Maromak nia naran iha foho-leet

ITA rona ona naran St. Moritz ka lae? Ida-neʼe mak fatin ida neʼebé ema barak iha mundu tomak hatene no gosta atu vizita kuandu sira feriadu. Fatin neʼe iha área naran Engadine iha rai-Suisa. St. Moritz mak fatin ida neʼebé furak loos no ba tinan barak ona fatin neʼe dada ema atu bá vizita. Fatin neʼe iha Foho-Alpes nia leet iha parte leste husi rai-Suisa, no besik ho fronteira husi rai-Itália nian. Iha área Engadine neʼe, iha mós jardín nasionál Suisa nian. Jardín neʼe nakonu ho animál oioin no ai oioin neʼebé furak, no buat sira-neʼe fó hahiʼi ba ita-nia Kriadór Boot, Jeová. (Sal 148:7-10) Maibé iha área neʼe, ema mós bele haree katak maizumenus tinan 400 liubá ema iha lisan ida neʼebé lori hahiʼi ba Maromak Jeová.

Iha área neʼe, uma barak iha buat ida neʼebé bele dada ema nia atensaun. Iha uma nia oin, hanesan iha odamatan nia leten, dala barak ema  hakerek liafuan sira neʼebé inklui mós Maromak nia naran. Tinan atus balu liubá, ema iha lisan atu halo furak uma nia liʼur hodi pinta ka bahat liafuan ruma. Iha-neʼe ita bele haree dezeñu kona-ba uma ida iha aldeia naran Bever neʼebé iha liafuan balu iha uma nia oin. Liafuan sira-neʼe tradús ba lia-tetun hanesan tuirmai neʼe: “Iha tinan 1715. Jeová mak hun, no Jeová mak rohan. Buat hotu bele halo ho Maromak, no labele halo buat ida se lahó nia.” Iha-neʼe, temi Maromak nia naran dala rua.

Ema bele haree mós hakerek ida neʼebé tuan liu iha aldeia naran Madulain. Liafuan sira-neʼe hatete: “Salmo 127. Se laʼós Jeová rasik mak harii uma, saugati deʼit ba ema sira neʼebé hakaʼas an atu harii uma neʼe. Lucius Rumedius. Iha tinan 1654.”

Tanbasá mak uma barak iha área neʼe, iha Maromak nia naran iha uma nia oin? Tanba besik tinan atus lima liubá, ema tradús Bíblia ba língua neʼebé ema iha Engadine koʼalia, língua neʼe mak lia-romanxe neʼebé nia hun mak lia-latín. Tuir loloos, Bíblia mak livru primeiru neʼebé ema tradús ba lia-romanxe. Buat neʼebé ema lee iha Maromak nia Liafuan book sira barak atu hakerek iha sira-nia uma oin, laʼós deʼit sira rasik nia naran, maibé atu hakerek mós eskritura husi Bíblia neʼebé inklui Maromak nia naran.

Loos duni, maski liafuan sira-neʼe hakerek tinan atus balu liubá, maibé sira nafatin fó sai Maromak Jeová nia naran no hahiʼi nia toʼo ohin loron. Ema neʼebé vizita ka hela iha área neʼe bele aprende liután kona-ba Maromak Jeová hodi vizita uma ida seluk neʼebé mós hakerek Maromak nia naran, uma neʼe mak Reuniaun-Fatin husi Testemuña ba Jeová iha Bever.

[Dezeñu iha pájina 7]

© Stähli Rolf A/age fotostock