“Ohin mak tempu diʼak”
“Ohin mak tempu diʼak”
“Haree bá, ohin mak tempu diʼak neʼe; haree bá, ohin mak loron maksoin.”—2 KOR 6:2.
1. Tanbasá mak ita presiza hatene kona-ba serbisu importante liu atu halo?
“KONA-BA buat hotu-hotu iha nia tempu, no iha tempu neʼebé loos ba buat hotu-hotu neʼebé akontese iha lalehan okos.” (Ecle 3:1) Iha-neʼe Salomão dehan katak importante atu hatene tempu neʼebé loos ba buat oioin neʼebé ita halo hanesan tempu atu halo toʼos, halo viajen, fila-liman, ka tempu atu koʼalia ba ema seluk. Maski nuneʼe, ita presiza hatene kona-ba serbisu neʼebé importante liu atu halo, hodi nuneʼe ita bele hatene oinsá atu uza ita-nia tempu ho matenek.
2. Kuandu Jesus haklaken iha rai, saida mak hatudu katak nia hatene didiʼak tempu neʼebé nia iha atu kumpre ninia knaar?
2 Kuandu Jesus sei iha rai, nia hatene didiʼak saida mak nia knaar no tempu hira mak nia iha atu kumpre ninia knaar. Jesus hatene didiʼak kona-ba buat neʼebé importante liu no nia rekoñese katak tempu ba liafuan hotu neʼebé profeta sira fó-hatene nanis kona-ba Mesias besik kumpre ona. (1 Ped 1:11; Apok 19:10, MF) Nia iha knaar atu halo ema hatene katak nia mak Mesias. Nia mós tenke haklaken ba ema barak lia-loos kona-ba Maromak nia Ukun no atu halibur sira neʼebé sei hola parte atu ukun hamutuk ho nia iha ninia governu. Nia fó treinu ba sira neʼebé sei sai parte ba kongregasaun kristaun atu sira bele kontinua haklaken no hanorin toʼo mundu nia rohan.—Mc 1:15.
3. Hodi hatene kona-ba tempu no knaar, oinsá mak ida-neʼe book Jesus nia hahalok?
3 Tanba Jesus komprende didiʼak ninia knaar no tempu neʼebé nia iha atu halo knaar neʼe, ida-neʼe book nia atu laran-manas atu kumpre ninia Aman nia hakarak. Nia hatete ba nia dixípulu sira: “Toʼos boot duni, maibé serbisu-naʼin sira uitoan deʼit. Tan neʼe, husu toʼos-naʼin bá atu haruka serbisu-naʼin sira ba nia toʼos.” (Lc 10:2; Mal 4:5, 6) Jesus hili ema naʼin-12 no tuirmai ema naʼin-70, nia fó sira matadalan kona-ba oinsá atu haklaken, no haruka sira bá hodi fahe mensajen importante ida-neʼe: “Reinu lalehan besik ona.” Tuirmai Bíblia dehan kona-ba Jesus: “Hanorin tiha nia eskolante naʼin sanulu-resin-rua, Jesus sai husi neʼebá atu bá hanorin no haklaken iha sira-nia sidade sira.”—Mt 10:5-7; 11:1; Lc 10:1.
4. Iha dalan saida mak Paulo halo tuir Jesus Kristu?
4 Jesus hatudu ezemplu neʼebé diʼak tebes ba ninia dixípulu sira kona-ba serbí Maromak ho laran-metin no laran-manas. Apóstolu Paulo mós koʼalia kona-ba ezemplu neʼe kuandu nia hatete ba nia maluk fiar-naʼin hodi dehan: “Imi buka halo tuir haʼu-nia hahalok, nuʼudar haʼu halo tuir Kristu.” (1 Kor 11:1) Iha dalan saida mak Paulo halo tuir Kristu? Dalan neʼebé importante liu mak nia hakaʼas an atu haklaken lia-foun diʼak. Iha Paulo nia karta ba kongregasaun sira, dala barak nia uza liafuan hanesan “keta baruk”, “serbí Naʼi bá”, “badinas nafatin ba Naʼi nia serbisu”, no “buat hotu neʼebé imi halo, halo ho laran”. (Rom 12:11; 1 Kor 15:58; Kol 3:23) Paulo nunka haluha tempu neʼebé nia hasoru Naʼi Jesus Kristu iha dalan ba Damasku no Jesus nia liafuan neʼebé karik dixípulu Ananias hatoʼo ba nia: “Ema neʼe hanesan matadalan neʼebé haʼu fihir atu lori haʼu-nia naran ba ema jentiu sira, ba liurai sira no Israel nia oan sira.”—Apos 9:15; Rom 1:1, 5; Gal 1:16.
“Ohin mak tempu diʼak”
5. Saida mak book Paulo atu halaʼo serbisu haklaken ho laran-manas?
5 Kuandu ita lee livru Apostolu, ita bele haree ho klaru katak Paulo hatudu aten-brani no laran-manas atu halaʼo ninia serbisu haklaken. (Apos 13:9, 10; 17:16, 17; 18:5) Paulo hatene katak nia moris iha tempu neʼebé importante no tan neʼe nia dehan: “Haree bá, ohin mak tempu diʼak neʼe; haree bá, ohin mak loron maksoin.” (2 Kor 6:2) Tinan 537 molok Kristu mak tempu diʼak ba ema Izraél atu fila husi Babilónia ba sira-nia rai. (Isa 49:8, 9) Maibé Paulo nia liafuan kona-ba “tempu diʼak” katak sá? Liafuan seluk neʼebé Paulo hakerek iha karta neʼe sei ajuda ita atu hatene Paulo nia liafuan neʼe.
6, 7. Ohin loron, ema kristaun kose-mina hetan knaar espesiál saida? Sé mak apoia ema kose-mina?
6 Iha kapítulu 5, Paulo koʼalia kona-ba knaar espesiál neʼebé nia no ninia maluk kose-mina sira simu. (Lee 2 Korinto 5:18-20.) Nia hatete katak Maromak hili sira atu halo “knaar hadame malu nian” hodi husu ema atu “hadame malu ho Maromak”. Neʼe katak ajuda ema atu iha relasaun diʼak fali ho Maromak.
7 Husi tempu neʼebé Adão no Eva kontra Maromak, ema hotu ketak ona no dook husi Maromak Jeová. (Rom 3:10, 23) Tan neʼe, ema hotu hela iha nakukun laran, no rezultadu mak terus no mate. Paulo hakerek: “Ita hatene katak ohin neʼe mós mundu tomak hakilar tanis hanesan feto neʼebé atu tuur ahi.” (Rom 8:22) Maibé Maromak rasik halo ona buat ruma atu ajuda ema no nia “husu” ema atu hadame malu ho nia. Nia entrega knaar ba Paulo no ninia maluk kristaun kose-mina iha tempu neʼebá atu ajuda ema atu hadame malu ho Maromak. No ida-neʼe mak “tempu diʼak” tanba neʼe “loron maksoin” ba sira neʼebé tau fiar ba Jesus. Ohin loron, ema kristaun kose-mina hotu no sira-nia maluk “bibi seluk” neʼebé apoia sira, halo serbisu hodi konvida ema hotu atu simu bensaun iha “tempu diʼak neʼe”.—Joao 10:16.
8. Saida mak halo lia-menon hadame malu nian sai buat neʼebé kapás tebes?
8 Tuir loloos, iha jardín Eden ema primeiru hakotu relasaun ho Maromak kuandu sira kontra nia, no ida-nee hanesan sira halo kotu ona ponte ida neʼebé liga ema ho Maromak. Maibé, buat neʼebé kapás mak Maromak rasik sai ulukliu atu hadiʼa fali ponte neʼe. (1 Joao 4:10, 19) Saida mak nia halo? Paulo esplika kona-ba neʼe hodi dehan: “Maromak hadame mundu ba nia an husi Kristu, hodi la sura ema sira-nia sala hasoru sira, maibé saran tiha mai ami lia-menon hadame malu nian.”—2 Kor 5:19; Isa 55:6.
9. Saida mak Paulo halo atu hatudu katak nia hafolin Maromak nia laran-sadiʼa?
9 Hodi fó Jesus nuʼudar sakrifísiu, Maromak Jeová loke dalan ba ema neʼebé hatudu fiar ba nia atu bele hetan perdua husi sira-nia sala no atu iha relasaun diʼak fali ho nia. Liután neʼe, Maromak haruka ninia manu-ain sira atu husu ema husi fatin oioin atu hadame malu fali ho nia bainhira tempu sei iha. (Lee 1 Timoteo 2:3-6.) Tanba Paulo komprende kona-ba Maromak nia hakarak no komprende kona-ba tempu neʼebé nia moris, nia hakaʼas an makaʼas atu halo “knaar hadame malu nian”. Maromak nia hakarak seidauk troka. Maromak sei lolo liman ba ema hodi sira bele hadame malu fali ho nia. Paulo nia liafuan kona-ba “ohin mak tempu diʼak neʼe” no “ohin mak loron maksoin” sei loos hela iha ita-nia tempu. Sin, klaru katak Jeová mak Maromak neʼebé hatudu laran-sadiʼa no domin boot ba ema!—Êx 34:6, 7.
Keta “simu Maromak nia grasa leet deʼit”
10. Saida mak ema kose-mina sira halo iha tempu uluk no agora tanba sira hela iha “loron maksoin”?
10 Ema neʼebé simu uluk bensaun atu hadame malu ho Maromak mak sira neʼebé “hela iha Kristu”. (2 Kor 5:17, 18) Sira-nia “loron maksoin” nian hahú iha Pentekostes 33. Husi tempu neʼe, ema sira-neʼe hetan knaar atu fó sai “lia-menon hadame malu nian”. Ohin loron, restu husi ema kristaun kose-mina sira sei nafatin halo “knaar hadame malu nian”. Sira komprende katak anju haat neʼebé apóstolu João haree iha ninia vizaun sei kaer hela “anin haat raiklaran nian atu labele huu ba rai”. Tan neʼe, ohin loron mós “loron maksoin” no “tempu diʼak”. (Apok 7:1-3) Tan razaun neʼe, maizumenus hahú husi tinan 1900, restu husi ema kose-mina sira komesa ho laran-manas halo “knaar hadame malu nian” toʼo rai nia rohan.
11, 12. Oinsá mak ema kristaun kose-mina sira neʼebé hela iha 1900 hatudu katak sira komprende kona-ba tempu? (Haree dezeñu iha pájina 15.)
11 Porezemplu, livru Saksi-Saksi Yehuwa Pemberita Kerajaan Allah esplika katak maizumenus besik tinan 1900 “C. T. Russell no ninia maluk sira fiar katak sira moris iha tempu koʼa nian no katak ema presiza rona lia-loos neʼebé halo sira livre”. Ida-neʼe book irmaun sira atu halo saida? Tanba hatene katak sira moris iha tempu koʼa nian ka “tempu diʼak”, irmaun sira sente katak la toʼo atu konvida deʼit ema atu tuir reuniaun relijiaun nian. Ulun-naʼin relijiaun kristaun falsu sira mós halo nuneʼe ba tempu kleur ona. Duké halo nuneʼe, ema kristaun kose-mina sira buka dalan oioin atu bele habelar lia-foun diʼak ba ema barak. Ida-neʼe inklui uza teknolojia neʼebé iha hodi aumenta sira-nia serbisu.
12 Atu habelar lia-foun diʼak kona-ba Maromak nia Ukun, ema-lubun kiʼik neʼe hatudu laran-manas hodi uza tratu sira no livru oioin. Sira prepara diskursu no informasaun neʼebé hatama iha jornál rihun ba rihun. Sira halo programa kona-ba Bíblia iha rádiu sira iha rai barak. Sira mós halo filme ho lian, antes ema barak haree filme sira hanesan neʼe. Sira-nia laran-manas lori rezultadu saida? Ohin loron, ema naʼin-7.000.000 liu simu tiha lia-foun diʼak no hamutuk ho sira atu habelar mensajen kona-ba “hadame malu ho Maromak”. Klaru katak, Maromak Jeová nia atan sira neʼebé serbí iha tempu neʼebá mak hatudu ezemplu diʼak kona-ba laran-manas maski sira la barak no la iha esperiénsia.
13. Maromak nia hakarak saida mak ita presiza hanoin didiʼak?
13 Paulo nia liafuan “ohin mak tempu diʼak” sei loos hela ohin loron. Ita hotu neʼebé simu ona Maromak Jeová nia laran-diʼak neʼebé nakonu ho domin agradese tebes katak Maromak fó ita oportunidade atu rona no simu mensajen dame malu nian. Entaun duké kontente deʼit ho ida-neʼe, diʼak atu ita hanoin didiʼak kona-ba Paulo nia liafuan tuirmai neʼebé dehan: “Ami husu imi makaʼas atu labele simu Maromak nia grasa leet deʼit.” (2 Kor 6:1) Maromak hatudu “grasa” ka laran-diʼak neʼebé nakonu ho domin tanba nia hakarak atu “hadame mundu ba nia an” liuhusi Kristu.—2 Kor 5:19.
14. Ema iha rai barak hetan oportunidade saida?
14 Satanás halo ema barak matan-delek kona-ba lia-loos, sira mós sei dook husi Maromak no sira la hatene tansá Maromak hatudu ninia grasa ba ema. (2 Kor 4:3, 4; 1 Joao 5:19) Maski nuneʼe, kuandu ema komprende katak situasaun aat neʼebé mosu ohin loron mak tanba ema la iha relasaun ho Maromak, ida-neʼe bele book sira atu simu lia-loos. Iha rai balu neʼebé uluk ema lakohi rona ita-nia mensajen, agora ema barak simu ona lia-foun diʼak no halo ona hakat sira neʼebé ajuda sira atu hadame malu fali ho Maromak. Entaun, importante ba ita ida-idak atu komprende katak agora mak tempu atu hatudu laran-manas liután iha serbisu atu konvida ema atu “hadame malu ho Maromak”.
15. Duké halo ema sente kmaan deʼit, saida mak ita hakarak atu sira hatene?
15 Ita-nia knaar laʼós deʼit atu fó-hatene ba ema katak se sira buka Maromak, nia sei ajuda sira iha sira-nia problema hotu no sira sei sente kmaan. Tanba ema barak gosta rona buat ruma hanesan neʼe kuandu bá igreja, ulun-naʼin relijiaun sira koʼalia barak kona-ba neʼe. (2 Tim 4:3, 4) Ita-nia knaar la hanesan neʼe. Ita haklaken lia-foun diʼak hodi fó sai katak Maromak Jeová iha domin boot ba ema no tan neʼe nia prontu atu perdua sira-nia sala liuhusi Kristu. Hodi nuneʼe, ema bele livre husi nakukun laran no hadame malu fali ho Maromak. (Rom 5:10; 8:32) Maski agora mak “tempu diʼak” atu hadame malu ho Maromak, maibé lakleur tan tempu neʼe sei ramata.
“Laran-manas nafatin iha espíritu”
16. Saida mak ajuda Paulo atu hatudu aten-brani no laran-manas?
16 Entaun, oinsá mak ita bele haburas ita-nia laran-manas ba adorasaun neʼebé loos? No oinsá mak ita bele nafatin iha laran-manas? Ema balu karik moedór no karik sente susar atu koʼalia barak ho ema seluk. Maski nuneʼe, diʼak atu hanoin-hetan katak laran-manas mak laʼós deʼit kona-ba hatudu sai sentimentu; ka laran-manas mós la depende ba ema nia hahalok. Paulo esplika oinsá ema bele haburas laran-manas kuandu nia koʼalia ba ninia maluk kristaun, hodi dehan: “Laran-manas nafatin iha espíritu.” (Rom 12:11) Maromak Jeová nia espíritu mak fó ajuda barak ba Paulo atu sai aten-brani no bele iha forsa atu tahan iha serbisu haklaken. Durante tinan 30 liu, hahú husi tempu neʼebé Jesus hili Paulo toʼo tempu neʼebé nia tama komarka no ikusmai mate iha Roma, nia nunka lakon ninia laran-manas. Nia sempre sadere ba Maromak neʼebé fó forsa ba nia liuhusi ninia espíritu santu. Paulo hatete: “Haʼu bele halo buat hotu iha Nia neʼebé fó kbiit mai haʼu.” (Flp 4:13) Sin, hodi aprende kona-ba Paulo nia ezemplu, ida-neʼe ajuda duni ita atu hatudu nafatin laran-manas!
17. Oinsá mak ita bele “laran-manas nafatin iha espíritu”?
17 Liafuan neʼebé tradús nuʼudar “laran-manas” iha Roma 12:11, bele iha arti katak “buat neʼebé nakali”. Ita hatene katak atu bee nakali nafatin ita presiza aumenta beibeik ai hodi ahi bele lakan nafatin hodi fó manas. Nuneʼe mós, atu bele sai “laran-manas nafatin iha espíritu”, ita presiza Maromak nia espíritu atu suli nafatin ba ita. Atu ita bele hetan ida-neʼe, ita presiza uza buat hotu neʼebé Maromak Jeová fó atu hametin ita-nia relasaun ho nia. Neʼe katak ita tenke hanoin didiʼak kona-ba ita-nia adorasaun família nian no kongregasaun nian. Porezemplu, halaʼo estuda mesak no estuda família beibeik, halo orasaun beibeik, no mós tuir reuniaun beibeik hamutuk ho maluk kristaun sira. Buat sira-neʼe mak hanesan ita iha “ahi” neʼebé fó manas nafatin atu bee bele “nakali”. Sin, hodi halo buat sira-neʼe ita bele kontinua atu “laran-manas nafatin iha espíritu”.—Lee Apostolu 4:20; 18:25.
18. Nuʼudar ema kristaun, ita hakarak hanoin kona-ba saida?
18 Kuandu ema dedika nia an ba buat ida, neʼe katak nia hanoin deʼit kona-ba buat neʼe no la husik buat seluk atu hanetik nia nuʼudar nia hakaʼas an atu halo tuir ninia dedikasaun. Nuʼudar ema kristaun neʼebé dedika an ona, ita-nia hakarak mak atu halo buat hotu neʼebé Maromak Jeová hakarak ita atu halo, hanesan Jesus. (Ebr 10:7) Ohin loron, Maromak nia hakarak mak atu ema barak tan bele hadame malu fali ho nia. Tan neʼe, mai ita hakaʼas an atu laran-manas hodi halo tuir Jesus no Paulo nia ezemplu, atu halaʼo knaar importante ho urjente ohin loron.
Ita hanoin-hetan?
• Saida mak “knaar hadame malu nian” neʼebé Maromak entrega ba Paulo no ninia maluk kristaun kose-mina sira?
• Oinsá mak restu husi ema kose-mina uza didiʼak “tempu diʼak” neʼe?
• Oinsá mak ema kristaun bele “laran-manas nafatin iha espíritu”? Oinsá mak ema kristaun bele “laran-manas nafatin iha espíritu”?
[Pergunta estudu nian]
[Dezeñu iha pájina 12]
Paulo nunka haluha tempu neʼebé nia hasoru Naʼi Jesus Kristu