF) Sin, iha eskritura neʼe, Paulo kompara mundu neʼe ho plataforma neʼebé ema uza atu halo drama. Drama neʼe iha situasaun sira neʼebé muda beibeik, no atór sira-neʼebé iha parte nuʼudar ema diʼak no ema aat tama sai plataforma tuir drama nia situasaun oioin.
2, 3. (a) Ita bele kompara drama kona-ba Maromak Jeová nia direitu atu ukun ho situasaun saida? (b) Pergunta saida deʼit mak ita sei haree hamutuk?
2 Ohin loron, iha drama ida neʼebé importante tebes neʼebé halaʼo daudauk, no ita hotu mós hola parte iha drama neʼe! Liuliu drama neʼe kona-ba Maromak Jeová loloos iha duni direitu atu ukun ka lae. Drama neʼe nia istória hanesan ho situasaun neʼebé karik bele mosu iha nasaun ruma. Iha parte ida, governu neʼebé harii tuir lei, halaʼo sira-nia ukun ho didiʼak. Maibé, iha parte seluk, iha mós organizasaun aat neʼebé la tuir lei no kontra governu nia ukun. Organizasaun aat neʼe koko atu ukun povu tomak ho lia-bosok, violénsia, no mós oho ema; no povu tenke hili sé mak sira sei halo tuir no apoia.
3 Tuir loloos, situasaun hanesan neʼe akontese iha dalan neʼebé boot liu. Iha duni governu ida neʼebé tuir lei iha direitu atu ukun buat hotu, governu neʼe mak “Naʼi Jeová, Ukun-Naʼin Boot Liu” nian. (Sal 71:5) Maibé, iha mós organizasaun ida neʼebé nia ulun mak “aat-naʼin” no koko atu ukun ema hotu. (1 Joao 5:19) Organizasaun neʼe kontra Maromak nia governu neʼebé loloos iha direitu atu ukun no mós koko governu neʼe nia povu sira-nia laran-metin. Oinsá mak situasaun neʼe mosu? Tanbasá mak Maromak husik ida-neʼe? Saida mak ita ida-idak bele halo kona-ba situasaun neʼe?
Drama neʼebé halaʼo daudauk
4. Drama neʼebé halaʼo daudauk neʼe, kona buat rua saida?
4 Drama neʼebé halaʼo daudauk neʼe envolve buat rua neʼebé kona malu. Buat rua neʼe mak: Maromak Jeová nia direitu atu ukun no mós ema nia laran-metin. Bíblia dala barak bolu Maromak Jeová nuʼudar “Ukun-Naʼin Boot Liu”. Porezemplu, ema neʼebé hakerek salmu ida kanta ho fiar-metin ba Maromak, dehan: “Haʼu halo Naʼi Jeová, Ukun-Naʼin Boot Liu, sai haʼu-nia fatin protesaun.” (Sal 73:28) Liafuan “Ukun-Naʼin Boot Liu” hatudu katak Maromak deʼit mak iha kbiit boot liu no iha pozisaun neʼebé aas liu no iha direitu atu ukun buat hotu. Ita iha razaun diʼak barak atu haree Maromak Jeová nuʼudar Ida neʼebé Aas Liu Hotu.—Dan 7:22.
5. Tanbasá mak ita hakarak apoia Maromak Jeová nia direitu atu ukun?
5 Nuʼudar Kriadór, Maromak Jeová mak Ukun-Naʼin neʼebé Boot Liu iha lalehan no rai. (Lee Apokalipse 4:11.) Maromak Jeová mak ita-nia Tesi-Lia Naʼin, Ida neʼebé Fó Ukun-Fuan, no Liurai. (Isa 33:22) Tanbasá mak ita tenke hakruʼuk an ba nia nuʼudar ita-nia Ukun-Naʼin Boot Liu? Tanba ita-nia moris mai husi Maromak no atu ita bele kontinua moris, neʼe mós depende ba Maromak. Hodi sempre hanoin-hetan katak “Jeová rasik mak halo metin ninia kadunan iha lalehan; no ninia ukun rasik mak ukun buat hotu”, ida-neʼe bele ajuda Ita atu nafatin apoia Maromak nia pozisaun neʼebé aas liu.—Sal 103:19; Apos 4:24.
6. Iha Bíblia liafuan neʼebé tradús nuʼudar “laran-metin”, katak sá?
6 Atu apoia Maromak Jeová nia direitu atu ukun, ita tenke nafatin laran-metin ba nia. Iha Bíblia liafuan neʼebé tradús nuʼudar “laran-metin” katak sala-laek, ka kompletu. Ema neʼebé laran-metin halo hahalok loos no sala-laek. Job mak fiar-naʼin ida neʼebé hatudu laran-metin hanesan neʼe.—Jó 1:1.
Oinsá mak drama neʼe hahú?
7, 8. Oinsá mak Satanás hasaʼe dúvida kona-ba Maromak Jeová nia direitu atu ukun?
7 Maizumenus tinan 6.000 liubá, anju ida hasaʼe dúvida kona-ba Maromak Jeová nia direitu atu ukun. Nia halo ida-neʼe tanba nia kaan adorasaun neʼebé Maromak simu husi kriatura sira. Anju neʼe lohi ema primeiru, Adão no Eva, atu la laran-metin tan ba Maromak nia ukun no mós nia koko atu hafoʼer Maromak Jeová nia naran hodi hatete katak Maromak bosok-teen. (Lee Gênesis 3:1-5. *) Anju aat neʼe, sai nuʼudar Maromak nia Inimigu Boot, neʼebé bolu Satanás (Kontradór), Diabu (Ida neʼebé habelar lia-bosok kona-ba ema seluk), samea (lohidór), no samea boot (ida neʼebé buka atu han Maromak nia atan sira).—Apok 12:9.
8 Satanás halo nia an rasik sai ukun-naʼin neʼebé buka atu hadau Maromak nia ukun. Saida mak Maromak Jeová halo kona-ba situasaun neʼe? Nia deside atu halakon kedas Satanás, Adão, no Eva, kontra-naʼin tolu neʼe ka lae? Klaru katak Maromak iha kbiit atu halo nuneʼe. No, se nia halo nuneʼe, ida-neʼe sei hatudu kedas katak nia mak iha kbiit boot liu hotu. No mós, ida-neʼe sei hatudu katak Maromak Jeová laʼós bosok-teen tanba sira neʼebé kontra nia ukun-fuan mate duni hodi tuir buat neʼebé nia hatete ona. Entaun, tanbasá mak Maromak la halo nuneʼe?
9. Satanás hasaʼe dúvida kona-ba saida?
9 Kuandu Satanás bosok no halo Adão no Eva kontra Maromak, nia hasaʼe dúvida kona-ba se Maromak iha direitu atu haruka ema atu halo tuir ninia ukun-fuan hotu ka lae. Liután neʼe, hodi halo ema primeiru la halo tuir Maromak, Satanás mós hasaʼe dúvida kona-ba kriatura matenek hotu nia laran-metin. Iha istória husi Job, neʼebé laran-metin ba Maromak Jeová nia ukun, Satanás hatete katak nia bele halo ema hotu kontra Maromak.—Jó 2:1-5.
10. Tanbasá mak Maromak hein no la uza nia kbiit atu halakon kedas Satanás?
10 Maromak Jeová hein no la uza nia kbiit kedas atu halakon Satanás, no ida-neʼe fó tempu ba Satanás atu hatudu se lia neʼebé nia hasaʼe mak loos ka lae. Maromak mós fó oportunidade ba ema atu hatudu sira-nia laran-metin ba ninia direitu atu ukun. Nuʼudar tempu laʼo ba daudauk, saida mak akontese? Satanás harii tiha organizasaun boot neʼebé aat. Maski nuneʼe, ikusmai Maromak Jeová sei halakon Diabu no nia organizasaun, no ida-neʼe sei hatudu ho klaru tebes katak Maromak deʼit mak iha direitu atu ukun. Maromak Jeová hatene duni katak ida-neʼe sei sai loos, no nia fó-hatene nanis kona-ba neʼe iha Eden kuandu ninia kriatura naʼin-tolu kontra nia.—Gên 3:15.
11. Saida mak fiar-naʼin barak halo ona?
11 Ema barak hatudu ona laran-metin ba Maromak Jeová hodi fiar katak Nia sei halo santu Nia naran no sei hatudu katak Nia iha duni direitu atu ukun. Ema sira-neʼe inklui Abel, Enoc, Noé, Abraão, Sara, Moisés, Rute, David, Jesus, sira neʼebé halo tuir Kristu iha tempu uluk, no mós ema rihun ba rihun neʼebé laran-metin ohin loron. Fiar-naʼin sira neʼebé laran-metin ba Maromak nia ukun hola parte atu halo santu Maromak Jeová nia naran hodi hatudu katak Satanás mak bosok-teen neʼebé foti-an. Sira hatudu katak Diabu koʼalia bosok kuandu nia ho gaba-an hatete katak nia bele halo ema hotu kontra Maromak.—Prov 27:11.
Ita hatene drama neʼe nia rohan
12. Tanbasá mak ita fiar katak Maromak sei la husik buat aat atu kontinua ba nafatin?
12 Ita bele fiar katak lakleur tan Maromak Jeová sei loloos ukun buat hotu, tanba nia sei la husik buat aat laʼo ba nafatin. Tuir loloos, ita hatene katak agora mak loron ikus sira. Iha tempu uluk, Naʼi Jeová halakon ema aat iha tempu Rai-Nabeen. Nia halakon sidade Sodoma no Gomorra no Faraó hamutuk ho ninia tropa sira. Sísera hamutuk ho nia tropa no Senaquerib ho tropa Asíria, la iha kbiit atu kontra Ida neʼebé Aas Liu Hotu. (Gên 7:1, 23; 19:24, 25; Êx 14:30, 31; Juíz 4:15, 16; 2 Reis 19:35, 36) Nuneʼe, ita bele fiar duni katak Maromak Jeová sei la husik ema no anju aat sira atu nafatin hafoʼer nia naran no haterus nia Testemuña sira. Liután neʼe, agora daudauk ita haree buat barak neʼebé hatudu katak Jesus ukun ona no katak mundu neʼe nia rohan besik ona.—Mt 24:3.
13. Oinsá mak ita bele hetan salvasaun bainhira Maromak Jeová halakon ninia inimigu sira?
13 Atu ita hetan salvasaun kuandu Maromak halakon ninia inimigu sira, ita tenke hatudu katak ita laran-metin ba Maromak Jeová nia ukun. Oinsá mak ita bele halo nuneʼe? Ita tenke haketak an husi Satanás nia ukun neʼebé aat no nunka husik ninia ema sira obriga ita atu halo buat neʼebé la loos. (Isa 52:11; Joao 17:16; Apos 5:29) Hodi halo nuneʼe deʼit mak ita bele apoia Maromak nia direitu atu ukun; no hanesan neʼe deʼit mak ita bele iha esperansa atu hetan salvasaun bainhira Maromak Jeová halo moos nia naran no hatudu katak nia mak Ukun-Naʼin Boot Liu.
14. Parte oioin iha Bíblia laran konta no esplika kona-ba saida deʼit?
14 Bíblia esplika kona-ba ema nia laran-metin no Maromak Jeová nia ukun. Iha kapítulu tolu primeiru konta kona-ba kriasaun no oinsá ema monu ba sala, no iha kapítulu tolu ikus konta kona-ba oinsá ema nia situasaun sei sai diʼak fali. Parte seluk husi Bíblia esplika kona-ba buat sira neʼebé Naʼi Jeová, Ukun-Naʼin Boot Liu, halo atu ninia hakarak ba ema, anju, mundu, no lalehan sei sai loos. Livru Gênesis konta kona-ba oinsá mak Satanás no buat aat sira mosu iha mundu, no parte ikus husi livru Apokalipse konta kona-ba oinsá Maromak sei halakon buat aat no Diabu, no oinsá Maromak nia hakarak sei sai loos iha rai nuʼudar iha lalehan. Loos duni, Bíblia esplika tansá mak sala no mate mosu no oinsá buat sira-neʼe sei lakon husi mundu, no mós oinsá mundu nia situasaun sei muda hodi sai nakonu fali ho ksolok no moris ba nafatin ba ema sira neʼebé laran-metin.
15. Saida mak ita presiza halo atubele simu bensaun kuandu drama neʼe ramata?
15 Lakleur tan mundu nia situasaun sei troka fali. Drama neʼebé komesa tinan atus ba atus liubá kona-ba Maromak nia direitu atu ukun sei ramata. Satanás sei la mosu iha plataforma, maibé nia sei hein toʼo tempu neʼebé nia sei lakon ba nafatin. No Maromak nia hakarak sei sai loos duni. Maibé, atu ita simu bensaun sira neʼebé Maromak nia Liafuan fó-hatene nanis, agora kedas ita tenke hatudu katak ita apoia Maromak nia direitu atu ukun. Ita labele tuur deʼit iha klaran. Atu ita bele hatete, “Jeová hamutuk ho haʼu”, ita tenke hamutuk ho Maromak Jeová hodi apoia nia.—Sal 118:6, 7.
Ita bele laran-metin nafatin!
16. Tanbasá mak ita bele fiar katak ita bele duni laran-metin nafatin ba Maromak?
16 Ita bele duni apoia Maromak Jeová nia ukun no nafatin laran-metin, tanba apóstolu Paulo hatete: “Imi hetan tentasaun neʼebé ema seluk mós hetan ona. Maibé Maromak mak laran-metin, no nia sei la husik imi hasoru tentasaun neʼebé imi la bele tahan; maibé kuandu imi hasoru tentasaun neʼe, nia sei fó dalan ba imi atu sai hodi imi bele tahan hasoru tentasaun neʼe.” (1 Kor 10:13, MF) Oinsá mak tentasaun neʼebé Paulo temi bele mosu? Oinsá mak Maromak bele halo dalan sai nian ba ita?
17-19. (a) Ema Izraél monu ba tentasaun saida iha rai-fuik maran? (b) Saida mak bele ajuda ita atu nafatin laran-metin ba Maromak Jeová?
17 Nasaun Izraél nia esperiénsia iha rai-fuik maran hatudu katak “tentasaun” mosu kuandu ita hasoru situasaun neʼebé bele book ita atu kontra Maromak nia ukun-fuan. (Lee 1 Korinto 10:6-8, 10.) Tuir loloos, ema Izraél bele hamriik metin hasoru tentasaun. Maibé kuandu Maromak Jeová halo milagre hodi haruka manu-fuik atu sira bele iha naʼan ba fulan ida, sira “buka buat aat sira”. Iha tempu neʼebá povu seidauk han naʼan ba tempu balu, maibé sira la hamlaha tanba Maromak fó maná ba sira atu han. Maski nuneʼe, sira monu ba tentasaun tanba sira sai kaan-teen kuandu sira halibur manu-fuik sira-neʼe.—Núm 11:19, 20, 31-35.
18 Molok neʼe, kuandu Moisés iha hela Foho Sinai nia leten atu simu Ukun-Fuan husi Maromak, ema Izraél adora estátua karau-oan no buka hakarak aat isin nian. Tan sira-nia ulun-naʼin la iha, sira husik sira-nia an monu ba tentasaun. (Êx 32:1, 6) Lakleur antes sira tama ba rai neʼebé Maromak promete ona, mane Izraél barak monu ba tentasaun atu halo sala-foʼer ho feto Moab sira. Iha tempu neʼe, ema Izraél rihun ba rihun mate tanba sira-nia sala rasik. (Núm 25:1, 9) Dala balu, ema Izraél monu ba tentasaun atu muramura kontra ulun-naʼin sira. Dala ida, sira la muramura kontra Moisés deʼit, maibé sira mós muramura hasoru Maromak rasik! (Núm 21:5) Laʼós neʼe deʼit, dala ida tan sira muramura tanba Corá, Datan, Abiram, no sira-nia maluk sira neʼebé hetan kastigu-mate. Sira hatete katak kastigu neʼe la justisa. Tanba neʼe Maromak fó malisan neʼebé halo ema naʼin-14.700 mate.—Núm 16:41, 49.
19 Tentasaun sira-neʼe hotu la todan liu toʼo ema Izraél la bele tahan. Sira rasik rende an ba tentasaun tanba sira lakon sira-nia fiar no haluha Maromak Jeová, oinsá nia tau matan ba sira, no ninia matadalan sira neʼebé loos. Hanesan mós ema Izraél, ita hasoru tentasaun sira neʼebé ema seluk mós hetan. Se ita hakaʼas an atu hamriik metin no sadere ba Maromak, ita bele laran-metin nafatin. Ita bele fiar ida-neʼe tanba “Maromak mak laran-metin” no nia sei la husik ita ‘hasoru tentasaun neʼebé ita la bele tahan’. Maromak Jeová nunka husik ita, maibé nia nafatin tau matan ba ita. Nia nunka husik ita tama ba situasaun iha neʼebé ita la bele duni halo tuir ninia hakarak.—Sal 94:14.
20, 21. Kuandu ita hasoru tentasaun, oinsá mak Maromak ‘fó dalan ba ita atu sai’?
20 Maromak Jeová ‘fó dalan ba ita atu sai’ hodi hametin ita atu tahan hasoru tentasaun. Porezemplu, ema neʼebé fó terus mai ita karik baku ita hodi ita bele nega ita-nia fiar. Situasaun neʼe bele tenta ita atu nega ita-nia fiar hodi nuneʼe ita la bele hetan tan baku ka karik mate. Maibé, ita hatene husi Paulo nia liafuan neʼebé hakerek iha 1 Korinto 10:13, katak situasaun neʼebé hamosu tentasaun neʼe sei la kontinua ba nafatin. Maromak Jeová sei nunka husik situasaun neʼe sai todan liu toʼo ita la bele tan hatudu laran-metin ba nia. Maromak bele hametin ita-nia fiar no ita-nia hakarak atu serbí nia hodi ita bele nafatin laran-metin.
21 Maromak Jeová hametin ita liuhusi ninia espíritu santu. Espíritu neʼe halo ita hanoin-hetan hanorin no istória husi Bíblia neʼebé bele hametin ita hodi ita bele tahan tentasaun. (Joao 14:26) Nuneʼe, ita la fiar lia-bosok ida neʼebé lori ita atu halo tuir dalan neʼebé sala. Porezemplu, ita hatene katak ita-nia laran-metin kona lia neʼebé Satanás hasaʼe kona-ba Maromak Jeová nia direitu atu ukun. Maromak nia atan barak hatene kona-ba neʼe, no sira hetan apoia husi Maromak atu hatudu laran-metin toʼo mate. Maibé laʼós mate mak sai nuʼudar dalan ba sira atu sai husi tentasaun; Maromak Jeová nia ajuda mak fó kbiit ba sira atu tahan toʼo rohan no la monu ba tentasaun. Nia mós bele fó ba ita kbiit atu tahan. Tuir loloos, nia mós uza ninia anju sira neʼebé fiar-metin atu ajuda hodi “serbí, ba sira neʼebé atu simu maksoin nuʼudar sira-nia liman-rohan”. (Ebr 1:14) Hanesan ita sei estuda iha lisaun tuirmai, ema neʼebé laran-metin deʼit mak iha esperansa furak atu bele apoia Maromak nia ukun ba nafatin. Ita mós bele hola parte ho sira se ita kaer metin ba Maromak Jeová nuʼudar ita-nia Ukun-Naʼin neʼebé Boot Liu.
[Nota–rodapé]
^ par. 7 Gênesis 3:1: “Kona-ba samea, nia mak kuidadu liu fali animál fuik sira seluk iha rai neʼebé Maromak Jeová halo ona. No samea komesa koʼalia ba feto neʼe dehan: ‘Maromak hatete katak imi labele han ai-fuan husi ai-hun hotu-hotu iha jardín laran, neʼe tebes duni ka lae?’ 2 Feto neʼe hatete ba samea: ‘Ai-fuan husi ai-hun iha jardín ami bele han. 3 Maibé kona-ba han ai-fuan husi ai-hun neʼebé iha jardín klaran, Maromak hatete, “Imi labele han ai-fuan husi ai-hun neʼe, labele, imi labele book ai-hun neʼe hodi imi la mate.”’ 4 Samea hatete ba feto neʼe: ‘Imi sei la mate. 5 Maromak hatene katak iha loron neʼebé imi han ai-fuan husi ai-hun ida-neʼe, imi-nia matan sei nakloke no imi sei sai hanesan Maromak hodi hatene diʼak no aat.’”
Oinsá ita hatán?
• Tanbasá mak ita tenke rekoñese Maromak Jeová nuʼudar ita-nia Ukun-Naʼin Boot Liu?
• Nafatin laran-metin ba Maromak katak sá?
• Oinsá mak ita hatene katak lakleur tan Maromak Jeová sei ukun buat hotu?
• Tuir 1 Korinto 10:13, tanbasá mak ita bele duni nafatin laran-metin ba Maromak Jeová?
[Pergunta estudu nian]
[Dezeñu iha pájina 24]
Satanás lohi Adão no Eva atu la laran-metin ba Maromak Jeová
[Dezeñu iha pájina 26]
Halo desizaun agora atu apoia Maromak Jeová nia direitu atu ukun