Pergunta husi lee-naʼin

Tanbasá mak Moisés sai hirus ba Aarão nia oan, Eleazar no Itamar lakleur depois sira-nia maun, Nadab no Abiú mate? Saida mak halo Moisés atu la sai hirus tan?—Lev 10:16-20.

Lakleur depois amlulik sira simu knaar atu serbí iha tabernákulu, Maromak Jeová oho Aarão nia oan Nadab no Abiú tanba sira hasaʼe sakrifísiu sunu nian neʼebé la tuir ukun-fuan. (Lev 10:1, 2) Iha situasaun neʼe, Moisés haruka Aarão nia oan seluk neʼebé Maromak la oho atu labele halo tuir ema Israel nia lisan kona-ba ema neʼebé mate. Iha tempu neʼebá mós, Moisés sai hirus ho Eleazar no Itamar tanba sira la han naʼan husi bibi neʼebé hasaʼe nuʼudar sakrifísiu sala nian. (Lev 9:3) Tanbasá mak Moisés sai hirus?

Ukun-fuan neʼebé Maromak Jeová fó ba Moisés hatete katak kuandu amlulik ida hasaʼe sakrifísiu sala nian, nia tenke han naʼan balu husi sakrifísiu neʼe iha pátiu tabernákulu nian. Hodi halo nuneʼe hatudu katak nia mak lori todan ba sala husi ema neʼebé fó sakrifísiu neʼe. Maibé, se raan balu husi sakrifísiu ida lori ba Fatin Santu iha tabernákulu laran, amlulik labele han naʼan husi sakrifísiu neʼe. Naʼan neʼe tenke sunu.—Lev 6:24-26, 30.

Tanba buat neʼebé akontese ba Nadab no Abiú, Moisés haree katak importante duni atu halo tuir buat hotu neʼebé Maromak Jeová haruka. Nuneʼe, Moisés sai hirus ba Eleazar no Itamar tanba sira la halo tuir ukun-fuan hodi han naʼan husi bibi neʼebé hasaʼe nuʼudar sakrifísiu sala nian, maibé sira sunu tiha sakrifísiu neʼe, maski raan husi bibi neʼe la lori tama ba Fatin Santu hodi hasaʼe ba Maromak Jeová. Moisés ho hirus husu sira tansá sira halo nuneʼe.—Lev 10:17, 18.

Aarão mak fó resposta ba Moisés nia pergunta, tanba karik Aarão mak fó lisensa ba Eleazar no Itamar atu halo ida-neʼe. Iha loron neʼe, Maromak oho ona Aarão nia oan naʼin-rua, no tan neʼe Aarão karik hanoin katak la iha amlulik ida neʼebé bele han naʼan sakrifísiu sala nian ho laran moos. Maski Maromak la fó kastigu ba amlulik sira hotu tanba sala neʼebé Nadab no Abiú halo, maibé Aarão karik sente katak se sira han sakrifísiu neʼe, ida-neʼe sei halo Maromak Jeová la kontente.—Lev 10:19.

Aarão karik sente katak tanba ninia família mak halaʼo knaar neʼe ba dala primeiru, sira tenkesér kuidadu tebes hodi sira bele halo kontente Maromak maski iha buat neʼebé kiʼik. Maibé iha loron neʼe, Nadab no Abiú hafoʼer tiha Maromak Jeová nia naran, no Maromak hatudu sai nia hirus ba sira. Tan neʼe, Aarão karik hanoin katak tanba amlulik balu husi ninia família halo sala ona, sira seluk mós labele han naʼan neʼebé hasaʼe nuʼudar sakrifísiu santu nian.

Ita bele haree katak Moisés simu buat neʼebé ninia maun hatete tanba eskritura dehan: “Kuandu Moisés rona ida-neʼe, nia sente katak neʼe diʼak iha nia matan.” (Lev 10:20) Klaru katak Maromak Jeová mós simu buat neʼebé Aarão hatete.