Hetan kbiit atu tahan kuandu hasoru tentasaun no kuandu sente laran-tun
Hetan kbiit atu tahan kuandu hasoru tentasaun no kuandu sente laran-tun
“Wainhira espíritu santu tun ba imi, imi sei simu kbiit.”—APOS 1:8.
1, 2. Jesus promete saida ba ninia dixípulu? Tanbasá mak sira presiza ida-neʼe?
JESUS hatene katak ninia dixípulu sira la iha kbiit atu halo tuir buat hotu neʼebé nia haruka se sira sadere deʼit ba sira-nia kbiit rasik. Jesus haruka sira atu haklaken iha mundu tomak, maski sira iha inimigu neʼebé ho forsa boot, no maski sira rasik mós ema ho fraku oioin. Atu kumpre knaar neʼe, sira presiza duni forsa neʼebé makaʼas liu fali ema nian. Entaun, foin antes Jesus saʼe ba lalehan, nia hametin ninia dixípulu sira hodi dehan: “Wainhira espíritu santu tun ba imi, imi sei simu kbiit; imi sei sai haʼu-nia sasin iha Jerusalém, iha Judeu no Samaria tomak toʼo rai nia rohan.”—Apos 1:8.
2 Buat neʼebé Jesus promete neʼe hahú sai loos iha tinan 33, kuandu espíritu santu fó kbiit ba Jesus Kristu nia dixípulu sira no sira halo nakonu Jerusalém ho sira-nia serbisu haklaken. Maski ema kontra dixípulu sira-nia serbisu, maibé ema sira-neʼe la bele hapara serbisu neʼe. (Apos 4:20) Jesus nia dixípulu sira neʼebé laran-metin, inklui mós ita, presiza duni kbiit husi Maromak atu kontinua halo Maromak nia hakarak “toʼo mundu nia rohan”.—Mt 28:20.
3. (a) Oinsá mak espíritu santu no kbiit la hanesan? (b) Kbiit husi Maromak Jeová bele ajuda ita atu halo saida?
3 Jesus promete ba ninia dixípulu sira katak ‘wainhira espíritu santu tun ba sira, sira sei simu kbiit’. Liafuan “kbiit” no “espíritu” iha arti neʼebé la hanesan. Maromak nia espíritu, katak forsa neʼebé Maromak haruka atu book ema ka buat ruma hodi halo Maromak nia hakarak iha tempu ruma, maibé espíritu neʼe la hela iha ema ka buat sira-neʼe nia laran. Liafuan kbiit iha arti katak forsa neʼebé bele hela iha ema ka buat ruma nia laran, no mós bele uza atu halo hahalok ruma ka atu kumpre buat ruma. Entaun, ita bele kompara espíritu santu ho eletrisidade nia korrente neʼebé fó enerjia ba bateria ida, maibé kbiit mak hanesan enerjia neʼebé hela iha bateria laran no seidauk uza. Kbiit neʼebé Maromak Jeová fó ba nia atan sira liuhusi espíritu santu, ajuda sira ida-idak atu moris tuir sira-nia dedikasaun nuʼudar ema kristaun. No mós kuandu susar ruma mosu, ida-neʼe ajuda sira atu tahan hasoru susar sira-neʼe no atu sees husi hanoin neʼebé sala.—Lee Miquéias 3:8; * Filipe 4:13.
4. Saida mak ita sei estuda iha lisaun neʼe? Tanbasá?
4 Oinsá mak ita bele hatene katak ita simu kbiit husi espíritu santu iha ita-nia moris? Oinsá mak espíritu santu bele book ita atu halo buat ruma, inklui kuandu ita hasoru situasaun neʼebé susar? Nuʼudar ita hakaʼas an atu serbí Maromak ho laran-metin, susar oioin sei monu ba ita-nia leten. Karik susar sira-neʼe mai husi Satanás, husi mundu aat neʼe, ka husi ita-nia an rasik tanba ita ema sala-naʼin. Importante duni atu ita manán susar sira-neʼe hodi ita bele sai nafatin ema kristaun neʼebé laran-metin, hodi bele haklaken beibeik, no hodi bele iha nafatin relasaun neʼebé diʼak ho Maromak Jeová. Mai ita koʼalia kona-ba oinsá mak espíritu santu ajuda ita atu tahan hasoru tentasaun no atu tahan kuandu sente kole no laran-tun.
Hetan kbiit atu tahan hasoru tentasaun
5. Oinsá mak orasaun bele fó kbiit mai ita?
5 Jesus hanorin ninia dixípulu sira atu harohan: “Keta husik ami monu ba tentasaun, maibé hasai ami husi buat aat.” (Mt 6:13) Kuandu Maromak Jeová nia atan sira harohan ba nia hanesan neʼe, nia sei ajuda duni sira. Jesus mós hatete katak “Aman iha lalehan sei haraik espíritu santu ba sira neʼebé husu ba Nia”. (Lc 11:13) Ita hotu agradese duni tanba Maromak Jeová promete atu fó ba ita kbiit neʼebé bele ajuda ita atu halo buat neʼebé loos! Maski nuneʼe, diʼak mós atu hanoin-hetan katak Maromak Jeová la tau lutu haleʼu ita atu ita la bele hetan tentasaun. (1 Kor 10:13, MF) Kuandu ita hetan tentasaun, neʼe mak tempu diʼak ba ita atu harohan makaʼas liután.—Mt 26:42.
6. Jesus hatán hodi uza saida kuandu Satanás tenta nia?
6 Jesus hatán ba tentasaun neʼebé Satanás fó hodi temi fali eskritura sira. Jesus hanoin-hetan didiʼak Maromak nia liafuan kuandu nia hatán: “Hakerek tiha ona . . . Hakerek nanis mós ona . . . Ho ida-neʼe, Jesus dehan ba nia: ‘Dook tiha, Satanás, basá hakerek ona: “Ó sei adora ó-nia Naʼi, ó-nia Maromak; Nia deʼit mak ó sei hanaʼi.”’” Domin ba Maromak Jeová no ba ninia Liafuan book Jesus atu la simu Satanás nia babeur neʼebé tau iha Jesus nia oin. (Mt 4:1-10) Depois Jesus tahan tiha hasoru Satanás nia tentasaun tolu, Satanás husik nia.
7. Oinsá mak Bíblia bele ajuda ita atu tahan hasoru tentasaun?
7 Maski Jesus perfeitu, nia sadere ba Maromak nia Liafuan hodi tahan hasoru tentasaun husi Satanás. Entaun, oinsá ho ita? Nuʼudar ema sala-naʼin ita presiza liután atu sadere ba Bíblia. Tuir loloos, atubele tahan hasoru Diabu, neʼe hahú ho ita-nia hakarak atu hatene didiʼak kona-ba Maromak nia matadalan no atu halo tuir buat sira-neʼe ho didiʼak. Ema barak neʼebé estuda Bíblia, husik buat neʼebé sira aprende book sira atu hafolin Bíblia nia matadalan nuʼudar buat neʼebé loos no matenek, no atu moris tuir matadalan neʼe. Tuir loloos, “Maromak nia liafuan” iha kbiit atu “hatene loloos buat neʼebé ema hanoin no hakarak iha nia fuan”. (Ebr 4:12) Kuandu ema ida kontinua atu lee no hanoin kleʼan kona-ba eskritura sira, ida-neʼe sei ajuda nia atu hatene liután ‘matenek kona-ba Maromak Jeová nia lia-loos’. (Dan 9:13) Entaun, diʼak tebes atu ita hanoin kleʼan kona-ba eskritura sira-neʼebé kona duni fraku neʼebé ita rasik iha.
8. Saida deʼit mak ita bele halo atu ita bele hetan espíritu santu?
8 Jesus bele tahan hasoru tentasaun tanba nia hatene didiʼak Eskritura sira, no mós tanba nia “nakonu ho espíritu santu”. (Lc 4:1) Atu ita mós bele hetan kbiit no matenek hanesan neʼe, ita presiza hakbesik ba Maromak Jeová hodi uza didiʼak buat hotu neʼebé nia fó hodi ita bele simu ninia espíritu. (Tgo 4:7, 8) Buat neʼebé nia fó inklui Bíblia, orasaun, no oportunidade atu ransu hamutuk ho ita-nia maluk kristaun sira. Ema barak mós sente katak hodi halo beibeik atividade kristaun nian, ida-neʼe ajuda sira atu iha hanoin hanesan Maromak nia hanoin.
9, 10. (a) Iha ita-nia área, ema hasoru tentasaun saida deʼit? (b) Oinsá mak hanoin didiʼak no halo orasaun bele fó ita kbiit atu tahan hasoru tentasaun maski ita sente kole?
9 Ita hasoru tentasaun saida deʼit? Ita hetan ona tentasaun atu book ema ida hodi finje katak Ita gosta nia, maski nia laʼós Ita-nia kaben? Se Ita seidauk kaben, Ita hetan ona tentasaun atu simu konvite atu bá han hamutuk ho ema neʼebé karik hakarak namora ho Ita, maski nia laʼós Testemuña? Kuandu ema kristaun haree televizaun ka uza internét, dala ruma buat neʼebé aat bele mosu no dada nia atu haree. Ida-neʼe akontese ona ba Ita ka lae? Se nuneʼe, saida mak Ita halo? Ita hatudu matenek se ita hanoin didiʼak kona-ba hakat ida neʼebé bele lori ita ba hakat seluk, no ikusmai sei halo ita monu ba sala boot. (Tgo 1:14, 15) No mós, matenek atu hanoin didiʼak kona-ba oinsá ita-nia sala sei hakanek Maromak Jeová nia laran, ema iha kongregasaun nia laran, no ita-nia família nia laran. Iha parte seluk, kuandu ita nafatin laran-metin ba Maromak nia matadalan, ita sente katak Maromak simu ita. (Lee Salmo 119:37; * Provérbios 22:3. *) Kuandu ita hasoru tentasaun, hakaʼas an atu husu kbiit husi Maromak atu tahan hasoru tentasaun sira-neʼe.
10 Iha buat seluk tan neʼebé ita presiza hanoin-hetan kona-ba Satanás nia tentasaun. Satanás hakbesik Jesus atu tenta nia depois nia halo jejún ba loron 40 iha rai-fuik maran. Klaru katak Satanás hanoin katak neʼe mak “tempu diʼak” atu koko Jesus nia laran-metin. (Lc 4:13) Satanás mós buka tempu neʼebé diʼak atu koko ita-nia laran-metin. Tan neʼe, importante tebes atu nafatin iha relasaun neʼebé metin ho Maromak. Dala barak Satanás ataka ita kuandu nia haree katak ita sente fraku. Entaun, kuandu ita sente kole ka laran-tun, ita tenke hakaʼas an atu harohan makaʼas hodi husu Maromak Jeová nia ajuda no ninia espíritu santu.—2 Kor 12:8-10.
Hetan kbiit atu tahan kuandu sente kole no laran-tun
11, 12. (a) Tanbasá mak ema barak ohin loron sente laran-tun? (b) Saida mak bele fó ita kbiit atu tahan kuandu ita sente laran-tun?
11 Nuʼudar ema sala-naʼin, dala ruma ita sente laran-tun. Karik ita sente hanesan neʼe tanba agora daudaun ita hasoru situasaun barak neʼebé susar. Tuir loloos, agora ita moris iha tempu neʼebé susar liu, neʼebé ema iha tempu uluk seidauk hasoru. (2 Tim 3:1-5) Nuʼudar funu Armagedon besik daudaun ona, problema ekonomia, ema sai bilán no taʼuk, no problema sira seluk sei sai boot liután. Entaun ita la hakfodak katak susar ba ema barak atu kumpre sira-nia responsabilidade atu tau matan ba família no fó buat neʼebé família presiza. Sira sente kole, kole tebes, toʼo ikusmai sente katak sira la iha tan forsa. Se ita hasoru daudaun situasaun hanesan neʼe, oinsá mak ita bele tahan hasoru ida-neʼe?
12 Jesus promete ba ninia dixípulu sira katak nia sei haruka ksolok-naʼin ba sira. Iha lia orijinál liafuan neʼebé tradús “ksolok-naʼin” mós iha arti “ida neʼebé fó ajuda”, neʼe mak espíritu santu. (Lee Joao 14:16, 17.) Espíritu santu mak forsa neʼebé makaʼas liu iha lalehan no iha rai. Liuhusi ida-neʼe mak Maromak Jeová bele fó forsa no ajuda “barak liu fali” hodi ita bele tahan hasoru susar naran deʼit. (Ef 3:20) Apóstolu Paulo hatete katak hodi sadere ba espíritu neʼe, ita sei simu “kbiit makaʼas” maski ita hetan “terus oioin”. (2 Kor 4:7, 8) Maromak Jeová la promete katak nia sei halakon ita-nia neon susar, maibé nia hatete katak liuhusi ninia espíritu, nia sei fó ita kbiit atu tahan hasoru buat sira-neʼe.
13. (a) Oinsá mak joven ida hetan kbiit atu tahan hasoru situasaun neʼebé susar tebes? (b) Ita hatene kona-ba esperiénsia neʼebé hanesan ka lae?
13 Hanoin toʼok kona-ba ezemplu husi Estefânia, neʼebé tinan 19, nia mós serbí nuʼudar pioneiru regulár. Kuandu nia tinan 12, nia hetan moras ida neʼebé halo nia isin-matek no mós tumór iha ninia kakutak. Tuirmai, nia hetan operasaun dala rua, simu tratamentu radiasaun nian, no ba dala rua tan nia hetan atake neʼebé halo nia isin-matek. Agora nia ladún bele book nia isin-lolon sorin karuk no mós la bele haree ho moos. Estefânia tenke rai didiʼak ninia forsa hodi bele uza ba buat neʼebé nia hanoin mak importante liu, hanesan tuir reuniaun kristaun no bá haklaken. Maibé, nia sente katak Maromak Jeová lolo nia liman atu ajuda nia iha dalan oioin. Esperiénsia sira husi maluk kristaun neʼebé hakerek iha livru sira neʼebé esplika kona-ba Bíblia fó laran-kmaan ba nia kuandu nia sente laran-tun. Irmaun-irmán sira fó apoiu ba nia hodi haruka karta ba nia ka hodi koʼalia ho laran-diʼak ba nia antes no depois reuniaun sira. Ema neʼebé hatudu interese ba Bíblia mós hafolin buat neʼebé Estefânia hanorin ba sira hodi bá ninia uma atu aprende liután kona-ba Bíblia. Buat sira-neʼe hotu halo Estefânia sente agradese tebes ba Maromak Jeová. Eskritura neʼebé kona loos ninia laran mak Salmo 41:3, neʼebé nia hanoin sai loos ona ba nia.
14. Ita presiza hasees an husi hanoin saida kuandu ita sente laran-tun? Tanbasá?
14 Kuandu ita sente kole ka hasoru susar, importante atu la hanoin katak atu halakon problema sira-neʼe ita presiza hamenus ita-nia serbisu ba Maromak. Hamenus ita-nia serbisu ba Maromak mak desizaun neʼebé la matenek duni! Tanbasá? Tanba atividade sira hanesan estuda mesak no estuda nuʼudar família, haklaken, no tuir reuniaun mak dalan neʼebé ita bele hetan fali kbiit husi espíritu santu. Sin, atividade kristaun nian sempre halo ita sente laran-kmaan. (Lee Mateus 11:28, 29.) Tuir loloos, dala barak irmaun no irmán sira sente kole loos kuandu sira toʼo iha reuniaun-fatin, maibé kuandu reuniaun ramata no sira fila fali ba uma, sira sente hanesan bateria neʼebé hetan fali kbiit. Sin, sira hetan fali kbiit atu kontinua serbí Maromak!
15. (a) Maromak Jeová dehan katak ema kristaun la presiza hakaʼas an ka lae? Esplika toʼok tuir eskritura sira. (b) Saida mak Maromak promete ba ita? Ida-neʼe hamosu pergunta saida?
15 Maski nuneʼe, neʼe la dehan katak ita la presiza hakaʼas an atu halo ita-nia knaar kristaun sira no atu laran-metin nafatin nuʼudar ema kristaun. (Mt 16:24-26; Lc 13:24) Maibé, liuhusi espíritu santu, Maromak Jeová bele fó forsa ba ema neʼebé sente kole. Profeta Isaías hakerek: “Sira neʼebé tau esperansa ba Jeová sei hetan fali kbiit. Sira sei saʼe ho liras hanesan manu-makikit. Sira sei halai no la sai kole, sira sei laʼo no la sai kole demais.” (Isa 40:29-31) Se hanesan neʼe, tansá mak ema dala ruma sente kole atu halo serbisu ba Maromak?
16. Saida mak Ita bele halo atu halakon buat neʼebé halo ita sente kole no laran-tun?
16 Maromak Jeová nia Liafuan fó laran-manas mai ita atu “haree momoos buat hotu-hotu neʼebé diʼak liu”, katak tau uluk buat neʼebé importante liu. (Flp 1:10) Hodi kompara ema kristaun nia moris ho halai-taru neʼebé dook, Paulo hatete: “Husik tiha buat hotu neʼebé hatodan ita, . . . hodi halai toʼo rohan iha konkursu neʼebé ita tuir daudaun.” (Ebr 12:1) Nia hanorin ita atu hasees an husi buat neʼebé la importante, neʼebé halo ita kole. Karik ita balu koko atu halo buat barak demais maski ita iha ona buat barak atu halo. Entaun se Ita sente kole ka estrese beibeik, diʼak atu hanoin didiʼak fali kona-ba oras hira mak Ita uza ba serbisu atu manán osan, ka tempu hira mak Ita uza atu laʼo pasiar ba rai seluk, ka tempu neʼebé Ita uza atu halo desportu ka halo atividade seluk. Ema neʼebé matenek no haraik an sei tetu didiʼak kona-ba buat neʼebé nia bele no la bele halo, no hanoin kona-ba oinsá nia bele hamenus atividade sira-neʼebé ladún importante.
17. Tanbasá mak ema balu sente laran-tun? Saida mak Maromak Jeová promete kona-ba neʼe?
17 Ita balu karik sente laran-tun tanba ita sente katak mundu aat neʼe nia rohan la mosu lalais tuir buat neʼebé ita hakarak. (Prov 13:12) Maibé, sira neʼebé sente nuneʼe bele hetan fali laran-manas hodi hanoin kona-ba liafuan husi Habacuque 2:3, neʼebé hatete: “Vizaun neʼe ba tempu neʼebé deside tiha ona, no neʼe halai toʼo rohan ho ansi, no neʼe sei la koʼalia bosok. Maski neʼe demora, hein nafatin nia bá; tanba nia sei sai loos duni. Nia sei la tarde.” Sin, Maromak Jeová rasik promete mai ita katak mundu aat neʼe sei lakon no ida-neʼe sei la tarde!
18. (a) Maromak nia promete saida mak fó forsa ba Ita? (b) Oinsá mak lisaun tuirmai diʼak ba ita?
18 Klaru katak Maromak Jeová nia atan hotu neʼebé laran-metin ba nia hein namanas ba loron neʼebé la iha tan kole no laran-tun, no loron neʼebé ema hotu sei haksolok fali tanba iha “forsa joven nian”. (Jó 33:25) Ohin loron mós liuhusi espíritu santu, ita bele hetan kbiit iha laran nuʼudar ita hola parte iha Maromak nia serbisu neʼebé halo ita sente laran-manas duni. (2 Kor 4:16; Ef 3:16) Maski ita sente kole, maibé keta husik ida-neʼe hanetik ita atu simu bensaun neʼebé sei iha ba nafatin. Susar no terus naran deʼit, inklui problema neʼebé mosu husi tentasaun, sente kole, ka sente laran-tun, sei liu tiha, maski karik laʼós agora kedas, maibé iha Maromak nia mundu foun. Iha lisaun tuirmai, ita sei estuda kona-ba oinsá espíritu santu fó kbiit ba ema kristaun atu hamriik metin kuandu hasoru terus husi ema seluk, kuandu hasoru tentasaun atu halo tuir deʼit ema seluk, no kuandu hasoru susar sira seluk tan.
[Nota–rodapé]
^ par. 3 Miquéias 3:8: “No, iha parte seluk, haʼu hetan forsa makaʼas, ho Maromak Jeová nia espíritu, no ho espíritu justisa no kbiit, atu fó-hatene ba Jacob kona-ba oinsá nia kontra hasoru Maromak no ba Israel kona-ba ninia sala.”
^ par. 9 Salmo 119:37: “Keta husik haʼu-nia matan atu haree buat neʼebé la iha folin; Halo haʼu moris nafatin tuir Ita-nia dalan.”
^ par. 9 Provérbios 22:3: “Ema neʼebé matenek haree perigu no buka atu subar nia an, maibé ema neʼebé ladún iha esperiénsia kontinua laʼo no loloos hetan susar.”
Oinsá ita hatán?
• Oinsá mak lee Bíblia fó ita kbiit?
• Oinsá mak orasaun no hanoin kleʼan fó ita kbiit?
• Oinsá mak ita bele halakon buat neʼebé bele halo ita sente laran-tun?
[Pergunta estudu nian]
[Dezeñu iha pájina 24]
Reuniaun kristaun bele fó ita forsa atu nafatin halo Maromak nia serbisu
