Keta hadook an husi ita-nia maluk fiar-naʼin

IRMAUN ida naran Jaroslaw no ninia feen Beata * hatete: “Durante tinan sanulu nia laran, ami hanoin deʼit kona-ba serbisu atu manán osan, no tan neʼe ami moris ho rikusoin barak. Maski ami-nia inan-aman haboot ami iha lia-loos, maibé ami sai dook husi Maromak Jeová no sente katak ami la iha forsa atu fila fali.”

Irmaun ida seluk naran Marek, dehan: “Tanba situasaun polítiku no ekonomia troka beibeik iha rai-Polónia, haʼu lakon haʼu-nia serbisu beibeik. Haʼu sente estrese. Uluk haʼu taʼuk atu harii haʼu-nia negósiu rasik tanba haʼu la iha matenek atu halo ida-neʼe. Maibé, ikusmai haʼu koko atu harii haʼu-nia negósiu rasik tanba haʼu hanoin katak ida-neʼe sei ajuda haʼu atu tau matan didiʼak ba haʼu-nia família nia presiza loroloron nian. Haʼu mós hanoin katak hodi halo negósiu neʼe sei la hanetik haʼu-nia serbisu ba Maromak. Maski nuneʼe, depois tempu balu liutiha, haʼu haree katak haʼu-nia hanoin neʼe la loos.”

Ohin loron, sasán nia folin aumenta ba beibeik, no mós ema barak lakon sira-nia serbisu. Iha situasaun susar sira-neʼe, dala ruma ema balu halo desizaun neʼebé la matenek. Irmaun balu deside atu halo serbisu ho oras barak liután, ka harii sira-nia negósiu rasik maski sira la iha esperiénsia. Sira hanoin katak hodi manán osan barak liután sei  ajuda sira-nia família, no katak serbisu neʼe sei la estraga sira-nia relasaun ho Maromak Jeová. Maibé situasaun ekonomia neʼebé troka beibeik bele estraga sira-nia planu, maski sira halo planu ho loos. Ikusmai, irmaun balu monu ba lasu hodi hanoin deʼit kona-ba rikusoin, no sira husik ida-neʼe hanetik sira-nia serbisu ba Maromak.—Ecle 9:11, 12.

Irmaun-irmán balu uza tempu barak liu atu halo serbisu, no ida-neʼe halo sira la iha tempu atu estuda mesak, tuir reuniaun sira, ka bá haklaken. Klaru katak kuandu husik atividade kristaun sira-neʼe, ida-neʼe sei hanetik sira-nia adorasaun no bele estraga sira-nia relasaun ho Maromak Jeová. Ikusmai, karik sira mós sei husik buat ida tan neʼebé importante, neʼe mak sira-nia relasaun ho maluk “iha fiar”. (Gal 6:10) Irmaun balu neineik-neineik hadook an husi maluk fiar-naʼin sira. Entaun, mai ita haree informasaun tan kona-ba neʼe.

Ita-nia responsabilidade ba maluk fiar-naʼin

Nuʼudar irmaun-irmán, ita iha oportunidade barak atu hatudu domin ba malu. (Rom 13:8) Karik iha ita-nia kongregasaun, ita haree ona ‘ema neʼebé halerik hodi husu ajuda’. (Jó 29:12) Sira balu karik ladún iha buat neʼebé sira presiza atu moris. Apóstolu João fó matadalan kona-ba buat neʼebé ita bele halo iha situasaun neʼe. Nia dehan: “Ema riku ida haree nia maluk iha susar laran karik, maibé taka nia fuan ba nia, Maromak nia domin horik iha nia oinsá loos?”—1 Joao 3:17.

Karik ita ajuda ona irmaun sira iha situasaun hanesan neʼe hodi fó buat neʼebé sira presiza. Maibé, hatudu domin ba maluk fiar-naʼin laʼós deʼit kona-ba fó sasán. Sira balu halerik hodi husu ajuda tanba sira sente mesamesak ka laran-tun. Dala ruma sira sente katak sira la iha folin, sira sai moras, ka sira triste tanba ema neʼebé sira hadomi mate. Entaun, dalan ida atu bele fó laran-manas ba sira mak hodi rona didiʼak ba sira no koʼalia ho sira. Hodi halo nuneʼe, ita ajuda sira atu sente kmaan fali, no mós hametin sira-nia relasaun ho Maromak Jeová. (1 Tes 5:14) Ida-neʼe mós sei hametin liután ita-nia domin ba malu nuʼudar irmaun-irmán.

Katuas sira iha kongregasaun presiza duni atu rona didiʼak ba ema neʼebé husu ajuda, hatudu katak sira hanoin ema neʼe, no mós fó matadalan husi Bíblia atu ajuda nia. (Apos 20:28) Hodi halo nuneʼe, sira halo tuir ezemplu husi apóstolu Paulo neʼebé “hadomi” ninia irmaun-irmán sira.—1 Tes 2:7, 8.

Maibé, oinsá mak ema kristaun bele ajuda ninia maluk fiar-naʼin se nia rasik laʼo dook husi kongregasaun? Ita hotu, inklui mós katuas sira iha kongregasaun, bele monu ba tentasaun atu buka uluk rikusoin. Entaun, saida mak ema kristaun ida bele halo se nia monu ona ba tentasaun neʼe?

Laran-susar bele hatodan ita

Hanesan ita temi tiha ona, importante atu serbisu makaʼas atu tau matan ba ita-nia família nia  presiza. Maski nuneʼe, ida-neʼe mós bele lori laran-susar no bele halo fraku ita-nia relasaun ho Maromak. (Mt 13:22) Marek, neʼebé ita temi uluk, hatete: “Kuandu haʼu-nia negósiu la hetan susesu, haʼu deside atu buka serbisu iha rai seluk, hodi bele manán osan barak. Haʼu-nia planu mak atu husik haʼu-nia família ba fulan tolu deʼit, maibé depois neʼe haʼu aumenta serbisu ba fulan tolu tan, no haʼu kontinua atu halo hanesan neʼe ba tempu kleur. Haʼu fila fali atu haree haʼu-nia família ba tempu uitoan deʼit. Tan neʼe, haʼu-nia feen neʼebé laʼós Testemuña, sente estrese no laran-tun.”

Marek nia desizaun laʼós deʼit lori susar ba nia moris família nian, maibé lori mós susar seluk tan. Nia hatete: “Haʼu tenke serbisu oras barak tebes iha rai-manas. Liután neʼe, haʼu tenke serbisu hamutuk ho ema aat neʼebé gosta atu hanehan malu. Sira-nia hahalok hanesan ema bandidu sira. Haʼu sente laran-tun no mós sente katak haʼu sai atan ba ema seluk. Tanba haʼu la iha tempu atu tau matan ba haʼu-nia an rasik, haʼu komesa hanoin katak haʼu la iha kbiit atu ajuda haʼu-nia maluk fiar-naʼin.”

Rezultadu aat neʼebé mosu husi Marek nia desizaun neʼe hatudu katak ita presiza hanoin didiʼak antes halo desizaun ruma. Maski ita fiar katak muda ba rai seluk sei resolve problema kona-ba osan, maibé ida-neʼe bele hamosu fali problema seluk ka lae? Porezemplu, saida mak sei akontese ba ita-nia família nia relasaun ho Maromak no sira-nia sentimentu? Karik hodi muda ba fatin seluk sei hakotu ita-nia relasaun ho kongregasaun ka lae? Ida-neʼe sei hanetik ita atu bele serbí no ajuda ita-nia maluk fiar-naʼin ka lae?—1 Tim 3:2-5.

Maibé, karik ita mós hatene katak laʼós muda ba rai seluk deʼit mak bele halo ema monu ba lasu atu sai okupadu liu. Hanoin toʼok kona-ba Jaroslaw no Beata. Jaroslaw hatete: “Kuandu ami foin kaben, ami komesa halo negósiu kiʼik atu faʼan hahán. Foufoun, serbisu neʼe simples deʼit. Maibé, tanba ami manán osan barak, ami deside atu halo boot liután ami-nia negósiu. Serbisu neʼe halo ami ladún iha tempu, tan neʼe ami komesa falta reuniaun sira. Lakleur deʼit, haʼu para atu serbí nuʼudar pioneiru no la serbí tan nuʼudar atan ba kongregasaun. Tanba ami manán osan barak, ida-neʼe book ami atu halo kontratu ho ema neʼebé laʼós fiar-naʼin hodi loke restaurante boot. Lakleur depois neʼe, haʼu laʼo ba rai oioin hodi halo kontratu neʼebé bele manán osan rihun ba rihun. Haʼu la hela metin iha haʼu-nia uma, no haʼu-nia relasaun ho haʼu-nia feen no oan-feto sai fraku. Ikusmai, ami okupadu liu ho ami-nia negósiu toʼo ami la serbí tan Maromak Jeová. Tanba ami dook husi kongregasaun, ami la hanoin tan kona-ba ami-nia irmaun-irmán sira.”

Ita bele aprende lisaun saida husi esperiénsia neʼe? Hakarak atu buka moris neʼebé diʼak no seguru bele sai lasu ba ita, toʼo ikusmai ita bele hamenus ita-nia serbisu ba Maromak, no ita mós bele lakon ita-nia hahalok kristaun nian neʼebé hanesan “hatais” furak iha Maromak nia oin. (Apok 16:15) No ida-neʼe mós bele hadook ita husi ita-nia irmaun sira neʼebé uluk ita prontu atu ajuda.

Hanoin didiʼak kona-ba ita-nia an

Karik ita hanoin: ‘Ida-neʼe sei la akontese mai haʼu.’ Maibé, diʼak atu ita ida-idak hanoin didiʼak kona-ba osan ka sasán hira mak ita presiza atu halaʼo ita-nia moris. Apóstolu Paulo hakerek: “Ita la lori buat ida mai mundu neʼe, no ita sei la lori sai buat ida husi nia; maibé wainhira ita iha ai-han no hatais, ita haksolok ona ho sira-neʼe.” (1 Tim 6:7, 8) Klaru katak situasaun moris iha rai ida-idak la hanesan tanba rai balu riku no rai balu kiak. Iha rai riku buat neʼebé ema hanoin katak moris simples bele haree hanesan moris neʼebé diʼak ba ema husi rai kiak.

Maski ita moris iha rai riku ka rai kiak, hanoin toʼok kona-ba Paulo nia liafuan tuirmai: “Ema neʼebé hakarak sai riku hetan babeur barak; sira hetan sira an ho hakarak beik no perigozu oioin, neʼebé neineik sei lori sira ba susar boot no todan.” (1 Tim 6:9) Hakarak atu sai riku mak hanesan lasu ida, no ida-neʼe bele kona ita maski ita la hatene. Oinsá mak ita bele hasees an husi lasu “perigozu” neʼe?

Hodi tau uluk buat neʼebé importante liu iha ita-nia moris, ida-neʼe bele ajuda ita atu uza tempu barak liu hodi serbí Maromak Jeová, neʼe inklui estuda mesak. Kuandu ema kristaun halo orasaun no estuda mesak, sira bele “hetan kbiit no hadiʼa an” atu bele ajuda ema seluk.—2 Tim 2:15; 3:17.

 Durante tinan balu, katuas sira iha kongregasaun hatudu domin hodi hametin no fó laran-manas ba Jaroslaw. Ida-neʼe book nia atu troka buat barak iha ninia moris. Nia dehan: “Loron ida, kuandu haʼu koʼalia ho katuas sira, sira hatudu ezemplu husi Bíblia laran kona-ba mane riku ida neʼebé hakarak atu moris ba nafatin maibé nia la prontu atu husik ninia rikusoin. Tuirmai, katuas sira ho laran-diʼak husu se istória neʼe kona haʼu-nia situasaun. Neʼe loke duni haʼu-nia matan atu hatene buat neʼebé haʼu presiza hadiʼa!”—Prov 11:28; Mc 10:17-22.

Jaroslaw ho laran-moos hanoin kona-ba ninia situasaun no deside atu la envolve an tan iha negósiu neʼebé boot. Liutiha tinan rua, nia no ninia família hametin fali sira-nia relasaun ho Maromak Jeová. Agora nia ajuda ninia maluk fiar-naʼin hodi serbí nuʼudar katuas kongregasaun nian. Jaroslaw hatete: “Kuandu irmaun sira uza tempu barak liu atu halo negósiu toʼo la halo sira-nia serbisu ba Maromak, haʼu uza haʼu-nia esperiénsia rasik atu hatudu katak la matenek duni atu kesi ita-nia an ho sira neʼebé laʼós fiar-naʼin. Kuandu serbisu hamutuk ho ema hanesan neʼe, la fasil atu tahan hasoru tentasaun neʼebé bele mosu no susar atu hatudu laran-moos nafatin.”—2 Kor 6:14.

Marek mós aprende buat barak husi ninia esperiénsia rasik. Maski nia manán osan barak iha rai seluk hodi ajuda ninia família atu iha moris neʼebé diʼak, maibé ninia relasaun ho Maromak no ho ninia irmaun sira sai la diʼak. Liutiha tinan balu, nia hadiʼa ninia hanoin kona-ba buat neʼebé importante liu. Nia hatete: “Haʼu-nia situasaun sai hanesan Baruc husi tempu antigu neʼebé ‘kontinua buka buat boot ba nia an rasik’. Ikusmai, haʼu fakar haʼu-nia laran ba Maromak Jeová, hodi fó-hatene nia kona-ba haʼu-nia laran-susar. Agora haʼu sente katak haʼu hadiʼa fali haʼu-nia relasaun ho Maromak.” (Jer 45:1-5) Agora Marek hakarak atu “halo serbisu neʼebé diʼak loos” hodi hakaʼas an atu sai nuʼudar katuas iha kongregasaun.—1 Tim 3:1.

Marek fó avizu tuirmai ba sira neʼebé hanoin kona-ba muda ba rai seluk atu buka serbisu neʼebé diʼak, hodi dehan: “Kuandu ita muda ba rai seluk, fasil duni atu monu ba lasu oioin husi mundu aat neʼe. Ladún hatene ema nia língua mós bele hanetik ita atu koʼalia ho ema seluk. Maski ita bele fila ba uma ho osan balu, maibé ita-nia relasaun ho Maromak sai fraku, no ida-neʼe karik presiza tempu naruk atu hadiʼa.”

Hodi tetu didiʼak kona-ba serbisu atu manán osan no ita-nia responsabilidade atu ajuda ita-nia maluk fiar-naʼin, ida-neʼe sei ajuda ita atu foti desizaun neʼebé halo Maromak Jeová kontente. Ita mós bele fó ezemplu neʼebé diʼak hodi book ema seluk atu halo desizaun neʼebé matenek. Sira neʼebé sente laran-tun presiza simu apoiu, domin no mós ezemplu neʼebé diʼak husi sira-nia irmaun-irmán sira. Katuas sira iha kongregasaun no ema seluk neʼebé iha esperiénsia barak bele ajuda maluk fiar-naʼin atu nafatin iha hanoin neʼebé loos no ajuda sira atu la husik estrese kona-ba buka moris domina sira.—Ebr 13:7.

Sin, mai ita nunka hadook an husi ita-nia maluk fiar-naʼin sira, no mai ita la uza tempu barak demais iha serbisu atu manán osan. (Flp 1:10) Duké halo ida-neʼe, mai ita sai “riku ba Maromak” hodi tau uluk ninia Ukun iha ita-nia moris.—Lc 12:21.

[Nota–rodapé]

[Dezeñu iha pájina 21]

Ita-nia serbisu atu manán osan hanetik ita atu tuir reuniaun sira ka lae?

[Dezeñu iha pájina 23]

Ita hafolin oportunidade atu ajuda ita-nia irmaun-irmán sira ka lae?