Ita hafolin duni bensaun neʼebé ita simu ona ka lae?

EMA Israel haksolok tebes atu bele adora Maromak Jeová ho livre kuandu nia halo milagre atu salva sira husi sira-nia situasaun nuʼudar atan iha rai-Egiptu. (Êx 14:29–15:1, 20, 21) Maibé, lakleur deʼit sira-nia hanoin troka no sira komesa muramura. Tanbasá mak sira-nia hanoin troka? Tanba sira hanoin barak liu mak kona-ba susar neʼebé sira hasoru iha rai-fuik maran, sira la hanoin tan kona-ba buat neʼebé Maromak Jeová halo ona ba sira. Tan neʼe, sira koʼalia ho Moisés, hodi dehan: “Tanbasá mak imi lori ami sai husi rai-Egiptu atu mate iha rai-fuik maran? Paun no bee la iha, no ami-nia moris hakribi ona ho paun aat neʼe [maná].”—Núm 21:5.

Tinan atus ba atus liutiha, Liurai David husi Israel antigu kanta: “Ba haʼu, haʼu tau fiar ona ba Ita-nia laran-diʼak neʼebé nakonu ho domin; haʼu-nia laran sei haksolok iha salvasaun husi Ita. Haʼu sei kanta ba Jeová, tanba nia haraik bensaun mai haʼu.” (Sal 13:5, 6) Sin, David la haluha laran-diʼak neʼebé Maromak Jeová hatudu ona ba nia, no David uza tempu barak atu hanoin beibeik kona-ba buat sira-neʼe. (Sal 103:2) Maromak Jeová mós haraik ona bensaun barak mai ita, no ita lakohi atu haree bensaun sira-neʼe nuʼudar buat neʼebé ladún importante. Nuneʼe, mai ita hanoin kona-ba bensaun balu neʼebé ita simu ona iha tempu agora.

‘Relasaun besik ho Maromak Jeová’

Ema neʼebé hakerek salmu ida dehan: “Sira neʼebé taʼuk ba Maromak Jeová iha relasaun neʼebé besik liu ho nia.” (Sal 25:14) Sin, atu iha relasaun neʼebé besik ho Maromak Jeová mak buat neʼebé espesiál tebes ba ema neʼebé sala-naʼin! Maibé, oinsá se ita iha buat barak atu halo iha ita-nia moris loroloron nian toʼo ikusmai ita ladún iha tempu atu halo orasaun? Hanoin toʼok kona-ba saida mak sei akontese ba ita-nia relasaun diʼak ho Maromak Jeová. Nuʼudar ita-nia belun, Maromak Jeová hakarak ita atu tau fiar ba nia no fakar sai ita-nia laran ba nia liuhusi  orasaun, hodi fó sai ita-nia hanoin, ita-nia hakarak, no ita-nia laran-taridu. (Prov 3:5, 6; Flp 4:6, 7) Tan neʼe, importante duni ba ita atu hanoin kona-ba dalan neʼebé ita koʼalia ho Maromak!

Kuandu joven kristaun ida naran Paul hanoin fali kona-ba orasaun sira neʼebé nia halo ona, nia sente katak nia presiza hadiʼa ninia orasaun. * Nia dehan: “Haʼu sai toman atu repete beibeik liafuan balu kuandu haʼu halo orasaun ba Maromak Jeová.” Tan neʼe, Paul buka informasaun liután kona-ba orasaun hodi uza ita-nia livru sira, no nia haree katak iha Bíblia laran iha orasaun maizumenus hamutuk 180. Husi orasaun sira-neʼe, nia bele haree katak Maromak Jeová nia atan sira iha tempu uluk fakar sai sira-nia laran iha orasaun. Paul hatete: “Hodi hanoin kleʼan kona-ba ezemplu sira-neʼe husi Bíblia, haʼu aprende atu fó sai ba Maromak buat neʼebé haʼu sente ka presiza. Ida-neʼe ajuda haʼu atu loke haʼu-nia laran ba Maromak Jeová. Agora haʼu sente haksolok atu hakbesik ba Maromak liuhusi orasaun.”

‘Ai-han iha tempu loloos’

Bensaun ida tan neʼebé Maromak Jeová haraik mai ita mak lia-loos husi Bíblia neʼebé ita aprende ona. Ita hetan ai-han espirituál barak, no ida-neʼe halo ita “haksolok tanba sente diʼak iha laran”. (Isa 65:13, 14) Maibé, ita presiza kuidadu atu la husik buat aat husi mundu neʼe atu halakon ita-nia laran-manas ba lia-loos. Porezemplu, se ita rona ka lee informasaun neʼebé koʼalia aat kona-ba Testemuña ba Jeová, ida-neʼe bele kona ita-nia hanoin no halo ita la hafolin tan ‘ai-han iha tempu loloos’ neʼebé ita simu husi Maromak Jeová liuhusi ‘atan laran-metin no matenek’.—Mt 24:45-47.

Hanoin toʼok kona-ba André, neʼebé serbí Maromak Jeová ba tinan barak. Nia para atu serbí Maromak tanba nia husik hanorin falsu husi ema neʼebé hatún Testemuña ba Jeová atu kona nia laran. Nia sente katak la perigu atu haree ba sítiu iha internét neʼebé iha hanorin falsu husi ema aat sira, maski haree ba tempu uitoan deʼit. Nia dehan: “Foufoun, haʼu hakarak hatene deʼit hanoin husi ema neʼebé kontra Testemuña ba Jeová. Nuʼudar haʼu lee barak liután buat neʼebé sira hatete, haʼu sente katak atu husik Maromak Jeová nia organizasaun mak buat neʼebé loos. Maibé ikusmai, kuandu haʼu buka informasaun seluk, haʼu haree katak buat neʼebé sira fó sai atu hatún Testemuña ba Jeová mak la iha hun. No ida-neʼe ajuda haʼu atu komprende katak sira mak mestre falsu no bosok-teen duni. Sira koʼalia lia-bobar atu ‘hatudu’ katak Testemuña ba Jeová mak sala no uza informasaun iha dalan neʼebé sala. Tan neʼe, haʼu deside atu lee fali ita-nia livru sira neʼebé esplika kona-ba Bíblia no tuir fali reuniaun sira. Lakleur deʼit, haʼu haree katak hodi husik lia-loos haʼu lakon buat barak.” Ikusmai, André fila fali ba Maromak nia organizasaun.

Ita-nia maluk fiar-naʼin

Bensaun ida tan neʼebé Maromak Jeová haraik mai ita mak ita-nia maluk kristaun sira, neʼebé hanesan família ida neʼebé hadomi malu no iha unidade. (Sal 133:1) Tan neʼe, apóstolu Pedro dehan: “Hadomi imi-nia maluk [fiar-naʼin] bá nuʼudar maun-alin.” (1 Ped 2:17) Sin, hodi sai parte ba família kristaun ida neʼebé iha fiar  hanesan, ita haksolok hodi hetan domin husi ema neʼebé sai hanesan ita-nia inan, aman, maun no alin.—Mc 10:29, 30.

Maski nuneʼe, dala ruma ita hasoru situasaun neʼebé halo susar ba ita atu iha relasaun diʼak ho ita-nia irmaun-irmán sira. Porezemplu, fasil ba ita atu sente laran-nakali tanba sala neʼebé ema ida halo, no tan neʼe karik ita hanoin beibeik buat aat kona-ba ema neʼe. Se ida-neʼe akontese, ita presiza hanoin-hetan katak Maromak Jeová hadomi ninia atan sira maski sira mak sala-naʼin. Hanoin-hetan mós katak Bíblia hatete: “Ita dehan karik katak ita sala la iha, ita lohi ita an rasik; la iha lia-loos iha ita.” (1 Joao 1:8) Sin, importante ba ita atu ‘simu malu didiʼak, tahan malu wainhira ita iha buat ruma hasoru ema seluk’ no mós ‘perdua malu nuʼudar Naʼi fó perdua ona ba ita’.—Kol 3:13.

Hanoin toʼok kona-ba esperiénsia husi feto joven ida naran Ann. Neineik-neineik nia hadook an husi Maromak nia povu, maibé ikusmai nia komesa hanoin iha dalan neʼebé loos no fila fali ba lia-loos. Ann nia esperiénsia hanesan ho Jesus nia ai-knanoik kona-ba oan neʼebé husik hela uma. (Lc 15:11-24) Saida mak Ann aprende husi ninia esperiénsia? Nia hatete: “Tanba haʼu fila fali ona ba Maromak Jeová nia organizasaun, haʼu hafolin duni irmaun-irmán hotu maski sira sala-naʼin. Iha tempu uluk, haʼu lalais atu buka deʼit sira-nia sala. Maibé, agora haʼu lakohi duni atu husik buat ida hanetik haʼu atu simu bensaun hodi ransu malu ho maluk fiar-naʼin. La iha buat ida iha mundu neʼe neʼebé bele kompara ho domin no dame neʼebé ita bele hetan iha Maromak nia povu nia leet.”

Hafolin nafatin ita-nia bensaun sira

Ita iha esperansa katak Maromak nia Ukun mak dalan ida deʼit atu hadiʼa ema nia problema hotu. Esperansa neʼe mak hanesan rikusoin neʼebé folin-boot tebes. Kuandu ita foin hatene kona-ba esperansa neʼe, ita hafolin tebes ida-neʼe, loos ka lae? Ita sente hanesan kontratu-naʼin neʼebé Jesus temi iha ninia ai-knanoik. Kontratu-naʼin neʼe “faʼan tiha buat hotu neʼebé nia iha” atubele sosa fatuk-murak “neʼebé folin-boot”. (Mt 13:45, 46) Jesus nunka dehan katak kontratu-naʼin neʼe ikusmai la hafolin tan fatuk-murak neʼe. Hanesan neʼe mós, mai ita hafolin nafatin ita-nia esperansa furak neʼe.—1 Tes 5:8; Ebr 6:19.

Hanoin toʼok kona-ba ezemplu husi irmán ida naran Jean, neʼebé serbí Maromak Jeová ba tinan 60 liu. Nia dehan: “Buat neʼebé ajuda haʼu atu hanoin nafatin kona-ba Maromak nia Ukun mak hodi koʼalia kona-ba ida-neʼe ba ema seluk. Kuandu haʼu haree sira-nia matan nabilan tanba sira komprende kona-ba Maromak nia Ukun, ida-neʼe halo haʼu kontente tebes. Bainhira haʼu haree lia-loos troka ema nia moris, ida-neʼe book haʼu atu hanoin: ‘Lia-loos mak buat furak tebes neʼebé haʼu iha atu fahe ba ema seluk!’”

Ita iha razaun barak atu hafolin bensaun sira neʼebé Maromak fó ba ita. Maski ita hasoru susar oioin, hanesan ema kontra ita, sai moras, sai ferik-katuas, sente laran-tun, família ida mate ka hasoru problema ekonomia, maibé ita hatene katak buat sira-neʼe la hela ba nafatin. Liután neʼe, iha Maromak nia Ukun nia okos ita sei simu bensaun barak tan. Susar sira neʼebé ita hasoru agora sei la iha tan iha mundu foun.—Apok 21:4.

Maibé antes tempu neʼe, mai ita hafolin bensaun sira neʼebé Maromak haraik ona mai ita, no hatudu agradese hanesan ema neʼebé hakerek salmu ida neʼebé dehan: “Oh, Jeová, haʼu-nia Maromak, Ita rasik halo ona buat barak, sin, Ita-nia serbisu neʼebé furak no Ita-nia hanoin ba ami; la iha ida neʼebé bele kompara ho Ita. Se haʼu hakarak atu koʼalia no fó sai kona-ba sira, sira sai barak liu fali buat neʼebé haʼu bele konta.”—Sal 40:5.

[Nota–rodapé]

[Dezeñu iha pájina 18]

Iha tempu susar Maromak haraik bensaun mai ita hodi ajuda ita