Keta bosok ita-nia an ho hanoin neʼebé la loos

DEPOIS Eva han tiha ai-fuan neʼebé bandu, Maromak husu nia, hodi dehan: “Saida mak ó halo?” Eva hatán: “Samea neʼe, nia lohi haʼu no tan neʼe haʼu han.” (Gên 3:13) Hodi uza samea, Satanás lohi Eva atu la halo tuir Maromak, no tan neʼe Bíblia bolu nia nuʼudar “samea uluk nian, . . . neʼebé bosok raiklaran tomak”.—Apok 12:9.

Istória husi livru Gênesis neʼe hatudu katak Satanás iha matenek atu bosok ema neʼebé la kuidadu. Klaru katak Eva monu ba ninia lia-bosok. Maski nuneʼe, ita labele hanoin katak Satanás deʼit mak iha kbiit atu lohi ita. Bíblia mós fó avizu kona-ba perigu atu ‘bosok ita-nia an’ ho hanoin neʼebé la loos.—Tgo 1:22.

Karik ita hanoin katak ita sei nunka bosok ita-nia an. Maibé, Maromak iha razaun atu fó avizu neʼe ba ita. Tan neʼe, importante atu hanoin didiʼak kona-ba saida mak bele dada ita atu bosok ita-nia an, no hanoin la loos saida mak bele lohi ita. Atu ajuda ita halo ida-neʼe, mai ita haree ezemplu ida husi Bíblia.

Sira bosok sira-nia an

Maizumenus iha tinan 537 molok Kristu, Liurai Ciro husi Pérsia hasai lei atu haruka ema judeu sira neʼebé dadur iha Babilónia atu fila ba Jerusalém no harii fali templu. (Esd 1:1, 2) Hodi tuir Maromak nia hakarak, iha tinan tuirmai, sira tau fatuk sira nuʼudar fundasaun ba templu foun neʼe. Ema Israel haksolok no hahiʼi Maromak Jeová tanba nia haraik ninia bensaun ba serbisu neʼebé sira halo ona ba templu neʼe. (Esd 3:8, 10, 11) Maibé lakleur, ema komesa atu kontra sira, no povu sai laran-tun. (Esd 4:4) Tinan 15 depois sira fila husi Babilónia, ukun-naʼin sira husi Pérsia bandu atu la halo tan serbisu atu harii templu. Sira mós haruka ema-boot atu bá Jerusalém hodi “hapara [ema judeu] ho kbiit no kroʼat sira”.—Esd 4:21-24.

Problema neʼebé ema judeu sira hasoru book sira atu iha hanoin neʼebé la loos. Sira komesa bosok sira-nia an, hodi dehan: “Tempu seidauk toʼo . . . atu harii Jeová nia uma.” (Ageu 1:2) Sira hanoin katak Maromak lakohi sira atu harii kedas ninia templu. Duké buka dalan atu halo Maromak nia hakarak, sira husik deʼit serbisu sagradu neʼebé Maromak fó ba sira, no sira sai badinas fali atu hadiʼa sira-nia uma rasik. Maromak nia profeta Ageu husu ba sira: “Imi sente katak agora mak tempu diʼak ba imi atu hela iha imi-nia uma neʼebé furak, se uma neʼe [Jeová nia templu] sei aat hela?”—Ageu 1:4.

Saida mak ita aprende husi ezemplu neʼe? Hanoin sala kona-ba Maromak nia tempu atu halaʼo ninia hakarak bele book ita atu haree ita-nia serbisu ba Maromak nuʼudar buat neʼebé ladún importante no halo fali atividade neʼebé halo ita rasik kontente. Porezemplu, hanoin toʼok katak ita hein hela bainaka atu mai. Tanba ita hein hela sira-nia vizita, ita sei badinas atu halo buat barak antes sira mai. Maibé, oinsá se ita rona katak ita-nia bainaka tarde? Ita sei lakohi tan atu prepara ka lae?

Hanoin-hetan katak Ageu no Zacarias ajuda ema judeu sira komprende katak Maromak Jeová hakarak nafatin atu sira harii fali templu lalais. Ageu fó laran-manas ba sira hodi dehan: “Sai forsa bá, imi povu hotu husi rai neʼe, no halo serbisu bá.” (Ageu 2:4) Sin, sira presiza atu kontinua halo serbisu neʼe, hodi fiar katak Maromak nia espíritu sei apoia sira. (Zac 4:6, 7) Ezemplu ida-neʼe bele ajuda ita atu la hanoin sala kona-ba Maromak Jeová nia loron, loos ka lae?—1 Kor 10:11.

 Troka hanoin neʼebé sala ho hanoin neʼebé loos

Iha apóstolu Pedro nia karta segundu, nia koʼalia kona-ba Maromak Jeová nia tempu atu halo “lalehan foun no rai foun”. (2 Ped 3:13) Nia esplika katak ema gozadór sira koʼalia hodi dehan katak Maromak sei la halo buat ida atu hadiʼa ema nia problema sira. Sira hanoin sala hodi dehan katak “buat hotu hanesan deʼit wainhira mundu neʼe hahú”. (2 Ped 3:3, 4) Pedro hakarak atu hatudu katak hanoin neʼe mak sala. Nia hakerek: “Haʼu hakaʼas an atu halo moris liután imi-nia matenek neʼebé la bosok ho haʼu-nia liafuan.” No nia fó-hanoin ninia maluk kristaun sira katak ema gozadór sira iha hanoin neʼebé la loos. Tuir loloos, uluk Maromak hamosu rai-nabeen boot atu hadiʼa mundu iha tempu neʼebá.—2 Ped 3:1, 5-7.

Iha tinan 520 molok Kristu, Ageu fó konsellu ba ema judeu neʼebé para ona atu halo serbisu atu harii fali templu tanba sira sente laran-tun, hodi dehan: “Hanoin ho imi-nia laran kona-ba imi-nia dalan sira.” (Ageu 1:5) Atubele book ninia maluk fiar-naʼin sira-nia hanoin, Ageu fó-hanoin sira kona-ba Maromak nia hakarak no promesa sira. (Ageu 1:8; 2:4, 5) Lakleur depois nia fó tiha laran-manas ba ninia maluk sira, sira hahú fali serbisu atu harii templu maski sei bandu hela. Dala ida tan ema judeu nia inimigu sira koko hapara serbisu neʼe, maibé sira la hetan susesu. Ukun-naʼin sira husi rai-Pérsia la bandu tan serbisu neʼe, no liutiha tinan lima templu harii hotu ona.—Esd 6:14, 15; Ageu 1:14, 15.

Hanoin kona-ba ita-nia dalan sira

Hanesan ema judeu sira iha Ageu nia tempu, dala ruma ita mós sai laran-tun kuandu susar ruma mosu. Se neʼe akontese, karik ida-neʼe halo susar ba ita atu nafatin laran-manas hodi haklaken lia-foun diʼak. Entaun, susar saida mak bele halo ita sente laran-tun? Karik buat la loos neʼebé akontese iha mundu aat neʼe lori susar ba ita. Hanoin toʼok kona-ba Habacuc, neʼebé hatete: “Oh, Jeová, ba tempu hira mak haʼu tenke bolu atu husu ajuda, no Ita la rona haʼu? Ba tempu hira mak haʼu sei bolu Ita atu Ita salva haʼu husi violénsia, no Ita la salva haʼu?” (Hab 1:2) Se ema kristaun ida hanoin katak Maromak demora atu hadiʼa mundu neʼe, ida-neʼe bele book nia atu la tau uluk Maromak nia serbisu no buka fali atu hetan moris neʼebé diʼak. Ida-neʼe akontese ba ita ka lae? Se ita komesa atu hanoin hanesan neʼe, neʼe katak ita bosok ita-nia an. Tan neʼe, importante atu halo tuir konsellu atu ‘hanoin ho ita-nia laran kona-ba ita-nia dalan sira’ no ‘halo moris liután ita-nia matenek’! Ita bele husu ita-nia an: ‘Haʼu presiza hakfodak hodi haree katak mundu aat neʼe la ramata lalais tuir haʼu-nia hakarak ka lae?’

Bíblia fó avizu kona-ba matan-moris

Hanoin toʼok kona-ba Jesus nia liafuan kona-ba mundu aat neʼe nia rohan. Iha livru Marcos, Jesus fó avizu beibeik ba ita atu matan-moris nafatin durante loron ikus sira. (Mc 13:33-37) Ita mós hetan avizu neʼebé hanesan iha parte seluk iha Bíblia laran neʼebé esplika kona-ba Maromak Jeová nia loron boot  iha Armagedon. (Apok 16:14-16) Tanbasá mak Bíblia fó beibeik avizu atu matan-moris? Tuir loloos, ita presiza avizu sira-neʼe tanba ita ema bele hanoin katak loron neʼe tarde atu mai, no hanoin hanesan neʼe bele halo susar mai ita atu nafatin matan-moris.

Jesus fó ai-knanoik ida hodi ajuda ita atu komprende katak importante ba ita atu kontinua matan-moris nuʼudar ita hein ba mundu aat neʼe nia rohan. Iha ai-knanoik neʼe, Jesus koʼalia kona-ba uma-naʼin ida neʼebé lakon ninia sasán tanba naʼok-teen tama nia uma hodi naʼok. Saida mak uma-naʼin neʼe tenke halo atu proteje ninia sasán husi naʼok-teen? Nia presiza matan-moris ba kalan tomak. Jesus ramata ninia ai-knanoik ho konsellu tuirmai: “Matan-moris bá, basá imi la hatene iha sá oras Oan-Mane sei mai.”—Mt 24:43, 44.

Ai-knanoik neʼe hatudu katak ita tenke matan-moris nafatin hodi prontu atu hein maski ba tempu naruk. Ita labele hanoin demais katak mundu aat neʼe la ramata lalais tuir ita-nia hakarak. Ita labele bosok ita-nia an ho hanoin neʼebé la loos hanesan ‘Maromak Jeová nia loron sei kleur’. Hanoin hanesan neʼe bele hamate ita-nia hakarak atu haklaken lia-foun diʼak kona-ba Maromak nia Ukun.—Rom 12:11.

Fokit sai hanoin neʼebé la loos

Matadalan iha Galasia 6:7 ajuda ita atu la monu ba hanoin neʼebé la loos. Eskritura neʼe dehan: “Keta bosok imi an . . . Ema ida sei koʼa buat neʼebé nia kari.” Kuandu ita husik deʼit rai mamuk no la kuda buat ida, lakleur deʼit rai neʼe sei nakonu fali ho duʼut aat. Hanesan neʼe mós, se ita la ‘halo moris liután ita-nia matenek’, hanoin neʼebé la loos bele sai abut iha ita-nia neon. Porezemplu, karik ita hanoin: ‘Haʼu fiar katak Maromak Jeová nia loron sei mai duni, maibé neʼe sei kleur.’ Hanoin hanesan neʼe bele book ita atu sai baruk atu halo atividade kristaun nian. Ikusmai, ita sei lakon ita-nia laran-manas atu serbí Maromak. No Maromak Jeová nia loron bele toman ita hanesan naʼok-teen ida.—2 Ped 3:10.

Maibé, hanoin neʼebé la loos sei la sai abut iha ita-nia neon se ita nafatin hafoun ita-nia hanoin atu bele “hatene loloos buat neʼebé Maromak hakarak”. (Rom 12:2) Lee beibeik Maromak nia Liafuan mak dalan ida neʼebé diʼak liu atu ajuda ita hafoun ita-nia hanoin. Eskritura sira bele hametin ita-nia fiar katak Maromak Jeová sempre halaʼo buat hotu iha tempu neʼebé nia deside ona.—Hab 2:3.

Hodi estuda, halo orasaun, tuir reuniaun beibeik, bá haklaken, no hatudu hahalok laran-diʼak, sei ajuda ita atu hanoin nafatin kona-ba Maromak Jeová nia loron. (2 Ped 3:11, 12, MF) Maromak Jeová sei haree ita-nia badinas. Apóstolu Paulo hatete: “Ita keta kole halo hahalok diʼak sira; ita la baruk karik hodi bá oin nafatin, loron sei toʼo mai wainhira ita sei halibur fuan sira.”—Gal 6:9.

Sin, agora laʼós tempu atu husik hanoin neʼebé la loos bosok ita atu sente katak Maromak Jeová nia loron sei demora atu mai. Duké hanoin hanesan neʼe, mai ita hakaʼas an atu hametin ita-nia fiar tanba Maromak Jeová nia loron besik daudauk ona.

[Dezeñu iha pájina 4]

Ageu no Zacarias fó laran-manas ba ema judeu atu harii fali templu

[Dezeñu iha pájina 5]

Oinsá se uma-naʼin hatene katak naʼok-teen atu mai?