Tau fiar ba Maromak Jeová iha tempu hotu
Tau fiar ba Maromak Jeová iha tempu hotu
“Imi hotu tau fiar ba Jeová iha tempu hotu.”—ISA 26:4.
1. Saida mak la hanesan entre Maromak nia atan sira no ema iha mundu neʼe?
EMA rihun ba rihun iha mundu neʼe la hatene ona atu tau fiar ba sé loos. Karik sira sente hanesan neʼe tanba ema neʼebé sira fiar hakanek sira no karik dala barak buat neʼebé sira hein la sai loos. Maibé, Maromak Jeová nia atan sira la sente hanesan neʼe! Tanba sira iha matenek husi Maromak, sira hatene katak saugati deʼit atu tau fiar ba mundu neʼe ka ba ninia “ulun-naʼin sira”. (Sal 146:3) Sira tau sira-nia moris no sira-nia futuru iha Maromak Jeová nia liman, tanba sira hatene katak nia hadomi sira no mós katak nia sempre kumpre ninia Liafuan.—Rom 3:4; 8:38, 39, MF.
2. Josué hatete saida kona-ba tau fiar ba Maromak?
2 Klaru katak ema bele duni tau fiar tomak ba Maromak. Josué husi tempu uluk sai nuʼudar sasin kona-ba neʼe. Kuandu nia besik ona atu mate, nia hatete ba ninia maluk Israel sira hodi dehan: “Imi hatene ho imi-nia laran tomak no ho imi-nia moris tomak katak husi liafuan diʼak hotu neʼebé Jeová, imi-nia Maromak, hatete ba imi, la iha ida mak la sai loos. Sira hotu sai loos ba imi.”—Jos 23:14.
3. Maromak nia naran hatudu saida kona-ba nia?
3 Maromak Jeová kumpre buat hotu neʼebé nia promete, laʼós deʼit tanba nia hadomi ninia atan sira, maibé liuliu tanba ninia naran. (Êx 3:14; 1 Sam 12:22) Iha The Emphasized Bible, J. B. Rotherham esplika kona-ba Maromak nia naran hodi dehan: “[Naran neʼe] mak sai hanesan promesa neʼebé diʼak liu hotu; Maromak iha kbiit atu sai buat naran deʼit iha situasaun naran deʼit, iha susar naran deʼit . . . [Naran neʼe] mak promesa ida, . . . [naran neʼe] ajuda ita atu hatene, no atu hanoin-hetan kona-ba nia. Ba naran neʼe mak Maromak sei laran-metin nafatin; kona-ba naran neʼe Nia sei nunka sente moe.”
4. (a) Isaías 26:4 fó laran-manas mai ita atu halo saida? (b) Lisaun neʼe sei koʼalia kona-ba saida deʼit?
4 Husu ita-nia an: ‘Haʼu hatene didiʼak Maromak Jeová hodi haʼu bele tau fiar tomak ba nia ka lae? Haʼu hateke ba futuru ho fiar-metin hodi hatene katak Maromak mak kontrola buat hotu?’ Isaías 26:4 hatete: “Imi hotu tau fiar ba Jeová iha tempu hotu, tanba Jah Jeová mak imi-nia Fatuk toʼo tempu neʼebé la bele sura.” Ita hotu hatene katak ohin loron Maromak la hadiʼa kedas ema nia problema sira ho milagre hanesan iha tempu Bíblia nian. Maski nuneʼe, Maromak nuʼudar ita-nia “Fatuk toʼo tempu neʼebé la bele sura” merese atu ita tau fiar ba nia “iha tempu hotu”. Oinsá mak ita-nia Maromak neʼebé ita bele fiar ajuda ninia atan sira ohin loron? Mai ita hanoin kona-ba dalan tolu: Oinsá Maromak hametin ita kuandu ita buka ninia ajuda atu tahan hasoru tentasaun, oinsá nia apoia ita kuandu ita hasoru ema neʼebé lakohi rona ita ka kontra ita, no oinsá nia halo ita sente kmaan kuandu susar ruma hatodan ita. Nuʼudar ita haree kona-ba buat tolu neʼe, diʼak atu hanoin kona-ba oinsá mak ita bele hametin ita-nia fiar ba Maromak Jeová.
Tau fiar ba Maromak kuandu hasoru tentasaun atu halo sala
5. Iha situasaun saida mak dala ruma susar ba ita atu tau fiar ba Maromak?
5 Dala barak fasil atu tau fiar ba buat neʼebé Maromak Jeová promete kona-ba mundu foun ka moris-hiʼas tanba buat sira-neʼe ita hein namanas. Maibé, dala ruma karik susar atu tau fiar ba ninia matadalan sira kona-ba buat morál nian, hodi fiar ho laran katak halo tuir ninia matadalan sira mak buat neʼebé loos no bele fó ita moris neʼebé kontente. Liurai Salomão hakerek konsellu tuirmai: “Fiar ba Maromak Jeová ho laran tomak no labele sadere ba ó-nia matenek rasik. Iha ó-nia dalan hotu fó atensaun ba nia, no nia rasik sei halo ó-nia dalan sai loos.” (Prov 3:5, 6) Eskritura neʼe fó konsellu mai ita atu tau fiar ba Maromak iha “dalan hotu” iha ita-nia moris, laʼós deʼit atu tau fiar ba buat neʼebé Maromak promete ba futuru. Entaun, oinsá mak ita bele hatudu fiar neʼe kuandu ita hasoru tentasaun atu halo sala?
6. Oinsá mak ita bele hametin ita-nia hakarak atu la simu hanoin neʼebé aat?
6 Atu hasees an husi buat neʼebé aat, ita presiza kontrola buat neʼebé ita hanoin. (Lee Roma 8:5; Efeso 2:3.) Nuneʼe, oinsá mak ita bele hametin ita-nia hakarak atu la simu hanoin neʼebé aat? Hanoin toʼok kona-ba dalan lima tuirmai neʼe: 1. Buka Maromak nia ajuda liuhusi orasaun. (Mt 6:9, 13) 2. Hanoin kleʼan kona-ba ema iha Bíblia laran neʼebé rona ba Maromak Jeová no mós sira neʼebé la rona ba Maromak. Tuirmai, haree saida mak akontese ba sira ida-idak. * (1 Kor 10:8-11) 3. Hanoin kona-ba estrese neʼebé ita no ita-nia família bele hetan se ita monu ba sala. 4. Hanoin kona-ba oinsá Maromak sente kuandu ninia atan ida halo sala boot. (Lee Salmo 78:40, 41. *) 5. Hanoin mós kona-ba ksolok neʼebé Maromak Jeová sente kuandu nia haree ninia atan ida neʼebé laran-metin la simu buat neʼebé aat no halo buat neʼebé loos, maski ema seluk haree ka la haree. (Sal 15:1, 2; Prov 27:11) Ita mós bele hatudu katak ita tau fiar ba Maromak Jeová hodi halo buat neʼebé loos.
Tau fiar ba Maromak kuandu ema lakohi rona ka kontra ita
7. Buat saida deʼit mak koko Jeremias nia fiar? Dala ruma nia sente oinsá?
7 Ita-nia irmaun-irmán barak serbí iha rai neʼebé susar tebes atu haklaken. Profeta Jeremias serbí iha situasaun hanesan neʼe. Nia serbí iha loron ikus sira ba nasaun Judá nian neʼebé nakonu ho susar. Tanba nia laran-metin atu fó sai Maromak nia mensajen tesi-lia nian, loroloron nia hasoru susar neʼebé koko ninia fiar. Iha tempu ida, ninia sekretáriu neʼebé laran-metin, naran Baruc, hatete katak nia kole ona. (Jer 45:2, 3) Susar sira-neʼe halo Jeremias sente laran-tun demais toʼo lakon ninia fiar ka lae? Tuir loloos, dala ruma nia sente laran-tun. Nia hatete: “Malisan ba loron neʼebé haʼu moris mai! . . . Tanbasá mak haʼu sai husi knotak hodi haree deʼit serbisu todan no laran-susar no haʼu-nia loron sira ramata ho moe deʼit?”—Jer 20:14, 15, 18.
8, 9. Tuir Jeremias 17:7, 8 no Salmo 1:1-3, saida mak ita presiza halo atu kontinua fó fuan diʼak?
8 Maski nuneʼe, Jeremias la rende an. Nia kontinua nafatin atu tau fiar ba Maromak Jeová. Tan neʼe, profeta neʼe neʼebé laran-metin, haree rasik oinsá mak Maromak Jeová nia liafuan neʼebé hakerek iha Jeremias 17:7, 8 sai loos: “Bensaun ba mane neʼebé tau fiar ba Jeová, no neʼebé laran-metin deʼit ba Jeová. No nia sei sai hanesan ai-hun neʼebé kuda besik bee, neʼebé hasai ninia abut toʼo bee-dalan; no nia sei la sente buat ida kuandu rai-manas mosu, maibé ninia tahan sei sai buras loos. No iha tempu bailoro nia sei la sente laran-taridu, no nia sei nunka para atu fó fuan.”
9 Hanesan ai-hun neʼebé buras tanba “kuda besik bee”, Jeremias “nunka para atu fó fuan”. Maski ema aat sira goza nia, maibé nia la husik ida-neʼe atu kona ninia hanoin. Nia kaer metin ba Maromak nuʼudar Ida neʼebé Hun ba “bee” moris nian, no nia simu ho laran buat hotu neʼebé Maromak Jeová hatete ba nia. (Sal 1:1-3; Jer 20:9) Sin, Jeremias fó ezemplu neʼebé kapás tebes ba ita, liuliu ba sira neʼebé serbí iha rai neʼebé susar atu haklaken! Se ita serbí iha situasaun hanesan neʼe, ita presiza kontinua nafatin atu sadere ba Maromak Jeová neʼebé sei ajuda ita atu tahan nuʼudar ita “hasaʼe sakrifísiu hahiʼi nian” ba ninia naran.—Ebr 13:15.
10. Bensaun saida deʼit mak ita simu ona? Diʼak atu husu ita-nia an pergunta saida?
10 Maromak Jeová fó ona mai ita buat barak hodi ajuda ita atu tahan susar oioin iha loron ikus sira-neʼe. Porezemplu, nia fó mai ita ninia Liafuan neʼebé kompletu, neʼebé sei kontinua tradús ba língua barak tan. Nia fó ai-han espirituál barak iha tempu neʼebé loos liuhusi ‘atan laran-metin no matenek’. No mós, liuhusi kongregasaun no reuniaun boot sira, Maromak fó mai ita maluk fiar-naʼin neʼebé apoia ita. Entaun, ita simu ho laran no hafolin buat hotu neʼebé Maromak fó mai ita ka lae? Ema hotu neʼebé halo nuneʼe “sei hasaʼe lian ho haksolok tanba sente diʼak iha laran”. Maibé, sira neʼebé la rona ba Maromak ‘sei tanis hakilar tanba sira-nia laran-susar no sira sei halerik tanba laran-kraik’.—Isa 65:13, 14.
Tau fiar ba Maromak kuandu hasoru laran-susar
11, 12. Mundu neʼe nakonu ho problema, tan neʼe matenek ba ita atu halo saida?
11 Hodi tuir buat neʼebé Bíblia fó-hatene nanis, ohin loron susar sira aumenta ba beibeik toʼo sai hanesan bee neʼebé saʼe, no ida-neʼe halo ema sente katak sira atu mout ona. (Mt 24:6-8; Apok 12:12) Baibain kuandu bee saʼe, buat primeiru neʼebé ema halo mak halai ba fatin aas ka saʼe ba uma-kakuluk atu hetan protesaun. Nuneʼe mós, nuʼudar mundu sai nakonu ho problema, ema rihun ba rihun buka protesaun iha organizasaun polítiku, relijiaun, ka osan, no mós buka protesaun iha siénsia no teknolojia. Maibé, tuir loloos buat sira-neʼe la fó protesaun neʼebé loos. (Jer 17:5, 6) Tan neʼe, Maromak Jeová nia atan sira la buka protesaun iha buat sira-neʼe. Sira hetan ona fatin neʼebé seguru, neʼe mak Maromak nuʼudar sira-nia “Fatuk toʼo tempu neʼebé la bele sura”. (Isa 26:4) Ema neʼebé hakerek salmu ida dehan: “[Jeová] mak haʼu-nia fatuk no haʼu-nia salvasaun, haʼu-nia fatin aas neʼebé seguru.” (Sal 62:6; lee Salmo 62:8. *) Oinsá mak ita bele halo Fatuk neʼe sai ita-nia fatin protesaun nian?
12 Ita hatudu katak ita kaer metin ba Maromak Jeová kuandu ita halo tuir ninia Liafuan. Dala barak Maromak nia Liafuan la hanesan ho matenek mundu nian. (Sal 73:23, 24) Porezemplu, ema neʼebé halo tuir matenek husi mundu neʼe, karik hatete: ‘Ita moris dala ida deʼit; tan neʼe, goza ita-nia moris bá.’ ‘Buka serbisu diʼak.’ ‘Manán osan barak.’ ‘Sosa ida-neʼe, sosa ida-neʼebá.’ ‘Bá pasiar iha rai seluk no haree mundu.’ Maibé, Maromak nia matenek la hanesan neʼe. Bíblia fó konsellu ba “sira neʼebé moris iha mundu neʼe” atu halaʼo sira-nia moris hanesan sira “la moris iha mundu neʼe. Basá mundu neʼe nuʼudar ohin sei mohu”. (1 Kor 7:31) Jesus mós fó konsellu ba ita atu nafatin tau uluk adorasaun ba Maromak Jeová iha ita-nia moris, hodi nuneʼe ita sei halibur “rikusoin iha lalehan”, iha neʼebé sei nunka lakon.—Mt 6:19, 20.
13. Hodi hanoin kona-ba 1 Joao 2:15-17, diʼak atu husu ita-nia an pergunta saida deʼit?
13 Dalan neʼebé ita haree “mundu” neʼe no “buat naran deʼit neʼebé mundu neʼe nian” hatudu katak ita tau fiar tomak ba Maromak ka lae? (1 Joao 2:15-17) Ita hafolin ita-nia relasaun diʼak ho Maromak no hafolin ita-nia knaar atu serbí nia, ka ita hafolin liu buat mundu neʼe nian? (Flp 3:8) Ita hakaʼas an atu nafatin iha “matan diʼak” ka matan neʼebé simples ka lae? (Mt 6:22) Klaru katak Maromak lakohi ita atu husik deʼit ita-nia responsabilidade sira, liuliu se ita iha família atu tau matan. (1 Tim 5:8) Maibé, Maromak hakarak ninia atan sira atu tau fiar tomak ba nia, laʼós ba Satanás nia mundu neʼebé besik ona atu mohu.—Ebr 13:5.
14-16. Bensaun saida mak ema balu simu tanba iha matan neʼebé simples no tanba tau uluk Maromak nia hakarak?
14 Hanoin toʼok kona-ba esperiénsia husi Richard no Ruth, neʼebé iha oan naʼin-tolu. Richard dehan: “Haʼu sente katak haʼu bele halo buat barak liután iha Maromak Jeová nia serbisu. Haʼu iha moris neʼebé diʼak, maibé haʼu sente katak haʼu fó deʼit ba Maromak buat neʼebé resin. Depois halo tiha orasaun kona-ba neʼe, no haree didiʼak ba haʼu-nia situasaun, haʼu no Ruth deside atu haʼu husu haʼu-nia patraun atu hamenus haʼu-nia loron serbisu nian ba loron haat iha semana ida nia laran. Ami halo ida-neʼe maski ami-nia rai iha krize ekonomia. Haʼu-nia patraun hatán atu halo ida-neʼe, no semana balu liutiha haʼu komesa halo serbisu ba loron haat iha semana ida nia laran.” Agora Richard sente oinsá?
15 Nia hatete: “Maski osan neʼebé haʼu simu sai menus ba porsentu 20, maibé agora haʼu iha loron 50 tan iha tinan ida nia laran atu hamutuk ho haʼu-nia família no treinu haʼu-nia oan sira. Oras neʼebé haʼu uza iha serbisu haklaken aumenta ba dala rua, númeru estudu Bíblia neʼebé haʼu halaʼo aumenta ba dala tolu, no haʼu iha tempu barak liu atu apoia kongregasaun nia serbisu haklaken. No mós, tanba haʼu iha tempu barak liután atu ajuda tau matan ba ami-nia oan sira, ida-neʼe ajuda Ruth atu dala ruma serbí nuʼudar pioneiru estra. Haʼu hakarak duni atu kontinua halo buat sira-neʼe.”
16 Roy no Petina iha oan-feto ida neʼebé sei hela hamutuk ho sira, maski nuneʼe sira bele hamenus sira-nia oras serbisu nian atu bele hola parte iha serbisu haklaken ba tempu-tomak. Roy dehan: “Semana-semana haʼu halo serbisu ba loron tolu, no Petina serbisu ba loron rua. Liután neʼe, ami muda husi ami-nia uma hodi bá fali fatin neʼebé kiʼik liu, neʼebé fasil atu hamoos no tau matan. Uluk, antes ami-nia oan-mane no oan-feto moris mai, ami serbí nuʼudar pioneiru, no ami nafatin hanoin atu komesa fali serbisu neʼe. Tan neʼe, kuandu ami-nia oan sira sai boot, ami komesa fali atu halo serbisu haklaken ba tempu-tomak. Tuir loloos, osan la bele kompara ho bensaun neʼebé ami simu.”
Husik “Maromak dame nian” proteje ita-nia laran
17. Tanba ita la hatene buat neʼebé sei akontese aban, oinsá mak Bíblia fó kmaan ba ita?
17 Ita hotu la hatene buat neʼebé sei akontese aban, tanba “tempu no akontesimentu neʼebé mosu derrepente deʼit” monu ba ita hotu. (Ecle 9:11) Maski nuneʼe, ita la hanesan ho ema neʼebé hanoin resin kona-ba aban, tanba ita sente seguru hodi iha relasaun neʼebé besik ho Maromak. (Mt 6:34) Apóstolu Paulo hatete: “Imi keta laran-taridu kona-ba buat ruma. Iha buat hotu, harohan no hamulak bá hodi fó-agradese; hatoʼo imi-nia harohan ba Maromak. Nuneʼe, Maromak dame nian sei rai hela imi-nia fuan no laran iha Kristu Jesus.”—Flp 4:6, 7.
18, 19. Iha dalan saida deʼit mak Maromak fó kmaan mai ita? Konta toʼok ezemplu ida.
18 Irmaun-irmán barak neʼebé hasoru situasaun susar simu ona Maromak Jeová nia ajuda hodi sente dame iha laran. Irmán ida dehan: “Doutór koko beibeik atu halo haʼu taʼuk hodi haʼu bele simu transfuzaun raan nian. Duké kumprimenta haʼu, buat primeiru neʼebé nia hatete mak: ‘Sé mak hasai ideia bulak neʼe kona-ba la simu raan?’ Iha tempu neʼe, no mós iha tempu seluk, haʼu halo orasaun iha laran ba Maromak Jeová, no nia halo haʼu sente kmaan iha laran. Haʼu sente haʼu hanesan fatuk ida neʼebé metin. Maski haʼu kole loos tanba raan menus, maibé haʼu bele esplika haʼu-nia fiar ho klaru tuir Bíblia.”
19 Dala ruma Maromak haraik tulun liuhusi maluk fiar-naʼin, ka nia ajuda ita hodi fó ai-han espirituál neʼebé ita simu iha tempu neʼebé loos. Karik ita rona ona irmaun ka irmán ida hatete: “Informasaun neʼe mak buat neʼebé haʼu presiza duni. Ida-neʼe hanesan hakerek kona-ba haʼu-nia situasaun rasik!” Sin, maski ita hasoru situasaun naran deʼit, maibé se ita tau fiar ba Maromak Jeová, nia sei hatudu ninia domin mai ita. Tuir loloos, ita mak ninia “bibi” no nia hili ita nuʼudar povu ida ba ninia naran.—Sal 100:3; Joao 10:16; Apos 15:14, 17.
20. Tanbasá mak ita sei hela ho seguru kuandu Maromak Jeová halakon Satanás nia mundu?
20 Durante “Jeová nia loron hirus nian” neʼebé besik daudauk ona, buat hotu iha Satanás nia mundu neʼe, neʼebé ema tau fiar, sei lakon hotu. Osan-mean, osan-mutin no buat seluk neʼebé folin-boot sei la fó protesaun. (Sof 1:18; Prov 11:4) Ita sei hetan protesaun iha Maromak deʼit, tanba nia mak nuʼudar ita-nia “Fatuk toʼo tempu neʼebé la bele sura”. (Isa 26:4) Entaun, agora mak tempu ba ita atu hatudu katak ita tau fiar tomak ba Maromak Jeová hodi laʼo tuir ninia dalan neʼebé loos, hodi haklaken lia-foun diʼak kona-ba Maromak nia Ukun maski ema lakohi rona ita ka kontra ita, no hodi saran ita-nia laran-taridu ba nia. Nuʼudar ita hakaʼas an atu halo buat sira-neʼe, ita sei “hela ho seguru no sei la hanoin resin kona-ba taʼuk ba susar”.—Prov 1:33.
[Nota–rodapé]
^ par. 6 Salmo 78:40: “Dala hira ona mak sira kontra nia iha rai-fuik maran, sira hakanek nia laran iha rai-fuik maran! 41 Dala barak sira koko Maromak, no sira hakanek Ida neʼebé Santu ba Israel.”
^ par. 11 Salmo 62:8: “Oh, povu, tau fiar ba nia iha tempu hotu. Iha nia oin fakar sai imi-nia laran. Maromak mak fatin protesaun ba ita.”
Ita bele hatán?
Oinsá mak ita bele tau fiar ba Maromak
• kuandu hasoru tentasaun atu halo sala?
• kuandu ema lakohi rona ka kontra ita?
• kuandu hasoru laran-susar?
[Pergunta estudu nian]
[Dezeñu iha pájina 13]
Halo tuir Maromak nia matadalan sei fó moris neʼebé kontente
[Dezeñu iha pájina 15]
“Jeová mak Fatuk toʼo tempu neʼebé la bele sura”
