Sai laran-manas ba adorasaun neʼebé loos
Sai laran-manas ba adorasaun neʼebé loos
“Toʼos boot duni, maibé serbisu-naʼin uitoan.”—MT 9:37.
1. Oinsá mak Ita esplika liafuan “urjente”?
SE ITA iha dokumentu neʼebé Ita hakarak ema ida atu asina lalais. Saida mak Ita sei halo? Ita karik tau sinál dehan “URJENTE!” Se Ita saʼe taksi atu bá tuir enkontru importante ida, maibé Ita tarde ona. Ita sei halo saida? Ita hatete ba xofér: “Favór, halai lalais; neʼe URJENTE loos!” Sin, se Ita tenke halo knaar ida no tempu hela uitoan deʼit, ita sei hakaʼas an atu halo lalais knaar neʼe. Karik Ita sente fuan tuku makaʼas ka raan halai lalais, ida-neʼe tanba Ita hatene katak knaar neʼe mak urjente duni!
2. Ohin loron, ema kristaun iha serbisu urjente saida?
2 Ba ema kristaun ohin loron, serbisu atu haklaken lia-foun diʼak kona-ba Maromak nia Reinu, ka ukun, no halo ema husi nasaun oioin sai dixípulu mak serbisu neʼebé importante tebes. (Mt 24:14; 28:19, 20) Marcos temi fali Jesus nia liafuan hodi dehan katak serbisu haklaken tenke halo “uluk”, antes mundu neʼe nia rohan. (Mc 13:10) Kona-ba serbisu ida-neʼe, Jesus hatete: “Toʼos boot duni, maibé serbisu-naʼin uitoan.” Sin, kuandu trigu prontu ona atu koʼa, ema nunka demora atu koʼa hodi hatama iha trigu-fatin antes tempu koʼa nian ramata.—Mt 9:37.
3. Saida mak ema barak halo tanba serbisu haklaken mak urjente?
3 Tanba serbisu haklaken importante tebes, ita presiza hakaʼas an duni atu uza ita-nia tempu, kbiit no ita-nia hanoin atu halo serbisu neʼe. Ema kristaun barak halo nuneʼe. Sira balu halo simples liu sira-nia moris hodi sira bele serbí Maromak ba tempu-tomak hanesan serbí nuʼudar pioneiru ka misionáriu, ka serbí iha Betel. Sira uza sira-nia moris atu halo buat barak iha Maromak nia serbisu. Karik sira husik buat barak hodi halo nuneʼe, no karik sira hasoru susar oioin. Maibé, sira hetan bensaun barak husi Maromak Jeová. Ita kontente tanba sira bele halo ida-neʼe. (Lee Lucas 18:28-30.) Ema seluk, maski sira la bele serbí Maromak ba tempu-tomak, maibé sira hakaʼas an atu uza tempu tuir sira-nia situasaun atu halaʼo serbisu neʼebé sei salva ema nia moris, ida-neʼe inklui ajuda oan sira atu hetan salvasaun.—Deut 6:6, 7.
4. Tanbasá mak dala ruma ema balu bele hanoin katak Maromak nia serbisu mak laʼós buat neʼebé urjente?
4 Hanesan ita koʼalia tiha ona, baibain ema halo buat ruma ho urjente tanba tempu besik hotu ka hodi bele kumpre tempu neʼebé deside ona. Agora ita moris iha loron ikus sira. Bíblia no ema nia istória hatudu ho klaru katak ida-neʼe loos. (Mt 24:3, 33; 2 Tim 3:1-5) Maibé, la iha ema ida neʼebé hatene ho loloos kona-ba oras neʼebé mundu nia rohan sei mosu. Bainhira Jesus esplika kona-ba sinál neʼebé hatudu katak “mundu neʼe atu hotu”, nia hatete: “Kona-ba loron no oras neʼe, ema ida la hatene: anju sira iha lalehan mós la hatene, Oan-Mane mós lae; Aman deʼit mak hatene.” (Mt 24:36) Tan neʼe, karik susar ba ema balu atu nafatin hanoin katak Maromak nia serbisu mak urjente, liuliu se sira halo serbisu neʼe ba tinan barak ona. (Prov 13:12) Dala ruma Ita mós sente hanesan neʼe ka lae? Saida mak bele ajuda ita atu hanoin nafatin katak serbisu neʼebé Maromak Jeová no Jesus Kristu haruka ita atu halo agora mak urjente?
Hanoin kona-ba Jesus nia ezemplu
5. Iha dalan saida deʼit mak Jesus hatudu katak nia halo Maromak nia serbisu ho urjente?
5 Jesus Kristu fó ezemplu neʼebé diʼak liu hotu kona-ba halo Maromak nia serbisu ho urjente. Razaun ida tansá nia halo serbisu ho urjente mak nia iha tinan tolu ho balu deʼit atu halo serbisu neʼebé Maromak fó ba nia. Maski nuneʼe, se kompara ho ema seluk, Jesus halo buat barak tebes atu apoia adorasaun neʼebé loos. Jesus halo ema barak hatene ninia Aman nia naran no hakarak, nia haklaken lia-foun diʼak kona-ba Maromak nia Ukun, nia fó sai ulun-naʼin relijiaun sira-nia laran-makerek no hanorin falsu, no nia mós apoia nafatin Maromak nia direitu atu ukun toʼo nia mate. Jesus hakaʼas an atu laʼo ba fatin barak hodi hanorin, ajuda no kura ema. (Mt 9:35) La iha ema seluk neʼebé kumpre buat barak hanesan Jesus iha tempu neʼebé badak. Jesus halo serbisu makaʼas duni!—Joao 18:37.
6. Saida mak importante liu iha Jesus nia moris?
6 Saida mak book Jesus atu halo serbisu haklaken ho badinas? Liuhusi liafuan neʼebé profeta Daniel hatete nanis, Jesus karik hatene kona-ba tempu neʼebé Maromak Jeová deside ona ba nia atu kumpre ninia serbisu iha rai. (Dan 9:27) Daniel nia liafuan sira hatudu katak Jesus sei halaʼo nia serbisu ba tinan tolu ho balu deʼit, ka sei ramata iha “semana nia klaran”. Iha tinan 33, lakleur depois Jesus tama ba Jeruzalein no ema simu nia ho haksolok nuʼudar liurai neʼebé promete ona, Jesus hatete: “Oras toʼo ona atu Oan-Mane simu glória.” (Joao 12:23) Maski Jesus hatene katak ninia mate besik ona, maibé neʼe laʼós razaun neʼebé importante liu ba nia atu halo serbisu ho badinas. Jesus hakaʼas an tanba nia hakarak uza oportunidade ida-idak atu halo ninia Aman nia hakarak no atu hatudu katak nia hadomi ema. Domin neʼe book nia atu halibur no treinu dixípulu sira, no haruka sira atu haklaken. Nia halo nuneʼe atu sira bele kontinua atu halo serbisu neʼebé nia mak hahú, no sira sei halo serbisu boot liu fali nia.—Lee Joao 14:12.
7, 8. Saida mak dixípulu sira sente kuandu Jesus duni sai ema husi templu? Tanbasá mak Jesus halo ida-neʼe?
7 Hanoin toʼok kona-ba buat ida neʼebé Jesus halo, neʼebé hatudu ho klaru ninia laran-manas. Iha festa Páskua nian iha tinan 30, Jesus no nia dixípulu sira tama Jeruzalein no haree iha templu laran ema “faʼan karau, bibi no falur, ho ema sira neʼebé troka osan tuur hela iha sira-nia meza”. Saida mak Jesus halo, no Jesus nia dixípulu sente oinsá kona-ba neʼe?—Lee Joao 2:13-17.
8 Buat neʼebé Jesus hatete no halo iha tempu neʼebá halo dixípulu sira hanoin-hetan liafuan husi salmu ida neʼebé David hakerek: “Laran-manas ba Ita-nia uma mak han mohu haʼu.” (Sal 69:9) Tanbasá mak dixípulu sira hanoin kona-ba salmu neʼe? Tanba buat neʼebé Jesus halo mak perigu tebes. Tuir loloos ema boot sira iha templu, hanesan amlulik sira no eskriba sira, mak apoia ema sira neʼebé fila-liman iha templu laran maski ida-neʼe kontra Maromak nia lei. Hodi fó sai no estraga sira-nia planu aat, Jesus halo nia an nuʼudar inimigu ba ulun-naʼin relijiaun sira iha tempu neʼebá. Jesus nia dixípulu hatene ho loloos katak Jesus hatudu ‘laran-manas ba Maromak nia uma’, ka laran-manas ba adorasaun loos. Entaun, laran-manas katak sá? Ida-neʼe hanesan ho urjente ka lae?
Laran-manas no urjente
9. Liafuan “laran-manas” katak sá?
9 Tuir disionáriu ida liafuan “laran-manas” iha arti “hahalok neʼebé hatudu katak ita gosta tebetebes buat ruma ka situasaun ruma no prontu atu fó ita-nia an ba nia”. Liafuan neʼe mós hanesan ho badinas ka fó laran tomak. Klaru katak iha Jesus nia serbisu haklaken nia hatudu duni hahalok sira-neʼe. Tan neʼe, Bíblia Todayʼs English Version tradús versíkulu neʼe nuʼudar: “Haʼu-nia laran-metin no domin ba Ita-nia uma, oh, Maromak, lakan hanesan ahi iha haʼu-nia laran.” Sin, kuandu Jesus nia dixípulu haree buat neʼebé nia halo ho laran-manas iha templu laran, ida-neʼe halo sira hanoin-hetan David nia liafuan sira-neʼe. Maibé, saida mak halo Jesus nia laran lakan hanesan ahi, hodi book nia atu hatudu laran-manas?
10. Iha dalan saida deʼit mak Bíblia uza liafuan “laran-manas”?
10 Iha salmu neʼebé David hakerek, liafuan “laran-manas” mai husi lia-ebraiku neʼebé iha eskritura seluk dala barak tradús nuʼudar “laran-moras”. Tradusaun Mundu Foun dala ruma tradús liafuan neʼe kuandu koʼalia kona-ba Maromak hodi hatudu ninia “hakarak atu ema adora nia mesak deʼit”. (Lee Êxodo 20:5; * 34:14; * Josué 24:19. *) Disionáriu ida esplika liafuan neʼe hodi dehan: “Liafuan neʼe dala barak uza kona-ba moris kaben nian . . . Laʼen ka feen iha direitu atu sente laran-moras kuandu sira-nia kaben la laran-metin ba nia. Hanesan neʼe, Maromak mós iha direitu atu simu adorasaun husi sira neʼebé sai ninia povu, no nia bele sente laran-moras kuandu sira la laran-metin ba nia.” Entaun, tuir Bíblia, laran-manas laʼós deʼit gosta tebes buat ruma, hanesan ema balu hatudu atu apoia grupu desportu ruma. David hatudu laran-moras ba buat neʼebé loos, hodi la simu adorasaun seluk no iha hakarak atu halo santu no defende Maromak nia naran.
11. Saida mak book Jesus atu hatudu laran-manas?
11 Loos ba Jesus nia dixípulu sira atu aplika David nia liafuan ba Jesus nia hahalok neʼebé sira haree iha templu. Jesus hakaʼas an atu halo Maromak nia serbisu, laʼós deʼit tanba nia iha tempu neʼebé badak, maibé mós tanba nia laran-manas ba nia Aman nia naran no ba adorasaun loos. Kuandu Jesus haree ema koʼalia aat no hafoʼer Maromak nia naran, nia iha duni direitu atu sente laran-moras, no ho laran-manas nia halo buat ruma atu hadiʼa situasaun. Kuandu Jesus haree ulun-naʼin relijiaun sira hanehan no aproveita ema haraik-an sira, ninia laran-manas book nia atu halo ema sente kmaan, no mós nia ho brani kritika makaʼas ulun-naʼin sira-neʼe.—Mt 9:36; 23:2, 4, 27, 28, 33.
Laran-manas ba adorasaun loos
12, 13. Saida mak ulun-naʼin relijiaun kristaun falsu sira halo kona-ba (a) Maromak nia naran? (b) Maromak nia Ukun?
12 Ohin loron, relijiaun barak mós hatudu hahalok neʼebé hanesan ka aat liu fali ema iha Jesus nia tempu. Porezemplu, hanoin toʼok buat primeiru neʼebé Jesus hanorin nia dixípulu sira atu harohan, neʼe mak Maromak nia naran. Nia dehan: “Halo Ita naran sai santu.” (Mt 6:9) Ita haree ulun-naʼin relijiaun sira, liuliu sira neʼebé dehan katak sira tuir Kristu, hanorin ema atu hatene Maromak nia naran, no atu halo santu ka hafolin naran neʼe ka lae? Lae duni! Sira hafoʼer Maromak nia naran hodi hanorin lia-bosok hanesan Trindade, ema mate iha klamar neʼebé moris hela, infernu, no sira halo ema sente katak susar atu komprende kona-ba Maromak no katak nia gosta atu fó kastigu ba ema. Sira mós hafoʼer Maromak nia naran liuhusi sira-nia hahalok neʼebé foʼer no laran-makerek. (Lee Roma 2:21-24.) Liután neʼe, sira hakaʼas an atu subar Maromak nia naran, inklui mós hasai naran neʼe husi Bíblia neʼebé sira tradús. Hodi halo buat sira-neʼe, sira hanetik ema atu hakbesik ba Maromak no atu haburas relasaun diʼak ho nia.—Tgo 4:7, 8.
13 Jesus mós hanorin nia dixípulu sira atu harohan kona-ba Maromak nia Reinu, ka ukun. Nia hatete: “Halo Ita-nia reinu toʼo mai ami; halo tuir Ita-nia hakarak ba iha rai nuʼudar iha lalehan.” (Mt 6:10) Maski ulun-naʼin relijiaun kristaun falsu sira dala barak repete orasaun neʼe, maibé sira mós fó laran-manas ba sira-nia ema atu hola parte iha polítika no apoia ema nia organizasaun sira. Laʼós neʼe deʼit, sira mós hatún ema sira neʼebé hakaʼas an atu fó sasin kona-ba Maromak nia Ukun. Tan neʼe, ema barak neʼebé dehan katak sira mak ema kristaun la koʼalia tan kona-ba Maromak nia Ukun, no la iha fiar ba ida-neʼe.
14. Oinsá mak ulun-naʼin relijiaun kristaun falsu sira halo kleʼuk lia-loos husi Maromak nia Liafuan?
14 Iha Jesus nia orasaun ba Maromak, ho klaru nia hatete: “Ita-nia liafuan mak lia-loos.” (Joao 17:17) No mós, antes Jesus fila ba lalehan, nia esplika katak nia sei fó knaar ba atan “laran-metin no matenek” atu bele fó hahán espirituál ba ninia povu. (Mt 24:45) Maski ulun-naʼin relijiaun kristaun falsu sira dehan katak sira hanorin Maromak nia Liafuan, sira halo ho laran-metin serbisu neʼebé Naʼi husu ka lae? Lae. Dala barak sira balu dehan katak buat neʼebé hakerek iha Bíblia laran mak istória neʼebé ema inventa deʼit. Duké fó hahán espirituál ba sira-nia bibi sira hodi bele hatene lia-loos no halo sira sente kmaan, ulun-naʼin sira-neʼe hanorin buat neʼebé sira hanoin katak sira-nia povu hakarak rona, hanesan ema nia filozofia. Liután neʼe, sira halo kleʼuk Maromak nia matadalan kona-ba morál hodi halo ema hanoin katak sira moris tuir hela morál neʼebé diʼak maski loloos sira la halo tuir Maromak nia matadalan.—2 Tim 4:3, 4.
15. Oinsá mak ita sente kona-ba buat hotu neʼebé ulun-naʼin relijiaun sira halo ona?
15 Tanba ulun-naʼin relijiaun sira neʼebé dehan katak sira fiar ba Maromak mak halo buat sira-neʼe, ida-neʼe halo ema laran-moos sira sai laran-triste no lakon sira-nia fiar ba Maromak no ba Bíblia. Sira monu tiha ba Satanás nia lasu no sai atan ba mundu aat neʼe. Kuandu ita haree no rona buat aat sira-neʼe akontese loron ba loron, ita sente oinsá? Nuʼudar Maromak Jeová nia atan, kuandu ita haree ema hafoʼer no koʼalia aat kona-ba Maromak nia naran, ida-neʼe book ita atu hakaʼas an atu hamoos no defende Maromak nia naran, loos ka lae? Kuandu ita haree ulun-naʼin relijiaun sira lohi no aproveita ema laran-moos, ida-neʼe book ita atu hakaʼas an atu halo ema sira-neʼe sente kmaan, loos ka lae? Jesus laʼós deʼit sente hanoin kuandu haree ema sira neʼebé “kole no neon nakraik, hanesan bibi sira neʼebé bibi-atan la iha”, maibé, nia mós “hahú hanorin sira buat barak”. (Mt 9:36; Mc 6:34) Hanesan Jesus, ita mós iha razaun barak atu sai laran-manas ba adorasaun loos.
16, 17. (a) Saida mak tenke book ita atu hakaʼas an iha serbisu haklaken? (b) Saida mak ita sei estuda iha lisaun tuirmai?
16 Kuandu ita laran-manas iha serbisu haklaken, apóstolu Paulo nia liafuan neʼebé hakerek iha 1 Timoteo 2:3, 4 sei kona loos ita-nia laran. (Lee.) Ita badinas iha serbisu haklaken laʼós deʼit tanba ita hatene katak ita moris iha loron ikus, maibé tanba ita hatene katak ida-neʼe mak Maromak nia hakarak. Nia hakarak ema hotu atu hatene didiʼak kona-ba lia-loos, hodi nuneʼe sira bele aprende atu serbí nia no hetan bensaun. Ita hakaʼas an atu halo serbisu haklaken laʼós deʼit tanba tempu besik hotu ona, maibé tanba ita hakarak atu halo santu Maromak nia naran no ajuda ema atu hatene kona-ba ninia hakarak. Sin, hodi halo nuneʼe ita hatudu laran-manas ba adorasaun neʼebé loos.—1 Tim 4:16.
17 Nuʼudar Maromak Jeová nia povu, ita haree ona katak ita hetan bensaun barak hodi hatene lia-loos kona-ba Maromak nia hakarak ba ema no ba rai. Ita bele ajuda ema atu hetan ksolok no bele iha esperansa kapás kona-ba futuru. Ita bele ajuda sira atu hatene fatin neʼebé seguru hodi bele hetan protesaun kuandu Maromak halakon mundu aat neʼe. (2 Tes 1:7-9) Duké hanoin barak no sai laran-tun tanba ita sente katak Maromak Jeová nia loron tarde atu mai, diʼak atu ita sente kontente tanba hatene katak ita sei iha tempu atu hatudu laran-manas ba adorasaun loos. (Miq 7:7; Hab 2:3) Oinsá mak ita bele haburas ita-nia laran-manas? Ita sei estuda kona-ba neʼe iha lisaun tuirmai.
[Nota–rodapé]
^ par. 10 Êxodo 20:5: “Ó labele hakruʼuk ba sira ka husik ema lori ó atu serbí sira, tanba haʼu Jeová mak ó-nia Maromak neʼebé hakarak ó atu adora haʼu mesak deʼit, ida neʼebé fó kastigu ba oan sira tanba sira-nia aman nia sala, no neʼebé fó kastigu ba jerasaun tolu no jerasaun haat, kona-ba sira neʼebé odi haʼu.”
^ par. 10 Êxodo 34:14: “No ó labele hakruʼuk ba maromak seluk, tanba Jeová, neʼebé iha naran Laran-Moras, nia mak Maromak neʼebé hakarak ema atu adora nia mesak deʼit.”
^ par. 10 Josué 24:19: “Tuirmai Josué hatete ba povu: ‘Imi la bele serbí Jeová, tanba nia mak Maromak neʼebé santu; nia mak Maromak neʼebé hakarak ema atu adora nia mesak deʼit. Nia sei la fó perdua ba imi-nia hahalok neʼebé kontra nia no ba imi-nia sala sira.’”
Ita bele hatán?
• Saida mak book Jesus atu halaʼo serbisu haklaken ho badinas?
• Iha dalan saida deʼit mak Bíblia uza liafuan “laran-manas”?
• Saida mak ita haree ohin loron neʼebé book ita atu hatudu laran-manas ba adorasaun neʼebé loos?
[Pergunta estudu nian]
[Dezeñu iha pájina 8]
Buat neʼebé importante liu ba Jesus mak atu halo ninia Aman nia hakarak no hatudu domin ba ema seluk
[Dezeñu iha pájina 10]
Ita iha razaun barak atu sai laran-manas ba adorasaun neʼebé loos