Pergunta husi lee-naʼin

“Imi sai diʼak loos bá, hanesan imi-nia Aman iha lalehan diʼak loos.” Oinsá mak ema sala-naʼin bele sai “diʼak loos”, ka perfeitu?—Mt 5:48.

Atu hatán pergunta neʼe, ulukliu ita presiza hatene oinsá Bíblia uza liafuan “diʼak loos”. Liafuan neʼebé Bíblia Tetun tradús nuʼudar “diʼak loos”, dala barak iha arti “perfeitu”. Maski nuneʼe, kuandu Bíblia temi katak ema ka buat ruma mak perfeitu, dala ruma neʼe la dehan katak sira la falta ona buat ida ka sira sala-laek. Tuir loloos, Aman Jeová deʼit mak ida neʼebé perfeitu loos. Liafuan sira iha Eskritura Lia-Ebraiku no Eskritura Lia-Gregu neʼebé iha arti “perfeitu”, baibain dehan katak buat ruma ka ema ruma mak “kompletu”, ka “sala-laek” hodi kumpre kritériu ruma husi ema ka husi Maromak. Baibain, ita mós uza liafuan perfeitu hanesan neʼe. Porezemplu, ema baibain dehan: “Nia halo knaar neʼe ho perfeitu.”

Maromak kria Adão no Eva ho hanoin no isin neʼebé perfeitu, no bele iha relasaun neʼebé diʼak loos ho Maromak. Sira perfeitu tuir kritériu husi sira-nia Kriadór. Maibé kuandu sira la halo tuir, sira la kumpre ona ninia kritériu, nuneʼe sira no sira-nia bei-oan la perfeitu ona. Entaun, tanba Adão nia sala, ema hotu sai la perfeitu no mate.—Rom 5:12.

Maibé, iha Jesus nia diskursu iha foho, nia esplika katak ema neʼebé sala-naʼin bele haree nuʼudar ema perfeitu tanba sira kumpre kritériu ruma. Iha diskursu neʼe, Jesus esplika kritériu kona-ba domin neʼebé perfeitu, ka kompletu. Domin neʼebé Maromak hatudu ba ema hotu mak ezemplu husi domin neʼebé perfeitu. Jesus hatete: “Hadomi imi-nia funu-balun sira, harohan ba sira neʼebé hanehan imi, atu imi sai imi Aman iha lalehan nia oan sira. Basá nia halo loron saʼe ba ema aat no ba ema diʼak, halo mós udan-been tun ba ema laran loos no ba ema laran laloos.” (Mt 5:44, 45) Hodi hatudu domin hanesan neʼe, Jesus nia dixípulu sira banati-tuir Maromak nia ezemplu neʼebé perfeitu kona-ba hatudu domin.

Ohin loron, Testemuña ba Jeová iha mundu tomak hakaʼas an atu halo tuir Maromak nia kritériu kona-ba hadomi ema seluk. Sira hakarak duni atu ajuda ema husi situasaun oioin, rasa, no relijiaun oioin atu hatene lia-loos husi Bíblia. Testemuña sira iha rai 236, halaʼo estudu Bíblia ho ema naʼin-7.000.000 liu.

Jesus hatete: “Basá imi hadomi karik ema neʼebé hadomi imi, imi sei simu kolen neʼebé? Publikanu sira mós halo nuneʼe. Imi kumprimenta deʼit imi-nia maun-alin sira, imi halo buat foun saida? Ema jentiu sira mós la halo hanesan neʼe?” (Mt 5:46, 47) Ema kristaun loos la fihir ema seluk tan deʼit sira-nia matenek ka sira-nia situasaun moris nian. No mós, ema kristaun loos la hatudu deʼit domin ba ema neʼebé bele hatudu fali domin ba sira. Maibé, sira ajuda ema kiak ka moras, joven ka ferik-katuas. Hodi halo nuneʼe, ema kristaun bele banati-tuir Maromak Jeová nia domin, no tan neʼe ita bele dehan katak sira hatudu domin neʼebé perfeitu ka diʼak loos.

Ita sei bele moris perfeitu hanesan ho Adão antes nia halo sala ka lae? Sin, bele. Hodi hatudu fiar ba Jesus nia sakrifísiu, ema neʼebé halo tuir Maromak sei sai perfeitu fali durante Kristu nia Ukun ba Tinan Rihun Ida, bainhira ‘Maromak nia Oan halakon buat neʼebé Diabu halo tiha’.—1 Joao 3:8.