Halo desizaun neʼebé lori hahiʼi ba Maromak
Halo desizaun neʼebé lori hahiʼi ba Maromak
“Ema neʼebé matenek hanoin uluk kona-ba nia hakat sira.”—PROV 14:15.
1, 2. (a) Iha ita-nia desizaun hotu, saida mak ita hakarak hanoin? (b) Ita sei koʼalia kona-ba pergunta saida deʼit?
ITA hotu hatene katak loron-loron ita presiza halo desizaun oioin. Desizaun balu ladún importante. Maibé, desizaun balu fali importante tebes tanba ida-neʼe bele lori rezultadu diʼak ka aat ba ita-nia moris. Tan neʼe, iha ita-nia desizaun hotu neʼebé ita foti, maski kiʼik ka boot, ita hakarak hanoin liuliu kona-ba oinsá desizaun sira-neʼe sei ajuda ita atu hahiʼi Maromak.—Lee 1 Korinto 10:31.
2 Ita sente katak fasil ba ita atu halo desizaun, ka ita sente katak neʼe mak buat neʼebé susar? Se ita hakarak atu sai ema kristaun ida neʼebé laʼo ba oin iha lia-loos, ita tenke aprende atu hatene buat neʼebé diʼak husi buat neʼebé aat, depois neʼe ita foti desizaun tuir buat neʼebé ita fiar mak loos, laʼós tuir deʼit ema seluk nia hanoin. (Rom 12:1, 2; Ebr 5:14) Saida mak razaun seluk tan atu aprende kona-ba halo desizaun neʼebé diʼak? Tanbasá mak dala ruma susar atu halo desizaun neʼebé diʼak? Hakat saida deʼit mak ita presiza halo atu nuneʼe desizaun neʼebé ita foti bele lori hahiʼi ba Maromak?
Tanbasá presiza halo desizaun?
3. Ita labele husik saida atu hanetik ita atu halo desizaun?
3 Se ita laran-rua kona-ba halo tuir Bíblia nia matadalan, ita-nia maluk iha eskola ka serbisufatin karik bele hanoin katak ita ladún iha fiar neʼebé metin, no tan neʼe fasil ba sira atu book ita atu halo tuir deʼit sira. Sira karik halo hahalok aat hanesan bosok, lohi ka naʼok, no sira koko atu book ita atu halo buat neʼebé hanesan, ka karik sira hakarak ita atu la fó sai sira-nia sala. (Êx 23:2) Maibé, ema neʼebé hatene atu halo desizaun neʼebé lori hahiʼi ba Maromak sei la husik hakarak atu ema simu nia ka taʼuk ba ema book nia halo hahalok neʼebé kontra nia konxiénsia ka laran neʼebé hetan ona treinu husi Bíblia.—Rom 13:5.
4. Tanbasá mak ema balu karik hakarak atu halo desizaun ba ita?
4 Klaru katak dala ruma ema hakarak halo desizaun ba ita tanba sira hanoin kona-ba ita-nia diʼak. Porezemplu, karik kolega balu hakarak ita atu halo tuir sira-nia konsellu. Maski ita la hela hamutuk ona ho inan-aman, maibé karik ita-nia família hanoin ita no hakarak nafatin envolve an ho desizaun neʼebé ita rasik tenke halo. Hanoin toʼok kona-ba halo desizaun atu hetan tratamentu saúde nian. Bíblia esplika ho klaru katak labele uza raan. (Apos 15:28, 29) Maibé, Bíblia la esplika matadalan hotu kona-ba tratamentu saúde nian, no tan neʼe dala ruma ita rasik presiza halo desizaun atu simu ka la simu tratamentu balu. * Iha situasaun hanesan neʼe, karik ita-nia família hakarak duni atu ita halo tuir sira-nia desizaun. Maibé, kuandu halo desizaun kona-ba buat sira-neʼe, ema kristaun ida-idak tenke “lori nia todan rasik”. (Gal 6:4, 5) Buat neʼebé importante liu mak ita hakarak atu nafatin iha laran neʼebé moos iha Maromak nia oin, laʼós atu halo ema kontente.—1 Tim 1:5.
5. Saida mak ita bele halo atu la halo rahun ita-nia fiar?
5 Laran-rua kona-ba halo desizaun bele lori perigu mai ita. Dixípulu Tiago hakerek katak ema neʼebé laran-rua “namlele iha buat neʼebé nia halo”. (Tgo 1:7, 8) Hanesan ema iha ró neʼebé la iha ai atu hean iha tasi boot nia klaran, ema neʼe nia hanoin mós sei muda bá muda mai hodi tuir deʼit ema seluk nia hanoin. Fasil ba ema hanesan neʼe atu halo rahun ninia fiar no depois neʼe karik nia duun fali ema seluk kona-ba ninia situasaun susar neʼe! (1 Tim 1:19) Saida mak ita bele halo atu ida-neʼe labele akontese ba ita? Ita tenke ‘sai makaʼas liután iha ita-nia fiar’. (Lee Koloso 2:6, 7.) Atubele sai makaʼas ka metin liután iha ita-nia fiar, ita presiza aprende atu halo desizaun sira neʼebé haleno fiar ba Maromak nia Liafuan. (2 Tim 3:14-17) Maibé, saida mak bele hanetik ita atu halo desizaun neʼebé diʼak?
Tanbasá dala ruma susar atu halo desizaun?
6. Oinsá mak sente taʼuk bele kona desizaun neʼebé ita halo?
6 Sente taʼuk atu halo desizaun neʼebé sala, ka taʼuk atu ema seluk haree ita nuʼudar ema beik, bele hanetik ita atu halo desizaun ruma. Tuir loloos, dala ruma ita hotu bele sente hanesan neʼe. Ita hotu lakohi atu halo desizaun neʼebé sala, neʼebé bele hamosu susar ba ita-nia an ka halo ita moe. Maski nuneʼe, domin ba Maromak no ba ninia Liafuan bele ajuda ita atu hamenus ita-nia taʼuk. Iha dalan saida? Domin ba Maromak bele book ita atu sempre buka matadalan iha ninia Liafuan no iha ita-nia livru sira neʼebé esplika kona-ba Bíblia antes ita halo desizaun importante ruma. Hodi halo nuneʼe, ita bele hadook an husi halo desizaun neʼebé sala. Oinsá? Bíblia bele “fó matenek ba ema neʼebé la iha esperiénsia, [no] fó koñesimentu no kbiit atu hanoin ba ema joven”.—Prov 1:4.
7. Liurai David nia ezemplu hanorin ita saida?
7 Ita nunka halo desizaun neʼebé sala ka lae? Lae duni! Ita hotu dala ruma halo desizaun neʼebé sala. (Rom 3:23) Porezemplu, Liurai David mak ema neʼebé matenek no laran-metin. Maibé, dala ruma nia halo desizaun neʼebé sala, no ida-neʼe lori susar ba ninia an rasik no mós ba ema seluk. (2 Sam 12:9-12) Maski nuneʼe, nia nunka husik ninia sala atu halo nia sente laran-rua kona-ba halo desizaun ruma neʼebé kona ninia relasaun ho Maromak. (1 Reis 15:4, 5) Karik uluk ita mós halo desizaun neʼebé sala, maibé hanesan ho David, ita bele kontinua halo desizaun neʼebé ajuda ita atu serbí Maromak hodi hanoin-hetan katak Maromak Jeová sei fó perdua mai ita no sei haluha ita-nia sala. Maromak sei kontinua atu apoia sira neʼebé hadomi no halo tuir nia.—Sal 51:1-4, 7-10.
8. Saida mak ita aprende husi apóstolu Paulo nia liafuan kona-ba kaben?
8 Tuir loloos, ita bele hamenus ita-nia laransusar kona-ba halo desizaun. Oinsá? Hodi hanoin katak kuandu ita halo desizaun, dala ruma iha dalan balu neʼebé loos atu hasoru situasaun ida. Hanoin toʼok buat neʼebé apóstolu Paulo esplika kona-ba kaben. Maromak haleno nia hodi dehan: “Oras neʼe, kona-ba sira neʼebé la kaben, . . . haʼu fó sai haʼu-nia hanoin . . . Haʼu hanoin katak iha susar laran ohin loron nian, diʼak duni ba ema ida atu hela hanesan ohin [ka la kaben]. Maibé ó hola feto karik, ó la sala ida, nuneʼe mós, feto neʼebé la iha laʼen la sala wainhira nia hola mane.” (1 Kor 7:25, 26, 28) Paulo fó sai katak kontinua moris nuʼudar ema neʼebé la kaben mak dalan neʼebé diʼak liu, maibé klaru katak la sala mós atu kaben.
9. Ita presiza hanoin kona-ba oinsá ema seluk haree ita-nia desizaun ka lae? Esplika toʼok.
9 Ita presiza hanoin kona-ba oinsá ema seluk haree desizaun neʼebé ita halo ka lae? Dala ruma diʼak atu halo ida-neʼe. Haree toʼok saida mak Paulo hatete kona-ba han ai-han ruma neʼebé karik hasaʼe ona nuʼudar sakrifísiu ba lulik. Nia hatene katak halo desizaun atu han ai-han sira-neʼe la sala, maibé desizaun neʼe karik bele hakanek ema seluk nia laran. Saida mak Paulo deside atu halo? Nia hakerek: “Neʼe duni, ai-han halo haʼu-nia maun-alin sala karik, haʼu sei la han naʼan liután, atu haʼu labele lori haʼu-nia maun-alin ba sala.” (1 Kor 8:4-13) Ita mós presiza hanoin kona-ba oinsá mak ita-nia desizaun sei kona ema seluk nia laran. Maibé, buat neʼebé importante liu mak ita presiza hanoin kona-ba oinsá desizaun neʼebé ita halo kona ita-nia relasaun ho Maromak Jeová nuʼudar belun. (Lee Roma 14:1-4.) Entaun, Bíblia nia matadalan saida deʼit mak sei ajuda ita atu halo desizaun neʼebé lori hahiʼi ba Maromak?
Hakat neen atu halo desizaun diʼak
10, 11. (a) Saida mak bele ajuda ita atu la sai foti-an iha família laran? (b) Katuas kristaun sira presiza hanoin kona-ba saida kuandu halo desizaun ba kongregasaun?
10 Labele sai foti-an hodi hadau ema seluk nia direitu atu halo desizaun. Antes halo desizaun ruma, ita presiza husu ba ita-nia an: ‘Haʼu iha duni direitu atu halo desizaun neʼe ka lae?’ Liurai Salomão hatete: “Oinsá se ema sai foti-an? Se nuneʼe nia sei hetan moe; maibé matenek hela ho ema haraik-an.”—Prov 11:2.
11 Inan-aman bele fó oportunidade ba oan sira atu halo rasik desizaun balu, maibé oan sira la bele sente katak sira bele hadau inan-aman nia direitu atu halo desizaun. (Kol 3:20) Maski feen ka inan sira bele halo desizaun balu iha família laran, maibé sira presiza rekoñese katak laʼen mak sira-nia ulun. (Prov 1:8; 31:10-18; Ef 5:23) Nuneʼe mós, laʼen sira presiza rekoñese katak sira presiza hakruʼuk an ba Kristu nuʼudar sira-nia ulun. (1 Kor 11:3) Maski katuas kristaun sira halo desizaun ba kongregasaun, maibé sira “labele bá liu fali buat neʼebé hakerek nanis” iha Maromak nia Liafuan. (1 Kor 4:6) Sira mós presiza halo tuir matadalan neʼebé sira simu husi atan laran-metin no matenek. (Mt 24:45-47) Se ita halo desizaun ho haraik-an bainhira ita iha duni direitu atu halo ida-neʼe, ita no mós ema seluk bele hasees an husi susar barak.
12. (a) Tanbasá mak ita tenke buka informasaun liután? (b) Esplika toʼok oinsá mak ita bele buka informasaun liután.
12 Buka informasaun liután. Salomão hatete: “Ema badinas nia planu sira sei hetan rezultadu neʼebé diʼak, maibé ema sira neʼebé ansi sei kuran buat neʼebé sira presiza.” (Prov 21:5) Porezemplu, agora daudauk ita hanoin atu harii negósiu ruma ka lae? Keta husik ita-nia sentimentu kontrola ita. Buka informasaun liután no buka konsellu husi ema neʼebé iha esperiénsia ona kona-ba negósiu neʼe, no mós hanoin kona-ba Bíblia nia matadalan neʼebé kona situasaun neʼe. (Prov 20:18) Halo lista rua, ida kona-ba buat diʼak neʼebé ita bele hetan husi negósiu neʼe, no ida seluk kona-ba susar saida deʼit neʼebé bele mosu hodi halo negósiu neʼe. Antes halo desizaun, diʼak atu “tuur uluklai atu sura buat neʼebé kuran”. (Lc 14:28) Sin, ita presiza hanoin didiʼak kona-ba oinsá ita-nia desizaun neʼe bele kona ita-nia situasaun ekonomia nian no mós ita-nia relasaun ho Maromak Jeová. Klaru katak ita presiza uza tempu barak no presiza hakaʼas an atu buka informasaun. Maibé hodi halo ida-neʼe, bele ajuda ita atu la halo desizaun neʼebé lori susar no estrese.
13. (a) Tiago 1:5 ajuda ita atu fiar kona-ba saida? (b) Oinsá mak harohan hodi husu matenek bele ajuda ita?
13 Harohan hodi husu matenek. Ita-nia desizaun sei lori hahiʼi ba Maromak se ita husu nia atu ajuda ita atu halo desizaun neʼe. Dixípulu Tiago hatete: “Imi ida kuran matenek karik, nia sei husu Maromak bá. Nia sei fó ba ema hotu-hotu ho laran-luak hodi la siʼak, no ema neʼe sei hetan matenek.” (Tgo 1:5) Sin, diʼak atu rekoñese katak ita presiza Maromak nia matenek atubele ajuda ita atu halo desizaun ruma. (Prov 3:5, 6) Klaru katak se ita sadere deʼit ba ita-nia matenek rasik, ida-neʼe bele halo ita laʼo sala dalan. Kuandu ita halo orasaun hodi husu matenek no buka tan informasaun iha Maromak nia Liafuan, neʼe hatudu katak ita husik espíritu santu atu ajuda ita atu hatene kona-ba tansá ita hakarak halo buat ruma.—Ebr 4:12; lee Tiago 1:22-25.
14. Tanbasá mak importante atu ita la demora atu halo desizaun?
14 Halo desizaun. Keta ansi atu halo desizaun ruma! Ulukliu, ita presiza buka informasaun liután no halo orasaun atu husu matenek. Ema neʼebé matenek uza tempu atu “hanoin uluk kona-ba nia hakat sira”. (Prov 14:15) Maibé, keta demora atu halo desizaun. Ema neʼebé hein kleur atu halo desizaun, karik ikusmai buka razaun oioin atu la halo buat neʼebé nia presiza atu halo. (Prov 22:13) Tuir loloos, ema neʼebé demora atu halo desizaun, neʼe hanesan nia deside atu husik ema seluk mak kontrola ninia moris.
15, 16. Halo tuir ita-nia desizaun envolve saida?
15 Halo tuir desizaun neʼebé ita foti. Tempu neʼebé ita uza atu foti desizaun sei sai saugati deʼit se ita la hakaʼas an atu halo tuir desizaun neʼe. Salomão hatete: “Buat hotu neʼebé ó-nia liman bele halo, halo ida-neʼe ho ó-nia kbiit tomak.” (Ecle 9:10) Atu hetan susesu, ita tenke prontu atu uza buat hotu neʼebé ita iha hodi halo tuir ita-nia desizaun. Porezemplu, karik haklaken-naʼin ida foti desizaun atu serbí nuʼudar pioneiru. Nia bele hetan susesu ka lae? Nia bele, se nia la husik ninia serbisu atu manán osan no halimar oioin atu halakon ninia forsa no tempu neʼebé nia presiza atu halo serbisu haklaken.
16 Dala barak, susar atu halo tuir desizaun diʼak neʼebé ita foti. Tanbasá? Tanba “mundu tomak sei iha aat-naʼin nia ukun”. (1 Joao 5:19) Ita “la halo funu hasoru ema deʼit” maibé mós ho anju aat sira. (Ef 6:12) Apóstolu Paulo no mós dixípulu Judas hatudu katak ema neʼebé halo desizaun atu hahiʼi Maromak, sira presiza hakaʼas an atu halo funu fiar nian.—1 Tim 6:12; Jud 3.
17. Kona-ba desizaun neʼebé ita halo, Maromak Jeová hakarak ita atu halo saida?
17 Hanoin didiʼak fali kona-ba ita-nia desizaun no hadiʼa se presiza. Laʼós desizaun hotu neʼebé ita halo sei sai loos tuir buat neʼebé ita planu ona. “Tempu no akontesimentu neʼebé mosu derrepente deʼit” monu ba ema hotu. (Ecle 9:11) Maski nuneʼe, Maromak Jeová hakarak ita atu halo tuir nafatin desizaun balu neʼebé ita foti ona maski hasoru susar oioin. Kuandu ema ida halo desizaun atu dedika ninia an ba Maromak Jeová, desizaun neʼe tenke halo tuir nafatin, nuneʼe mós ho juramentu kaben nian. Maromak hein atu ita halo tuir ita-nia desizaun sira-neʼe. (Lee Salmo 15:1, 2, 4. *) Maibé, desizaun barak neʼebé ita halo karik ladún importante hanesan neʼe. Tan neʼe, husi tempu ba tempu, ema neʼebé matenek sei hanoin didiʼak fali kona-ba desizaun neʼebé nia halo ona. Nia sei la husik hahalok foti-an atu hapara nia hodi hadiʼa ka troka ninia desizaun se presiza. (Prov 16:18) Buat neʼebé importante liu ba nia mak nia hakarak atu halaʼo nia moris iha dalan neʼebé lori hahiʼi ba Maromak.
Hanorin ema seluk atu halo desizaun neʼebé hahiʼi Maromak
18. Oinsá mak inan-aman bele hanorin sira-nia oan atu halo desizaun neʼebé diʼak?
18 Inan-aman sira bele halo buat oioin atu ajuda sira-nia oan kona-ba oinsá halo desizaun neʼebé lori hahiʼi ba Maromak. Hatudu ezemplu diʼak mak dalan furak liu hotu atu hanorin. (Lc 6:40) Kuandu iha oportunidade, inan-aman bele esplika ba sira-nia oan kona-ba oinsá inan-aman rasik halo desizaun ruma. Inan-aman mós karik bele husik sira-nia oan atu halo rasik desizaun balu, no gaba sira kuandu sira halo tuir sira-nia desizaun ho didiʼak. Maibé, oinsá se oan halo desizaun neʼebé ladún diʼak? Baibain inan-aman barak hakarak atu proteje sira-nia oan husi rezultadu aat neʼebé mosu tanba oan nia desizaun. Maibé, halo ida-neʼe karik sei la ajuda oan atu aprende buat ida. Porezemplu, karik inan-aman husik oan ida atu hetan karta-kondusaun atu kaer motór ka karreta. Maibé, hanoin toʼok se oan neʼe kontra lei ruma no presiza atu selu osan ruma nuʼudar multa. Karik inan-aman bele selu osan neʼe, maibé se inan-aman husik oan atu halo serbisu ruma atu selu fali osan neʼe, karik nia sei aprende katak nia presiza simu rezultadu husi buat neʼebé nia halo.—Rom 13:4.
19. Saida mak ita presiza hanorin ba ita-nia estudante Bíblia nian? Oinsá mak ita bele halo ida-neʼe?
19 Jesus haruka ninia dixípulu sira atu hanorin ema seluk. (Mt 28:20) Buat importante ida neʼebé ita bele hanorin ba ita-nia estudante Bíblia mak kona-ba oinsá atu halo desizaun neʼebé diʼak. Atu halo ida-neʼe, ita labele fó-hatene deʼit ba sira desizaun saida mak sira presiza halo. Buat neʼebé diʼak liu mak hanorin sira atu hanoin kona-ba Bíblia nia matadalan, hodi nuneʼe sira bele halo desizaun rasik. Tuir loloos, “ita ida-ida sei hatán kona-ba nia an ba Maromak”. (Rom 14:12) Tan neʼe, importante ba ita hotu atu hakaʼas an hodi halo desizaun neʼebé lori hahiʼi ba Maromak.
[Nota–rodapé]
^ par. 4 Atu hetan informasaun liután kona-ba neʼe, haree livru “Hela Nafatin iha Maromak nia Domin”, pájina 77-79 no 215-218.
^ par. 17 Salmo 15:1: “Oh, Jeová, sé mak sei sai bainaka iha Ita-nia tenda? Sé mak sei hela iha Ita-nia foho santu? 2 Ema neʼebé la laʼo iha dalan neʼebé laloos no halo hahalok neʼebé loos no hatete lia-loos iha nia laran. 4 Iha ninia matan, nia la simu duni ema neʼebé aat, maibé nia hatudu respeitu ba sira neʼebé taʼuk Jeová. Maski ninia promete aat ba nia an, maibé nia la muda.”
Oinsá ita hatán?
• Tanbasá mak ita presiza aprende atu halo desizaun?
• Oinsá mak sente taʼuk bele kona ita-nia desizaun sira? Saida mak ita bele halo kona-ba neʼe?
• Hakat neen saida mak bele ajuda ita atu halo desizaun neʼebé lori hahiʼi ba Maromak?
[Pergunta estudu nian]
[Kaixa/Dezeñu iha pájina 16]
Hakat sira atu halo desizaun neʼebé diʼak
1 Labele sai foti-an
2 Buka informasaun liután
3 Harohan hodi husu matenek
4 Halo desizaun
5 Halo tuir desizaun neʼebé ita foti
6 Hanoin didiʼak fali no hadiʼa
[Dezeñu iha pájina 15]
Ema neʼebé laran-rua kona-ba halo desizaun mak hanesan ema iha ró neʼebé la iha ai atu hean iha tasi boot nia klaran
