Hanoin kona-ba buat neʼebé Maromak Jeová halo ona ba Ita

LAKLEUR depois tempu neʼebé Jesus moris hiʼas, ninia dixípulu naʼin-rua laʼo husi Jerusalém ba Emaus. Livru Lucas hatete katak kuandu “sira sei koʼalia hodi haksesuk malu daudaun, Jesus rasik hakbesik hodi laʼo hamutuk ho sira. Maibé sira-nia matan ladauk nakloke atu hatene nia”. Tuirmai Jesus hatete ba sira: “‘Imi koʼalia ba malu kona-ba saida tuir dalan?’ Sira para tiha ho oin-nakraik.” Tanbasá sira oin-nakraik ka triste? Dixípulu sira hanoin katak iha tempu neʼebá mak Jesus atu halo ema Israel sai livre husi ema jentiu nia ukun, maibé ida-neʼe la akontese. Duké salva Israel, ema oho Jesus. Tan neʼe, sira triste.—Lc 24:15-21; Apos 1:6.

Nuneʼe Jesus esplika ba dixípulu sira-neʼe hodi “hahú ho Moisés no profeta sira hotu, nia hanorin ba sira buat hotu neʼebé hakerek iha eskritura tomak kona-ba nia”. Tuir loloos, durante tempu neʼebé Jesus halaʼo ninia serbisu iha rai, iha duni buat barak neʼebé akontese neʼebé bele hametin dixípulu sira-nia fiar! Nuʼudar dixípulu sira rona ba buat neʼebé Jesus esplika, sira-nia oin troka, hahú husi oin neʼebé triste, agora sira sai kontente fali. Iha lokraik iha loron neʼebá, sira hatete: “Ita-nia laran la manas wainhira nia koʼalia tuir dalan hodi hanorin eskritura?” (Lc 24:27, 32) Lisaun saida mak ita bele aprende husi Jesus nia dixípulu naʼin-rua neʼe neʼebé sai laran-manas fali?

Oinsá mak ita sente kuandu ita-nia hakarak la sai loos?

Dixípulu naʼin-rua neʼebé iha dalan atu laʼo ba Emaus sente triste tanba buat neʼebé sira hakarak atu akontese la sai loos. Sira sente buat neʼebé hakerek iha Provérbios 13:12 neʼebé hatete: “Hakarak neʼebé la sai loos iha nia tempu hamosu laran moras.” Nuneʼe mós, ita balu neʼebé ho laran-metin serbí ona Maromak Jeová ba tinan barak, dala ruma hanoin katak ‘terus boot’ tenke mosu ona. (Mt 24:21; Apok 7:14) Klaru katak ita-nia hakarak neʼe neʼebé la sai loos karik bele halo ita sai triste.

Maibé, hanoin-hetan katak dixípulu naʼin-rua neʼe sai kontente fali depois Jesus ajuda sira atu hanoin kona-ba liafuan sira iha eskritura neʼebé sai loos tiha ona durante sira-nia moris. Ita mós bele sente ksolok nafatin no la sai triste demais kuandu ita hanoin kona-ba liafuan husi eskritura neʼebé sai loos ona.  Katuas kristaun ida naran Michael hatete: “Keta hanoin demais kona-ba buat neʼebé Maromak Jeová seidauk halo. Maibé, hanoin kona-ba buat neʼebé nia halo tiha ona.” Sin, neʼe mak konsellu neʼebé diʼak tebes!

Buat neʼebé Maromak Jeová halo ona

Hanoin toʼok kona-ba buat balu neʼebé Maromak Jeová halo tiha ona. Jesus hatete: “Ema neʼebé fiar iha haʼu sei halo mós hahalok sira neʼebé haʼu halo; nia sei halo hahalok boot liu fali hirak-neʼe.” (Joao 14:12) Ohin loron, Maromak nia atan sira halo hahalok ka halo serbisu kristaun nian neʼebé boot liu fali tempu uluk. Agora, ema naʼin-7.000.000 liu hein namanas atu hetan salvasaun husi terus boot. Hanoin toʼok, iha ema nia istória seidauk akontese hanesan ohin loron! Maromak Jeová nia atan barak tebes ho laran-metin serbí nia iha rai oioin iha mundu tomak. Sin, Maromak Jeová ajuda ona ninia atan sira atu “halo hahalok boot liu fali” uluk, hanesan Jesus fó-hatene nanis ona.

Saida tan mak Maromak Jeová halo ona ba ita? Nia ajuda ona ema laran-loos sira atu sai husi mundu aat neʼe hodi tama fali ba kongregasaun neʼebé nia harii neʼebé nakonu ho dame no unidade. (2 Kor 12:1-4) Uza tempu atu hanoin kona-ba buat neʼebé ita hetan iha kongregasaun kristaun. Porezemplu, haree toʼok ba fatin tau livru nian iha ita-nia Reuniaun-Fatin ka ba livru sira neʼebé ita hetan ona. Haree toʼok ba Watch Tower Publications Index ka loke toʼok ba Watchtower Library iha komputadór. Rona toʼok ba drama kona-ba Bíblia neʼebé grava tiha ona. Hanoin fali kona-ba buat neʼebé ita rona no haree iha reuniaun boot neʼebé ita foin lalais tuir. Liután neʼe, hanoin toʼok kona-ba ksolok neʼebé ita hetan hodi ransu hamutuk ho ita-nia irmaun no irmán sira. Sin, Maromak Jeová ho laran-diʼak tebes fó ita hahán espirituál neʼebé barak no fó ita irmaun-irmán neʼebé hadomi malu!

David hatete: “Oh, Jeová, haʼu-nia Maromak, Ita rasik halo ona buat barak, sin, Ita-nia serbisu neʼebé furak no Ita-nia hanoin ba ami.” (Sal 40:5) Sin, hodi hanoin kona-ba buat furak sira neʼebé Maromak Jeová halo ona ba ita no hodi hanoin didiʼak kona-ba oinsá nia ho domin hanoin ita ida-idak, ita sei hetan fali forsa atu tahan ho laran-metin nuʼudar ita halaʼo ita-nia serbisu ho laran tomak ba ita-nia Aman iha lalehan, Jeová.—Mat 24:13.

[Dezeñu iha pájina 31]

Jesus ajuda ninia dixípulu sira atu hanoin kona-ba buat neʼebé Maromak Jeová halo ona ba sira

[Dezeñu iha pájina 32]

Hanoin fali kona-ba buat neʼebé ita rona no haree iha reuniaun boot neʼebé ita foin lalais tuir