Ita odi buat neʼebé aat ka lae?
Ita odi buat neʼebé aat ka lae?
“Ita [Jesus] odi buat neʼebé aat.”—EBR 1:9, MF.
1. Saida mak Jesus hanorin kona-ba domin?
JESUS KRISTU hatudu katak domin mak importante tebes, hodi dehan ba ninia dixípulu sira: “Haʼu fó ba imi ukun-fuan foun: imi sei hadomi malu; nuʼudar haʼu hadomi imi, nuneʼe mós imi sei hadomi malu. Nuneʼe mak ema hotu sei hatene katak imi haʼu-nia eskolante sira: wainhira imi hadomi malu.” (Joao 13:34, 35) Jesus haruka ninia dixípulu sira atu hatudu domin loloos ba malu. No domin neʼe sai nuʼudar sinál neʼebé hatudu katak sira mak dixípulu neʼebé loos. Jesus mós fó laran-manas ba sira, hodi dehan: “Hadomi imi-nia funu-balun sira, harohan ba sira neʼebé hanehan imi.”—Mt 5:44.
2. Sira neʼebé tuir Kristu presiza odi saida?
2 Maibé, maski Jesus hanorin ninia dixípulu sira kona-ba domin, nia mós hanorin sira kona-ba buat neʼebé sira tenke odi. Bíblia koʼalia kona-ba Jesus, hodi dehan: “Ita hadomi buat neʼebé loos no Ita odi buat neʼebé aat.” (Ebr 1:9, MF; Sal 45:7) Ida-neʼe hatudu katak la toʼo atu haburas deʼit domin ba buat neʼebé loos, maibé ita mós presiza atu odi buat neʼebé aat, ka sala. Apóstolu João hatete: “Ema neʼebé halo sala la halo tuir Maromak nia ukun-fuan, basá sala mak la halo tuir ukun-fuan.”—1 Joao 3:4.
3. Iha lisaun neʼe ita sei koʼalia kona-ba buat haat saida?
3 Nuʼudar ema kristaun, ita tenke husu ba ita-nia an: ‘Haʼu odi buat neʼebé aat ka lae?’ Mai ita haree dalan haat neʼebé hatudu katak ita odi buat neʼebé aat: (1) ita-nia hanoin kona-ba hemu tua demais, (2) ita-nia hanoin kona-ba matan-dook nia atividade, (3) ita-nia hanoin kona-ba hahalok foʼer, no (4) ita-nia hanoin kona-ba ema neʼebé hadomi buat neʼebé aat.
Hanoin neʼebé loos kona-ba hemu tua
4. Tanbasá mak Jesus bele koʼalia ho laran moos kuandu fó konsellu kona-ba hemu tua demais?
4 Dala ruma, Jesus mós hemu tua. Nia hatene katak tua mak hanesan prezente husi Maromak. (Sal 104:14, 15) Maibé, Jesus nunka uza sala prezente neʼe. Nia nunka hemu tua barak demais. (Prov 23:29-33) Tanba Jesus hatudu ezemplu diʼak kona-ba neʼe, nia bele koʼalia ho laran moos kuandu nia fó konsellu kona-ba keta sai lanu. (Lee Lucas 21:34.) Hemu tua demais bele mós lori ita atu halo sala boot seluk. Nuneʼe, apóstolu Paulo hakerek: “Keta lanu ho tua, neʼebé halo aat deʼit imi; sai hakonu imi an ho espíritu.” (Ef 5:18) Nia mós fó konsellu ba feto sira neʼebé idade ona iha kongregasaun atu la sai atan ba tua, ka “la lanu-teen”.—Tito 2:3.
5. Se ita hemu tua, ita presiza husu pergunta saida deʼit ba ita-nia an?
5 Se ita hemu tua, ita presiza husu ba ita-nia an: ‘Haʼu-nia hanoin kona-ba hemu tua demais hanesan ho Jesus nian ka lae? Se haʼu presiza fó konsellu ba ema seluk kona-ba hemu, haʼu rasik hatudu ezemplu diʼak kona-ba neʼe ka lae? Haʼu hemu tua atu haluha haʼu-nia laran-susar ka halakon haʼu-nia estrese ka lae? Semana-semana haʼu hemu tua kopu hira? Haʼu sente oinsá kuandu ema ida dehan katak karik haʼu hemu barak demais? Haʼu koko atu defende haʼu-nia an ka sai hirus ka lae?’ Kuandu ita husik ita-nia an atu sai atan ba tua, ida-neʼe bele kona dalan neʼebé ita hanoin no dalan neʼebé ita halo desizaun. Ema kristaun neʼebé loos hakaʼas an atu proteje sira-nia kbiit atu hanoin.—Prov 3:21, 22.
Hasees an husi matan-dook nia atividade
6, 7. (a) Oinsá mak Jesus hasoru Satanás no nia anju aat sira? (b) Tanbasá mak buat sira-neʼe sai barak ohin loron?
6 Kuandu Jesus iha rai, nia hamriik metin hodi kontra hasoru Satanás no nia anju aat sira. Jesus la husik Satanás atu halakon ninia laran-metin. (Lc 4:1-13) Jesus mós hatene kona-ba Satanás nia lasu atu hafoʼer ninia hanoin no hahalok, no Jesus la simu ida-neʼe. (Mt 16:21-23) Jesus ajuda ema laran loos atu sai livre husi anju aat sira.—Mc 5:2, 8, 12-15; 9:20, 25-27.
7 Depois simu tiha knaar nuʼudar Liurai iha tinan 1914, Jesus hamoos lalehan hodi hasai Satanás no ninia anju aat sira. Tan neʼe, agora Satanás hakaʼas an liután atu “bosok raiklaran tomak”. (Apok 12:9, 10) Nuneʼe, ita la hakfodak katak agora ema barak gosta matan-dook nia atividade no ida-neʼe aumenta ba beibeik. Saida mak ita bele halo atu proteje ita-nia an husi buat sira-neʼe?
8. Ita ida-idak presiza hanoin kona-ba saida kuandu hili halimar ruma?
8 Bíblia fó avizu ho klaru katak hola parte iha matan-dook nia atividade mak perigu tebes. (Lee Deuteronômio 18:10-12. *) Ohin loron, Satanás no nia anju aat sira book ema nia hanoin liuhusi filme, livru, no video game neʼebé iha matan-dook nia atividade. Tan neʼe, kuandu ita hili halimar ruma, diʼak atu husu ba ita-nia an: ‘Iha fulan balu neʼebé liu ona, haʼu hili atu haree filme, programa iha TV, halimar video game, ka lee livru neʼebé iha matan-dook nia atividade ka lae? Haʼu hatene katak importante atu la simu buat sira-neʼe, ka haʼu hanoin katak neʼe la perigu? Haʼu mós hanoin kona-ba oinsá Maromak Jeová sente kona-ba haʼu-nia desizaun atu hili halimar balu ka lae? Se haʼu husik ona Satanás nia ideia sira atu tama iha haʼu-nia moris, haʼu-nia domin ba Maromak Jeová no ba ninia matadalan neʼebé loos sei book haʼu atu halakon kedas buat sira-neʼe ka lae?’—Apos 19:19, 20.
Labele simu hahalok foʼer
9. Oinsá mak ema ida bele haburas domin ba buat neʼebé aat?
9 Jesus apoia Maromak Jeová nia matadalan neʼebé loos kona-ba hahalok seksuál. Nia hatete: “Imi la lee katak horiuluk kedas Maromak halo mane ho feto hodi dehan; ‘Tan neʼe mak mane sei husik nia aman ho nia inan hodi moris hamutuk ho nia feen; sira naʼin-rua sei sai isin ida deʼit?’ Nuneʼe, sira laʼós naʼin-rua tan, maibé isin ida deʼit ona. Neʼe duni buat neʼebé Maromak tau hamutuk ema keta haketak.” (Mt 19:4-6) Jesus hatene katak buat neʼebé ema haree bele kona sira-nia laran. Tan neʼe, iha ninia diskursu iha foho, nia hatete: “Imi rona ema dehan; ‘Ó keta sala ho ema nia kaben.’ Maibé haʼu dehan ba imi; ‘Ema neʼebé hateke ba feto ida hodi kaan nia, nia halo ona sala-foʼer ho nia iha nia laran.’” (Mt 5:27, 28) Tuir loloos, kuandu ema la simu Jesus nia avizu neʼe, neʼe katak sira haburas domin ba buat neʼebé aat.
10. Konta toʼok esperiénsia ida neʼebé hatudu katak ema bele sai livre husi pornografia.
10 Satanás habelar hahalok seksuál neʼebé foʼer liuhusi pornografia. Satanás nia mundu aat neʼe nakonu ho buat aat sira-neʼe. Ema neʼebé haree pornografia sente susar atu halakon husi sira-nia neon buat neʼebé sira haree. Sira bele sai toman atu haree pornografia beibeik. Hanoin toʼok kona-ba buat neʼebé akontese ba ema kristaun ida. Nia hatete: “Haʼu haree pornografia subasubar. Haʼu hanoin katak buat neʼebé haʼu halo la kona haʼu-nia serbisu ba Maromak Jeová. Haʼu hatene katak buat neʼebé haʼu halo mak sala, maibé haʼu bosok haʼu-nia an hodi hanoin katak Maromak sei simu nafatin haʼu-nia adorasaun ba nia.” Saida mak ajuda irmaun neʼe atu troka ninia hanoin? Nia hatete: “Maski neʼe mak buat neʼebé susar liu ba haʼu atu halo, maibé haʼu halo desizaun atu fó-hatene katuas sira kona-ba haʼu-nia problema neʼe.” Ikusmai, irmaun neʼe sai livre husi ninia toman foʼer neʼe. Nia hatete: “Depois haʼu husik tiha hahalok sala neʼe, haʼu sente katak Maromak simu duni haʼu-nia adorasaun.” Sin, sira neʼebé odi buat neʼebé aat tenke hakaʼas an atu odi pornografia.
11, 12. Kuandu ita hili múzika, oinsá mak ita bele hatudu katak ita odi buat neʼebé aat?
11 Múzika no liafuan iha múzika sira bele book duni ita-nia laran ka sentimentu. Tuir loloos, múzika mak hanesan prezente husi Maromak, no múzika mós sai parte ba adorasaun loos ba tempu kleur ona. (Êx 15:20, 21; Ef 5:19) Maibé ohin loron, Satanás nia mundu aat neʼe habelar múzika sira neʼebé nakonu ho hahalok foʼer. (1 Joao 5:19) Oinsá mak ita bele hatene se múzika neʼebé ita rona hafoʼer ita ka lae?
12 Ita bele husu ba ita-nia an: ‘Múzika neʼebé haʼu rona koʼalia kona-ba oho ema, halo sala-foʼer, ka koʼalia aat kona-ba Maromak ka lae? Se haʼu lee liafuan ruma husi múzika balu ba ema seluk, sira sei hanoin katak haʼu odi buat neʼebé aat, ka sira sei hanoin katak haʼu-nia laran foʼer ona?’ Se ita dehan katak ita odi buat neʼebé aat, ita labele rona múzika neʼebé temi buat neʼebé aat ka foʼer. Jesus dehan: “Buat neʼebé sai husi ibun mai husi ema nia fuan; neʼe mak hafoʼer ema. Husi ema nia fuan mak suli mai hanoin aat sira, oho ema, sala hasoru ema nia kaben, sala-foʼer, naʼok, bobar lia falsu, hateten aat Maromak.”—Mt 15:18, 19; kompara ho Tiago 3:10, 11.
Jesus nia hanoin kona-ba ema neʼebé hadomi buat neʼebé aat
13. Saida mak Jesus nia haree kona-ba ema neʼebé kontinua nafatin atu halo buat neʼebé aat?
13 Jesus dehan katak nia mai atu bolu ema sala-naʼin, ka ema aat, atu hakribi sira-nia sala. (Lc 5:30-32) Maibé, saida mak ninia haree kona-ba ema neʼebé kontinua nafatin atu halo buat neʼebé aat? Jesus fó konsellu makaʼas atu ita labele husik ema sira-neʼe hafoʼer ita-nia hanoin. (Mt 23:15, 23-26) Nia mós hatete: “Laʼós ema hotu neʼebé dehan mai haʼu: ‘Naʼi, Naʼi!’ sei tama iha reinu lalehan, maibé nia deʼit neʼebé halo tuir haʼu Aman iha lalehan nia hakarak. Ema barak sei dehan mai haʼu iha loron neʼebá [kuandu Maromak tesi lia]: ‘Naʼi, Naʼi, laʼós hodi Ita-Boot nia naran mak ami siʼik nuʼudar profeta, no hodi Ita naran mak duni sai tiha diabu sira, no mós halo milagre barak?’” Maski nuneʼe, Jesus sei la simu sira neʼebé kontinua nafatin atu halo buat neʼebé aat, hodi dehan: “Hadook an tiha husi haʼu.” (Mt 7:21-23) Tanbasá mak Maromak tesi lia hasoru sira? Tanba ema sira-neʼe hafoʼer Maromak nia naran no hakanek ema seluk liuhusi sira-nia hahalok aat.
14. Tanbasá mak ema neʼebé la arrepende sira-nia sala presiza hasai husi kongregasaun?
14 Maromak nia Liafuan fó mandamentu katak kuandu ema ida la arrepende ninia sala, kongregasaun presiza hasai nia. (Lee 1 Korinto 5:9-13.) Kongregasaun halo ida-neʼe tanba razaun tolu: (1) atu la hafoʼer Maromak Jeová nia naran, (2) atu proteje kongregasaun husi buat neʼebé aat, no (3) atu ajuda ema neʼebé halo sala atu arrepende an.
15. Atu hatudu laran-metin ba Maromak Jeová, diʼak atu husu ba ita-nia an pergunta saida deʼit?
15 Ita mós iha hanoin neʼebé hanesan ho Jesus kona-ba ema neʼebé kontinua nafatin atu halo buat neʼebé aat ka lae? Importante atu hanoin kona-ba pergunta sira tuirmai: ‘Haʼu hili atu ransu malu ho ema neʼebé kongregasaun hasai tiha, ka ho ema neʼebé ho hakarak rasik hili atu la sai parte tan ba kongregasaun ka lae? Oinsá se ema neʼe mak haʼu-nia família rasik neʼebé la hela tan hamutuk ho haʼu?’ Situasaun hanesan neʼe bele koko duni ita-nia domin ba buat neʼebé loos no ita-nia laran-metin ba Maromak. *
16, 17. Susar saida mak irmán ida hasoru? Saida mak ajuda nia atu apoia Maromak nia arranju kona-ba ema neʼebé kongregasaun hasai ona?
16 Hanoin toʼok kona-ba irmán ida nia esperiénsia. Uluk ninia oan-mane hadomi Maromak Jeová. Maibé, ikusmai, ninia oan neʼe ho hakarak rasik hili atu halo buat neʼebé aat. Tan neʼe, kongregasaun hasai ninia oan. Ita-nia irmán nafatin hadomi Maromak Jeová, maibé nia mós hadomi ninia oan, no tan neʼe nia sente katak susar duni atu halo tuir Bíblia nia ukun-fuan atu la ransu ho ninia oan.
17 Konsellu saida mak ita bele fó atu ajuda irmán ka irmaun sira neʼebé hasoru situasaun hanesan neʼe? Iha irmán neʼe nia situasaun, katuas kongregasaun nian ida ho domin ajuda nia atu hatene katak Maromak Jeová komprende laran kanek neʼebé nia sente. Nia book irmán neʼe atu hanoin kona-ba laran kanek neʼebé Maromak Jeová rasik sente kuandu anju balu kontra hasoru nia. Katuas neʼe koʼalia ho nia hodi dehan katak maski Maromak Jeová hatene oinsá situasaun hanesan neʼe hamosu laran kanek, maibé hodi tuir ninia lei, ema neʼebé halo sala no la arrepende an presiza hasai husi kongregasaun. Irmán neʼe simu buat neʼebé nia rona no ho laran-metin nia apoia Maromak nia arranju kona-ba ema neʼebé kongregasaun hasai ona. * Hahalok laran-metin hanesan neʼe halo Maromak Jeová nia laran kontente!—Prov 27:11.
18, 19. (a) Hodi hakotu ita-nia relasaun ho ema neʼebé kontinua halo buat neʼebé aat, ita hatudu katak ita odi saida? (b) Buat diʼak saida mak bele mosu se ita laran-metin ba Maromak no ninia arranju?
18 Se ita mós hasoru situasaun hanesan neʼe, hanoin-hetan katak Maromak Jeová hatene buat neʼebé ita sente. Hodi hakotu ita-nia relasaun ho ema neʼebé kongregasaun hasai, ita hatudu katak ita odi ninia hahalok aat. Ita mós hatudu katak ita hadomi ema neʼe no hanoin nia, maski nia halo sala. Ita-nia laran-metin ba Maromak Jeová karik bele book ema neʼebé hetan dixiplina atu bele arrepende an no fila fali ba Maromak Jeová.
19 Irmán ida neʼebé uluk kongregasaun hasai no ikusmai arrepende an no kongregasaun simu fali, hatete: “Haʼu kontente atu hatene katak Maromak Jeová hadomi duni ninia povu hodi halo ninia organizasaun moos nafatin. Ema neʼebé la iha lia-loos karik hanoin katak hasai ema husi kongregasaun mak dixiplina neʼebé makaʼas liu, maibé tuir loloos ida-neʼe presiza no neʼe mak dalan neʼebé domin.” Tuir ita-nia hanoin, se ema iha kongregasaun laran, inklui irmán neʼe nia família, la hakotu relasaun ho nia iha tempu neʼebé kongregasaun hasai nia, irmán neʼe bele hafolin dixiplina neʼebé nia simu ka lae? Hodi apoia ukun-fuan husi Bíblia kona-ba ema neʼebé kongregasaun hasai ona, ita hatudu katak ita hadomi buat neʼebé loos no mós hatudu katak ita simu Maromak Jeová nia direitu atu fó matadalan kona-ba buat neʼebé diʼak no aat.
“Odi buat neʼebé aat”
20, 21. Tanbasá mak importante tebes atu aprende atu odi buat neʼebé aat?
20 Apóstolu Pedro fó avizu ba ema kristaun atu “matan-moris” nafatin. Tanbasá? Nia hatete: “Imi-nia funu-balun, katak, Diabu, laʼo mai laʼo bá hanesan leaun ida, hodi buka atu han ema ruma.” (1 Ped 5:8) Oinsá ho ita? Diabu sei han ita ka lae? Tuir loloos, neʼe depende ba ita no oinsá ita aprende atu odi buat neʼebé aat.
21 Klaru katak la fasil atu odi buat neʼebé aat. Ita hotu moris mai nuʼudar ema sala-naʼin, no ita mós moris iha mundu aat neʼebé book ita atu halo tuir hakarak aat isin nian. (1 Joao 2:15-17) Maibé, hodi banati-tuir Jesus Kristu no hodi haburas domin ba Maromak Jeová, ita bele duni atu odi buat neʼebé Maromak odi. Nuneʼe, mai ita hakaʼas an atu “odi buat neʼebé aat”, hodi fiar katak Maromak Jeová “tau matan ba ema laran-metin . . . no nia salva sira husi ema aat nia liman”.—Sal 97:10.
[Nota–rodapé]
^ par. 8 Deuteronômio 18:10: “Iha imi-nia leet, labele iha ema ruma neʼebé halo nia oan mane ka feto liu husi ahi, ema neʼebé uza sasiʼik, ema neʼebé uza masonik, ka ema ruma neʼebé buka sinál, ka matan-dook, 11 ka ema neʼebé fekit ema seluk, ka ema ruma neʼebé bá konsulta iha matan-dook, ka siʼikdór kona-ba akontesimentu sira, ka ema ruma neʼebé husu ba ema mate. 12 Tanba ema hotu neʼebé halo buat hirak-neʼe, Jeová sei hakribi sira. Tanba Jeová hakribi ema hotu neʼebé halo buat hirak-neʼe, no tanba buat foʼer hirak-neʼe mak Jeová, ita-nia Maromak, hadook sira husi imi-nia leet.”
^ par. 15 Atu hetan informasaun liután kona-ba neʼe haree livru “Hela Nafatin iha Maromak nia Domin”, pájina 207-9.
^ par. 17 Haree mós Menara Pengawal 15 Januari 2007, pájina 17-20.
Oinsá ita hatán?
• Saida mak sei ajuda ita atu iha hanoin neʼebé loos kona-ba hemu tua?
• Saida mak ita presiza halo atu la simu matan-dook nia atividade?
• Tanbasá mak pornografia perigu tebes?
• Kuandu kongregasaun hasai ema neʼebé ita hadomi, oinsá mak ita hatudu katak ita odi buat neʼebé aat?
[Pergunta estudu nian]
[Dezeñu iha pájina 29]
Se ita hemu tua, ita presiza hanoin kona-ba saida?
[Dezeñu iha pájina 30]
Hasees an husi buat aat hotu neʼebé Satanás habelar
[Dezeñu iha pájina 31]
Ema neʼebé haree pornografia haburas domin ba saida?
