‘Nia hahalok diʼak laʼo hamutuk ho nia’

THEODORE JARACZ, neʼebé serbí iha Grupu Administradór husi Testemuña ba Jeová, ramata ninia moris iha rai, iha loron-kuarta dadeer, 9 Juñu 2010. Nia tinan 84, no nia husik hela ninia feen, Melita, neʼebé kaben ona ho nia ba tinan 53. Nia mós husik hela ninia biin ida, sobriñu ida no sobriña rua.

Irmaun Jaracz moris iha loron 28 Setembru 1925, iha Pike County, Kentucky, iha Estadus Unidus. Nia hetan batizmu iha 10 Agostu 1941 kuandu nia tinan 15. Tinan rua tuirmai, kuandu nia tinan 17 ona, nia hahú serbí nuʼudar pioneiru regulár, no nia kontinua serbí Maromak tempu-tomak maizumenus ba tinan 67.

Iha tinan 1946, kuandu nia tinan 20 hela, irmaun Jaracz tuir eskola Watchtower Bible School of Gilead neʼebé halaʼo ona ba dala hitu. Depois eskola neʼe ramata, irmaun Jaracz hetan knaar atu serbí nuʼudar katuas neʼebé vizita kongregasaun sira iha Cleveland, Ohio, Estadus Unidus. Iha tinan 1951, nia hetan knaar atu tau matan ba serbisu iha sukursál Austrália. Iha Buku Kegiatan Saksi-Saksi Yehuwa 1983 esplika katak irmaun Jaracz “laran-manas atu halo tuir matadalan husi Maromak nia organizasaun no hatudu ezemplu diʼak kona-ba haklaken. Ida-neʼe fó laran-manas duni ba irmaun sira iha rai ida-neʼe”.

Depois fila tiha ba Estadus Unidus, irmaun Jaracz kaben ho Melita Lasko iha 10 Dezembru 1956. Depois kaben tiha sira komesa kedas halo serbisu atu vizita kongregasaun sira. Sira ho laran-manas vizita área barak iha Estadus Unidus. Iha tinan 1974 nia rohan, irmaun Jaracz hetan konvite atu serbí iha Grupu Administradór husi Testemuña ba Jeová.

Ita sei hanoin-hetan irmaun Jaracz nuʼudar Maromak Jeová nia atan neʼebé laran-metin no ho laran tomak halo Maromak nia serbisu. Nia mak laʼen neʼebé hadomi no tau matan ba ninia família. Nia mós hafolin ninia relasaun ho Maromak no sempre tau uluk ema seluk nia diʼak duké ninian. (1 Kor 13:4, 5) Klaru katak nia hanoin ema seluk nia diʼak tanba nia hakaʼas an atu la haree ema ida diʼak liu ema seluk no nia mós hatudu laran-sadiʼa. Liután neʼe, nia hatudu ninia domin ba ema hodi ho laran-manas hola parte iha serbisu haklaken.

Maski ita triste tanba lakon ema ida neʼebé família Betel no irmaun-irmán hotu hadomi, maibé ita haksolok tanba irmaun Jaracz serbí Maromak Jeová ho laran-metin ba tinan barak. Ita fiar duni katak nia ‘laran-metin toʼo mate, no simu tiha ona koroa moris nian’. (Apok 2:10) Ita mós fiar katak ‘nia hahalok diʼak laʼo hamutuk ho nia’.—Apok 14:13.