Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

• Ema kristaun primeiru uza Maromak nia naran ka lae?

Sin. Ita bele fiar katak ema kristaun primeiru lee Maromak nia naran iha sira-nia tradusaun husi Eskritura iha lia-ebraiku no mós iha sira-nia kópia husi Eskritura iha lia-gregu.—1/10, pájina 6.

• Caim nia feen husi neʼebé?

Caim nia feen mak Eva nia oan ka bei-oan. Eva iha “oan-mane no oan-feto sira”. (Gên 5:4)—1/10, pájina 9.

• Sé mak anju neʼebé Maromak haruka atu laʼo iha ema Izraél nia oin kuandu nia lori sira sai husi Ejitu? (Êx 23:20, 21)

Ita bele fiar katak anju neʼe, neʼebé iha ‘Maromak Jeová nia naran iha nia laran’, mak Maromak nia Oan-Mane boot, neʼebé ikusmai ema bolu nuʼudar Jesus.—15/9, pájina 21.

• Tansá mak Jesus la fó apoiu ba partidu polítiku ida?

Jesus la fó apoiu ba parte ida tanba nia halo tuir Bíblia nia matadalan sira. Porezemplu, nia hatene katak “ema ukun ema toʼo nia hetan susar”, no katak “mundu tomak sei iha aat-naʼin nia ukun”. (Ecle 8:9; 1 Joao 5:19)—1/10, pájina 22.

• Ema fó razaun saida deʼit, neʼebé Maromak la simu, hodi la halaʼo sira-nia serbisu iha adorasaun neʼebé loos?

‘Ida-neʼe susar liu. Haʼu lakohi atu halo ida-neʼe. Haʼu la iha tempu. Haʼu-nia matenek la toʼo. Ema hakanek haʼu-nia laran.’ Razaun sira-neʼe laʼós razaun neʼebé loos atu ita la halaʼo ita-nia serbisu ba Maromak.—15/10, pájina 12-15.

• Ita bele halo saida deʼit hodi reuniaun sira sai fatin neʼebé hametin ita no ita-nia maluk?

Prepara nanis. Tuir beibeik. Toʼo sedu. Lori buat neʼebé Ita presiza. Tau atensaun nafatin. Hola parte. Fó komentáriu neʼebé badak. Kumpre Ita-nia knaar. Gaba sira neʼebé hola parte iha reuniaun. Ransu malu ho irmaun-irmán sira antes no depois reuniaun.—15/10, 22.

• Ba sé loos mak presiza konfesa sala?

Maromak la fó kbiit ba ema ida atu perdua sala neʼebé kontra nia; Maromak deʼit mak bele fó perdua. (1 Joao 1:9) Tanba Maromak deʼit mak bele fó perdua, ita tenke konfesa sala ba nia. (Apos 3:19)—1/10, pájina 27.

• Saida mak ita bele aprende husi Aarão nia ezemplu kona-ba halo tuir deʼit maluk sira-nia hakarak?

Kuandu Moisés iha foho leten, ema Izraél sira hakaʼas Aarão atu halo maromak ida ba sira. Aarão monu ba sala neʼe no nia halo tuir deʼit. Ida-neʼe hatudu katak laʼós joven sira deʼit mak hetan tentasaun husi sira-nia kolega. Ema boot neʼebé hakarak atu halo buat neʼebé loos mós bele hetan tentasaun hanesan neʼe. Ita presiza duni hamriik metin nafatin.—15/11, pájina 8.

• Bíblia hanorin katak mundu sei lakon ka lae?

Lae. Bíblia hatete: “[Maromak] halo tiha rai iha fatin neʼebé metin; neʼebé sei la nakdoko toʼo tempu neʼebé la bele sura, ka ba nafatin.” (Sal 104:5)—1/10, pájina 29.